ലൂക്കോസു 23:5 - സാമി സേദി

⁵ ആന അവാര്: <<ഇയാള് എഗുദ്യ നാഡ്‌ലിര്‌ക്കുവ ആള്‌ഗാള്‌ക്ക് ഒട്ടുക്കു താന് പഡുസുവ കാര്യഗാള്‌ന പഡിസി ആള്‌ഗാള്‌കുള്ളുക്കു കലമ്പാല് മാഡ്‌ന്റാന്. ഗലീല നാഡ്‌ലിന്ത് ഇദ്‌മാട്ട്‌ക്ക് ഇയാള് ഇത്തെ ഗേന്ത്‌റ്‌ന്റാന്>> എന്റ് ഒറേപ്പായി സൊന്നാര്.

ലൂക്കോസു 23:5 ပူးပေါင်းရင်းမြစ်များ

ഓഗന്നാന് 2:11

ഇദ്‌ത്തെ ഏസ്സ് മുദാല് ഗേന്ത അദിസ്യമാന അഡ്യാള. ഇദ്‌ന ഗലീല നാഡ്‌ല കാനാവു എന്നുവ പട്ടണാത്ത്‌ല് ബെത്ത് ഗേന്ത് ഏസ്സ് തന്ന് മദ്‌പ്പ്‌ന കാട്ടി കൊഡുത്താന്. ഇദ്‌ന കണ്ട് ഏസ്സ് സൊല്ലുപഡി നഡാക്ക്‌ന്റവാര് അയാള്‌ന നമ്പ്‌നാര്.

ഓഗന്നാന് 1:43

മറ്‌നാള് ഏസ്സ് ഗലീലാക്ക് പോയ എന്റ് മുഡിവെ്ഡ്‌ത്ത്‌റ്‌ക്കാട്ടി പീലിപോസുന കണ്ട്: <<എന്ന് പിന്ന്‌മേലെ ബാ>> എന്റ് അയാള്‌ക്ക് സൊന്നാന്.

മര്‌ക്കോസു 1:14

അദ്‌ക്ക് പ്‌റ ഓഗന്നാന്‌ന ജെയില്‌ക്ക് അഡേത്താര്. ഏസ്സ് ഗലീല നാഡ്‌ക്ക് പോയി സാമി ആള്യ പോവ കാലന പറ്റി സൊല്ലുവ നല്ല സേദിന സൊല്ലി കൊഡുത്താന്.

മത്തായി 4:23

പ്‌റ ഏസ്സ് ഗലീല നാഡ്‌ല് എല്ലാ സാരിമ് പോയി എഗുദാര് പരേസുവ ബീ്ഡ്‌ക്ക്‌റാഗ പഡിസികൊണ്ടുമു സാമി ആളുവ കാലന പറ്റി സൊല്ലുവ നല്ല സേദിന ആള്‌ഗാള്‌ക്ക് സൊല്ലികൊണ്ടുമു ഇന്താന്. അയി ഗളിഗേല് ആള്‌ഗാള് കൂട്ടാത്ത്‌ല് എല്ലാ ദിന്‌സ് നോയി തട്ടിന്തവാര്‌നാമ് ഗെര്‌ഗബ്‌ന്തിന്തവാര്‌നാമ് അയാള് തെ്ള്‌സ്‌നാന്.

അപ്പോസുത്തലാര് 23:10

ഈ തറ്‌ക്ക സേത്തി ദൊഡ്ഡാദ്‌ക്ക് ആറ്റ്. അദുക്കുള അവാര് പവുലോസുന തുണ്ടു തുണ്ട കൊച്ചി തള്ളുവാര് എന്റ് ആയിര പട്ടളഗാറാര് തലെവാന് അഞ്ച്‌നാന്. അദ്‌നാലെ അയാള്‌ന അവാര് പട്ട്‌ലിന്ത് പട്ടളഗാറാര് തങ്കുവ കോട്ടേക്ക് കൂട്ടി പോയ അയി പട്ടള തലെവാന് തന്ന് പട്ടളഗാറാന്‌ക്ക് സൊന്നാന്.

അപ്പോസുത്തലാര് 10:37

എഗുദ നാഡ് ഒട്ടുക്കു എന്ത് നഡാന്ത്‌ദ് എന്റ് നിമ്മ കേ്ട്ട്‌റ്‌ന്റ്‌റ്. ഓഗന്നാന് നീര്‌ല് മുളുഗുസുവാദ്‌ന പറ്റി സൊന്ന പ്‌റ ഗലീലാല്‌ത്തെ ഇദ് മുദാല് നഡാന്ത്‌ദ്.

അപ്പോസുത്തലാര് 7:57

അദുക്കുള എഗുദ കോഡിദിഗാറാര് ആലാത്ത് ക്‌ളാമ്പ്‌നാര്. അവാര് കാദ്‌ന പൊത്തി പ്‌ഡിത്ത്‌കൊണ്ട് തെപാനോസു പട്ട്‌ക്ക് ഓഡുനാര്.

അപ്പോസുത്തലാര് 7:54

തെപാനോസു സൊന്ന ഈ നായന കേ്ട്ട് എഗുദ കോഡിദിഗാറാര്‌ക്ക് മൊനെ ബന്ത്‌ദ്. അദ്‌നാലെ അവാര് തെപാനോസുക്കു നേരെ പല്ല്‌ന കഡിത്താര്.

അപ്പോസുത്തലാര് 5:33

ഇദ്‌ന കേ്ള്‌ക്കാട്ടി എഗുദ കോഡിദില ആള്‌ഗാള്‌ക്ക് സെര്യാന മൊനെ ബന്ത്‌ദ്. അവാര് അപ്പോസുത്തലാര്‌ന കൊല്ലുഡൊ എന്റ് മുഡിവെ്ഡ്‌ത്താര്.

ഓഗന്നാന് 19:15

അദുക്കുള: <<അയാള്‌ന കൊല്ലു, അയാള്‌ന കൊല്ലു, അയാള്‌ന കുരുസുക്കു സേത്തി ആണി അഡിത്ത് കൊല്ലു>> എന്റ് അവാര് ആലാത്താര്. അദുക്കുള: <<നിമ്മ് രാജാവുന നാന് കുരുസുക്കു സേത്തി ആണി അഡിത്ത് കൊല്ല്യാഗ?>> എന്റ് പീലത്തോസു അവാര്‌ന കേ്ട്ടാന്. അദുക്കുള എഗുദാര് പൂസാരി തലെവാര്‌ഗാള്: <<എമാക്ക് റോമ നാഡ് രാജാവല്ലാദെ ബേ്റൊന്റു രാജാവില്ലെ>> എന്റ് ബദ്‌ല് സൊന്നാര്.

ഓഗന്നാന് 7:52

അവാര് അയാള്‌ക്ക്: <<നല്ല കാര്യത്തെ. നീയിമ് ഗലീല നാഡ്‌ലിന്ത്‌ത്തെ ബന്റവാന? സാമി സൊല്ലുസുലാക്കാന പഡിത്ത് നോഡു, ഗലീലാലിന്ത് സാമി സൊല്ലി ബ്‌ഡുവെ എന്റ് സൊന്ന അയി സാമിദാസ് ബരുവാദില്ലെന്റ് അന്നാപ്പ് നിനാക്ക് തെരിമ്>> എന്റ് സൊന്നാര്.

ഓഗന്നാന് 7:41

ബേ്റെ ലേസ ആള്‌ഗാള്: <<ഇയാള് ക്‌റ്‌സ്‌ത്ത്‌ത്തെ>> എന്റ് സൊന്നാര്. ആന ലേസ ആള്‌ഗാള്: <<കണ്ടിപ്പായിമ് ക്‌റ്‌സ്‌ത്ത് ഗലീലാലിന്തല്ല ബരുവാദ്?

ലൂക്കോസു 23:23

ആന അവാര്: <<ഏസ്സ്‌ന കുരുസുക്കു സേത്തി ആണി അഡിത്ത് കൊല്ലുഡൊ>> എന്റ് ആലാത്ത്‌ക്‌ളാമ്പി സൊല്ലി കൊണ്ടേ ഇന്താര്. അത്തെ അവാര് ആലാത്ത് ക്‌ളാമ്പ്‌നാദ്‌ക്കുള്ള കാര്യ നഡാന്ത്‌ദ്.

ലൂക്കോസു 11:53

ഏസ്സ് അദ്‌ലിന്ത് പോഗാട്ടി പരിസാര്‌ഗാള്‌മ് ബേദബാത്ത്യനാമ്‌മ് അയാളോഡ മൊനേക്ക് തെ്ട്ടി കൊണ്ടു എഞ്ചോ കാര്യഗാള്‌ന പറ്റി കേ്ള്‌വി കേ്ള്‌ക്ക്യ പ്‌ഡിത്താര്. അയാള് സൊല്ലുവ നായാത്ത്‌ല് കുറ്റ കണ്ട് അയാള്‌ന സിക്ക്‌സ്യ ബേ്ണ്ടിത്തെ അവാര് അത്തെ ഗേന്താദ്.

മത്തായി 27:24

ആള്‌ഗാള് ആലാത്ത് ക്‌ളാമ്പുവാദ് അദിഗ ആവാദല്ലാദെ തനാക്ക് ഒന്റുമു ഗേയ മുഡിവാദില്ലെ എന്റ് പീലത്തോസു നോഡി, നീര് എ്ഡ്‌ത്ത് ആള്‌ഗാള് മുന്നുക്കു ബെത്ത് കയി കച്ചിന്ത്: <<ഇയാള്‌ന കൊല്ലുവാദ്‌ല് നാന് കുറ്റഗാറാനല്ല. നിമ്മ താനെ നോഡി കൊള്ളുനു>> എന്റ് സൊന്നാന്.

മത്തായി 2:1

എരോദ രാജാവായിന്ത കാലാത്ത്‌ല് എഗുദ നാഡ്‌ല ബെദ്ദ്‌ലെഗേമ് പട്ടണാത്ത്‌ല്‌ത്തെ ഏസ്സ് പ്‌റാന്താദ്. ഏസ്സ് പ്‌റാന്ത പ്‌റ ക്‌ളാക്ക് സാരിന്ത് നാള്‌നച്ചെത്ത്‌റ നോഡുന്റവാര് എര്‌സലേമ്‌ക്ക് ബന്താര്.

മത്തായി 11:1

ഏസ്സ് തന്ന് സൊല്ലുപഡി നഡാക്കുവ പന്നന്റാള്‌ഗാള്‌ക്ക് ഈ കാര്യഗാള്‌ന സൊന്ന പ്‌റ അയാള് എഗുദാര് പട്ടണഗാള്‌ക്ക്‌റാഗ പഡിസ്യാമ് നായ സൊല്ല്യാമ് അദ്‌ലിന്ത് പോനാന്.

ലൂക്കോസു 23:6

ഇദ്‌ന കേ്ട്ട് പീലത്തോസു: <<ഇയാള് ഗലീലഗാറാന്‌ത്തേഗ?>> എന്റ് കേ്ട്ടാന്.