തീത്തോസു 2:15 - സാമി സേദി

¹⁵ ഈ കാര്യഗാള്‌ന നീ പഡിസി കൊഡുക്കുഡൊ. എല്ലാ അദിഗരത്തോഡ അവാര്‌ന ദയിരപഡുസുഡൊ, എല്ലാ അദിഗരത്തോഡ അവാര്‌ന നൊഡിഡൊ. നിനാന ബെലെ ഇല്ലത്തവാനായി കാണ്യ ആര്‌നാമ് ബ്‌ഡാദെ.

തീത്തോസു 2:15 ပူးပေါင်းရင်းမြစ်များ

മത്തായി 7:29

എന്ത്‌ക്കെന്റ് സൊന്ന അവാര്‌ത്ത് ബേദബാത്ത്യനാമ്‌ഗാള്‌ന പാസെ അല്ല, അദിഗരത്തോഡ ആയിന്ത്‌ദ് ഏസ്സ് അവാര്‌ക്ക് ബുദ്ദിനായ സൊന്നാദ്.

മര്‌ക്കോസു 1:22

അയാള് സൊന്ന ബുദ്ദിനായന കേ്ട്ട് ആള്‌ഗാള് അദിസ്യപട്ടാര്. ബേദബാത്ത്യനാമ്‌ഗാള്‌ന പാസെ അല്ല ഏസ്സ് ബുദ്ദിനായ സൊന്നാദ്; അദിഗരത്തോഡാത്തെ അയാള് ബുദ്ദിനായ സൊന്നാദ്.

മര്‌ക്കോസു 1:27

ഇദ്‌ന കണ്ട് അദ്‌ലിന്ത ആള്‌ഗാളൊട്ടുക്കു അദിസ്യപട്ടാര്: <<ഇദെന്ത്? ഒന്റു പുദ്യ ബുദ്ദിനായ; കെ്ട്ടജാദിഗാള്‌ക്ക് അയാള് അദിഗരത്തോഡ കല്‌പനെ കൊഡുക്കുന്റാന്. അയാള് സൊല്ലുവാദ്‌നെല്ല അയി ജാദി അദേപാസെ കേ്ള്‌ക്ക്‌ന്റ്>> എന്റ് തമാക്ക് തമാക്ക് സൊന്നാര്.

ലൂക്കോസു 4:36

അദുക്കുള അദ്‌ലിന്ത ആള്‌ഗാളൊട്ടുക്കു അദിസ്യപട്ടാര്. <<അവ്വോ! ഇദെന്ത്‌ക്കുള നായ? കെ്ട്ടജാദിഗാള്‌ക്ക് അയാള് അദിഗരത്തോഡാമ് സക്‌ത്യോഡാമ് കല്‌പനെ കൊഡുക്കുന്റാന്. അയാള് കല്‌പനെ കൊഡുക്കാട്ടി അയി ജാദിഗാള് ബ്‌ട്ട് പോന്റു>> എന്റ് തമാക്ക് തമാക്ക് സൊന്നാര്.

1 കൊരിന്ത്യഗാറാര് 16:11

അദ്‌നാലെ നിമ്മ ആര്‌മ് അയാള്‌ന ബെലെ ഇല്ലത്തവാനായി കണാക്കാക്കദേന്. അയാള് നിമ്മ്‌ദ്യായി എന്ന് പട്ട്‌ക്ക് ബന്ത് എജ്ജ്യ നിമ്മ അയാള്‌ന കയിതാങ്കുഡൊ. ബേ്റെ ഏസ്സ്‌ഗാറാരൊപ്പ അയാള് ബര്യ നാന് കാത്ത്‌കൊണ്ട് ഇര്‌ക്ക്‌ന്റെ.

1 തിമിത്തോസു 5:20

ഇത്തെ കുറ്റ ഗേന്തവാര്‌ന ഏസ്സ്‌ഗാറാര് മുന്നുക്കു ബെത്ത് താനെ നൊഡിഡൊ. അന്നാപ്പ്‌ത്തെ ബേ്റാള്‌ഗാള്‌മ് കുറ്റ ഗേയ അഞ്ചുവാര്.

2 തിമിത്തോസു 4:2

ആള്‌ഗാള്‌ക്ക് സാമി സൊല്ലുസുലാക്കന സൊല്ലി കൊഡുക്കുഡൊ. ഏദ് നേരാമ് ആള്‌ഗാള്‌ക്ക് നീ സാമി സൊല്ലുസുലാക്കന സൊല്ലി കൊഡുക്ക്യ ഒരുക്കത്തോഡ ഇര്‌ക്കുഡൊ. നീ പഡ്‌സ്‌ഗാട്ടി മ്‌ഗ്‌ന്ത പൊറിമോഡ ആള്‌ഗാള് ഗേവ കുറ്റഗാള്‌ന കാട്ടി കൊഡുക്കുഡൊ, ആള്‌ഗാള്‌ന നൊഡിഡൊ, ആള്‌ഗാള്‌ന ദയിരാമ് പഡുസുഡൊ.

തീത്തോസു 1:13

അയി ബുദ്ദിസാലിഗാറാന് സൊന്നാദ് നേര്‌ത്തെ. അദ്‌നാലെ അവാര്‌ന കാര്യമായി നൊഡിഡൊ. അന്നാപ്പ് അവാര് ഒറേപ്പായി നമ്പുവാര്.

1 പത്ത്‌റോസു 4:11

നായ സൊല്ല്യ ബര കെ്ഡേസ്‌നവാന് സാമി സൊല്ലുസുലാക്കാത്ത്‌ല് എന്ത്‌ന സൊല്ലിര്‌ക്ക്‌ന്റൊ അദ്‌ന താനെത്തെ സൊല്ലുഡൊ. അഡ്‌ത്തവാര്‌ക്ക് ഉവഗര ഗേയ ബര കെ്ഡേസ്‌നവാന് സാമി കൊഡുത്ത സക്‌തിക്ക് തഗ്‌ന്ത പാസെ ഗിലാസ ഗേഡൊ. അത്തെ നിമ്മ ഗേവ എന്ത് കാര്യഗാള്‌മ് അദ്‌ന ഗേയ കയിതാങ്കുവ ഏസ്സ് ക്‌റ്‌സ്‌ത്ത് പേര്‌ല് സാമി ദൊഡ്ഡവാന് ആഡൊ. സാമി എന്നാല്‌ക്ക്‌മ് പേര്‌പെരിമേമ് എല്ലാദ്‌നാമ് ആളുവ അദിഗരാമ് ഉള്ളവാന് ആയിര്‌ക്കുഡൊ. ആമേന്.