15 <<ഈത്തെ തഗ്ന്ത സമ്യ; സാമി ആളുവാദ് ബര്യ പക്ക ആയിര്ക്ക്ന്റ്. അദ്നാലെ പാവ ഗേവാദ്ന തള്ളി ഈ നല്ല സേദിന നമ്പ്ന്>> എന്റ് അയാള് സൊന്നാന്.
നിമ്മ പോഗാട്ടി: <സാമി ആളുവാദ് ബര്യ പോന്റു> എന്നുവ നല്ല സേദിന അവാര്ക്ക് സൊല്ലുനു.
<<സാമി ആളുവ കാല ബര്യ പോവാദ്നാലെ പാവ ഗേവാദ്ന തള്ളി സാമിസാരി തിര്ഗ്ന്>> എന്റ് ആലാത്താലാത്ത് സൊന്നാന്.
അദ്ക്ക് ഇര്ക്ക്യ പോന നാള്ലിന്തേ ഏസ്സ്: <<സാമി ആളുവാദ് ബര്യ പോവാദ്നാലെ പാവ ഗേവാദ്ന തള്ളി സാമിസാരി തിര്ഗ്ന്>> എന്റ് ആലാത്താലാത്ത് സൊല്ല്യ പ്ഡിത്താന്.
<ഇദാ നോഡുനു, നിമാക്ക് ദെ്ണ്ടണെ ബന്റ് എന്റ് നിമ്മ തെര്യ ബേ്ണ്ടി നിമ്മ് പട്ടണാത്ത്ലിന്ത് എമ്മ് കാല്ക്ക് പ്ഡിത്ത ദൂളിന നിമ്മ് മുന്നുക്കു ബെത്ത് താനെ തട്ടി തള്ള്ന്റേമ്. സാമി ആളുവാദ് നിമ്മ് പട്ട്ക്ക് ബന്ത്റ്ന്റ് എന്റ്മ് നിമ്മ തെരിന്ത്റ്ന്> എന്റ് സൊല്ലുനു.
അയി പട്ടണാത്ത്ല നോയിഗാറാര്ന തെ്ള്സ്ന്. <സാമി ആളുവാദ് നിമ്മ് പട്ട്ക്ക് ബന്ത്റ്ന്റ്> എന്റ് അവാര്ക്ക് സൊല്ലുനു.
തപ്പ് ഗേവാദ്ന തള്ളി സാമിസാരി തിര്ഗ്ന്റവാര്ക്ക് തമ്മ ഗേന്ത പാവാക്ക് പൊറിമെ കെ്ഡേക്ക്മ് എന്നുവ സേദിന പറ്റിമ് എര്സലേമ്ലിന്ത് പ്ഡിത്ത് എല്ലാ നാഡ്ഗാള്ക്ക്മ് അയാള് പേര്ല് സൊല്ലുവാര് എന്റ്മ്ത്തെ സാമി ബൊക്കുലു എ്ള്ദിര്ക്കുവാദ്.
പാവ ഗേവാദ്ന തെ്റിന്ത് തള്ളി സാമിസാരി തിരിഗി ബരുഡൊ എന്റ്മ് നമ്മ് ആണ്ടവാന് ഏസ്സ്ന നമ്പുഡൊ എന്റ്മ് നാന് എഗുദാര്ക്ക് താനെ അല്ല എഗുദാര് അല്ലാത്ത ജാദിഗാള്ക്ക്മ് സൊക്കാന സൊല്ലിര്ക്ക്ന്റേന്.
ആന എന്നാല്ക്ക്മ് ഇര്ക്കുവ സാമി ഈ സത്ത്യന ബെ്ളിപഡിസ്യ കല്പനെ കൊഡുത്താദ്നാലെ സാമിദാസ്ഗാള് സാമി സൊല്ലുസുലാക്കാത്ത്ല് ഈ കാര്യന എ്ള്ദിര്ക്ക്ന്റാര്. സാമി അത്തെ ഗേന്താദ് എല്ലാ ജാദിഗാള്മ് അയി സത്ത്യന നമ്പി സാമി സൊല്ലുപഡി നഡാക്ക്യ ബേ്ണ്ടിത്തെ.
ആന തഗ്ന്ത സമ്യ ബര്ഗാട്ടി സാമി തന്ന് മഗാന്ന ഉലഗാക്ക് സൊല്ലി ബ്ട്ടാന്. അയാള് പെ്ണ്ണ്ലിന്ത് പ്റാന്ത് സട്ടഗാള്ക്ക് കെ്പട്ട് പെ്ളേത്താന്.
ഇദ്ന എത്തെ തെരിവാദ് എന്റ് സൊന്ന, ഒന്റൊന്റു കാര്യഗാള് ഏദേദ് ഗളിഗേക്ക് നഡാക്കുഡൊ എന്റ് സാമി മുദാല് താനെ നെനേത്തിന്താന്. അദെല്ല നഡാന്ത് മുഡിഗാട്ടി മേലോഗാത്ത്ല്മ് ബൂലോഗാത്ത്ല്മ് ഇര്ക്കുവാദ്ന ഒട്ടുക്കു ക്റ്സ്ത്ത് ആള്വാനെന്റ്മ് സാമി മുദാല് താനെ നെനേത്തിന്താന്.
എല്ലാ മന്സാര്ഗാള്ക്ക്മ് അവനവാന് ഗേവ പാവാക്ക് കെ്ഡേക്കുവ ദെ്ണ്ടണേക്ക് ബഡ്ഡി അയാള് തനാന താനെ കുരുസുക്കു ഒപ്പുസുനാന്. ഇദെല്ല സാമി മുഡിവാക്കിന്ത സമ്യാത്ത്ല് താനെ നഡാന്ത്ദ്. എല്ലാ ആള്ഗാള്നാമ് കാപാറ്റുഡൊ എന്റ് സാമിക്കിര്ക്കുവ ആസേക്ക് തെ്ള്വുത്തെ ഇദ്.