ഓഗന്നാന് 20:26 - സാമി സേദി

²⁶ എ്ട്ട് നാള് കളിന്ത പ്‌റ സൊല്ലുപഡി നഡാക്ക്‌ന്റവാര് പിന്നേമ് ബീ്ഡ്‌കുളാക്ക് കൂഡിന്താര്. അദുക്കുള തോമാസ്‌മ് അവാരോഡൊപ്പ ഇന്തിന്താന്. ബാസ അഡേത്ത്‌റ്‌ക്കാട്ടി ഏസ്സ് ബന്ത് അവാര്‌ക്ക് നഡ്‌ക്കെ നിന്റ് കൊണ്ടു: <<നിമ്മ നിമ്മ്‌ദ്യായി ഇര്‌ന്>> എന്റ് സൊന്നാന്.

ഓഗന്നാന് 20:26 ပူးပေါင်းရင်းမြစ်များ

മത്തായി 17:1

ആറ് നാള് കളിന്ത പ്‌റ ഏസ്സ് പത്ത്‌റോസുനാമ്, ആക്കോവുനാമ്, അയാള് തമ്പി ഓഗന്നാന്‌നാമ് കൂട്ട്യെ്ഡ്‌ത്ത് ഒന്റു ഉജാന്ത ഗുഡ്ഡേക്ക് പോനാന്. അദ്‌ല് അവാര് തനിഗെ ഇന്താര്.

മര്‌ക്കോസു 16:14

കഡേഗല പദ്‌നൊണ്ണു സൊല്ലുപഡി നഡാക്ക്‌ന്റവാര്‌മ് തീനി തിന്റ്‌കൊണ്ടു ഇര്‌ക്കാട്ടി ഏസ്സ് അവാര് കണ്ണ്‌ക്ക് കാട്ട്‌നാന്. താന് ഉജുര്‌ളാഗ്‌ന പ്‌റ തനാന കണ്ണാറ കണ്ടവാര് സൊന്നാദ്‌ന അവാര് നമ്പാത്താദ്‌ക്ക്‌മ് അവാര്‌ക്ക് ഇര്‌ക്കുവ മരനെഞ്ച്‌ന കണ്ട്‌മ് ഏസ്സ് അവാര്‌ന നൊഡിന്താന്.

ലൂക്കോസു 24:36

ഇത്തെ അവാര് റാഡാള് ഇദ്‌ന പറ്റി നായനൊഡിന്ത് കൊണ്ടു ഇര്‌ക്കാട്ടി ഏസ്സ് താന്‌താനെ അവാര്‌ക്ക് നഡ്‌ക്കെ ബന്ത് നിന്റ് അവാര്‌ക്ക്: <<നിമ്മ നിമ്മ്‌ദ്യായി ഇര്‌ന്>> എന്റ് സൊന്നാന്.

ലൂക്കോസു 9:28

ഈ കാര്യഗാള്‌നെല്ല സൊല്ലി തീന്ത് ഒപ്പതപ്പ എ്ട്ട് നാള് കളിന്ത പ്‌റ ഏസ്സ് പത്ത്‌റോസുനാമ്, ഓഗന്നാന്‌നാമ്, ആക്കോവുനാമ് കൂട്ട്യെ്ഡ്‌ത്ത് മലേക്ക് പരേസ്യ പോനാന്.

ഓഗന്നാന് 11:16

അദുക്കുള ദിദിമോസു എന്റ് സൊല്ലുവ തോമാസ്: <<നമ്മാമ് അയാളോഡ സായ പോഗാന്>> എന്റ് തന്നോഡ ഇര്‌ക്കുവ ഏസ്സ് സൊല്ലുപഡി നഡാക്ക്‌ന്റവാര്‌ക്ക് സൊന്നാന്.

ഓഗന്നാന് 14:27

നാന് നിമ്മ് മനേസ്സ്‌ക്ക് നിമ്മ്‌ദി തന്ത് പോന്റെ, ഇത്തവ നിമ്മ്‌ദി എനാക്ക് താനെത്തെ നിമാക്ക് തര്യ മുഡിമ്, ഉലഗാത്ത്‌ലിന്ത് നിമാക്ക് കെ്ഡേക്കുവ നിമ്മ്‌ദിന പാസെ അല്ല നാന് നിമാക്ക് തരുവാദ്, അദ്‌നാലെ നിമ്മ് മനേസ്സ് ബെന്ത്‌ഡ്യ പാങ്കില്ലെ, അര്‌ക്കപഡ്യാമ് പാങ്കില്ലെ.

ഓഗന്നാന് 20:19

ബാരാത്ത്‌ല് ഒണ്ണാവാദ് നാള് സന്ത്യോഡ ഏസ്സ് സൊല്ലുപഡി നഡാക്ക്‌ന്റവാര് ഒന്റായി ബീ്ഡ്‌ല് ഇര്‌ക്കാട്ടി എഗുദാര്‌ക്ക് അഞ്ചി അവാര് ബാസന അഡേത്ത് ഇന്താര്. അദുക്കുള ഏസ്സ് അവാര് പട്ട്‌ക്ക് ബന്ത് നിന്റ്: <<നിമ്മ നിമ്മ്‌ദ്യായി ഇര്‌ന്>> എന്റ് സൊന്നാന്.

ഓഗന്നാന് 20:21

ഏസ്സ് പിന്നേമ് അവാര്‌ക്ക്: <<നിമ്മ നിമ്മ്‌ദ്യായി ഇര്‌ന്, അപ്പാന് സാമി എനാന സൊല്ലി ബ്‌ട്ട പാസെ നാന്‌മ് നിമാന സൊല്ലി ബ്‌ഡ്‌ന്റെ>> എന്റ് സൊന്നാന്.

ഓഗന്നാന് 21:1

അദ്‌ക്ക് പ്‌റ ഏസ്സ് തിവര്യോസു കഡാല് ഓരാത്ത്‌ല് ബെത്ത് തന്ന് സൊല്ലുപഡി നഡാക്ക്‌ന്റവാര് കണ്ണ്‌ക്ക് പിന്നേമ് കാട്ട്‌നാന്. ഈ ദിന്‌സ്‌ല്‌ത്തെ അയാള് അവാര് കണ്ണ്‌ക്ക് കാട്ട്‌നാദ്:

ഓഗന്നാന് 21:14

അത്തെ ഏസ്സ് സത്തവാര്‌ലിന്ത് ഉജുര്‌ളാഗ്‌ന പ്‌റ തന്ന് സൊല്ലുപഡി നഡാക്ക്‌ന്റവാര് കണ്ണ്‌ക്ക് കാട്ട്‌നാദ് ഇദ് മൂറാവാദ് ജമ്പ്‌മ്‌ത്തെ.

അപ്പോസുത്തലാര് 1:3

ഏസ്സ് സത്ത പ്‌റ അയാള് നാപ്പദ് നാള് കുളാക്ക് ഏസ്സ് സൊല്ലുപഡി നഡാക്ക്‌ന്റവാര്‌ക്ക് എഞ്ചോ ഗളിഗെ ബെ്ളിപട്ടാന്. താന് ഉജുരോഡ ഇര്‌ക്ക്‌ന്റേനെന്റ് അവാര്‌ക്ക് സന്തേഗപഡാത്ത ദിന്‌സ്‌ല് സൊക്കാന കാട്ടി കൊഡുത്താന്. അത്തെ അവാര് ഏസ്സ്‌ന കണ്ടാര്. അയാള് അവാരോഡ സാമി ആള്യ പോവാദ്‌ന പറ്റി നായ നൊഡിന്താന്.