ആക്കോവു 2:6 - സാമി സേദി

⁶ ആന നിമ്മ എന്ത്‌ക്ക് അവാര്‌ന സ്‌ന്നവാരായി നോഡുവാദ്? പണഗാറാര് ആയിര്‌ക്കുവ ആള്‌ഗാള്‌ത്തെ നിമാന കൊഡിമെപഡുസുവാദ്. അവാര്‌ത്തെ നിമ്മ് മുദാല്‌മുമ്പുഗാള്‌നെല്ല ഏമാത്തി എ്ഡ്‌ക്കുവാദ്.

ആക്കോവു 2:6 ပူးပေါင်းရင်းမြစ်များ

1 കൊരിന്ത്യഗാറാര് 11:22

തിന്ന്യാമ് കുഡിക്ക്യാമ് നിമാക്ക് ബീ്ഡില്ലേഗ? ഇല്ലേ, സാമിഗാറാര് കൂട്ടാക്ക് ബെലെ ഇല്ലെന്റ് നെനേത്ത് ഏ്ളെഗാള്‌ന മാനഗെ്ഡ്‌സ്‌ന്റ്‌റ? ഈ കാര്യാത്ത്‌ല് നാന് നിമാന പറ്റി എന്ത് സൊല്ല്യ? നിമാന പറ്റി പെരിമെപഡ്‌ന്റെ എന്റ് സൊല്ല്യാഗ? ഇല്ലെ, ഈ കാര്യാത്ത്‌ല് നാന് നിമാന പറ്റി പെരിമെപഡാഗേ മാട്ടെ.

ആക്കോവു 5:4

നിമ്മ് പട്ട്‌ക്ക് ഗിലാസാക്ക് ബന്തവാര് കൂലിന തീത്ത് കൊഡുക്കത്താദ്‌നാലെ അവാര് ബായി ബ്‌ട്ട് അഗാറ്‌ന്റാര്. അവാര് ബായി ബ്‌ട്ട് അഗാറുവാദ്‌ന ദൊഡ്ഡ പഡേന ബെത്ത്‌റ്‌ക്കുവ ആണ്ടവാന് കേ്ട്ട്‌റ്‌ന്റാന്. അദ്‌ന കേ്ട്ട് ആണ്ടവാന് അവാര്‌ന ദെ്ണ്ടിക്ക്യ ഒരുങ്കിര്‌ന്റാന്.

ആക്കോവു 2:3

നിമ്മ നല്ല സീലെസിലാപ്പ് ഇക്കിര്‌ക്ക്‌ന്റവാന്‌ന നോഡി: <<നീ മുന്നുക്കു ബന്ത് കുക്കാ>> എന്റ്‌മ് എ്ള്‌ക്ക് പ്‌ഡിത്ത സീലെസിലാപ്പ് ഇക്കിര്‌ക്ക്‌ന്റവാന്‌ന നോഡി: <<നീ പിന്ന്‌ക്ക് പോയി ഏദ്‌ക്കാറ്റ കുക്കാ, ഇല്ലപോന എന്ന് കാല്‌കഡി ബന്ത് കുക്കാ>> എന്റ്‌മ് സൊന്നദാന

അപ്പോസുത്തലാര് 17:6

ആന അവാര്‌ന അദ്‌ല് കാണത്താദ്‌നാലെ ആസോനുനാമ് ബേ്റെ ലേസ ഏസ്സ്‌ഗാറാര്‌നാമ് മുജുവോഡ പ്‌ഡിത്ത് പട്ടണ തലെവാര്‌ഗാള് പട്ട്‌ക്ക് ഇ്ള്‌ത്തെ്ഡ്‌ത്ത് ബന്താര്. <<ഉലഗാന ഒട്ടുക്കു കലമ്പാല് മാഡ്‌ന്റവാര് ഈങ്ക്‌മ് ബന്ത്‌റ്‌ന്റാര്.

അപ്പോസുത്തലാര് 13:50

ആന സാമിന കുമ്മുഡിന്ത എഗുദാര് അല്ലാത്ത മദ്‌പ്പ് ഇര്‌ക്കുവ പെ്ണ്ണ്‌മക്കാള്‌നാമ് പട്ടണാത്ത്‌ല ദൊഡ്ഡുദൊഡ്ഡ തലെവാര്‌ഗാള്‌നാമ് എഗുദാര് ഗോളിസി ബ്‌ട്ട് പവുലോസുനാമ് ബറ്‌ണവാസ്‌നാമ് കൊഡിമെപഡിസ്യ പ്‌ഡിത്താര്. അത്തെ അവാര് അയി ദേസാലിന്ത് അവാര്‌ന മുഡുക്കുനാര്.

അപ്പോസുത്തലാര് 8:3

ആന സവുലു ബീ്ഡ് ബീ്ഡ പോയി ഏസ്സ്‌ഗാറാര് കൂട്ടാത്ത്‌ല പെ്ണ്ണ്‌മക്കാള്‌നാമ്, ഗണ്ടാള്‌നാമ് ഇ്ള്‌ത്ത്‌ബലിത്ത് എ്ഡ്‌ത്ത് പോയി ജെയില്‌ക്ക് അഡേത്താന്. അയാള് അത്തെ ഗേന്ത് ഏസ്സ്‌ഗാറാര് കൂട്ടന കെ്ഡിസ്യ ഓരാഡ്‌നാന്.

ആക്കോവു 5:6

എന്ത്‌ക്കെന്റ് സൊന്ന നിമ്മ് മുന്നുക്കു ഒന്റു നായാമ് എ്ഡ്‌ത്ത് സൊല്ല്യ മുഡ്യാത്തവാര്‌ന നിമ്മ കുറ്റ ബിദിത്ത് കൊന്റു കൊലെബാങ്ക്‌ന്ററ്. അവാര് ഒന്റു കുറ്റാമ് ഗേഗാത്തവാരായിന്ത്‌മ് നിമ്മ അവാര്‌ന അത്തെ ഗേന്ത്‌റ്.

അപ്പോസുത്തലാര് 18:12

ഗല്ല്യോനു അഗായ ദേസാക്ക് അദിഗാരി ആയി ആണ്ടിന്താന്. അയി ഗളിഗേല് എഗുദാര് ഒന്റായി എ്ണേന്ത് പവുലോസുന പ്‌ഡിത്ത് റോമ കോഡിദിക്ക് എ്ഡ്‌ത്ത് പോനാര്.

ഓഗന്നാന് 8:49

അദ്‌ക്ക് ഏസ്സ്: <<എനാക്ക് കെ്ട്ടജാദി തട്ടാലെ. നാന് എന്നപ്പാന് സാമിനത്തെ മദ്‌സ്‌ന്റെ. ആന നിമ്മാഗൊ എനാന മദ്‌സുവാദില്ലെ.