1 Juan 1:2 - Buglere

² Gwangeabi Jesucristo klebi enebi mo Ñenua Chube ole nga ngaña giti, bigire Jesucristo chku nga dba ai giti kwian kare toi kwianske, cha ulita gwagedu Jesucristodi age no kwianske kwian alin, cha kle geru e trage kwian ole, kaire cha ba ulita ta gbe chke ama giti kaire ama agedu giti. Cha gerule ba ole, Jesucristo giti che be toi no diali chui tangle ama ole kaire Chube ole nga ngaña giti.

1 Juan 1:2 ပူးပေါင်းရင်းမြစ်များ

Juan 1:18

Ni kwian gdaite nu gwageba Chubedi, Chube Kirolla alin giti kwian Chube uñe, Chube Kirolla gdaitre alin ama kaire Chube, ama talla kle ule diali mo Ñenua ole.

Juan 1:4

Cristo alin giti lle ulita gwade kwian ulita gwade. Ama kwian ta gbe suge kwian chagedale mine Chube takalin kare, ama jichra kare kwian ulita alin, ama kwian ta gbe suge salengwli jichra kle kwian gbe ten nga jereske kare.

Juan 10:28

Cha kwian ene gbe toi diali chui tangle Chube ole, ama mi chege sugekare Chubege ji chuge, kwian ene chanu diali, ni kwian me no gdaite ni dolla ñage kwian chanu jwennga cha ngeru.

Juan 14:6

Jesu jaindunga: —Cha agali jonkare kwian ulita alin, cha giti alin allabi kwian ñage joge chke cha Ñenua ngwadi, cha giti geru ulia cha Ñenua giti chke uñale kwiange, kaire cha giti kwian ñage toi diali chui tangle cha Ñenua ole.

Juan 16:28

Cha kledu cha Ñenua ole gire cha chiu cha chku nga dba ai giti, nege cha be joge siere nga dba ai gitige, cha be jogeni naskuni cha Ñenua ngwadi.

Juan 17:3

Kwian ba gadale Chube gdaitre alin ulia, kaire kwian cha gadale ulia ba Kirolla Jesucristo, ba cha kagu nga dba ai giti, kwian cha uñe ene kaire kwian ba uñe, e giti kwian toi diali chui tangle.

Juan 17:5

Cha Ñenua, nege cha be jogeni ba ngwadi, cha takalin ba cha gbeni naskuni kweri cha kledu ba ole unsuialin nga ulita bebi dodadale gire cha kledu ba ole, cha klekalinni naskuni eni ba ole.

Juan 19:35

Cha Juan chada ai deganga, boidu ulita Jesu ole cha gwagedudi mo gwagwa giti, cha kle gerule ulia cha gwagedudi, chage uñale trate ulia cha gwagedudi boidu ene ulia, ene ba ulita bai kaire chada ai batenga cha kle gerule giti ba ulita geru ai gai ulia.

Juan 21:14

Jesu chkebani gwade, ai bitamaikedale Jesu medu kwian geru jwannga ulitage.

Juan 3:13

Ni kwian gdaite nga dba ai giti jo nga ngaña giti Chube kle ngwadi gire chiuni nga dba ai giti geru kete kwian ulitage Chube giti, cha alin allabi kledu nga ngaña giti chiu nga dba ai giti gerule kwian ole Chube giti, cha ama Kirolla, ama cha kagu nga dba ai giti kwian kare.

Juan 7:29

cha ama uñe trate, cha chiu ama ngwadi, ama cha kagu.

Juan 8:38

Cha kle gerule ba ulita ole cha Ñenua cha tku tangle kare, agwa ba ulita kle mo ñenua keruchuge ba kle age ama ba tku tangle kare ama kle gerule kare.

Hechos 10:41

Ama me mo kaitu kwian ulitage, ama mo kaitu cha ulita chagedu ama olege. Boidu ene Chube agali cha ulita gbu biale chage Jesu ole ene cháge chege tragale uñale Jesu agedu ulita giti. Ama meduni gwadeni cha ulitage gire cha ulita blidu ule ama ole cha ulita chi jau ule ama ole.

Hechos 2:32

Gire Jesu amaña chku nga dba ai giti, Jesu guleda, Chube Jesu gbuni gwade. Cha ulita chagedu modi Jesu ole ama chagedu ama boidu uñale cha ulitage, ulia boidu David chada degu unsuialin gerule kare.

Hechos 3:15

gire ba ulita Jesu chugu ngwadi gwadaleda. Jesu alin allabi giti che toi diali chui tangle, ba ulita ama guda agwa Chube ama jaba gbuni gwade naskuni. E ulia cha kle gerule kare ba ole, cha ulita gwagedu mo gwagwa giti Jesudi boi ene ulita.

Hechos 5:32

Ulita Jesu boidu mine uñale cha ulitage kaire Chube Oñage uñale Jesu boidu mine, Chube mo Oña kete kwian ulitage bai mo ta gbe Chube gai dage age Chube takalin kare —Pedro gerudu ene kwian chugagwalla ulita ole.

Romanos 8:3

Che kwian, che agali gballa me ñadu age ulita Moisés nu Chube gerua degaba gerule kare, malen che chegu jiske Chube gwage, geru degaba me ñadu che jwen siere ji chugege che agedu me no gdale. Chube mo Kirolla Jesucristo kagu nga dba ai giti kwian kare, ene Jesucristo ñadu kwian age me no ulita dbe mo ole llagli jogedaleda, Jesucristo jokeda giti ene che me chege jiske Chube gwage.

Gálatas 4:4

Che kledu ene gire Chube chui gbaba unsuialin chuia chku Chube mo Kirolla kagu cheske, Chube Kirolla medunga muinga kote nga dba ai giti kwian israelitaske, Chube Kirolla mo ta gbu age ulita Moisés chadalla gerule kare.

1 Timoteo 3:16

Ulia Chube geru noare ketu chege, geru e kweri che alin, geru e gerule Jesucristo giti: Jesucristo chku nga dba ai giti kwian kare. Chube Oña giti chku uñale kwiange Jesucristo agedu no trate ulita nga dba ai giti. Lle boanga Chube alin nga ngaña giti gwagedu Jesucristodi age no ulita. Geru Jesucristo giti no chagedu nga ulitage, kwian nga ulitage geru e keruchugu, kwian nga ulitage gweale geru Jesucristo giti gau ulia. Chube Jesucristo duni nga ngaña giti, Chube Jesucristo gbuni Chube kle ngwadi. Ulia geru e noare, geru ulia, kwian Chubenu ulita geru e manadale no.

2 Timoteo 1:10

Nege chku uñale chege ulia Chube agedu no kwian ulita alin, ama Jesucristo kagu nga dba ai giti kwian ulita alin, Jesucristo che jwannga siere. Ngeru kwian ulitage jogeda giti ama kennga, nege Jesucristo giti kwian me ta dbadale kennga jogeda giti, kwian geru Jesucristo giti gai ulia, geru e giti chke uñale kwiange ama toi diali chui tangle Chube ole, bdagli ama mi jogeda dare.

Tito 1:2

kaire kwiange chke uñale chui be chke gire kwian Chubenu ulita be toi diali chui tangle Chube ngwadi Chube ole, kwian Chubenu ulita kle chui e manade. Ngeru ngeru Chube bebi nga dba ai ulita dodade Chube bebi kwian dodade gire Chube gerudu: “Kwian ulita bai cha gai ulia be toi diali chui tangle cha ole.” Chube gerudu ene, Chube me sodu, Chube gerule ulia diali.

1 Pedro 5:1

Nege cha gerule ba daba Chubenu chugagwalla ulita ole, cha daba Chubenu chugagwalla ba ulita kare. Cha gwagedu mo gwagwa giti Cristodi ji chuge dagale nga dba ai giti, Cristo chieni chuiage che ulita be gwage Cristodi ule, chui ege che ulita be joge toi ule ama ole nga ngaña giti.

1 Juan 1:1

Cha chada ai dege Jesucristo giti ba ulita Chubenu alin: Jesucristo klebi enebi Chube nga ulita lle ulita kwian ulita dodadu gwangeabi gire, Jesucristo kwian ta gbanga toi Chube ole, Jesucristo giti cha kle chada ai dege ba ulita Chubenu alin. Chube Jesucristo kagu toi nga dba ai giti kwianske geru gbagda chke uñale kwiange Jesucristo giti kwian ñage toi ule Chube ole diali chui tangle. Jesucristo chku nga dba ai giti, cha ulita geru jwannga amage chagedu ama ole ule cha ama keruchugu gerule mo olodi agali kaire cha ulita gwagedu agali mo gwagwa giti amadi age no kwianske, kaire cha ulita agali ama gau kodi, cha ulitage sugedu Chube ama kagu nga dba ai giti kwian kare, ama chagedu kwian kare nga dba ai giti, ama giti cha kle chada ai dege ba ulita ta gbagda.

1 Juan 2:25

Jesucristo agali gerudu che ulita amanu mo ta gbale chege ene ule ama ole kaire Chube ole, ene che ulita amanu be toi chui tangle diali Chube ole.

1 Juan 3:5

Agwa bage ulita uñale Jesucristo ni agenga me no sidri, ama no trate agenga no diali, ama chku nga dba ai giti che agenga me no ta blite ama ole talla me no jwennga siere chege, ama giti che tien gitiru ji chugege age me no gdale. Jesucristo no trate ulita,

1 Juan 3:8

Agwa kwian bai kaire kle age me no diali ama kle tañachuge kare, kwian ene che dolla Satanánu, che dolla Satanás agedu me no gwangeabi kaire kle age diali, malen Chube Kirolla Jesucristo chku kwianske nga dba ai giti, ama chku kirachke che dolla Satanádi ene che dolla Satanás me chege age ulita Satanás takalin kare.

1 Juan 4:14

Cha ulita gwagedu mo gwagwa giti Jesucristodi nga dba ai giti, cha chagedu ama ole ule, cha ulitage sugedu trate Chube Jesucristo Ñenua Chube ama kagu nga dba ai giti kwian ulita jwanngale siere ji chugege age me no gdale, ene kwian ñage toi Chube ole.

1 Juan 4:2

Ba kwian ulita ta chugaleda ama kle chage geru Chube giti ulia trate dbe Chube Oña kirallaske o me, ba kwian ta chugaleda ene: Kwian bai kaire gerule ulia Chube Kirolla Jesucristo chku nga dba ai giti kwian kare, kwian ene ulia kle gerule Chube talla giti, Chube Oña kle kwian ene tale.

1 Juan 5:11

Ai geru ulia Jesucristo giti che ulita alin: Chube che gbe toi diali chui tangle ama ole che Chube Kirolla Jesucristo gai ulia giti.

1 Juan 5:13

Cha kle chada ai dege ba ulita alin bai kaire Chube Kirolla gai ulia mo Chugagwallale, ene suge trate bage ba ulita Chube Kirolla gaba ulia giti ba be toi diali chui tangle Chube ole nga ngaña giti.

1 Juan 5:20

Che ulitage uñale trate Jesucristo Chube Kirolla chiu nga dba ai giti che alin, ama che ta gbu suge trate Chube mine, Jesucristo giti che Chube ulia uñe, Jesucristo giti suge trate chege Chube e Chube ulia. Chube Kirolla Jesucristo giti che Chubenu kaire che Jesucristonu, Jesucristo giti che be toi diali chui tangle Chube ole Jesucristo ole nga ngaña giti.