പിലെമോനു 1:6 - സാമി സേദി

⁶ ഏസ്സ്‌ന നമ്പുവാദ്‌നാലെ നമാക്ക് ബേ്റെ ഏസ്സ്‌ഗാറാരോഡിര്‌ക്കുവ ഒത്തിമെന നമ്മ ഗേവ കാര്യഗാള്‌ല് ഗേന്ത് കാട്ടുഡൊ എന്റ് നാന് പരേസ്‌ന്റെ. അത്തെ ഗേന്ത് കാട്ട്‌ഗാട്ടി ക്‌റ്‌സ്‌ത്തോഡ ഒന്റായി പെ്ളേക്കുവാദ്‌നാലെ കെ്ഡേക്കുവ എല്ലാ നല്ല കാര്യഗാള്‌ന പറ്റി നമാക്ക് നല്ല അറുവു കെ്ഡേക്ക്‌മ്.

പിലെമോനു 1:6 ပူးပေါင်းရင်းမြစ်များ

മത്തായി 25:16

അയിദ് താലന്ത് കെ്ഡേത്തവാന് സട്ടന പോയി അദ്‌ന ഏവര മാഡി ബേ്റെ അയിദ് താലന്ത് ഗുഡി കെ്ഡേസ്‌നാന്.

മത്തായി 5:16

അദേപാസെ നിമ്മ ഗേവ നല്ല കാര്യഗാള്‌ന കണ്ട് മേലോഗാത്ത്‌ല നിമ്മ് അപ്പാന് സാമിന അഡ്‌ത്തവാര് പെരിമെപഡ്യ നിമ്മ് ബെ്ള്‌സ അവാര് മുന്നുക്കു അഡിക്കുഡൊ.>>

1 കൊരിന്ത്യഗാറാര് 14:25

അയാള് മനേസ്സ്‌ല് മറേസി ബെത്ത്‌റ്‌ക്കുവ കാര്യഗാള് എല്ലാര്‌ക്ക്‌മ് നെപ്പ്‌കെ്ഡേക്ക്‌മ്. അത്തെ അയാള് സത്ത്യമായിമ് സാമി നിമ്മ് പട്ട്‌ല് ഇര്‌ക്ക്‌ന്റാന് എന്റ് സൊല്ലി സഡങ്ക ബ്‌ന്ത് സാമിന കുമ്മുഡുവാന്.

1 കൊരിന്ത്യഗാറാര് 16:9

നാന് തങ്കുവാദ് എന്ത്‌ക്കെന്റ് സൊന്ന ദൊഡ്ഡ ഒന്റു ഉവഗര പട്ട കാര്യ ഗേവാദ്‌ക്കുള്ള സദുവു എനാക്ക് ഇദ്‌ല് കെ്ഡേത്ത്‌റ്‌ക്ക്‌ന്റ്. ആന പല പോട്ടിഗാറാര്‌മ് എനാക്ക് ഇദ്‌ല് ഇര്‌ക്ക്‌ന്റാര്.

പിലിപ്പ്യഗാറാര് 4:8

കഡേസില്, ഏസ്സ്‌ഗാറാരെ, നാന് ഒന്റു കാര്യ ഗുഡി നിമാക്ക് സൊന്റെ. നിമ്മ സത്ത്യമാന കാര്യഗാള്‌ന പറ്റിമ്, എല്ലാവാര്‌മ് നല്ലാദെന്റ് സൊല്ലുവ കാര്യഗാള്‌ന പറ്റിമ്, ആര്‌മ് കുറ്റ സൊല്ലാത്ത കാര്യഗാള്‌ന പറ്റിമ്, എല്ലാവാര്‌ക്ക്‌മ് മെച്ച്‌പ്‌ഡിത്ത കാര്യഗാള്‌ന പറ്റിമ്, എല്ലാവാര്‌മ് പെരിമെപഡുവ കാര്യഗാള്‌ന പറ്റിമ്‌ത്തെ നെനേക്കുഡൊ.

കൊലേസ്യഗാറാര് 1:9

അദ്‌നാലെ ഈ കാര്യഗാള്‌ന കേ്ട്ട നാള്‌ലിന്തേ സാമി പിര്യാന പറ്റി തെരിവ അറുവുലു നിമ്മ ദൊഡ്ഡവാരായ ബേ്ണ്ടിമ് നിമ്മ് നിഗാല് കുട്ടിക്ക് ബേ്ഡ്‌മാന എല്ലാ അറുവുലു നിമ്മ ദൊഡ്ഡവാരായ ബേ്ണ്ടിമ് എമ്മ ഒപ്പ പരേസ്‌ന്റേമ്.

കൊലേസ്യഗാറാര് 3:10

ഏസ്സ്‌ന ഉജുര്‌ളാക്ക്‌ഗാട്ടി തന്ന് നാഡ്‌ല് പെ്ളേക്കുവാദ്‌ക്ക് തഗ്‌ന്ത ഉരുവാത്ത്‌ല് നിമാനാമ് ഉജുര്‌ളാക്ക്‌നാന്. അദ്‌നാലെ അദ്‌ക്ക് തഗ്‌ന്ത ഗുണാത്ത്‌ല് നിമ്മ പെ്ളേന്.

തീത്തോസു 3:14

നമ്മ് ആള്‌ഗാള് ഉവഗരില്ലത്തവാരാഗാദെ അഡ്‌ത്തവാര്‌ക്ക് ബേ്ഡ്‌മാന കാര്യഗാള്‌ന കാണ്‌ഗാട്ടി അദ് ഗേന്ത് കൊഡുത്തു നല്ല കാര്യഗാള് ഗേയ പഡിക്കുഡൊ.

എവുറായാര് 6:10

നിമ്മ ഗേന്ത കാര്യഗാള്‌നാമ് സാമ്യോഡ നിമ്മ ബെത്ത സീവാന്‌നാമ് മറാന്ത് തള്ള്യ സാമി നേര്‌മല്ലത്തവാന് അല്ല. സാമ്യോഡ സീവാന്‌ബെത്താദ്‌നാലെ സാമിക്ക് പട്ടവാര്‌ന നിമ്മ കയി താങ്കിര്‌ക്ക്‌ന്റ്‌റ്. ഇന്നാല്‌മ് അവാര്‌ന കയിതാങ്കി കൊണ്ടു ഇര്‌ക്ക്‌ന്റ്‌റ്.

ആക്കോവു 2:14

ഏസ്സ്‌ഗാറാരെ, ഒരുത്താന് ഏസ്സ്‌ന നമ്പിന്ത്‌മ് നമ്പിക്കേക്ക് തഗ്‌ന്ത ഒന്റു കാര്യാമ് ഗേഗാദെ പോന അത്തെ നമ്പ്‌നാദ്‌നാലെ ഒന്റു ഉവഗരാമില്ലെ. അത്തവ നമ്പിക്കെ അയാള്‌ന കാപാറ്റ്‌മ?

ആക്കോവു 2:17

അദ്‌നാലെ ഏസ്സ് ക്‌റ്‌സ്‌ത്ത്‌ന നമ്പിര്‌ക്കുവ നീ നിന്ന് നമ്പിക്കേക്ക് തഗ്‌ന്ത കാര്യഗാള് ഗേഡൊ. അത്തെ ഗേഗാദെ പോന ഒന്റുക്കുമു ഉവഗരപഡാത്ത സത്ത സാവുന പാസെ നിന്ന് നമ്പിക്കേമ് ഒന്റുക്കുമു ഉവഗരപഡമാട്ട.

1 പത്ത്‌റോസു 2:12

എഗുദാരല്ലാത്ത ജാദിഗാള് പട്ട്‌ല് നിമ്മ നലമായി പെ്ളേക്കുഡൊ. അത്തെ നിമ്മ കെ്ട്ട കാര്യഗാള് ഗേന്റവാര് എന്റ് സൊല്ലുന്റവാര് നിമ്മ ഗേവ നല്ല കാര്യഗാള്‌ന കണ്ട് സാമി ബരുവ നാള് സാമിന ദൊഡ്ഡവാന് എന്റ് സൊല്ലുവാര്.

1 പത്ത്‌റോസു 3:1

അദേപാസെ പെ്ണ്ടച്ച്യാമെ, നിമ്മ് സൊന്ത ആളനച്ചനാമ്‌ക്ക് കെ്ട്ട്‌പട്ട് നഡാന്. അത്തെ നഡാന്ത നിമ്മ് കൂട്ടാത്ത്‌ല് സാമി സൊല്ലുസുലാക്ക പഡി നഡാക്കാത്തവാര് ഇന്തദാന തമ്മ് പെ്ണ്ടച്ച്യാമ് സാമിക്ക് അഞ്ചി സുത്താപ്പോഡ പെ്ളേക്കുവാദ്‌ന കണ്ട് ഒന്റുമു സൊല്ലാദെ താനെ നിമാക്കിര്‌ക്കുവ നല്ല ഗുണനാലെ അവാര്‌ന സാമിസാരി തിരിക്ക്യ മുഡിമ്.

2 പത്ത്‌റോസു 1:8

ഇത്തവ ഗുണഗാളെല്ല നിമാക്ക് എഞ്ച്‌ക്കൊ ഇന്തദാന നമ്മ് ആണ്ടവാന് ഏസ്സ് ക്‌റ്‌സ്‌ത്ത്‌ന പറ്റി നിമാക്കിര്‌ക്കുവ അറുവുലു നിമ്മ സുറുസുറുപ്പു ഇല്ലത്തവാര്‌മ് ഉവഗര ഇല്ലത്തവാര്‌മ് ആഗമാട്ട്‌റ്.