Chube cha kagu nga dba ai giti kwian kare, chui bdaglige cha be chieni nakwaite cha Ñenua Chube kirallaske, cha be chieni ule lle boanga Chube alin nga ngaña giti ngle ole. Chui ege cha be gerule kwian bai jiske Chube gwa giti kwian bai me jiske Chube gwa giti. Kwian bai agedu me no Chube dollale, kwian ene jiske Chube gwa giti, cha be kwian ene ulita gbe ji chuge agedu me no kbiale. Kwian bai agedu no Chube takalin kare cha mi kwian ene gbe jiske Chube gwa giti, cha be age no ama ulita alin ama agedu no trate Chube takalin kare ñanale.
1 Pedro 4:13 - Buglere13 Ba boi daga ngwaleske ba mo ta gbadale suga no, sugedale bage Cristo boidu daga ngwale kaire, ene kaire ba amanu boidale daga ngwale, ba mo ta gbe suga no boi daga ngwaleske nege nga dba ai giti, ene kaire nga be suga no no badi Cristo chieni chuiage, chui ege Cristo be chkeni mo kiralla giti, gire be suge ba ulitage Cristo no Cristo kweri. အခန်းကိုကြည့်ပါ။ |
1 Pedro 4:13
35 ပူးပေါင်းရင်းမြစ်များ
Kwian lle boanga gerudu ene gire chugagwalla gerudu ama ole: “Ba kwian lle boanga no ulia, ba mo ta gbu lle boi no cha alin, ba agedu no no. Cha igi ketu bage, igi e ole ba lle bo no cha alin, ba igi na gau ngle cha alin. Ba lle bo no cha alin igi e ole, malen nege cha be lle ma kweri kete bage boadale cha alin. Nga suga no chadi ba lle bo no cha alin giti, bai cha ole chui ollade nga suga no ole.” Chugagwalla gerudu ene kwian lle boanga ngeru ole.
Kwian lle boanga gerudu ene gire chugagwalla gerudu ama ole: “Kaire agwe ba kwian lle boanga no ulia, ba mo ta gbu lle boi no cha alin, ba agedu no no. Cha igi ketu bage, igi e ole ba lle bo no cha alin, ba igi na gau ngle cha alin. Ba lle bo no cha alin igi e giti, malen nege cha be lle na ma kweri kete bage boadale cha alin. Nga suga no chadi ba lle bo no cha alin giti, bai cha ole chui ollade nga suga no ole.” Chugagwalla gerudu ene kwian lle boanga e ole.
Jesu gerudu dare kwian geru jwannga amage ulita ole: —Chube nu cha kagaba nga dba ai giti kwian kare, ama be cha kageni nabitaite kira kweri molen kwian ulita Chugagwallale. Cha chieni chuiage lle boanga Chube alin nga ngaña giti ngle be chie ule cha ole mo litaba chadi tangle, chui ege cha be gerule kwian ulita giti nga ulitage kwian bai Chube gerua gau ulia kwian bai me Chube gerua gau ulia.
Cha kwian ulita Chugagwalla be gerule kwian cha ko taingwli ngnagu ole: “Bai cha ole ba mangire batre Chube gerua gau ulia, cha Ñenua Chube no no ba ole ama age no ba alin diali. Nege nga no lle no kle dodaba ba alin nga ngaña giti Chube kle ngwadi, Chube nga ulita lle ulita dodadu unsuialin gwangerutabi gire ama nga dodadubi ama kle ngwadi ba mangire batre ngwange.
Cha gerule ba ole, Chube cha kagu nga dba ai giti kwian kare chui bdaglige cha be chieni nakwaite cha Ñenua Chube kiralla giti, cha be chieni ule lle boanga Chube alin nga ngaña giti ngle ole. Kwian nege tangle bai kaire cha gai ulia agwa ama ibule cha giti cha gerua giti kwian agenga me no me cha gerua gaba ngeru, kwian ene ole nga chie ibule amage gerule ama cha gai ulia. Kwian bai ibule ene cha giti nege, kwian ene giti cha mi gerule no cha be chieni chuiage, chui ege cha mi gerule ama giti ama chanu.
Ene kaire cha be chieni chuiage kwian tanre be kle toi age kwian unsuialin suia toi age Noé chuiage tangle kare, kwian tanre be kle toi age kwian unsuialin suia toi age Lot chuiage tangle kare, kwian ene ulita mi kle tañachuge be boi giti, be kle toi age me no tanre, gire chui ege sugeti ngwale cha be chieni, kwian ene ulita be chege boi daga ngwale tanre diali, mi ñage tien gitiru boi tirarege.
Kwian Jesu gerua ketanga ulita jo siere chugagwalla ulitage, kwian Jesu gerua ketangadi nga chiu suga no ama ulitadi, ama ulita gerudu modi: —Che alin noare Chube che ulita gbu boidale daga ngwale ene Jesu gerua giti. Chubege uñale che mi Jesu gerua mlienga mo tale, che mo ta gbe suga no diali geru Jesu giti dbe, che ulita mi ka chite gerule Jesu giti.
Nga suga no chedi me chui e manade alin giti, kaire nga suga no chedi che kle boi nege giti, nege che kle boi daga ngwale Jesucristo gai ulia giti kwian me Jesucristo gaba ulia kote, uñale chege boi daga ngwale giti che mo kira gbaleda ma no boi daga ngwale na darege, ene bdagli che boi daga ngwale tanre che mi tallade, che be mo ta gbe jage boi daga ngwale ulitage.
Che Chube olia, malen Chube age no che alin Chube age no mo Kirolla Cristo alin kare, Cristo kle toi nga ngaña giti Chube kle ngwadi, kaire bdagli che ulita Chube olia be toi diali chui tangle Cristo ole nga ngaña giti Chube kle ngwadi. Cristo boidu tanre daga ngwale nga dba ai giti, che kaire boi daga ngwale nga dba ai giti Cristo gerua giti, che me talladale, bdagli che be kle ule Cristo ole nga ngaña giti, Chube be gerule no che giti Chube gerule no mo Kirolla Cristo giti kare.
Ulia che kle boi daga ngwale Jesucristo gerua giti nga dba ai giti, e sugeti alin me salengwli che be kle ule Jesucristo ole kare, malen cha me tañachuge tanre boi daga ngwale giti. Ma no diali cha kle tañachuge chui be chie giti gire che be kle ule Jesucristo ole diali chui tangle nga ngaña giti Chube kle ngwadi, chui ege che mi boi daga ngwale dare, che be kle no ulita Jesucristo ole.
Geru chku uñale chage ba ulita giti ba kle boi daga ngwale Cristo gerua dbe giti, e giti chke uñale chage ba kle mo ta gbe no Cristo ole, kaire boi daga ngwaleske Chube kle ba chudaboi ba ta gbe nga suga no ole ene ba kle ñage ta chege kiraske Cristo geruage diali, e giti nga suga no chadi ba ulita giti.
Baini kaire cha joge ngwadi cha chage gwangerugu geru Jesu giti dbe, geru dbe ene giti diali kwian ta cha gwakalinda, agwa cha me kle tañachuge tanre e giti, cha tañachuge Jesu giti, Jesu bole ene kaire, cha takalin kwian tanre Jesu uñe cha giti malen cha kle mo ta gbe chage gwangerugu geru Jesu giti trage kwian ole me tañachuge kwian kle age giti cha ole.
Nege toi nga dba ai giti boi daga ngwaleske cha kle tañachuge diali bdagli giti cha be joge toi nga ngaña giti Chube kle ngwadige, tañachuge e giti cha kira gbeda jage boi daga ngwaleske nga dba ai giti, uñale chage cha kle boi daga ngwale nege e me chege diali, e be joge tangle, malen suge chage e sugeti alin. Agwa cha joge toi nga ngaña giti gire cha be joge siere boi daga ngwale ulita nga dba ai gitige, nga ngaña giti cha be toi no diali nga suga no ole chui tangle Chube ole, e me joge tangle, e chege diali cha alin.
Geru Cristo giti cha kle dbe kwiange, e gdale cha kle boi daga ngwale Cristo gerudu gwangeabi kwian ama gerua ganga be boi kare. Agwa kaire chadi nga suga no cha kle boi daga ngwale giti ba ulita Cristo gerua ganga ulia alin. Chage suge cha kle mo boange daga ngwale Cristo gerua gdale Cristo bole kare che ulita ama gerua ganga alin, ene che ulita ñage chege ama jegwalenu kare kwaitre alin.
Chube agedu no tanre ba ulita alin Jesucristo giti malen ba mo ta gbadale biale tañachuge no ulita Chube takalin kare, ba me mo chugadale ngwadi tañachuge age me no, ba mo ta gbadale tañachuge diali Jesucristo chieni ba jwenni giti, ba kledale chui e manade diali nga suga no ole, chui ege Jesucristo be ba dbe nga ngaña giti Chube kle ngwadi, nga ngaña giti Chube be age no no ulita ba alin.
Ba boidale daga ngwale age no giti Cristo agedu kare, Cristo chagedu nga dba ai giti ama boidu tanre daga ngwale age no giti ba ulita alin, e chegu egdage ba ulita alin ba ulita mo ta gbadale ene Cristo agedu kare, ama no kwian ole ama mo ta gbu age no diali kwian ole boi daga ngwaleske nga dba ai giti, ama agedu ene ba ulita alin, ene chkedale uñale bage ba ulita mo ta gbadale Cristo mo ta gbu kare.
Chube no no ba ulita ole, ta ene ole ama ba ulita gau mo alin Jesucristo giti, Jesucristo giti chui bdaglige ba ulita be kle ule Chube ole diali chui tangle nga ngaña giti, agwa nege nga dba ai giti ba boi daga ngwale sugeti, boi daga ngwaleske Chube agali be ba ta gbe ma trate ma kiraske ngerugu, ene diali ba ta be chege Chube ole, ene ba mi mo ta blite che dolla Satanás ole.
Chube che ulita amanu jun siere ji chugege che agedu me no gdale che Chugagwalla Jesucristo giti, Chube e amaña ba chudaboi ba kira gbe ba manade, ene ba me joge siere amage age me no ba takalin kare, ene ba kle biale joge toi ule ama ole ama kle ngwadi ta no trate nga suga no ole. Chube no no, Chube kweri, Chube kira molen kweri, Chube kiralla me jwlite, Chube kiralla unsuialin, Chube kiralla amaña nege, kaire Chube kiralla amaña chege gwangerugu chui tangle. Che ulita amanu gerudale no ama giti diali. Ene nobi. Geru ai ene ulita cha Judas chada degu ba kwian Chubenu ulita alin. Che kle meni.
Cha gerule ulia ba ole, Jesucristo be chieni bogakwaskeni nga dba ai giti gire kwian ulita be gwage amadi, kwian bai agedu Jesucristo dollale Jesucristo guda Jesucristo kledu nga dba ai giti gire, kwian e kaire be gwage Jesucristodi chieni. Kwian nga ulitamu nga dba ai giti be nga dbe suga olire modi chru ole kennga Jesucristo chuia be chke gire. Ai ulia be boi ulita cha kle gerule kare. Ene nobi.
Che ulita Jesucristo gau mo Chugagwallale gire ene Jesucristo giti che ulita Chubenu. Cha Juan ba daballa Jesucristo giti kaire agwe kle boi daga ngwale ba ulita Chubenu kle boi kare Jesucristo gerua gai gdale. Jesucristo kle kira kete che ulitage ene che ñage jage boi daga ngwaleske, ene che ñage chege ta no ole che kle boi ulita tanre daga ngwalege. Jesucristo cha ta gbu geru ulia Chubenu giti gire cha Jesucristo gerua du gdale cha dule skadi ngadrega bleske ka jwankle Patmoge.
ကြော်ငြာတွေ