ലൂക്കോസു 12:32 - സാമി സേദി

³² സ്‌ന്ന ആഡ് കൂട്ടഗാളെ, അഞ്ചദേന്. നിമാന സാമി ആളുവ നാഡ്‌ക്ക് പട്ടവാര് മാഡ്യ ബേ്ണ്ടി നിമ്മ് അപ്പാനായിര്‌ക്കുവ സാമിക്ക് പിര്യപ്‌ഡിത്ത്‌റ്‌ക്ക്‌ന്റ്.

ലൂക്കോസു 12:32 ပူးပေါင်းရင်းမြစ်များ

മത്തായി 14:27

അന്നാല് താനെ ഏസ്സ് അവാര്‌ക്ക്: <<ദയിരപഡ്‌ന്, ഇദ് നാന്‌ത്തെ, അഞ്ചദേന്>> എന്റ് സൊന്നാന്.

മത്തായി 20:16

അത്തെ കഡേസി ബന്തവാര് മുന്ത്‌നവാര് ആവാര്. മുന്നുക്കു ബന്തവാര് പിന്ന്‌ക്കാവാര്.>>

മത്തായി 25:34

അദ്‌ക്ക് പ്‌റ രാജാവു തന്ന് ബല സാരി ഇര്‌ക്ക്‌ന്റവാര്‌ക്ക്: <എന്നപ്പാനോഡിന്ത് ബര കെ്ഡേസിര്‌ക്ക്‌ന്റവാരെ, ഉലഗാന ഉണ്ടാക്ക്‌നാദ്‌ലിന്ത് നിമാക്ക് ബേ്ണ്ടി ഒരിക്കി ബെത്ത്‌റ്‌ക്കുവ സാമി ആളുവ നാഡ്‌ക്ക് ഉരിമെഗാറാരായ ബാന്.

മത്തായി 7:15

<<സാമിനിഗാല് സൊന്റെന്റ് ഉറുട്ടു സൊല്ലുവ സാമിദാസ്‌ഗാള്‌ന സൂസാരിത്ത് ഇര്‌ന്. അവാര് കറ്‌മ്മകറ്‌മ്മ ഇര്‌ക്കുവ കൊറ്യാഡ്‌ഗാള്‌ന പാസെ ബക്‌തിഗാറാരായി നഡിത്ത് കൊണ്ടു നിമ്മ് പട്ട്‌ക്ക് ബന്റാര്. ആന അവാര് കപ്പികൊഡേവ സെന്നായിഗാള്‌ന പാസെത്തെ.

ലൂക്കോസു 10:21

അയി ഗളിഗേല് ഏസ്സ്‌ക്ക് സാമിനിഗാലേ്റി മ്‌ഗ്‌ന്ത പിര്യാത്ത്‌ല് ഇത്തെ പരേസ്‌നാന്: <<അപ്പാ, മേലോഗാക്ക്‌മ് ബൂലോഗാക്ക്‌മ് ആണ്ടവാനായിര്‌ക്ക്‌ന്റവനെ, നീ ഇദ്‌ന അറുവുഗാറാര്‌ക്ക്‌മ് ബുദ്ദിസാലിഗാള്‌ക്ക്‌മ് മറേസി ബെത്ത് സ്‌ന്നമക്കാള്‌ന പാസെ തണിന്ത് നഡാക്ക്‌ന്റവാര്‌ക്ക് കാട്ടി കൊഡുത്ത്‌റ്‌ന്റായി. നേര്‌ത്തപ്പ, അത്തെ ഗേയാത്തെ നിനാക്ക് ആസെ ഇന്താദ്.>>

ഓഗന്നാന് 18:36

അദ്‌ക്ക് ഏസ്സ്: <<നാന് ആളുവ നാഡ് ഈ ഉലഗാക്ക് പട്ടാദല്ല, നാന് ആളുവ നാഡ് ഈ ഉലഗാക്ക് പട്ടാദ് ആയിന്തദാന എനാന എഗുദാര് കയിക്ക് കൊഡുക്കാദിര്‌ക്ക്യ ബേ്ണ്ടി എന്ന് ഗിലാസഗാറാര് എനാക്ക് ബേ്ണ്ടി ജുദ്ദ ഗേന്ത്‌റ്‌ക്കുവാര്. ആന നാന് ആളുവ നാഡ് ഈ ഉലഗാക്ക് പട്ടാദല്ല>> എന്റ് സൊന്നാന്.

അപ്പോസുത്തലാര് 20:28

നിമ്മ നിമാന താനേമ് സൂസാരിത്ത് സാമിനിഗാല് നോഡി നഡാത്ത്യ ബേ്ണ്ടി നിമാക്ക് തന്ത്‌റ്‌ക്കുവ ആള്‌ഗാള്‌നാമ് നിമ്മ പാദ്‌ഗാക്കുഡൊ. ആഡ്‌മേസ്‌ന്റവാന് തന്ന് ആഡ്‌ഗാള്‌ന നോഡുവ പാസെ സാമി തന്ന് സൊന്തമഗാന് ഉജുരുന കൊഡുത്തു ബാങ്കിര്‌ക്കുവ ഏസ്സ്‌ഗാറാര് കൂട്ടന നിമ്മ നോഡി നഡാത്തുഡൊ.

അപ്പോസുത്തലാര് 20:29

നാന് പോന പ്‌റ സെന്നായിഗാള്‌ന പാസെ കപ്പികൊഡേവ ലേസ ആള്‌ഗാള് നിമ്മ് പട്ട്‌ക്ക് ബരുവാര്. സാമിക്ക് ആഡ്‌ഗാളായി ഇര്‌ക്കുവ ആള്‌ഗാള്‌ന അവാര് കെ്ഡ്‌സാദെ ബ്‌ഡമാട്ടാര് എന്റ്‌മ് എനാക്ക് തെരിമ്.

റോമഗാറാര് 6:23

പാവ ഗേവാദ്‌ക്ക് കെ്ഡേക്കുവ കൂലി സാവുത്തെ, സാമി ഗേവ ദാന എന്നുവാദ് നമ്മ് ആണ്ടവാനാന ഏസ്സ് ക്‌റ്‌സ്‌ത്ത്‌ല് കെ്ഡേക്കുവ എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ത്തെ.

1 കൊരിന്ത്യഗാറാര് 1:21

തമാക്കിര്‌ക്കുവ അറുവുലുമു ബുദ്ദില്‌മ് ഉലഗാത്ത്‌ല ആള്‌ഗാള്‌ക്ക് സാമിന നെപ്പ്‌കെ്ഡേസ്യ മുഡ്യാമാട്ട എന്റ് സാമി തന്ന് അറുവുലുമു ബുദ്ദില്‌മ് മുഡിവെ്ഡ്‌ത്താന്. അദ്‌നാലെ ബുദ്ദിഗെ്ട്ട നായ എന്റ് ആള്‌ഗാള് നെനേക്കുവ സേദിന നമ്പുവ ആള്‌ഗാള്‌ന കാപാറ്റ്യ സാമിക്ക് പിര്യ പ്‌ഡിത്ത്‌ദ്.

പിലിപ്പ്യഗാറാര് 2:13

എന്ത്‌ക്കെന്റ് സൊന്ന സാമി ആസെപഡുവാദ്‌ന ഗേയ നിമാക്ക് ആസെ തരുവാദ്‌മ് സാമിത്തെ, അദ്‌ന ഗേയ നിമാക്ക് ബില തരുവാദ്‌മ് സാമിത്തെ.

2 തെസെലോനിക്ക്യഗാറാര് 1:11

അദ്‌നാലെ നിമാന തെരിന്തെ്ഡ്‌ത്ത്‌റ്‌ക്കുവ സാമിക്ക് തഗ്‌ദ്യുള്ളവാരായി സാമി നിമാന കണാക്കാക്കുവ പാസെ നിമ്മ പെ്ളേക്ക്യ ബേ്ണ്ടി എമ്മ ഒപ്പ നിമാക്ക് ബേ്ണ്ടി സാമിക്ക് പരേസ്‌ന്റേമ്. നിമ്മ നല്ലാദ് ഗേയ ആസെപഡുവ എല്ലാ ആസെഗാള്‌നാമ്, നിമ്മ നമ്പിക്കോഡ ഗേവ കാര്യഗാള്‌നാമ് സാമി സക്‌തില് ഗേന്ത് തെഗേക്ക്യ സാമി നിമാന കയിതാങ്കുഡൊ.

2 തെസെലോനിക്ക്യഗാറാര് 1:5

നിമാന സാമി ആളുവ നാഡ്‌ക്ക് തഗ്‌ദ്യുളളവാരായി കണാക്കാക്കുവാന് എന്നുവാദ്‌നത്തെ ഈ പൊറിമേമ് നമ്പിക്കേമ് കാട്ടുവാദ്. അത്തെ സാമി എല്ലാ ആള്‌ഗാള്‌നാമ് നീദ്യോഡ ബിദിക്കുവാന്. സാമി ആളുവ അയി നാഡ്‌ക്ക് ബേ്ണ്ടിത്തെ നിമ്മ ഈ കജട്ടപാഡ്‌ഗാള് പട്ട് കൊണ്ട്‌റ്ക്കുവാദ്.

എവുറായാര് 12:28

അദ്‌നാലെ ഗ്‌ഡ്‌ഗ്‌ഡ ആഡ്‌സ്യ മുഡ്യാത്ത ഒന്റു രാജ്യ നമാക്ക് കെ്ഡേക്കുവാദ്‌നാലെ സാമിക്ക് നമ്മ നണ്ണ്യുള്ളവാര് ആയിര്‌ക്കുഡൊ. അദ്‌താനേമല്ല, സാമിക്ക് മെച്ച്‌പട്ട ദിന്‌സ്‌ല് സാമിന നമ്മ കുമ്മുഡുഡൊ. സാമിക്ക് അഞ്ചിമ് മദ്‌പ്പ് കൊഡുത്തുമു സാമിന കുമ്മുഡുഡൊ.

ആക്കോവു 2:5

എനാക്ക് മെച്ച്‌പ്‌ഡിത്ത ഏസ്സ്‌ഗാറാരെ, നാന് സൊല്ലുവാദ്‌ന സൊക്കാന കേ്ള്‌ന്. ഈ ലോഗാത്ത്‌ല് ഏസ്സ്‌ന നമ്പി പെ്ളേക്കുവ ഏ്ളെഗാള്‌ന സാമി ദൊഡ്ഡവാരായി കണാക്ക് മാഡ്‌ന്റാന്. അത്തവാള്‌ഗാള് സാമ്യോഡ സീവാന്‌ബെത്ത് പെ്ളേക്കുവാദ്‌നാലെ സാമി അവാര്‌ന തന്ന് സൊന്ത മക്കാളായി എ്ഡ്‌ത്ത് ബെക്ക്‌ന്റാന്.

2 പത്ത്‌റോസു 1:11

അത്തെ നമ്മ് ആണ്ടവാന്‌മ് നമാന കാപാറ്റ്‌ന്റവാന്‌മ് ആയിര്‌ക്കുവ ഏസ്സ് ക്‌റ്‌സ്‌ത്ത്‌ത്ത് അളിവില്ലാത്ത നാഡ്‌ക്ക് പോവാദ്‌ക്കുള്ള ഉരിമെ തഡേസില്ലാദെ നിമാക്ക് കെ്ഡേക്ക്‌മ്.

ബെ്ളിപട്ട കാര്യ 1:6

അയാള് നമാന സാമി ആളുവ ആള്‌ഗാള് മാഡിമ് തന്ന് അപ്പാനാന സാമിക്ക് നമാന പൂസാരിഗാള് മാഡിമ് ബെത്ത്‌റ്‌ന്റാന്. അയി ഏസ്സ് ക്‌റ്‌സ്‌ത്ത്‌ക്ക് പേര്‌പെരിമേമ് എല്ലാദ്‌നാമ് ആളുവ അദിഗരാമ് എന്നാല്‌ക്ക്‌മ് ഇര്‌ക്കുഡൊ. ആമേന്.

ബെ്ളിപട്ട കാര്യ 22:5

അദ്‌ല് ഇന്നി ജാമ ഇര്‌ക്കമാട്ട. സാമ്യാന ആണ്ടവാന് അവാര്‌ക്ക് ബ്‌ളാക്ക് ആയിര്‌ക്കുവാദ്‌നാലെ ബ്‌ളാക്ക് ബെ്ള്‌സാഗൊ നേര ബെ്ള്‌സാഗൊ അവാര്‌ക്ക് തേവില്ലെ. അവാര് എന്നാല്‌ക്ക്‌മ് രാജാവുഗാള്‌ന പാസെ ആളുവാര്.