ബെ്ളിപട്ട കാര്യ 2:13 - സാമി സേദി

¹³ നീ ഏദ്‌ല് ഇര്‌ക്ക്‌ന്റായി എന്റ്‌മ് അദ് സെയിത്താന് കുറിഞ്ചി എന്റ്‌മ് എനാക്ക് തെരിമ്. നീ എനാന കയി ബ്‌ഡാഗേ ഇല്ലെ. സെയിത്താന് ആളുവ നിമ്മ് പട്ട്‌ല് ബെത്ത് അന്തിപാസ്‌ന കൊന്റ കാലാത്ത്‌ല് ഗുഡി നിമ്മ് നമ്പിക്കേന തള്ളാഗേ ഇല്ലെ. നമ്പ്യ മുഡിന്റവാനാന അന്തിപാസ് എനാന പറ്റി സൊല്ലിന്തവാന്‌ത്തെ.

ബെ്ളിപട്ട കാര്യ 2:13 ပူးပေါင်းရင်းမြစ်များ

മത്തായി 10:23

ആന ഒന്റു പട്ടണാത്ത്‌ല് അവാര് നിമാന കൊഡിമെപഡ്‌സ്‌നദാന ബേ്റൊന്റു പട്ടണാക്ക് ഓഡി പോനു. മന്‌സാനായി പ്‌റാന്തവാന് പിന്നേമ് ബരമാട്ട്‌ക്ക് ഇസ്‌റവേല്‌ല് എല്ലാ പട്ടണഗാള്‌ക്ക്‌മ് പോയി നാന് സൊന്നാദ്‌ന നിമ്മ ഗേന്ത് മുഡിക്കമാട്ട്‌റ് എന്റ് നാന് സത്ത്യമായി നിമാക്ക് സൊന്റെ.

മത്തായി 24:9

അയി ഗളിഗേക്ക് അവാര് നിമാന കൊഡിമെപഡിസ്യ കൊഡുക്കുവാര്. അവാര് നിമാന കൊല്ലുവാര്. നിമ്മ എനാന പറ്റി സൊല്ലുവാദ്‌നാലെ എല്ലാ ജാദിഗാള്‌മ് നിമാന തൊറേന്ത് തള്ളുവാര്.

മത്തായി 4:10

ഏസ്സ് സെയിത്താന്‌ക്ക്: <<സെയിത്താനെ, നീ എന്ന് പട്ട്‌ലിന്ത് പൊ! <നിന്ന് സാമ്യായിര്‌ക്കുവ ആണ്ടവാന്‌ന കുമ്മുഡി കൊണ്ടുമു അയി സാമിക്ക് പ്‌ഡിക്കുവ കാര്യഗാള്‌ന താനെ ഗേന്ത് കൊണ്ടുമു നഡാക്കുഡൊ> എന്റ് എ്ള്‌ദിര്‌ക്ക്‌ന്റല്ല>> എന്റ് സൊന്നാന്.

ലൂക്കോസു 21:17

നിമ്മ എനാന പറ്റി സൊല്ലുവാദ്‌നാലെ ആള്‌ഗാളൊട്ടുക്കു നിമാന തൊറേന്ത് തള്ളുവാര്.

അപ്പോസുത്തലാര് 22:20

നിനാന പറ്റി നായ സൊല്ലിന്ത തെപാനോസുന കൊല്ലുഗാട്ടി നാന്‌മ് അയാള്‌ന കൊല്ല്യ സൊല്ലി അയാള്‌ന കൊന്റവാര് ഉഡുപ്പുഗാള്‌ന കാത്ത്‌കൊണ്ട് അവാര്‌ക്കര്‌ഗെ നിന്റിന്തേന്.>

അപ്പോസുത്തലാര് 9:14

ദമാസ്‌കോസുലുമു നിനാന കുമ്മുഡുന്റവാര്‌ന ഒട്ടുക്കു പ്‌ഡിത്ത് എര്‌സലേമ്‌ക്ക് എ്ഡ്‌ത്ത് പോയാത്തെ അയാള് ഇന്നാല് ബന്ത്‌റ്‌ക്കുവാദ്. അദ്‌ക്കായി തനാക്ക് അദിഗര കൊഡുത്ത്‌റ്‌ക്കുവ കത്ത് അയാള് എഗുദാര് ദൊഡ്ഡ പൂസാര്യോഡ ഇന്ത് ബാങ്കിര്‌ക്ക്‌ന്റാന്.>>

1 തെസെലോനിക്ക്യഗാറാര് 5:21

എല്ലാദ്‌നാമ് സോദണെ ഗേന്ത് നല്ല കാര്യഗാള്‌ന ഒറേപ്പായിമ് തങ്കാരിക്കുഡൊ.

1 തിമിത്തോസു 5:8

ആന ഒരുത്താന് തന്ന് കൂട്ടകുഡുമാക്ക്‌മ് മുക്ക്യമായി തന്ന് ബീ്ഡ്‌ലവാര്‌ക്ക്‌മ് ബേ്ഡ്‌മാന കാര്യഗാള്‌ന ഗേന്ത് കൊഡുക്കാദിന്തദാന അയാള് തന്ന് നമ്പിക്കേന ബ്‌ട്ട് തള്ള്‌നവാന്‌മ് ഏസ്സ്‌ന നമ്പാത്തവാന്‌ന ബ്‌ഡ ഒന്റേപെ്ട്ട് കെ്ട്ട് തള്ള്‌നവാന്‌മ്‌ത്തെ.

2 തിമിത്തോസു 1:13

നീ എന്നോഡിന്ത് കേ്ട്ട നേരാന കാര്യഗാള്‌ന മനേസ്സ്‌ല് ബെത്ത് അദ്‌ക്ക് കെ്ട്ട്‌പട്ട് കൊണ്ടു ഒന്റൊന്റു കാര്യഗാള് ഗേഡൊ. നമ്മ ക്‌റ്‌സ്‌ത്ത് ഏസ്സോഡ ഒന്റായി ഇര്‌ക്കുവാദ്‌നാലെ ക്‌റ്‌സ്‌ത്ത്‌ന നമ്പി കൊണ്ടുമു അഡ്‌ത്തവാനോഡ സീവാന്‌ബെത്ത് കൊണ്ടുമു ബേ്ഡ്‌മ് ഈ കാര്യഗാള് ഗേയ.

2 തിമിത്തോസു 2:12

നമ്മ എന്നാല്‌ക്ക്‌മ് കജട്ടന താങ്ക്‌ന നമ്മ അയാളോഡ ആള്‌ല നമ്മ അയാള്‌ന ബേ്ഡെന്റ് സൊന്നദാന അയാള്‌മ് നമാന ബേ്ഡെന്നുവാന്.

എവുറായാര് 10:23

നമ്മ എദ്‌ക്ക സൊല്ലുവ നമ്മ് നെഞ്ചഡേല് ഒറേത്ത് നില്ല്‌ഗാന്. എന്ത്‌ക്കെന്റ് സൊന്ന നമാക്ക് ബാക്ക് തന്ത്‌റ്‌ക്കുവ സാമി അദ്‌ന നഡാത്തി തരുവാന് എന്റ് സാമിന നമാക്ക് നമ്പ്യ മുഡിമ്.

എവുറായാര് 3:6

ആന ക്‌റ്‌സ്‌ത്ത് സാമിബീ്ഡ്‌ന നോഡിനഡാത്തുവ കാര്യാത്ത്‌ല് ഒന്റു മഗാന്‌ന പാസെ നമ്പ്യ മുഡിന്റവാന് ആയിര്‌ക്ക്‌ന്റാന്. നമ്മ നമ്പിക്കേല് ദയിര ഉള്ളവാര്‌മ് നമ്മ നെഞ്ചഡെ ബെത്ത്‌റ്‌ക്കുവാദ്‌ല് പെരിമെ ഇര്‌ക്ക്‌ന്റവാര്‌മ് ആയിന്തദാന നമ്മാത്തെ അയാള് ബീ്ഡ്.

ആക്കോവു 2:7

സാമി തന്ന് സൊന്ത മക്കാളായി എ്ഡ്‌ത്ത് ബെത്ത്‌റ്‌ക്കുവ ഏ്ളെഗാള്‌ന നാണഗെ്ഡ്‌സുവാദ്‌മ് അവാര്‌ത്തെ.

ബെ്ളിപട്ട കാര്യ 11:3

നാന് സൊല്ല്യ സൊന്ന നായഗാള്‌ന സൊല്ല്യ എനാന പറ്റി സൊല്ലുവ റാഡാള്‌ക്ക് അയി നാള് അദിഗര കൊഡുക്കുവെ. അവാര് സാക്ക്‌ല് മാഡ്‌ന ഉഡുപ്പുന ഇക്കി ആയിരത്തി ഇര്‌നൂറ്റി അറുവദ് നാള് എനാക്ക് സൊല്ല്യ ഇര്‌ക്കുവാദ്‌ന സൊല്ലുവാര്.>>

ബെ്ളിപട്ട കാര്യ 12:11

കൊറ്യാഡ് കുട്ടി സോരെനാലേമ് തമ്മ സൊന്ന സത്ത്യ സേദിനാലേമ് അവാര് അയി പാമ്പ്‌ന സോലുസുനാര്. തമ്മ് ഉജുരുന ദൊഡ്ഡാദ് എന്റ് നോഡാദെ സായ ഗുഡി അവാര് ഒരിങ്കിന്താര്.

ബെ്ളിപട്ട കാര്യ 13:2

നാന് കണ്ട അയി ബേ്ണ്ട് പുലിന പാസേമ്, അയി ബേ്ണ്ട് കാല്‌ഗാള് കറാഡി കാല്‌ന പാസേമ്, ബായി സിങ്ക ബായിന പാസേമ് ഇന്ത്‌ദ്. ദൊഡ്ഡ പാമ്പ് തന്ന് സക്‌തിനാമ്, തന്ന് കുറിഞ്ചിനാമ്, തനാക്ക് ഇര്‌ക്കുവ മ്‌ഗ്‌ന്ത അദിഗരനാമ് അയി ബേ്ണ്ട്‌ക്ക് കൊഡുത്തുദു.

ബെ്ളിപട്ട കാര്യ 14:12

ഏസ്സ്‌ന നമ്പി നഡാക്ക്‌ന്റവാര്‌മ് സാമി സട്ടപഡി നഡാക്ക്‌ന്റവാര്‌മ് ആന സാമിഗാറാര് പൊറിമോഡ താങ്ക്‌ന്റവാര് ആയിര്‌ക്കുഡൊ എന്റ്‌ത്തെ ഇദ് അര്‌ത്ത മാഡുവാദ്.

ബെ്ളിപട്ട കാര്യ 17:14

അവാര് കൊറ്യാഡ് കുട്ട്യോഡ ജുദ്ദ ഗേവാര്. ആന കൊറ്യാഡ് കുട്ടി അവാര്‌ന സോലുസുവാന്. എന്ത്‌ക്കെന്റ് സൊന്ന അയാള് ആണ്ട്‌റ്‌ന്റവാര്‌ഗാള്‌ക്ക് ആണ്ടവാന്‌മ് രാജാവുഗാള്‌ക്ക് രാജാവുമുത്തെ. അയാളോഡ ഇര്‌ക്ക്‌ന്റവാര് സാമി ബ്‌ളിത്തവാര്‌മ് തെരിന്തെ്ഡ്‌ത്തവാര്‌മ് നമ്പ്യ മുഡിന്റവാര്‌മ്‌ത്തെ>> എന്റ് സൊന്നാന്.

ബെ്ളിപട്ട കാര്യ 17:6

സാമിഗാറാര് സോരെനാമ് നമ്പ്യ മുഡിന്റവാരായി ഏസ്സ്‌ന പറ്റി സൊന്നവാര് സോരെനാമ് അവാള് കുഡിത്ത് ബോദേ്റിര്‌ക്കുവാദ്‌ന നാന് കണ്ടേന്. അവാള്‌ന കാണ്‌ഗാട്ടി, നാന് ഒന്റേപെ്ട്ട് അന്തബ്‌ട്ടേന്.

ബെ്ളിപട്ട കാര്യ 2:2

നീ ഗേവ കാര്യഗാള്‌ന എനാക്ക് തെരിമ്. നീ നല്ല പാഡ്‌പട്ട് ഗേവാദ്‌മ് നീ പൊറിമോഡ ഇര്‌ക്കുവാദ്‌മ് എനാക്ക് തെരിമ്. കെ്ട്ടവാര്‌ന പൊറുക്ക്യ നിനാക്ക് മുഡ്യ എന്റ്‌മ് എനാക്ക് തെരിന്റ്. അപ്പോസുത്തലനാമ് അല്ലാദിന്ത് ഗുഡി, അപ്പോസുത്തലനാമ് എന്റ് നഡിക്ക്‌ന്റവാര്‌ന നീ സോദണെ ഗേന്ത് അവാര് പൊയി സൊന്റവാര് എന്റ് കണ്ട്‌പ്‌ഡിത്ത്‌റ്‌ന്റായി.

ബെ്ളിപട്ട കാര്യ 3:11

നാന് ബേഗ ബരുവേന്. നിന്ന് ഗിര്യാഡന ആര്‌മ് ത്‌റ്‌ഡി എ്ഡ്‌ക്കാദെ ഇര്‌ക്ക്യ നിനാക്ക് ഇര്‌ക്കുവാദ്‌ന കയി ബ്‌ഡാദെ ബെയ്യി.

ബെ്ളിപട്ട കാര്യ 3:3

അദ്‌നാലെ നീ പഡിത്താദ്‌നാമ് കേ്ട്ടാദ്‌നാമ് മറാക്കാദെ. അദ്‌ക്ക് നീ കെ്ട്ട്‌പട്ട് നഡ. നീ ഗേവ പാവഗാള്‌ന തള്ളി സാമിസാരി തിര്‌ഗ്. നീ ഇ്ളാഗാദെ പോന, നാന് ഒന്റു ത്‌റ്‌ട്ടാന് ബരുവ പാസെ ബരുവേന്. ഏദ് ഗളിഗേക്ക് നാന് നിന്ന് പട്ട്‌ക്ക് ബരുവേന് എന്റ് നിനാക്ക് തെര്യാമ് മാട്ട.