1 Juan 1:1 - Buglere

¹ Cha chada ai dege Jesucristo giti ba ulita Chubenu alin: Jesucristo klebi enebi Chube nga ulita lle ulita kwian ulita dodadu gwangeabi gire, Jesucristo kwian ta gbanga toi Chube ole, Jesucristo giti cha kle chada ai dege ba ulita Chubenu alin. Chube Jesucristo kagu toi nga dba ai giti kwianske geru gbagda chke uñale kwiange Jesucristo giti kwian ñage toi ule Chube ole diali chui tangle. Jesucristo chku nga dba ai giti, cha ulita geru jwannga amage chagedu ama ole ule cha ama keruchugu gerule mo olodi agali kaire cha ulita gwagedu agali mo gwagwa giti amadi age no kwianske, kaire cha ulita agali ama gau kodi, cha ulitage sugedu Chube ama kagu nga dba ai giti kwian kare, ama chagedu kwian kare nga dba ai giti, ama giti cha kle chada ai dege ba ulita ta gbagda.

1 Juan 1:1 ပူးပေါင်းရင်းမြစ်များ

Juan 19:35

Cha Juan chada ai deganga, boidu ulita Jesu ole cha gwagedudi mo gwagwa giti, cha kle gerule ulia cha gwagedudi, chage uñale trate ulia cha gwagedudi boidu ene ulia, ene ba ulita bai kaire chada ai batenga cha kle gerule giti ba ulita geru ai gai ulia.

Juan 20:27

Jesu gbi kadu ene gire gerudu Tomás ole: —Tomás, kobara chúge aini cha koge clavo taneage, kaire ba ko du aini ko chuge cha jigwaru tangle jo dagaba taneage, ba me tañachugadale cha me chkuni gwade, mo ta gbége cha gai cha chkuni gwade ulia, ba me tañachugale cha me chkuni gwade.

Juan 5:26

Cha Ñenua ta gwade agali molen malen ama kwian gbanga gwade, ene kaire cha ama Kirolla ama cha gbu ta gwade mauña, cha ñage age cha Ñenua age ulita kare, cha ñage kwian jogebada jaba gbeni gwade, kaire kwian me Chube uñe kle chage jogebada kare cha ñage kwian ene ta blite Chube ole, ene kwian toi chui tangle diali cha ole cha Ñenua ole.

Juan 8:58

Jesu gerudu: —Cha gerule ulia ulia ba ulita ole, cha gwagedu Abrahamdi Abraham gwagedu chadi, Abraham bebi menga chebia kote gire cha klebi enebi ngeru Abrahamge.

Hechos 1:3

Jesu jokeda kruge, ama jaba chkuni gwade kledu gwadeni gire Jesu mo kaitu kwian geru jwannga gdataboko giti gdaite ulitage, kwian e ulita gwagedu Jesudi gwadeni, kwian e ulita gwa giti Jesu ageduni no tanre chke gda uñale ulia amaña kle gwadeni. Jesu chegu toi dare nga dba ai giti chui cuarenta, e suiage tangle Jesu medu bitangle kwian geru jwannga amage ulitage, diali Jesu gerudu ama ole Chube takalin kwian ulita Chube gerua Jesu giti uñe ene kwian ñage mo ta blite Chube ole Chube gai ulia mo Chugagwallale.

Hechos 4:20

Cha me ñage chege kamne me gerule sidri Jesu agedu no giti, cha me ñage age ene. Mo gwagwa giti cha gwagedu amadi age no ulita kaire mo ologe cha ama keruchugu gerule no ulita, e giti cha me ñage chege kamne, cha geru e ulita tragadale kwian na ole.

Hebreos 2:3

Nege tangle Chube gerua no ma kiraske Jesucristo giti jo ketaba chege che jwangda siere ji chugege age me no gdale. ¿Agwa gire mineade che gweale kle tañachuge che be chege sugekare ji chugege, ji me joge gbaba tirare che giti kwian unsuialin tangle kare che me Jesucristo gerua e gai ulia giti? Che me ñage tañachuge ai kare ene. Kwian ulita bai kaire me kle Chube gerua Jesucristo giti gai ulia me kle geru Jesucristo giti tallade, kwian e kaire agwe ji chugadale kwian unsuialin tangle kare ama agedu me no gdale. Che Chugagwalla Jesucristo amañabi geru gbu gwangea kwian alin kwian ama gerua gai ulia mo tale gire Jesucristo giti kwian e tien gitiru ji chugege ama agedu me no gdale. Kwian ulita bai geru jun Jesucristoge Jesucristo kledu nga dba ai giti gire, kwian e giti geru chku uñale chege geru Jesucristonu geru no trate ulia.

1 Juan 4:14

Cha ulita gwagedu mo gwagwa giti Jesucristodi nga dba ai giti, cha chagedu ama ole ule, cha ulitage sugedu trate Chube Jesucristo Ñenua Chube ama kagu nga dba ai giti kwian ulita jwanngale siere ji chugege age me no gdale, ene kwian ñage toi Chube ole.

1 Juan 5:7

Geru gbamai kle Jesucristo kaite nate ulia Jesucristo Chube Kirolla, geru gbamai ai kle gerule ene: Bitaite Chube kerua sugedu kwiange gerule Jesucristo giti Jesucristo ñeange chiske chuiage kaire bitabokedale Chube gerudu Jesucristo giti Jesucristo kledu bedre jogekeda kruge gire, kaire bitamaidale Chube Oña kle kwian ta gbe suge Jesucristo ulia Chube Kirolla. Geru ai gbamai Jesucristo giti kle gerule salengwli Jesucristo kaite nate Jesucristo ulia Chube Kirolla.

Apocalipsis 1:11

Geru e sugedu chage gerule ene: “Ba Juan chada degadale chada giti lle ulita ba kle gwagedi nege kaire lle ulita ba be gwagedi dare ba degadale ulita. Ba chada e kagadale kwian Chubenu kle mo lite Chube geruadi mne gdaguke toinga una gdagukege nga kweri Asiage alin, ba chada kage kwian Chubenu una gdaguke ai kare alin: kwian Chubenu toinga una Efesoge, kwian Chubenu toinga una Esmirnage, kwian Chubenu toinga una Pérgamoge, kwian Chubenu toinga una Tiatirage, kwian Chubenu toinga una Sardige, kwian Chubenu toinga una Filadelfiage, kwian Chubenu toinga una Laodiceage. Kwian Chubenu una e ulita gdaguke alin ba chada degadale lle ulita ba kle gwagedige giti, ba chada dege ba kage kwian Chubenu una emu ulita alin.”

Apocalipsis 1:8

Chube che Chugagwalla kweri ama kiraske ama ñage age ulita, ama klebi lle ulita gwangeabi, kaire ama kle nege tangle be kle chui diali dale alin, Chube ai amaña kle gerule ene: “Cha Chube cha lle ulita Chugagwalla gwangea ngerutabi, kaire cha lle ulita Chugagwalla nege tangle, kaire cha be chege lle ulita Chugagwalla chui bdaglige diali chui tangle.” Chube kle gerule ene mau giti naskuni.

Apocalipsis 19:13

Kaire ama kledu chage ñometraske ñometra e kledu ulita bere. Ama kledu chage ka na dbe ka e kledu gerule ene: GERU ULIA CHUBENU.

Apocalipsis 2:8

Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Esmirnamu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: ‘Cha amaña lle ulita Chugagwalla gwangea ngerutabi kaire cha amaña be chege lle ulita Chugagwalla chui bdaglige diali chui tangle. Cha jokeda gire cha jaba chkuni gwade, nege cha kle gwade chui tangle diali. Cha amaña kle gerule ba ulita kle mo lite Chube geruadi una Esmirnage ole,