റോമഗാറാര് 13:1 - സാമി സേദി

¹ എല്ലാ ആള്‌ഗാള്‌മ് അദിഗരഗാള്‌ക്ക് കെ്ട്ട്‌പട്ട് ഇര്‌ക്കുഡൊ. എന്ത്‌ക്കെന്റ് സൊന്ന, സാമി ബെക്കാത്ത ഒന്റു അദിഗരാമില്ലെ. ഇന്നാല് കണ്ട് ബരുവ അദിഗരഗാളെല്ല സാമി ബെത്ത അദിഗരഗാള്‌ത്തെ.

റോമഗാറാര് 13:1 ပူးပေါင်းရင်းမြစ်များ

മത്തായി 6:13

പാവ ഗേവ ആസേക്ക് എമാന സിക്ക്‌സാദെ കെ്ട്ടവാന് കയിലിന്ത് എമാന കാപാറ്റുഡോമെ. എന്ത്‌ക്കെന്റ് സൊന്ന എന്നാല്‌ക്ക്‌മ് എല്ലാ നാഡ്‌ന ആള്‌ന്റവാന്‌മ് മ്‌ഗ്‌ന്ത ബില ഇര്‌ക്ക്‌ന്റവാന്‌മ് മ്‌ഗ്‌ന്ത മദ്‌പ്പിര്‌ക്ക്‌ന്റവാന്‌മ് നീത്തെ, ആമേന്.>

ഓഗന്നാന് 19:11

അദ്‌ക്ക് ഏസ്സ്: <<സാമിലിന്ത് നിനാക്ക് അദിഗര കെ്ഡേക്കാദെ ഇന്തിന്തദാന നിനാക്ക് എനാന ഒന്റുമു ഗേയ മുഡ്യമാട്ടായിന്ത്‌ദ്. അദ്‌നാലെ എനാന നിന്ന് കയിക്ക് തന്തവാന് അദിഗ പാവ ഗേന്തവാന്‌ത്തെ>> എന്റ് സൊന്നാന്.

അപ്പോസുത്തലാര് 2:41

പത്ത്‌റോസു സൊന്ന സേദിന നമ്പ്‌നവാര് ഒട്ടുക്കു നീര്‌ക്ക് മുളുഗുനാര്. അയി നാള് താനെ ഒപ്പതപ്പ മൂണായിര ആള്‌ഗാള് അവാരൊപ്പ എ്ണേന്താര്.

റോമഗാറാര് 12:21

നിമാക്ക് ആരാറ്റ കെ്ട്ട കാര്യഗാള് ഗേന്തദാന അവാര്‌ക്ക് കെ്ട്ട കാര്യഗാള് ഗേയ പാങ്കില്ലെ, നല്ല കാര്യഗാള് ഗേന്ത് കൊഡുക്കുവാദ്‌ത്തെ നിമ്മ പെ്ളേപ്പ് ആയിര്‌ക്കുഡൊ.

റോമഗാറാര് 13:2

അദ്‌നാലെ അദിഗരാക്ക് ബണങ്കാത്തവാന് സാമി ബെത്ത അദിഗരാക്ക്ത്തെ ബണങ്കാദിര്‌ന്റാന്. അത്തെ ബണങ്കാത്തവാര് ദെ്ണ്ടണെ കെ്ഡേസുവാര്.

എപസോസുഗാറാര് 5:21

നിമ്മ ഇന്നാല് ക്‌റ്‌സ്‌ത്തോഡ എ്ണേന്ത് പെ്ളേക്കുവ പുദ്യ പെ്ളേപ്പ് എത്ത്‌റാഗോ ദൊഡ്ഡ പെ്ളേപ്പ് എന്റ് നെനേത്ത് ആങ്കീങ്ക് സൊല്ലുവ നായാക്ക് കെ്ട്ട്‌പട്ട് നഡാന്.

1 തിമിത്തോസു 2:2

മുക്ക്യമായി രാജാവുഗാള്‌ക്ക്‌മ്, എല്ലാ അദിഗാരിഗാള്‌ക്ക്‌മ് ബേ്ണ്ടി പരേസുഡൊ. അത്തെ പരേസ്‌നദാന നമാക്ക് നിമ്മ്‌ദ്യോഡാമ് അര്‌ക്കില്ലാദേമ് പെ്ളേക്ക്യ മുഡിമ്. അത്തെ നമാക്ക് സാമിക്ക് ബേ്ണ്ടി നലമായി പെ്ളേക്ക്യാമ് അഡ്‌ത്തവാരോഡ നല്ല ദിന്‌സ്‌ല് നഡാന്ത്‌പ്‌ഡിത്ത് ഗേയാമ് മുഡിമ്.

തീത്തോസു 3:1

സര്‌ക്കാര്‌ക്ക്‌മ് എല്ലാ സര്‌ക്കാര് അദിഗാരിഗാള്‌ക്ക്‌മ് കെ്ട്ട്‌പട്ട് ഇര്‌ക്കുഡൊ എന്റ്‌മ് അവാര് സൊല്ലു പേസ് കേ്ട്ട് ഏദ് നല്ല കാര്യ ഗേയാമ് ഒരിങ്കിര്‌ക്കുഡൊ എന്റ്‌മ് നിന്ന് ആള്‌ഗാള്‌ക്ക് സൊല്ലി കൊഡുക്കുഡൊ.

ജൂദാന് 1:8

എന്ത്‌ക്കെന്റ് സൊന്ന അവാര്‌ന പാസെത്തെ ഇവാര്‌മ് തമ്മ് പെ്ളേപ്പ്‌ന കെ്ഡിസി കൊണ്ടു തമ്മ കണ്ട കനേസ്‌ല്‌ഗാള്‌നാമ് തമ്മ കണ്ട കാര്യഗാള്‌നാമ് ദൊഡ്ഡ കാര്യ എന്റ് നെനേക്ക്‌ന്റാര്. സാമി അവാര്‌ക്ക് ബെത്ത്‌റ്‌ക്കുവ തലെവാര്‌ഗാള്‌നാമ് അയി തലെവാര്‌ഗാള് സൊല്ലുപഡിക്ക് ഇര്‌ക്കുവാദ്‌നാമ് അവാര് ദൊഡ്ഡാദെന്റ് നെനേക്കാദെ തമ്മ നല്ല മദിസി നഡാക്കുവ കാര്യഗാള്‌ന ബെലെ ഇല്ലാത്ത കാര്യഗാളെന്റ് സൊല്ലി നഡാക്ക്‌ന്റാര്.

ബെ്ളിപട്ട കാര്യ 17:14

അവാര് കൊറ്യാഡ് കുട്ട്യോഡ ജുദ്ദ ഗേവാര്. ആന കൊറ്യാഡ് കുട്ടി അവാര്‌ന സോലുസുവാന്. എന്ത്‌ക്കെന്റ് സൊന്ന അയാള് ആണ്ട്‌റ്‌ന്റവാര്‌ഗാള്‌ക്ക് ആണ്ടവാന്‌മ് രാജാവുഗാള്‌ക്ക് രാജാവുമുത്തെ. അയാളോഡ ഇര്‌ക്ക്‌ന്റവാര് സാമി ബ്‌ളിത്തവാര്‌മ് തെരിന്തെ്ഡ്‌ത്തവാര്‌മ് നമ്പ്യ മുഡിന്റവാര്‌മ്‌ത്തെ>> എന്റ് സൊന്നാന്.

ബെ്ളിപട്ട കാര്യ 19:16

രാജാവുഗാള്‌ക്ക് രാജാവുമു ആണ്ട്‌റ്‌ന്റവാര്‌ഗാള്‌ക്ക് ആണ്ടവാന്‌മ് എന്നുവ പേര് അയാള് ഉഡുപ്പുലുമു തൊഡേല്‌മ് എ്ള്‌ദിര്‌ക്ക്‌ന്റ്.