Apocalipsis 14:6 - Buglere

⁶ Kaire cha gwagedu lle boanga Chube alin gdaitedi ji chienga ngaña tangle, ama kledu chage Chube gerua chui tangle dale kwian jwangda siere ji chuge age me no gdale ole, ama kledu chage geru e dbe ketadale kwian ulita toinga nga dba gitige kwian chudalla nga ulitamuge gerunga kwira na ulitamulege, ama ulitage lle boanga Chube alin kledu Chube gerua e kete.

Apocalipsis 14:6 ပူးပေါင်းရင်းမြစ်များ

Mateo 10:27

Cha kle Chube gerua kete ba alinge sugekare kwian na ulitage, ba geru e tragale kwian ulita gwa giti. Ba kle geru keruchuge chage sugekare kwian na ulitage, ba me ta kennga geru e kete kwian na ulitage una kaire kairege.

Marcos 16:15

Jesu ka bo ene kwian geru jwannga amage gdataboko giti gdaite ole gire Jesu gerudu dare ama ole: —Ba jogedale nga ulitage Chube gerua no cha giti kete kwian na ulitage.

Romanos 16:25

Cha kle ba jige Chube kote, ama ñage ba kira gbe mo ta gbe kiraske diali geru uliage cha ba tku tangle kare Jesucristo giti. Chube me boi, ama chege gwade diali chui tangle, unsuialin Chube kwian tanre Chube gerua ketanga ta gbu chada dege be boi Jesucristo ole giti, boidu ene ulita Chube kwian ta gbu mo gerua dege kare. Ngeru Chube nga dodaduge Chube mo ta gbu Jesucristo kage nga dba ai giti kwian jwanle siere ji chugege age me no gdale, geru e chegu ogaba kare skwlenre ba kwian me israelitage, agwa nege geru e chku uñale bage kaire kwian na nga ulitage, ene kwian nga ulitage ñage mo ta gbe Chube gai ulia mo Chubeale Jesucristo giti age Chube takalin kare.

Colosenses 1:23

Ba ta chegekalin diali Chube ole mo tale Chube skatemanallale, ba mo ta gbadale gwangerugu Cristo gerua gai jumale mo tale diali ni joge siere geru ege. Ba tañachugadale diali Chube be age bdagli ba alin giti. Chube gerua Cristo giti jo ketaba bage ba geru e gau ulia, geru sugedu bage chui bdagli Chube be age no ba alin. Geru ai amaña Cristo giti jo ketaba kwian nga na ulitamuge nga dba ai giti, geru ai amaña cha Pablo kle kwian tke tangle giti.

2 Tesalonicenses 2:16

Che Ñenua Chube ama noare che ole, diali ama kle age no che alin, Chube che ta gbe, ene uñale chege Chube be che manade chui diali dale alin be age no che alin Jesucristo giti ama gerudu be age kare. Cha takalin Chube che Ñenua ule Jesucristo che Chugagwalla ole ba ulita ta gbe dare nga suga no ole ba kle boi daga ngwale Chube gerua gdale giti. Kaire cha takalin Chube ba kira gbe me kennga gerule no ulita Jesucristo giti kwian na ole age no ulita daba na alin Chube takalin kare.

Hebreos 13:20

Ulia che Chugagwalla Jesucristo mo ketu gwaleda kwian jwen siere ji chugege age me no gdale, gire Jesucristo jokeda giti Chube geru jagere gbu egdage kwian ole chui diali dale alin. Jesucristo jokeda Chube Jesucristo gbu chkeni gwade, nege Jesucristo kle che manade no salengwli kwian bda oveja mananga no kle mo ta gbe oveja manade no kare, Jesucristo che mananga no ama kiraske kweri no trate ama kle tañachuge che giti diali. Cha takalin Chube ta suga no mauña agali ba ta gbe suga no ba ta gbe biale no trate age diali Chube takalin kare, kaire cha takalin Chube age che ulita tale ama takalin kare Jesucristo giti gire ene che ulita ñage age ulita Chube takalin kare Jesucristo kirallaske, ene Chubedi nga be suga no che ulita giti. Cha gerule no Jesucristo giti noare Jesucristo chege kweri kwian ulita gwa giti kwian ulita ama gai dage no Chugagwallale kweri chui tangle. Ene nobi.

1 Pedro 1:25

Agwa Chube gerua me boi, Chube gerua jage diali chui tangle.” Chube gerua e geru Cristo kwian jwannga siere giti, geru e amaña Cristo giti jo tragaba ba ulita ole.

Apocalipsis 10:11

Kaire agwe gerudre cha ole ene: “Ba geru na dbadale nakwaite kwiange Chube be age giti kwian nga tanremu ole kwian chudalla kwira tanremu ole kaire daba chugagwalla nga ulitamu ole. Chube be age kwian e ulita ole giti ba gerudale.” Gerudre ene cha ole ulita.

Apocalipsis 13:7

Kaire lle gude chadale karege jo kira ketaba age me no mo tke dole kira bate kwian Chubenu ulita toinga nga dba giti ole ama kirachke batre kare, kaire ama chegu kwian chudalla ulita nga ulitamuge kwian gerule kwira na tanrere ulita chugagwallale.

Apocalipsis 3:10

Ba ulita kle mo ta gbe age diali cha takalin kare ba ulita kle mo ta gbe jage ta no ole ba kle boi daga ngwaleske, malen cha be ba ulita manade no be boi tirage nga ulitage nga dba ai giti, cha mi ba chuge ngwadi boi daga ngwale kwian na me cha gerua gaba be boi kare, cha be boi daga ngwale gbe kwian ene ulita ta chugagda, ene be chke nate uñale kwian ene ulita kwian mine.

Apocalipsis 5:9

Kwian mangire batre ulita kledu ne ngwadi ama ulita mo gatu biale geru no jagere giti Bda Cordero alin ene: “Cha ulita no ba ole. Ba ulia no trate malen ba ñage chada e gai kote lle chada gatagda gdaguke jwennga. Ba jo boaba daga ngwale gwabada kwian agedu me no giti. Ba boidu daga ngwale ba jokeda kruge kwian ulita alin ene kwian ulita ba gai ulia ñage chege Chubenu, ba agedu ene kwian chudalla ulita alin kaire kwian gerunga kwira ulita alin kaire kwian toinga nga ulitage alin. Ene ba jokeda giti kwian ulita ñage Chube uñe.

Apocalipsis 8:13

Bigire cha gwagedu mu kweria gbaitedi ji chienga nga ngaña giti sui jwennga kweri kwian be boi giti, mu e gerudu kiraske: “Ay, ay, ay, cha tai dage kwian nga dba giti ulitage. Lle boanga Chube alin na gdamai ulita be ngwane trompetage gdaite gdaite gire be boi tirare ulita nga dba giti.”