ഓഗന്നാന് 14:30 - സാമി സേദി

³⁰ നാന് ഇന്നി നിമ്മോഡ എഞ്ചോ ഗളിഗെ നായനൊഡ്യമാട്ടെ, എന്ത്‌ക്കെന്റ് സൊന്ന ഈ ഉലഗാന ആള്‌ന്റവാന് ബന്റാന്, ആന അയാള്‌ക്ക് എനാന ആള്യ ഒന്റു അദിഗരാമ് ഇല്ലെ.

ഓഗന്നാന് 14:30 ပူးပေါင်းရင်းမြစ်များ

ലൂക്കോസു 1:35

അദുക്കുള സാമിദൂദാന്: <<സാമിനിഗാല് നിനാക്ക് ബര്‌മ്. എല്ലാദ്‌ക്ക്‌മ് ബ്‌ഡ ദൊഡ്ഡവാന് ആയിര്‌ക്കുവ സാമി സക്‌തി നിനാക്ക് ബര്‌മ്. അത്തെ നിനാക്ക് പ്‌റാക്കുവ മഗ സാമിക്ക് ബേ്ണ്ടി അലാക്ക പ്‌റ്‌ത്ത്‌ബെത്തവാന് ആയിര്‌ക്കുവാന്. അയി മഗാന സാമിമഗാന് എന്റ് ബ്‌ളിക്കുവാര്.

ലൂക്കോസു 22:53

നാന് നാള്‌ക്ക്‌മ് സാമിബീ്ഡ്‌ല് നിമ്മോഡൊപ്പ ഇന്തേനല്ല. അദുക്കുളെല്ല നിമ്മ എനാന പ്‌ഡിക്കാലെ. ആന ഇ്റ്‌ട്ട്‌ക്കിര്‌ക്കുവ അദിഗര ആളുവ ഈ സമ്യത്തെ നിമാക്ക് എനാന പ്‌ഡിക്കുവാദ്‌ക്കുള്ള സമ്യ>> എന്റ് സൊന്നാന്.

ഓഗന്നാന് 12:31

ഈ ഉലഗാത്ത്‌ല ആള്‌ഗാള്‌ന സാമി ബിദിക്കുവ ഗളിഗെ ഇന്നാല്‌ത്തെ. ഈ ഉലഗാന ആള്‌ന്റവാന്‌ന സാമി ഇന്നാല് മുഡിക്കി ബ്‌ഡുവാന്.

അപ്പോസുത്തലാര് 1:3

ഏസ്സ് സത്ത പ്‌റ അയാള് നാപ്പദ് നാള് കുളാക്ക് ഏസ്സ് സൊല്ലുപഡി നഡാക്ക്‌ന്റവാര്‌ക്ക് എഞ്ചോ ഗളിഗെ ബെ്ളിപട്ടാന്. താന് ഉജുരോഡ ഇര്‌ക്ക്‌ന്റേനെന്റ് അവാര്‌ക്ക് സന്തേഗപഡാത്ത ദിന്‌സ്‌ല് സൊക്കാന കാട്ടി കൊഡുത്താന്. അത്തെ അവാര് ഏസ്സ്‌ന കണ്ടാര്. അയാള് അവാരോഡ സാമി ആള്യ പോവാദ്‌ന പറ്റി നായ നൊഡിന്താന്.

2 കൊരിന്ത്യഗാറാര് 4:4

ഏസ്സ്‌ന നമ്പാത്തവാര് മനേസ്സ്‌ന ഈ ഉലഗാത്ത്‌ല സാമ്യാന സെയിത്താന് കുറുഡു മാഡിര്‌ന്റാന്. അദ്‌നാലെ സാമി ഉരുവ ആയിര്‌ക്കുവ ക്‌റ്‌സ്‌ത്ത്‌ന പറ്റി സൊല്ലുവ നല്ല സേദിത്ത് മദ്‌പ്പ്‌ന അവാര്‌ക്ക് കാണ്യ മുഡിവാദില്ലെ.

2 കൊരിന്ത്യഗാറാര് 5:21

ക്‌റ്‌സ്‌ത്ത് പാവ ഇല്ലത്തവാന് ആയിന്താന്. നമ്മ ഗേന്ത പാവഗാള്‌നെല്ല സാമി അയാള് തലേക്ക് ഏ്റ്‌സ്‌നാന്. അത്തെ അയാളോഡ രാജി കൂഡിര്‌ക്കുവ പേര്‌ല് സാമി നമാന നേര്‌മെ ഉള്ളവാര് ആയി സേത്തി ബെക്ക്‌ന്റാന്.

എപസോസുഗാറാര് 2:2

അയി ഗളിഗേല് നിമ്മ ഉലഗാത്ത്‌ല് ബേ്റെ ആള്‌ഗാള്‌ന പാസെ സാമി സൊല്ലുപഡിക്ക് നഡാക്കാദെ പെ്ളേത്തിന്ത്‌റ്. എന്ത്‌ക്കെന്റ് സൊന്ന സാമി സൊല്ലുപഡിക്ക് നഡാക്കാത്തവാര്‌ന ഇന്നാല്‌മ് നഡാത്തുവാദ് മാഗെലോഗന ആണ്ട്‌റ്‌ക്കുവ ഗരഗഗാള്‌ത്തെ. ഈ ഗരഗഗാള്‌ത്തെ മുന്നുക്കു നിമ്മ് പെ്ളേപ്പ്‌നാമ് നഡാത്തിന്താദ്.

എപസോസുഗാറാര് 6:12

എത്തെന്റ് സൊന്ന നമ്മ ജുദ്ദ ഗേവാദ് മന്‌സാരോഡല്ല. അദ്‌ക്ക് ബദ്‌ല കണ്ണ്‌ക്ക് കാട്ടാത്ത സെയിത്താന് പട്ടളഗാളോഡാമ് അവാര്‌ക്കിര്‌ക്കുവ അദിഗരഗാളോഡാമ് മാഗേലിന്ത് കൊണ്ടു തമാക്കിര്‌ക്കുവ ഏമാത്തുവ സക്‌തില് ഈ ഉലഗാന നഡാത്തി ബന്റവാരോഡാമ്‌ത്തെ ജുദ്ദ ഗേയ ഇര്‌ക്കുവാദ്.

എവുറായാര് 4:15

നമാക്ക് ഇര്‌ക്കുവ കൊറേവുഗാള്‌ന കണ്ട് കറ്‌മ്മപ്‌ഡിക്കാത്ത ഒന്റു ദൊഡ്ഡ പൂസാരി അല്ല നമാക്ക് ഇര്‌ക്കുവാദ്. അദ്‌ക്ക് ബദ്‌ല എല്ലാ ദിന്‌സ്‌ല്‌മ് നമാന പാസെ സോദണെ പട്ട് ഗുഡി പാവ ഗേഗാത്തവാന് ആയിന്ത ഒന്റു ദൊഡ്ഡ പൂസാരിത്തെ നമാക്ക് ഇര്‌ക്കുവാദ്.

എവുറായാര് 7:26

ഇത്തെ ഒന്റു ദൊഡ്ഡ പൂസാരിത്തെ നമാക്ക് ബേ്ഡ്‌മ്. അയാള് സാമിക്ക് ബേ്ണ്ടി അലാക്ക പ്‌റ്‌ത്ത് ബെത്ത്‌റ്‌ന്റവാന്‌മ്, കുറ്റ ഒന്റുമു സൊല്ല്യ ഇല്ലത്തവാന്‌മ്, പാവ ഇല്ലത്തവാന്‌മ്, പാവ ഗേന്റവാര്‌ലിന്ത് അലാക്ക പ്‌റ്‌ത്ത് ബെത്ത്‌റ്‌ന്റവാന്‌മ്‌ത്തെ. അയാള്‌ക്ക് മേലോഗാത്ത്‌ല് ഉജാന്ത പദാവിപട്ട കെ്ഡേത്ത്‌ദ്.

1 പത്ത്‌റോസു 1:19

ആന അദ്‌ക്ക് ബദ്‌ല മൊണ്ടിമുഡാവൊ, കുറ്റകൊറേവൊ ഇല്ലാത്ത കൊറ്യാഡ് കുട്ടിന പാസെ ഇര്‌ക്കുവ ക്‌റ്‌സ്‌ത്ത്‌ത്ത് ബെലെപെറ്റ സോരെനാലെത്തെ തിരിക്കി എ്ഡ്‌ത്താദെന്റ് നിമാക്ക് തെരിമല്ല.

1 പത്ത്‌റോസു 2:22

<<ഏസ്സ് പാവ ഗേഗാലെ, അയാള് ബായിലിന്ത് ബഞ്ചിക്കുവ നായഗാള്‌മ് ബരാലെ.>>

1 ഓഗന്നാന് 4:4

ആന പ്‌ള്ളെഗാളെ, സാമിനിഗാല്‌ല് സാമിപ്‌ള്ളെഗാള് ആയിര്‌ക്കുവ നിമ്മ അയാള്‌ന പാസെ ഇര്‌ക്കുവ ആള്‌ഗാള്‌ന സോലുസിര്‌ക്ക്‌ന്റ്‌റ്. എന്ത്‌ക്കെന്റ് സൊന്ന നിമ്മോഡിര്‌ക്കുവ സാമിനിഗാല് അവാരോഡിര്‌ക്കുവ നിഗാല്‌ന ബ്‌ഡ ദൊഡ്ഡവാന്‌ത്തെ.

1 ഓഗന്നാന് 5:18

സാമിനിഗാല്‌ല് പ്‌റാന്തവാര് ആര്‌മ് പാവ ഗേന്ത്‌കൊണ്ടേ ഇര്‌ക്കമാട്ടാര്. സാമിമഗാന് ഏസ്സ് ക്‌റ്‌സ്‌ത്ത് അവാര്‌ന സൂസാരിക്ക്‌ന്റാന്. അദ്‌നാലെ എല്ലാ കെ്ട്ട കാര്യഗാള്‌ക്ക്‌മ് പണ്ണാഡ്യായിര്‌ക്കുവ സെയിത്താന്‌ക്ക് അവാര്‌ന അണ്ണ്യ മുഡ്യാമാട്ട.

1 ഓഗന്നാന് 5:19

സാമ്യോഡ എ്ണേവു ബെത്ത്‌റ്‌ക്കുവ നമ്മ സാമി പ്‌ള്ളെഗാളെന്റ്‌മ് സാമിന തെര്യാത്ത ഉലഗാത്ത്‌ല ആള്‌ഗാള് ഒട്ടുക്കു സെ്യ്‌ത്താന് കാല്‌കഡി ഇര്‌ന്റാര് എന്റ്‌മ് നമാക്ക് തെരിമ്.

ബെ്ളിപട്ട കാര്യ 12:9

പിജാദ് എന്റ്‌മ് സെയിത്താന് എന്റ്‌മ് സൊല്ലുവ ബൂമില് ഇര്‌ക്കുവ എല്ലാ ആള്‌ഗാള്‌ന ഏമാത്തുവ അയി ദൊഡ്ഡ പാമ്പ് പള്യ പാമ്പ്‌ത്തെ. അയാള്‌നാമ് അയാളോഡൊപ്പ അയാള് ദൂദാര്‌നാമ് അഡി ബൂമിക്ക് എ്റിന്ത് തള്ള്‌നാര്.