റോമഗാറാര് 4:9 - സാമി സേദി

⁹ ഇത്തെ കെ്ഡേക്കുവ ബാഗ്യന പറ്റി സൊല്ലുവ ഈ നായ പരിസേദനെ സാത്ത്‌റ ഗേന്ത എഗുദാര്‌ക്ക് താനെത്തേഗ? ഇല്ലെ, എഗുദാരല്ലാത്ത ജാദിഗാള്‌ക്ക്‌മ് ഗുഡിത്തേഗ? അവുറഗാമ് സാമിന നമ്പ്‌നാന് അദ്‌നാലെ സാമി അയാള്‌ന നേര്‌മെഗാറാനായി കണാക്കാക്ക്‌നാന് എന്റല്ല നമ്മ സൊല്ലി ബന്താദ്.

റോമഗാറാര് 4:9 ပူးပေါင်းရင်းမြစ်များ

ഗലാത്ത്യഗാറാര് 3:14

സാമി അവുറഗാമ്‌ക്ക് കൊഡുത്ത ബാക്ക്‌വരഗാള്‌ന ക്‌റ്‌സ്‌ത്ത് ഏസ്സ്‌നാലെ എല്ലാ ജാദിഗാള്‌ക്ക് കെ്ഡേക്ക്യ ബേ്ണ്ടിമ് സാമി കൊഡുക്കുന്റെ എന്റ് സൊല്ലിന്ത തന്ന് നിഗാല്‌ന നമ്മ നമ്പുവാദ്‌നാലെ കെ്ഡേസ്‌നവാരായ ബേ്ണ്ടിമ്‌ത്തെ ക്‌റ്‌സ്‌ത്ത് ഇത്തെ ഗേന്താദ്.

കൊലേസ്യഗാറാര് 3:11

അത്തെ അയാള് നാഡ്‌ല് എവന നാഡ്‌ഗാറാനൊ എഗുദാര് നാഡ്‌ഗാറാനൊ എന്നുവ ജാദി വിത്ത്യാസില്ലെ. പരിസേദനെ സാത്ത്‌റ ഗേന്തവാരൊ, പരിസേദനെ ഗേഗാത്തവാരൊ എന്നുവ മദ വിത്ത്യാസില്ലെ. പഡിത്തവാനൊ പഡിക്കത്തവാനൊ എന്നുവ അറുവു വിത്ത്യാസാമ് ഇല്ലെ. അഡിമേഗൊ മുദലാള്യൊ എന്നുവ സൊത്തു വിത്ത്യാസാമ് ഇല്ലെ. അദ്‌ല് എല്ലാര്‌ക്ക്‌മ് എല്ലാദ്‌ക്ക്‌മ് ഉജാന്തവനാന ക്‌റ്‌സ്‌ത്ത് താനെത്തെ ഇര്‌ക്കുവാന്.

എപസോസുഗാറാര് 3:8

ക്‌റ്‌സ്‌ത്ത്‌ന ബെത്ത് ഇന്നമാട്ട്‌ക്ക് സൊല്ലി തരാദിന്ത അയി അറുവു എത്ത്‌റ ദൊഡ്ഡാദ്? ക്‌റ്‌സ്‌ത്ത്‌ന ബെത്ത് സാമിക്ക് ബേ്ണ്ടി പ്‌റ്‌ത്ത് ബെത്ത്‌റ്‌ക്കുവ എഞ്ചോ ആള്‌ഗാള് കൂട്ടാത്ത്‌ല് നാന് ദൊഡ്ഡവാനല്ല. അത്തിന്ത് ഗുഡി അയി നല്ല സേദിന സൊല്ലുവ ഗിലാസാന ഗേയ സാമി എനാക്ക് പ്‌ണ്ണ്യ ഗേന്താന്.

റോമഗാറാര് 4:3

എന്ത്‌ക്കെന്റ് സൊന്ന, സാമി ബൊക്കുലു <<അവുറഗാമ് സാമിന നമ്പ്‌നാന്. അദ്‌നാലെ അയാള്‌ന നേര്‌മെഗാറാനായി സാമി കണാക്കാക്ക്‌നാന്>> എന്റ്‌ത്തെ എ്ള്‌ദിര്‌ക്ക്‌ന്റ്.

ലൂക്കോസു 2:32

അയാള് ഇസ്‌റവേല്‌ഗാറാര് ആയിര്‌ക്കുവ നിന്ന് ആള്‌ഗാള്‌ക്ക് മദ്‌പ്പ്‌മ് സാമി പിര്യാന കാണ്യ ബേ്ണ്ടി ബേ്റെ ജാദിഗാള്‌ക്ക് തന്ന് ബെ്ള്‌സാനാമ് കൊഡുക്കുവാന്.>>

റോമഗാറാര് 4:10

ഇത്തെ അയാള്‌ന നേര്‌മെഗാറാനായി എ്ഡ്‌ത്ത് ബെത്താദ് പരിസേദനെ സാത്ത്‌റ ഗേന്ത പ്‌റാഗൊ ഇല്ലെ പരിസേദനെ സാത്ത്‌റ ഗേഗാത്ത മുന്നുക്കൊ? പരിസേദനെ സാത്ത്‌റ ഗേഗാത്ത മുന്നുക്കുത്തെ.