റോമഗാറാര് 12:18 - സാമി സേദി

¹⁸ മുഡിന്തളാവുക്കു നിമ്മ എല്ലാ ആള്‌ഗാളോഡമ് പിര്യപിര്യാത്ത്‌റ്‌ന്.

റോമഗാറാര് 12:18 ပူးပေါင်းရင်းမြစ်များ

എവുറായാര് 12:14

എല്ലാവാരോഡാമ് പിര്യപിര്യാത്തിന്ത് പെ്ളേക്ക്യ ഓരാഡ്‌ന്. സാമിക്ക് ബേ്ണ്ടി ഒന്റേപെ്ട്ട് അലാക്ക പ്‌റ്‌ത്ത് ബെത്തവാരായി പെ്ളേന്. അത്തെ പെ്ളേക്കാദെ പോന ആണ്ടവാന്‌ന കാണമാട്ടാമ്.

റോമഗാറാര് 14:19

അദ്‌നാലെ പിര്യപിര്യാത്തോഡ ഇര്‌ക്കുവ കാര്യഗാള് ഗേയ ബേ്ണ്ടിമ് നമ്മ് കൂട്ടാത്ത്‌ലവാര്‌ക്ക് ഇര്‌ക്കുവ നമ്പിക്കേന ആങ്കീങ്ക് ഒറേപ്പ് മാഡുവ കാര്യഗാള് ഗേയ ബേ്ണ്ടിമ് നിമ്മ ഓരാഡ്‌ന്.

മത്തായി 5:9

അഡ്‌ത്തവാര്‌ന സമദന മാഡി പെ്ളേക്ക്യ ബെക്ക്‌ന്റവാര് ബാഗ്യകേ്ട്ടവാര്. എന്ത്‌ക്കെന്റ് സൊന്ന അവാര്‌ക്ക് സാമിപ്‌ള്ളെഗാള് എന്നുവ പേര് കെ്ഡേക്ക്‌മ്.

2 കൊരിന്ത്യഗാറാര് 13:11

ഏസ്സ്‌ഗാറാരെ, നാന് ഈ എ്ള്‌ത്ത് എ്ള്‌ദി മുഡിക്കുവ സമ്യാത്ത്‌ല് നാന് നിമാക്ക് സൊല്ലുവാദ് എന്തെന്റ് സൊന്ന, നിമ്മ പിര്യപഡ്‌ന്, നിമ്മ് നമ്പിക്കേല് മ്‌ഗ്‌ന്തവാര് ആയ നിമ്മ ഓരാഡ്‌ന്, നിമ്മ ആങ്കീങ്ക് ദയിര സൊല്ലി നഡാന്, ഒന്റേ മനേസ്സോഡ ഇര്‌ന്, പിര്യപിര്യാത്തോഡ പെ്ളേന്, സീവാന്‌മ് നിമ്മ്‌ദിമ് ഉള്ള സാമി നിമ്മോഡ ഇര്‌ക്കുവാന്.

ഗലാത്ത്യഗാറാര് 5:22

ആന സാമിനിഗാല് സൊല്ലുക്കു കെ്ട്ട്‌പട്ട് നഡാക്ക്‌ന്റ്‌വാര് പളാക്കഗാള്: അവാര് സീവാനിര്‌ക്ക്‌ന്റവാര്‌മ്, പിര്യപിര്യാത്ത് ഇര്‌ക്ക്‌ന്റവാര്‌മ്, നിമ്മ്‌ദ്യോഡ ഇര്‌ക്ക്‌ന്റവാര്‌മ്, പൊറിമുള്ളവാര്‌മ്, ഗവപഡ്‌ന്റവാര്‌മ്, ഉവഗര ഗേന്റവാര്‌മ്, നമ്പ്യ മുഡിന്റവാര്‌മ്,

മര്‌ക്കോസു 9:50

ഉപ്പു നല്ലാദ്‌ത്തെ. ആന ഉപ്പുക്കിര്‌ക്കുവ ഗുണ ഇല്ലാദ്യാന പിന്നെ എത്തെ അദ്‌ക്കിര്‌ക്കുവ ഗുണ മാഡ്യ മുഡിമ്? അദ്‌നാലെ നിമ്മ ഉപ്പുന പാസെ ആങ്കീങ്ക് പിര്യപിര്യാത്ത്‌റ്‌ന്.>>

1 പത്ത്‌റോസു 3:11

അയാള് കെ്ട്ട കാര്യഗാള് ഗേഗാദെ നല്ല കാര്യഗാള് ഗേഡൊ. അഡ്‌ത്തവാരോഡ പിര്യപിര്യാത്തിന്ത് അദേപാസെ താനെ പിര്യാത്തിര്‌ക്ക്യ അയാള് ഓരാഡി കൊണ്ട്‌റ്‌ക്കുഡൊ.

2 തിമിത്തോസു 2:22

അദ്‌നാലെ ബാലിവെഗളിഗേല് ഗേയ ആസെപഡുവ എല്ലാ കെ്ട്ട കാര്യഗാള്‌നാമ് ബ്‌ട്ട്‌തള്ള്. എന്റിന്ത് നല്ല മനേസ്സോഡ ആണ്ടവാന്‌ന നെനേത്ത് പരേസ്‌ന്റവാരോഡ നീയിമ് എ്ണേന്ത് നേരാന കാര്യഗാള് ഗേന്ത്, എല്ലാവാര്‌ക്ക്‌മ് നമ്പ്യ മുഡിന്റവാനായിമ്, അഡ്‌ത്തവാരോഡ സീവാന്‌ബെത്ത്‌മ് നിമ്മ്‌ദ്യോഡാമ് പെ്ളേക്ക്യ നോഡുഡൊ.

റോമഗാറാര് 14:17

എന്ത് തിന്റാമ് എന്ത് കുഡിക്ക്‌ന്റാമ് എന്നുവാദല്ല സാമി ആളുവ നാഡ്‌ല് മുക്ക്യമാന കാര്യ. അദ്‌ക്ക് ബദ്‌ല നേര്‌മോഡ പെ്ളേക്കുവാദ്‌മ് നിമ്മ്‌ദ്യോഡ പെ്ളേക്കുവാദ്‌മ് സാമിനിഗാല് തരുവ പിര്യാത്ത്‌ല് പെ്ളേക്കുവാദ്‌മ്‌ത്തെ മുക്ക്യമാന കാര്യ.

1 തെസെലോനിക്ക്യഗാറാര് 5:13

അവാര് നിമാക്ക് ബേ്ണ്ടി പാഡ്‌പഡുവാദ്‌ന നെനേത്ത് മ്‌ഗ്‌ന്ത സീവാന്‌ബെത്ത് അവാര്‌ന മദിസി നഡാന് എന്റ് എമ്മ നിമാന ബേ്ണ്ടി കൊള്ളുന്റേമ്. നിമ്മ ആങ്കീങ്ക് പിര്യപിര്യാത്തോഡ ഇര്‌ന്.

എപസോസുഗാറാര് 4:3

നിമ്മ ആങ്കീങ്ക് പിര്യരിമോഡ ഇന്ത് ഒന്റായി പെ്ളേക്ക്യ സാമിനിഗാല് നിമാന കയിതാങ്ക്‌ന്റാന് എന്റ് സൊക്കാന കണ്ട് പെ്ളേന്.

മത്തായി 5:5

തണിമോഡ നഡാന്ത്‌പ്‌ഡിത്ത് ഗേന്റവാര് ബാഗ്യകേ്ട്ടവാര്, എന്ത്‌ക്കെന്റ് സൊന്ന അവാര് ബൂമിന തമ്മ് കയിക്ക് മാഡുവാര്.

1 കൊരിന്ത്യഗാറാര് 7:15

ആന ഏസ്സ്‌ന നമ്പാത്ത ഒന്റൊരുത്താന് പ്‌റ്‌ന്ത് പോയ ആസെപട്ടദാന പ്‌റ്‌ന്ത് പോഡൊ. ഈ കാര്യാത്ത്‌ല് ഏസ്സ്‌ഗാറാനൊ ഏസ്സ്‌ഗാറിസ്യൊ ആളാന് പെ്ണ്ടായി പെ്ളേക്കുവ കെ്ട്ട്‌മനാക്ക് പട്ടവാരല്ല. ആന സാമി നമാന നിമ്മ്‌ദ്യായി പെ്ളേക്ക്യത്തെ ബ്‌ളിത്ത്‌റ്‌ന്റാന് എന്റ് നെനേന്.

മത്തായി 5:24

നിന്ന് നേര്‌സെന പലി കൊഡുക്കുവ മദ്‌ല് പട്ട്‌ക്ക് ബെത്ത്‌തള്ളി മുദാല് പോയി അയാളോഡ രാജി കൂഡു. അദ്‌ക്ക് പ്‌റ ബന്ത് നിന്ന് നേര്‌സെന കൊഡു.

റോമഗാറാര് 1:15

അദ്‌നാലെ റോമ പട്ടണാത്ത്‌ലിര്‌ക്കുവ നിമാക്ക്‌മ് നല്ല സേദിന സൊല്ല്യ നാന് എനാക്ക് മുഡിന്തളാവുക്കു ഒരിങ്കിര്‌ക്ക്‌ന്റെ.