ലൂക്കോസു 18:32 - സാമി സേദി

³² എഗുദാര് അയാള്‌ന എഗുദാരല്ലാത്ത ജാദിഗാള് കയിക്ക് ബ്‌ട്ട് കൊഡുക്കുവാര്. അവാര് അയാള്‌ന ഏസ്സികാട്ടിമ് നാണഗെ്ഡിസിമ് മോന്തേക്ക് തുപ്പിമ്,

ലൂക്കോസു 18:32 ပူးပေါင်းရင်းမြစ်များ

ലൂക്കോസു 23:11

എരോദാവുമു അയാള് പട്ടളഗാറാര്‌മ് ഏസ്സ്‌ന നാണഗെ്ഡിസി ബെലെലില്ലത്തവാന് മാഡ്‌ന പ്‌റ ദഗദഗാത്ത് കത്തുവ ഉഡുപ്പുന ഇക്കിസി പീലത്തോസു പട്ട്‌ക്ക് തിരിക്കി സൊല്ലി ബ്‌ട്ടാര്.

അപ്പോസുത്തലാര് 3:13

പണ്ട് കാലാത്ത്‌ല നമ്മ് അവുറഗാമ്‌ത്ത്‌മ് ഇസഗാക്ക്‌ത്ത്‌മ് ആക്കോവുത്ത്‌മ് സാമിത്തെ നമ്മ് പാട്ടനാമ് സാമി. അയി സാമി താന് സൊല്ലുവാദ്‌നെല്ല അദേപാസെ ഗേവ ഏസ്സ്‌ന ദൊഡ്ഡവാന് മാഡി ഉജാത്ത്‌നാന്. അയി ഏസ്സ്‌ന നിമ്മ എഗുദാര് അദിഗാരിഗാള്‌ക്ക് പ്‌ഡിത്ത് കൊഡുത്തുറു. പീലത്തോസു അയാള്‌ന ബെ്റ്‌ദെ ബ്‌ഡ്‌ഡൊ എന്റ് മുഡിവു എ്ഡ്‌ത്ത് ഗുഡി നിമ്മ അയാള്‌ന എമാക്ക് ബേ്ഡ എന്റ് പീലത്തോസുക്കു സൊന്നുറു.

മര്‌ക്കോസു 14:65

പഗ്‌ദ്യാള്‌ഗാള് അയാള്‌ക്ക് തുപ്പുനാര്, അവാര് അയാള് കണ്ണ്‌ന കെ്ട്ടി പ്‌ഡികുത്തുലു അയാള്‌ന കുത്തുനാര്. <<നീ ഒന്റു സാമിദാസല്ല? ആര് നിനാന അഡിത്താദ് എന്റ് സൊല്ലു>> എന്റ് അവാര് അയാള്‌ന കേ്ട്ടാര്. കാവഗാറാര് ഏസ്സ്‌ന എ്ഡ്‌ത്ത് പോയി അഡിത്ത്‌പ്‌ഡിത്ത് ഗേന്താര്.

മത്തായി 26:67

അദുക്കുള അവാര് അയാള് മൂഞ്ചിക്ക് തുപ്പുനാര്, പ്‌ഡികുത്തുലു അയാള്‌ന കുത്തുനാര്. ലേസ ആള്‌ഗാള് അയാള് സെ്ഗ്‌ഡ്‌ന അഡിത്ത്:

മത്തായി 16:21

അയി നാള്‌ലിന്ത് ഏസ്സ്: <<എനാക്ക് എര്‌സലേമ്‌ക്ക് പോഡൊ. അദ്‌ല് ബെത്ത് മൂപ്പനാമ്‌ഗാള്‌മ് എഗുദാര് പൂസാരി തലെവാര്‌ഗാള്‌മ് ബേദബാത്ത്യനാമ്‌ഗാള്‌മ് കയിലിന്ത് എഞ്ചോ കജട്ടഗാള് താങ്ക്യ ഇര്‌ക്ക്‌ന്റ്. എനാന കൊല്ല്യാമ് കൊഡുക്കുവാര്. ആന നാന് മൂറാവാദ് നാള് ഉജുര്‌ളാഗുവെ>> എന്റ് സൊല്ലുപഡി നഡാക്ക്‌ന്റവാര്‌ക്ക് സൊല്ല്യ പ്‌ഡിത്താന്.

അപ്പോസുത്തലാര് 2:23

സാമി ഏസ്സ്‌ന എന്ത് ഗേഡൊ എന്റ് മുദാല് താനെ മുഡിവെ്ഡ്‌ത്ത് ഒറേപ്പ് മാഡി ബെത്തിന്ത പാസെ അയാള്‌ന നിമ്മ് കയിക്ക് ഒപ്പുസുനാന്. നിമ്മ അയാള്‌ന കേ്ഡ്‌ഗെ്ട്ടവാര് കയിക്ക് കൊഡുത്തുറു. അവാര് ഏസ്സ്‌ന കുരുസുക്കു ആണി അഡിത്ത് കൊന്റു തള്ള്‌നാര്.

ഓഗന്നാന് 18:35

അദ്‌ക്ക് പീലത്തോസു: <<നാന് ഒന്റു എഗുദാര് ജാദിക്ക് പട്ട ഒരുത്താന? നിന്ന് കൂട്ടാര്‌മ് അവാര് പൂസാരി തലെവാര്‌ഗാള്‌മ്‌ത്തെ നിനാന എന്ന് പട്ട്‌ക്ക് എ്ഡ്‌ത്ത് ബന്ത്‌റ്‌ക്കുവാദ്. നീ എന്ത് ഗേന്തായി?>> എന്റ് കേ്ട്ടാന്.

ഓഗന്നാന് 18:30

അദുക്കുള അവാര്: <<ഇയാള് കുറ്റ ഗേഗാദിന്തദാന എമ്മ ഇയാള്‌ന നിന്ന് പട്ട്‌ക്ക് എ്ഡ്‌ത്ത് ബന്ത്‌റ്‌ക്കമാട്ടേമ്>> എന്റ് സൊന്നാര്.

ഓഗന്നാന് 18:22

ഏസ്സ് ഇത്തെ സൊല്ലുഗാട്ടി സാമിബീ്ഡ് കാവഗാറാര്‌ല് അയാളര്‌ഗെ നിന്റിന്ത ഒരുത്താന്: <<എഗുദാര് ദൊഡ്ഡ പൂസാര്യോഡ ഇത്തേത്തെ ബദ്‌ല് സൊല്ലുവാദ?>> എന്റ് സൊല്ലി ഏസ്സ് സെ്ഗ്‌ഡ്‌ക്ക് ഒന്റു അഡി കൊഡുത്താന്.

ലൂക്കോസു 23:35

ആള്‌ഗാള് ഇദ്‌നെല്ല നോഡികൊണ്ടു അര്‌ഗെ നിന്റിന്താര്. <<ഇയാള് ബേ്റെ ആള്‌ഗാള്‌ന കാപാറ്റ്‌നാന്, സാമി സൊല്ലി ബ്‌ട്ട കാപാറ്റ്‌ന്റവാന് ആന ക്‌റ്‌സ്‌ത്ത് ആയിന്തദാന തനാന താനെ കാപാറ്റുഡൊ>> എന്റ് സൊല്ലി എഗുദാര് തലെവാര്‌ഗാള്‌മ് നാണഗെ്ഡ്‌സ്‌നാര്.

ലൂക്കോസു 23:1

അദ്‌ക്ക് പ്‌റ അദ്‌ലിന്തവാര് ഒട്ടുക്കു കൂഡി ഏസ്സ്‌ന പീലത്തോസു പട്ട്‌ക്ക് എ്ഡ്‌ത്ത് പോയി:

മത്തായി 27:2

പ്‌റ അയാള്‌ന പ്‌ഡിത്ത് കെ്ട്ടി എ്ഡ്‌ത്ത് പോയി റോമ നാഡ് അദിഗാരി പീലത്തോസു കയിക്ക് കൊഡുത്താര്.

ഓഗന്നാന് 18:28

റാവെ താനെ എഗുദാര് തലെവാര്‌ഗാള് ഏസ്സ്‌ന കയ്യപ്പാവു പട്ട്‌ലിന്ത് നാഡ് തലെവാന് കോട്ടേക്ക് എ്ഡ്‌ത്ത് പോനാര്. ആന അവാര് തമ്മ് സട്ട്‌മെ്ട്ട്‌പഡി അയിത്ത്യ പഡാദിര്‌ക്ക്യ ബേ്ണ്ടി കോട്ടെ കുളാക്ക് പോഗാലെ. എന്ത്‌ക്കെന്റ് സൊന്ന അയിത്തപഡാത്തവാര് ആയിന്താത്തെ പെസഗെ സാപ്പാഡ് തിന്ന്യ മുഡിമ്.

മര്‌ക്കോസു 15:1

ബെ്ഡ്യാകാല ജാമാത്ത്‌ല് എഗുദാര് പൂസാരി തലെവാര്‌ഗാള് ദ്‌ഡീരന പോയി എഗുദാര് മൂപ്പനാമ്‌ഗാള്‌നാമ് ബേദബാത്ത്യനാമ്‌ഗാള്‌നാമ് എഗുദ കോഡിദിഗാറാര്‌നാമ് ഒട്ടുക്കു കണ്ട് ഏസ്സ്‌ന എന്ത് ഗേഡൊ എന്റ് സട്ട കെ്ട്ട്‌നാര്. അവാര് സട്ട കെ്ട്ട്‌ന പ്‌റ അയാള്‌ന പ്‌ഡിത്ത് കെ്ട്ടി റോമ നാഡ് അദിഗാരി പീലത്തോസു കയിക്ക് കൊഡുത്താര്.

മത്തായി 20:19

എഗുദാരല്ലാത്ത ജാദിഗാള് കയിക്ക് ബ്‌ട്ട് കൊഡുക്കുവാര്. അവാര് അയാള്‌ന നാണാമ്‌ ഗെ്ഡ്‌സുവാര്, സാട്ടെവാര്‌ല്‌മ് അഡിക്കുവാര്, കുരുസുക്കു സേത്തി ആണിമ് അഡിക്കുവാര്. ആന അയാള് മൂറാവാദ് നാള് അയാള് ഉജുര്‌ളാഗുവാന്.>>

മത്തായി 22:6

മിച്ച ഇന്തവാര് അയാള് അഡിമെഗാള്‌ന പ്‌ഡിത്ത് നാണഗെ്ഡിസി കൊന്റു തള്ള്‌നാര്.

ലൂക്കോസു 18:33

അവാര് അയാള്‌ന സാട്ടെവാര്‌ല് അഡിത്ത്‌മ് ഗേന്ത പ്‌റ കൊല്ലുവാര്. ആന അയാള് മൂറാവാദ് നാള് ഉജുര്‌ളാഗുവാന്>> എന്റ് സൊന്നാന്.

ഓഗന്നാന് 18:32

അവാര് ഇത്തെ സൊല്ലുഗാട്ടി താന് എത്തെ സാവാന് എന്നുവാദ്‌ന പറ്റി ഏസ്സ് സൊന്ന കാര്യ അദേപാസെ നഡാന്ത്‌ദ്.