ഓഗന്നാന് 1:13 - സാമി സേദി

¹³ ഉലഗാത്ത്‌ല് മക്കാള്‌മറി പ്‌റാക്കുവ പാസേഗൊ, മന്‌സാന് ആസെപഡി പ്‌റാക്കുവ പാസേഗൊ അല്ല അവാര് പ്‌റാന്ത്‌റ്‌ക്കുവാദ്. സാമിത്തെ അവാര്‌ന പ്‌റാത്തിര്‌ക്കുവാദ്.

ഓഗന്നാന് 1:13 ပူးပေါင်းရင်းမြစ်များ

മത്തായി 3:9

<അവുറഗാമ്‌ത്തെ എമ്മ് പാട്ടാന്> എന്റ് നിമ്മ മനേസ്സ്‌കുളാക്ക് താനെ സൊല്ലി തപ്പിസി കഡാക്ക്യ മുഡിമ് എന്റ് നെനേക്കാദേന്. എന്ത്‌ക്കെന്റ് സൊന്ന ഈ കല്ല്‌ഗാള്‌ലിന്ത് അവുറഗാമ്‌ക്ക് മക്കാള്‌ഗാള്‌ന ഉണ്ടാക്കി കൊഡുക്ക്യ സാമിക്ക് മുഡിമ് എന്റ് നാന് നിമാക്ക് സൊന്റെ.

ഓഗന്നാന് 3:3

അദുക്കുള ഏസ്സ് അയാള്‌ക്ക്: <<നാന് സത്ത്യമായിമ് നിനാക്ക് സൊന്റെ, ഒരുത്താന് മറിസിമ് പ്‌റാക്കാദെ പോന സാമി ആളുവാദ്‌ന കാണ്യ മുഡ്യാമാട്ട>> എന്റ് സൊന്നാന്.

1 കൊരിന്ത്യഗാറാര് 3:6

സാമി കാഡ്‌ന പാസെത്തെ നിമ്മ. അയി കാഡ്‌ക്ക് ബെദേന നാട്ട്‌നവാന്‌ന പാസെത്തെ നാന്, അദ്‌ക്ക് നീര് നലേസ്‌നവാന്‌ന പാസെത്തെ അപ്പലോസു, ആന അയി ബെദേന ബളാത്ത്‌നാദ് സാമിത്തെ.

പിലിപ്പ്യഗാറാര് 2:13

എന്ത്‌ക്കെന്റ് സൊന്ന സാമി ആസെപഡുവാദ്‌ന ഗേയ നിമാക്ക് ആസെ തരുവാദ്‌മ് സാമിത്തെ, അദ്‌ന ഗേയ നിമാക്ക് ബില തരുവാദ്‌മ് സാമിത്തെ.

തീത്തോസു 3:5

നമാന കാപാറ്റ്‌നാന്. നമ്മ ഗേന്ത നല്ല കാര്യഗാള്‌നാലെ അല്ല, സാമിക്ക് ബേ്റ്‌വെന്താദ്‌നാലെത്തെ നമാന കാപാറ്റ്‌നാദ്. സാമി തന്ന് നിഗാല്‌ന ബെത്ത് നമാന പുദ്യ മന്‌സാന്‌മ് മാഡ്‌നാന്, നമ്മ് പാവാന തീത്ത് ബെ്ഡിപ്പ് മാഡി നമാക്ക് മറ്‌പ്‌റാപ്പ്‌മ് തന്താന്.

ആക്കോവു 1:18

താന് ദ്‌ട്ടിസിര്‌ക്കുവ എല്ലാദ്‌ന ബ്‌ഡ നമ്മ ഉജാന്തവാരായി ഇര്‌ക്ക്യ ബേ്ണ്ടി സാമി ആസെപഡ്‌ന്റാന്. അദ്‌നാലെ സാമി തന്ന് സത്ത്യമാന സൊല്ലുസുലാക്കാന നമാക്ക് സൊല്ലി തന്ത് നമാന പുദ്യ മന്‌സാന് മാഡിര്‌ക്ക്‌ന്റാന്.

1 പത്ത്‌റോസു 1:23

അളിന്ത് പോവ അവ്വ്യപ്പാന് മക്കാളായല്ല നിമ്മ മറിസി പ്‌റാന്ത്‌റ്‌ക്കുവാദ്, അളിന്ത് പോഗാത്താദ്‌മ് ഉജുരുള്ളാദ്‌മ് എന്നാല്‌ക്ക്‌മ് ഇര്‌ക്കുവാദ്‌മാന സാമി സൊല്ലുസുലാക്കനാലെത്തെ അളിവില്ലാത്ത അപ്പാന്‌ക്ക് പ്‌ള്ളെഗാളായി മറിസി പ്‌റാന്ത്‌റ്‌ക്കുവാദ്.

1 പത്ത്‌റോസു 1:3

നമ്മ് ആണ്ടവാന് ഏസ്സ് ക്‌റ്‌സ്‌ത്ത് അപ്പാനാന സാമിക്ക് നണ്ണി. ഏസ്സ് ക്‌റ്‌സ്‌ത്ത്‌ന സാവുലിന്ത് ഉജുര്‌ളാക്കി ബെത്ത് ഉജുരുള്ള നെഞ്ചഡേക്കായിമ് നിമാക്ക് ബേ്ണ്ടി മേലോഗാത്ത്‌ല് സൂസാരിത്ത് ബെത്ത്‌റ്‌ക്കുവാദ്‌മ് അളിന്ത് പോഗത്താദ്‌മ്, തുരുമ്പു പ്‌ഡിക്കാത്താദ്‌മാന സൊത്തുക്കു ബേ്ണ്ടിമ് സാമിക്കിര്‌ക്കുവ ദൊഡ്ഡ ഗവനാലെ നിമാന മറിസിമ് പ്‌റാത്തിര്‌ന്റാന്.

1 പത്ത്‌റോസു 2:2

ഒന്റേപെ്ട്ട് തപ്പിസി കഡാക്ക്യ ബേ്ണ്ടി സാമ്യോഡ ബെത്ത്‌റ്‌ക്കുവ നമ്പിക്കേല് ഒറേപ്പുള്ളവാരായി കൊണ്ടു ഇര്‌ക്ക്യ ഇന്നാല് പ്‌റാന്ത പച്ചെപ്‌ള്ളെഗാള്‌ന പാസെ സാമി സൊല്ലുസുലാക്ക എന്നുവ തനി പാല്‌ന താനെ കുഡിക്ക്യ ആസെപഡ്‌ന്.

1 ഓഗന്നാന് 3:9

സാമിപ്‌ള്ളെഗാള് ആയിര്‌ക്ക്‌ന്റവാര് ആര്‌മ് സാമി സട്ടാക്ക് മീ്റി പാവ ഗേന്ത്‌കൊണ്ടേ ഇര്‌ക്കുവാദില്ലെ. എന്ത്‌ക്കെന്റ് സൊന്ന സാമിമഗാന് ഏസ്സ് ക്‌റ്‌സ്‌ത്ത് അവാര് നെഞ്ച്‌ല് ഇര്‌ക്കുവാദ്‌നാലെ അവാര്‌ക്ക് പാവ ഗേന്ത്‌കൊണ്ട്‌റ്‌ക്ക്യ മുഡ്യാമാട്ട.

1 ഓഗന്നാന് 4:7

പൊന്നനാമെ, സീവാന് സാമിലിന്ത് കെ്ഡേക്കുവാദ്‌നാലെ നമ്മ ആങ്കീങ്ക് സീവാന്‌ബെത്ത് നഡാക്കുഡൊ. സീവാന്‌ബെത്ത് നഡാക്ക്‌ന്റവാരെല്ല സാമിനിഗാല്‌ല് പ്‌റാന്തവാര്‌മ് സാമിന തെരിന്റവാര്‌മ്‌ത്തെ.

1 ഓഗന്നാന് 5:1

ഏസ്സ്‌ത്തെ സാവുക്കാളായിന്ത എനാന കാപാറ്റ്‌ന ക്‌റ്‌സ്‌ത്ത് എന്റ് നമ്പി പെ്ളേക്ക്‌ന്റാവാനെല്ല സാമിപ്‌ള്ളേത്തെ. അദേപാസെ അപ്പാന് സാമ്യോഡ സീവാന്‌ബെത്ത് നഡാക്ക്‌ന്റവാനെല്ല സാമി പ്‌ള്ളഗാളോഡാമ് സീവാന്‌ബെത്ത് നഡാക്ക്‌ന്റാന്.

1 ഓഗന്നാന് 5:18

സാമിനിഗാല്‌ല് പ്‌റാന്തവാര് ആര്‌മ് പാവ ഗേന്ത്‌കൊണ്ടേ ഇര്‌ക്കമാട്ടാര്. സാമിമഗാന് ഏസ്സ് ക്‌റ്‌സ്‌ത്ത് അവാര്‌ന സൂസാരിക്ക്‌ന്റാന്. അദ്‌നാലെ എല്ലാ കെ്ട്ട കാര്യഗാള്‌ക്ക്‌മ് പണ്ണാഡ്യായിര്‌ക്കുവ സെയിത്താന്‌ക്ക് അവാര്‌ന അണ്ണ്യ മുഡ്യാമാട്ട.

1 ഓഗന്നാന് 5:4

എന്ത്‌ക്കെന്റ് സൊന്ന സാമി പ്‌ള്ളെഗാളായി പ്‌റാന്തവാരെല്ല സീവാനില്ലാത്ത ഈ ഉലഗാത്ത്‌ല ആള്‌ഗാള്‌ന സോലുസുന്റാര്. സാമിമഗാന് ഏസ്സ് ക്‌റ്‌സ്‌ത്ത്‌മ് ഇത്തേത്തെ സീവാനില്ലാത്ത ഉലഗാത്ത്‌ല ആള്‌ഗാള്‌ന സോലുസുനാദ്. അദ്‌നാലെ ഈ ഏസ്സ്‌ന നമ്പി പെ്ളേക്ക്‌ന്റവാനല്ലാദെ ആര് പിന്നെ ഈ ഉലഗാത്ത്‌ല ആള്‌ഗാള്‌ന സോലുസുവാദ്?