മര്‌ക്കോസു 4:15 - സാമി സേദി

¹⁵ ബട്ടേക്ക് ബ്‌ന്ത ബെദേന പാസെത്തെ പഗ്‌ദ്യാള്‌ഗാള് സാമി സൊല്ലുസുലാക്കന കേ്ള്‌ക്കുവാദ്. ഇവാര് കേ്ട്ട സാമി സൊല്ലുസുലാക്കന സെയിത്താന് ബന്ത് സട്ടന എ്ഡ്‌ത്ത് തള്ള്‌ന്റാന്.

മര്‌ക്കോസു 4:15 ပူးပေါင်းရင်းမြစ်များ

1 പത്ത്‌റോസു 5:8

നിമ്മ അഡക്കൊദുക്കത്തോഡ ഇര്‌ക്ക്‌ന്റവാര്‌മ് സൂസാരിത്തിര്‌ക്ക്‌ന്റവാര്‌മ് ആയിര്‌ന്. എന്ത്‌ക്കെന്റ് സൊന്ന നിമ്മ് പോട്ടിഗാറാന് സെയിത്താന് മൊരേവ സിങ്കന പാസെ ആര്‌ന പ്‌ഡിത്ത് നുങ്ക്യ എന്റ് നോഡികൊണ്ടു സുറ്റ്യറ്റി നഡാക്ക്‌ന്റാന്.

മത്തായി 13:19

ഒരുത്താന് സാമി ആളുവാദ്‌ന പറ്റി സൊല്ലുവ സേദിന കേ്ട്ട് നെപ്പ്‌കെ്ഡേസാദെ ഇര്‌ക്കുവാദ് ബട്ടേക്ക് അലേന്ത ബെദേക്ക് സമ. സെയിത്താന് ബന്ത് അയാള് മനേസ്സ്‌ക്ക് ബിത്ത്‌ന ബെദേന എ്ഡ്‌ത്ത് തള്ള്‌ന്റാന്.

2 കൊരിന്ത്യഗാറാര് 2:11

അവാന് ഗേന്ത കുറ്റന നിമ്മ പൊറുക്കാദിന്തദാന സെയിത്താന് നമാന ഏമാത്തുവാന്. സെയിത്താന് തന്ത്‌റഗാള്‌ന പറ്റി നമ്മ അറുവില്ലാത്തവാരല്ല.

ലൂക്കോസു 8:12

ബട്ടേക്ക് ബ്‌ന്ത ബെദെ എന്നുവാദ് ഒരുത്താന് സാമി സൊല്ലുസുലാക്കാന കേ്ള്‌ക്കുവാദ്‌ത്തെ. ആന സെയിത്താന് ബന്ത് അയാള് കേ്ട്ട സാമി സൊല്ലുസുലാക്കാന മറാന്ത് തള്ള്യ ബെക്ക്‌ന്റാന്. അദ്‌നാലെ അവാര്‌ക്ക് നമ്പ്യാമ് മുഡ്യാലെ, തപ്പിസി കഡാക്ക്യാമ് മുഡ്യാലെ.

മര്‌ക്കോസു 4:4

അയാള് ബിത്ത്‌ഗാട്ടി ലേസ ബെദെ ബട്ടേക്ക് ബ്‌ന്ത്‌ദ്. അദ്‌ന പക്കിഗാള് ബന്ത് കൊത്തി തിന്റ് തള്ള്‌ട്ട്.

അപ്പോസുത്തലാര് 5:3

അദുക്കുള പത്ത്‌റോസു അയാള്‌ക്ക് ഇത്തെ സൊന്നാന്: <<അനനാസെ, നീ സെയിത്താന് സൊല്ലുക്കു ആളായി സാമിനിഗാലോഡ ജൂദുപ്‌ഡിത്ത് ഉറുട്ടു സൊന്നാദ്‌മ് ബൂമി ബിറ്റ് കെ്ഡേത്ത പണാത്ത്‌ലിന്ത് ലേസ എ്ഡ്‌ത്ത് ബെത്താദ്‌മ് എന്ത്‌ക്ക്?

ബെ്ളിപട്ട കാര്യ 20:10

ബേ്ണ്ട്‌നാമ് സാമി സൊന്റു എന്റ് സൊല്ലി ഉറുട്ടു സൊല്ലുവ സാമിദാസ്‌നാമ് എ്റിന്ത് ബ്‌ട്ട്‌റ്‌ക്കുവ ഗെന്തഗ കത്തി എരേവ തീ കഡാല്‌ക്ക് അവാര്‌ന ഏമാത്തിന്ത സെയിത്താന്‌ന എ്റിന്ത് ബ്‌ഡുവാന്. റാവുപഗാല് അദ്‌ലിന്ത് കൊണ്ടു അവാര് എന്നാല്‌ക്ക്‌മ് ദെ്ണ്ടണെപഡുവാര്.

ബെ്ളിപട്ട കാര്യ 20:7

ആയിര ബര്‌സ്സ കളിന്ത പ്‌റ സെയിത്താന്‌ന കെ്ട്ടി ബെത്ത്‌റ്‌ക്കുവ പട്ട്‌ലിന്ത് ഉക്കി ബ്‌ഡുവാന്.

എവുറായാര് 2:1

അദ്‌നാലെ നമ്മ കേ്ട്ട സത്ത്യഗാള്‌ന അദിഗ ഗെവുനിക്കുഡൊ. അത്തെ ഗേന്ത കപ്പാല് ആങ്കീങ്ക് അലേന്ത് നഡാക്കുവ പാസെ നമ്മ അയി സത്ത്യഗാള്‌ന ബ്‌ട്ട് അലേന്ത് നഡാക്കമാട്ടാമ്.

2 തെസെലോനിക്ക്യഗാറാര് 2:9

സെയിത്താന് കൊഡുക്കുവ സക്‌തിനാലെ ഗേവ കാര്യഗാളോഡ അയി കേ്ഡ്‌ഗെ്ട്ടവാന് ബെ്ളിപഡുവാന്. അയാള് തന്ന് പൊയ്യാന സക്‌തില് അഡ്യാളഗാള്‌മ് അദിസ്യഗാള്‌മ് ഗേന്ത് കൊണ്ടു ആള്‌ഗാള്‌ന ബഞ്ചിക്കുവാന്.

മത്തായി 22:5

ആന അവാര് അദ്‌ന കേ്ള്‌ക്കാദെ ഒരുത്താന് തന്ന് കാഡ്‌ക്ക്‌മ്, ബേ്റെ ഒന്റൊരുത്താന് തന്ന് ഏവരാക്ക്‌മ് പോനാന്.

ബെ്ളിപട്ട കാര്യ 12:9

പിജാദ് എന്റ്‌മ് സെയിത്താന് എന്റ്‌മ് സൊല്ലുവ ബൂമില് ഇര്‌ക്കുവ എല്ലാ ആള്‌ഗാള്‌ന ഏമാത്തുവ അയി ദൊഡ്ഡ പാമ്പ് പള്യ പാമ്പ്‌ത്തെ. അയാള്‌നാമ് അയാളോഡൊപ്പ അയാള് ദൂദാര്‌നാമ് അഡി ബൂമിക്ക് എ്റിന്ത് തള്ള്‌നാര്.

മത്തായി 4:10

ഏസ്സ് സെയിത്താന്‌ക്ക്: <<സെയിത്താനെ, നീ എന്ന് പട്ട്‌ലിന്ത് പൊ! <നിന്ന് സാമ്യായിര്‌ക്കുവ ആണ്ടവാന്‌ന കുമ്മുഡി കൊണ്ടുമു അയി സാമിക്ക് പ്‌ഡിക്കുവ കാര്യഗാള്‌ന താനെ ഗേന്ത് കൊണ്ടുമു നഡാക്കുഡൊ> എന്റ് എ്ള്‌ദിര്‌ക്ക്‌ന്റല്ല>> എന്റ് സൊന്നാന്.

എവുറായാര് 12:16

കേ്ഡ്‌ഗെ്ട്ട് ബേസ്യാഡി നഡാക്ക്‌ന്റവാര്‌ന പാസേഗൊ തലെകോഡി മഗാന് എന്നുവ പദാവിപട്ടന ഒന്റു ജമ്പ് തിന്നുവ തീനിക്ക് ബേ്ണ്ടി ബ്‌റ്റ് തള്ള്‌ന ഏസ്സാവുന പാസെ സാമി ആസെപഡി നഡാക്കാത്തവാര്‌ന പാസേഗൊ ആഗാദിര്‌ക്ക്യ സൂസാരിത്തിര്‌ന്.

അപ്പോസുത്തലാര് 17:32

സത്തവാര് ഉജുര്‌ളാഗുവാദ്‌ന പറ്റി അയാള് സൊന്നാദ്‌ന അവാര് കേ്ള്‌ക്കാട്ടി ലേസ ആള്‌ഗാള് പവുലോസുന നാണഗെ്ഡ്‌സ്‌നാര്. ആന ബേ്റെ ലേസ ആള്‌ഗാള്: <<ഈ കാര്യന പറ്റി ഇന്നിമ് നിന്ന് നായന കേ്ള്‌ക്ക്‌ന്റേമ്>> എന്റ് അയാള്‌ക്ക് സൊന്നാര്.

മര്‌ക്കോസു 4:14

ബിത്ത്‌ന്റവാന് ബെദെ ബിത്തുവ പാസെത്തെ സാമി സൊല്ലുസുലാക്കന ഒന്റൊരുത്താന് ആള്‌ഗാള്‌ക്ക് സൊല്ലി കൊഡുക്കുവാദ്.

മര്‌ക്കോസു 4:16

അറെ പട്ട്‌ക്ക് ബ്‌ന്ത ബെദേന പാസെത്തെ പഗ്‌ദ്യാള്‌ഗാള് സാമി സൊല്ലുസുലാക്കന കേ്ള്‌ക്കുവാദ്. ഈ ആള്‌ഗാള് സാമി സൊല്ലുസുലാക്കന പിര്യപിര്യത്തോഡ തങ്കാരിക്കുവാര്.