ബെ്ളിപട്ട കാര്യ 4:1 - സാമി സേദി

¹ അദ്‌ക്ക് പ്‌റ നാന് നോഡുഗാട്ടി, മേലോഗാത്ത്‌ല് ഒന്റു ബാസ ത്‌റാന്ത്‌റ്‌ക്കുവാദ്‌ന നാന് കണ്ടെ. കൊമ്പൂദുവ ജദ്ദന പാസെ മുദാല് എന്നോഡ നായ നൊഡിന്ത ജദ്ദ എനാക്ക് ഇത്തെ സൊല്ലുവാദ്‌ന നാന് കേ്ട്ടെ: <<ഇദ്‌ക്ക് ബാ, ഇന്നി നഡാക്ക്യ പോവാദ് എന്ത് എന്റ് നാന് നിനാക്ക് കാട്ടി തന്റെ.>>

ബെ്ളിപട്ട കാര്യ 4:1 ပူးပေါင်းရင်းမြစ်များ

മത്തായി 3:16

ഏസ്സ് മുളിഗി ഇ്ളാഗ്‌നാദ്‌മ് അന്നാല് താനെ ഏ്ട്ടിക്ക് ഏ്റ്‌നാന്. അദുക്കുള ബാന് ത്‌റാന്ത് സാമിനിഗാല് സോറെ പക്കിന പാസെ ഇ്റാഗി തന്ന് കുദ്ദാക്ക് ബന്ത് ഏ്റ്‌വാദ്‌ന അയാള് കണ്ടാന്.

മര്‌ക്കോസു 1:10

ഏസ്സ് മഡുവുലിന്ത് ഏ്ട്ടിക്ക് ഏ്റ്‌നാദ്‌മ് അന്നാല് താനെ ബാന് ത്‌റാന്ത് സാമിനിഗാല് സോറെ പക്കിന പാസെ തന്ന് കുദ്ദാക്ക് ഏ്റുവാദ്‌ന അയാള് കണ്ടാന്.

ലൂക്കോസു 3:21

ആള്‌ഗാള്‌നെല്ല ഓഗന്നാന് നീര്‌ക്ക് മുളിഗിസി കൊണ്ട്‌റ്‌ക്കാട്ടി ഏസ്സ്‌നാമ് നീര്‌ക്ക് മുളുഗുസ്‌നാന്. അദ്‌ക്ക് പ്‌റ അയാള് പരേസികൊണ്ടു ഇര്‌ക്കാട്ടി സാമി ബാന്‌ന ത്‌റാന്താന്.

ഓഗന്നാന് 16:13

ആന സാമിന പറ്റ്യുള്ള സത്ത്യന കാട്ടി തരുവ സാമിനിഗാല് ബര്‌ഗാട്ടി അയാള് നിമാക്ക് സത്ത്യമാനാദ്‌നെല്ല പഡിസി തരുവാന്. അയാള് തന്ന് അദിഗരാത്ത്‌ല് നായനൊഡ്യാദെ താന് കേ്ള്‌ക്കുവാദ്‌ന താനെത്തെ സൊല്ലുവാന്, ബര്യ ഇര്‌ക്കുവാദ്‌ന നിമാക്ക് സൊല്ലിമ് തരുവാന്.

അപ്പോസുത്തലാര് 10:11

ബാന് ത്‌റാന്ത് ദൊഡ്ഡ ഒന്റു ദുപ്പുട്ടിന പാസെ എന്തോ ജാദിന അദ്‌ക്കിര്‌ക്കുവ നാക്ക് താനെനാമ് കെ്ട്ടി ബൂമിക്ക് ഇ്റാക്കുവാദ്‌ന അയാള് കണ്ടാന്.

അപ്പോസുത്തലാര് 7:56

തെപാനോസു ഇത്തെ സൊന്നാന്, <<ഇദാഗെ മേലോഗ ത്‌റാന്ത്‌റ്‌ക്കുവാദ്‌നാമ്, മന്‌സാനായി പ്‌റാന്തവാന് സാമ്യോഡൊപ്പ ആള്യ സാമി ബല സാരി കുക്കാന്ത് ഇര്‌ക്കുവാദ്‌നാമ് നാന് കാണ്‌ന്റേന്!>>

ബെ്ളിപട്ട കാര്യ 1:10

ആണ്ടവാന്‌ന കുമ്മുഡുവ നാള് സാമിനിഗാല് നഡാത്തുവാദ്‌ക്ക് നാന് ഒന്റേപെ്ട്ട് കെ്ട്ട്‌പട്ട് ഇന്തേന്. അദുക്കുള എന്ന് പിന്ന് സാരി കൊമ്പൂദുവ ജദ്ദന പാസെ ദൊഡ്ഡൊന്റു ജദ്ദന നാന് കേ്ട്ടേന്.

ബെ്ളിപട്ട കാര്യ 1:12

എന്നോഡ നായനൊഡിവാദ് ആരെന്റ് കാണ്യ നാന് തിരിഗി നോഡുനേന്. അദുക്കുള പൊന്നുലു ഉണ്ടാക്ക്‌ന ഏ്ള് നിലബ്‌ളാക്ക്‌ഗാള്‌ന നാന് കണ്ടേന്.

ബെ്ളിപട്ട കാര്യ 1:19

അദ്‌നാലെ നീ കണ്ടാദ്‌നാമ് ഇന്നാല് ഇര്‌ക്കുവാദ്‌നാമ് നഡാക്ക്യ പോവാദ്‌നാമ് പറ്റി നീ എ്ള്‌ദുഡൊ.

ബെ്ളിപട്ട കാര്യ 11:12

അദുക്കുള മേലോഗാത്ത്‌ലിന്ത് ദൊഡ്ഡ ഒന്റു ജദ്ദ <<ഈങ്ക് ഏ്റി ബാന്>> എന്റ് സൊല്ലുവാദ്‌ന അവാര് കേ്ട്ടാര്. അവാര് പോട്ടിഗാറാര് നോഡിര്‌ക്കാട്ടി താനെ മഞ്ച്‌ല് അവാര് മേലോഗാക്ക് ഏ്റി പോനാര്.

ബെ്ളിപട്ട കാര്യ 11:19

പ്‌റ മേലോഗാത്ത്‌ല സാമിബീ്ഡ് ത്‌റാന്ത്‌ദ്. സാമി ബെത്ത ഒപ്പന്തന കാട്ടുവ പെ്ട്ടി അദ്‌ല് കാട്ട്‌റ്റ്. അദുക്കുള മിച്ചുവ ബെ്ള്‌സഗാള്‌മ്, ഓസെഗാള്‌മ്, ഇ്ഡി ബെ്ട്ടുവ ജദ്ദഗാള്‌മ്, കല്ല് മഗേമ് ബന്ത്‌ദ്, ബൂമിമ് കുലുങ്കുറ്റു.

ബെ്ളിപട്ട കാര്യ 16:17

ഏ്ളാവാദ് ദൂദാന് തന്ന് സട്ടിന എ്ഡ്‌ത്ത് ബാന്‌ക്ക് ഊറ്റുനാന്. അദുക്കുള <<എല്ലാദ്‌മ് നഡാന്ത് മുഡിന്ത്‌ദ്>> എന്റ് സൊല്ലുവ ദൊഡ്ഡ ഒന്റു ജദ്ദ സാമിബീ്ഡ്‌ല കുറിഞ്ചി പട്ട്‌ലിന്ത് ബന്ത്‌ദ്.

ബെ്ളിപട്ട കാര്യ 19:11

അദ്‌ക്ക് പ്‌റ മേലോഗ ത്‌റാന്ത്‌റ്‌ക്കുവാദ്‌ന നാന് കണ്ടെ. നാന് നോഡുഗാട്ടി ഒന്റു ബെ്ള്ള കുദുറെന കണ്ടെ. അയി കുദുറെ കുദ്ദാക്ക് കുക്കാന്ത് ഇര്‌ന്റവാന്‌ന നമ്പ്യ മുഡിന്റവാന് എന്റ്‌മ് സത്ത്യമുള്ളവാന് എന്റ്‌മ്‌ത്തെ ബ്‌ളിത്തിന്താദ്. നേര്‌മോഡാത്തെ അയാള് ആള്‌ഗാള്‌ന ബിദിക്കുവാദ്‌മ് പോട്ടിഗാറാരോഡ ജുദ്ദ ഗേവാദ്‌മ്.

ബെ്ളിപട്ട കാര്യ 22:6

അയി ദൂദാന് എനാക്ക്, <<ഈ നായഗാള് സത്ത്യാമ് നമ്പ്യ മുഡിവാദ്‌മ്‌ത്തെ. സാമിദാസ്‌ഗാള് എന്ത് സൊല്ലുഡൊ എന്റ് സൊല്ല്യ ബെക്കുവ ആണ്ടവാനാന സാമി ഇന്നി സട്ടന നഡാക്ക്യ പോവ കാര്യഗാള്‌ന തന്ന് ഗിലാസഗാറാര്‌ക്ക് കാട്ടി കൊഡുക്ക്യ തന്ന് ദൂദാന്‌ന സൊല്ലി ബ്‌ട്ട്‌റ്‌ന്റാന്>> എന്റ് സൊന്നാന്.