എപസോസുഗാറാര് 6:8 - സാമി സേദി

⁸ ഗിലാസഗാറാന് ആനാല്‌മ് സെരി പണ്ണാഡി ആനാല്‌മ് സെരി ഒന്റൊന്റാള്‌മ് അവനവാന് ഗേവ ഗിലാസാന എത്ത്‌റാക്ക് സൊക്കാന ഗേന്റാരൊ അദ്‌ക്ക് തഗ്‌ന്ത കൂലിത്തെ ക്‌റ്‌സ്‌ത്തോഡിന്ത് കെ്ഡേസ്യ പോന്റാര്.

എപസോസുഗാറാര് 6:8 ပူးပေါင်းရင်းမြစ်များ

മത്തായി 16:27

മന്‌സാനായി പ്‌റാന്തവാന് തന്ന് അപ്പാന് സാമിക്ക് ഇര്‌ക്കുവ മദ്‌പ്പ്‌ല് തന്ന് ദൂദാര്‌ഗാളോഡ ബരുവാന്. അദുക്കുള ഒന്റൊന്റാള് ഗേന്ത കാര്യഗാള്‌ക്ക് തഗ്‌ന്ത കൂലി അയാള് കൊഡുക്കുവാന്.

മത്തായി 20:7

അദുക്കുള: <എമാന ആര്‌മ് കൂലിക്ക് ഗിലാസ ഗേയ ബ്‌ളിക്കാലെ> എന്റ് അവാര് സൊല്ലുഗാട്ടി: <നിമ്മാമ് മുന്തിരി ദോട്ടാക്ക് പോനു> എന്റ് സൊന്നാന്.

മത്തായി 5:12

മേലോഗാത്ത്‌ല് സാമി നിമാക്ക് മ്‌ഗ്‌ന്ത കൂലി ബെത്ത്‌റ്‌ക്കുവാദ്‌നാലെ നിമ്മ പിര്യപൊങ്കിമറ്‌ന്ത് നഡാന്. നിമാക്ക് മുദാല് പെ്ളേത്തിന്ത സാമിദാസ്‌ഗാള്‌നാമ് ആള്‌ഗാള് ഇദേപാസെ കൊഡിമെപഡിസിര്‌ക്ക്‌ന്റാര്.>>

മത്തായി 6:1

<<നിമ്മ് സട്ട്‌മെ്ട്ട്‌പഡി ഗേവ കാര്യഗാള്‌ന ആള്‌ഗാള് കാണ്യ ബേ്ണ്ടി നിമ്മ അവാര് കണ്ണ്‌മുന്നുക്കു ഗേഗാദേന്. അത്തെ ഗേന്തദാന മേലോഗാത്ത്‌ല നിമ്മ് അപ്പാന് കയിലിന്ത് നിമാക്ക് കൂലി കെ്ഡേക്കമാട്ട.

മത്തായി 6:4

അന്നാപ്പ്‌ത്തെ അദ് സൂഗാന ഗേവാദാമ്. അത്തെ നിമ്മ സൂഗാന ഗേവാദ്‌ന കാണുവ നിമ്മ് അപ്പാനാന സാമി നിമാക്ക് കൂലി തരുവാന്.>>

ലൂക്കോസു 14:14

അന്നാപ്പ് നീ ബാഗ്യകേ്ട്ടവാന് ആവായി. എന്ത്‌ക്കെന്റ് സൊന്ന നീ അവാര്‌ക്ക് ബിര്‌ന്തട്ട് കൊഡുത്ത പാസെ നിനാക്ക് ബിര്‌ന്തട്ട് തര്യ അവാര് കയില് ഒന്റുമില്ലെ. നേര്‌മെഗാറാര്‌മ് ഉജുര്‌ളാഗുവ ഗളിഗേക്ക് അദുക്കുള്ള കൂലി സാമി നിനാക്ക് തരുവാന്>> എന്റ് സൊന്നാന്.

ലൂക്കോസു 6:35

ആന നിമ്മ് പോട്ടിഗാറാരോഡ നിമ്മ സീവാന്‌ബെത്ത് നഡാക്കുഡൊ. അവാര്‌ക്ക് നിമ്മ നല്ലാദ് ഗേന്ത് കൊഡുനു. തിരിക്കി കെ്ഡേക്ക്‌മ് എന്റ് നെഞ്ചഡെ ബെക്കാദെ നിമ്മ കഡാന് കൊഡുനു. അന്നാപ്പ് നിനാക്ക് കെ്ഡേക്കുവ കൂലി മൊത്തനാക്ക് ഇര്‌ക്ക്‌മ്. നിമ്മ എല്ലാദ്‌ക്ക്‌മ് ബ്‌ഡ ദൊഡ്ഡവാന് ആയിര്‌ക്കുവ സാമിപ്‌ള്ളെഗാള്‌മ് ആവുറു. എന്ത്‌ക്കെന്റ് സൊന്ന സാമി നണ്ണില്ലത്തവാരോഡാമ് കേ്ഡ്‌ഗെ്ട്ടവാരോഡാമ് ഗവ ബെത്ത്‌റ്‌ന്റാന്.

1 കൊരിന്ത്യഗാറാര് 12:13

പല ആള്‌ഗാള് ആയിര്‌ക്കുവ നമ്മൊട്ടുക്കു ഒന്റേ നിഗാല്‌ന കെ്ഡേസി ഒന്റു കൂട്ട ആനാമ്. അയി കൂട്ട എന്നുവാദ് പല മൂട്ടുമുറിഗാള് കൂഡിര്‌ക്കുവ ഒന്റു സരിഗലന പാസെത്തെ. അത്തെ ഒന്റേ നിഗാല്‌ന കെ്ഡേസി പെ്ളേക്കുവ നമ്മ് കൂട്ടാത്ത്‌ല് എഗുദാരൊ, എവനഗാറാരൊ, അഡിമെഗാളൊ, അഡിമ്യല്ലത്തവാരൊ എന്നുവ ബിത്ത്യാസ ഇല്ലെ.

2 കൊരിന്ത്യഗാറാര് 5:10

എന്ത്‌ക്കെന്റ് സൊന്ന ഒന്റൊന്റാള്‌മ് നമ്മ സരിഗലാത്ത്‌ല് ഇര്‌ക്കാട്ടി ഗേന്താദ് കെ്ട്ടാദ് ആനാല്‌മ് സെരി നല്ലാദ് ആനാല്‌മ് സെരി അദ്‌ക്ക് തഗ്‌ന്ത കൂലി കെ്ഡേക്ക്‌മ്. അദ്‌ക്ക് ബേ്ണ്ടി നമ്മ എല്ലാവാര്‌മ് ക്‌റ്‌സ്‌ത്ത് നായ ബിദിക്കുവ പട്ട്‌ക്ക് പോയി നില്ല്യ ബേ്ണ്ടി ബര്‌മ്.

ഗലാത്ത്യഗാറാര് 3:28

നിമ്മൊട്ടുക്കു ക്‌റ്‌സ്‌ത്ത് ഏസ്സോഡ ഒന്റായിര്‌ക്കുവാദ്‌നാലെ എഗുദാരെന്റൊ എഗുദാര് അല്ലാത്ത ജാദിഗാളെന്റൊ, ദൊഡ്ഡവാനെന്റൊ സ്‌ന്നവാനെന്റൊ, ഗണ്ടെന്റൊ പെ്ണ്ണെന്റൊ എന്നുവ ബിത്ത്യാസ ഇല്ലെ.

കൊലേസ്യഗാറാര് 3:11

അത്തെ അയാള് നാഡ്‌ല് എവന നാഡ്‌ഗാറാനൊ എഗുദാര് നാഡ്‌ഗാറാനൊ എന്നുവ ജാദി വിത്ത്യാസില്ലെ. പരിസേദനെ സാത്ത്‌റ ഗേന്തവാരൊ, പരിസേദനെ ഗേഗാത്തവാരൊ എന്നുവ മദ വിത്ത്യാസില്ലെ. പഡിത്തവാനൊ പഡിക്കത്തവാനൊ എന്നുവ അറുവു വിത്ത്യാസാമ് ഇല്ലെ. അഡിമേഗൊ മുദലാള്യൊ എന്നുവ സൊത്തു വിത്ത്യാസാമ് ഇല്ലെ. അദ്‌ല് എല്ലാര്‌ക്ക്‌മ് എല്ലാദ്‌ക്ക്‌മ് ഉജാന്തവനാന ക്‌റ്‌സ്‌ത്ത് താനെത്തെ ഇര്‌ക്കുവാന്.

കൊലേസ്യഗാറാര് 3:24

അത്തെ നേര്‌മോഡ ഗേവ ഗിലാസാക്ക് അയി ആണ്ടവാന്‌ലിന്ത് കൂലി കെ്ഡേക്ക്‌മ് എന്റ് തെരിന്ത് ആണ്ടവാനാന ക്‌റ്‌സ്‌ത്ത്‌ക്ക് ബേ്ണ്ടി നിമ്മ ഗിലാസ ഗേന്.

കൊലേസ്യഗാറാര് 3:25

അയി ആണ്ടവാന് സ്‌ന്നവാനൊ ദൊഡ്ഡവാനൊ എന്റ് നോഡുവാദില്ലെ. അദ്‌നാലെ നേര്‌മോഡ ഗേന്റവാന്‌ക്ക് അദ്‌ക്ക് തഗ്‌ന്ത കൂലി കെ്ഡേക്കുവ പാസെ നേര്‌മോഡ ഗേഗാത്തവാന്‌ക്ക്‌മ് അദ്‌ക്ക് തഗ്‌ന്ത ദെ്ണ്ടണെ ആണ്ടവാന്‌ലിന്ത് കെ്ഡേക്ക്‌മ്.

എവുറായാര് 10:35

അദ്‌നാലെ നിമാക്ക് മുദാല് ഇന്ത ദയിരന നിമ്മ കയി ബ്‌ഡാദേന്. എന്ത്‌ക്കെന്റ് സൊന്ന അദ്‌ക്ക് മ്‌ഗ്‌ന്ത കൂലി ഇര്‌ക്ക്‌ന്റ്.

എവുറായാര് 11:26

മിസ്‌റേമ് നാഡ്‌ല എല്ലാ സൊത്തു മുദാല്‌ഗാള്‌ന ബ്‌ഡ ക്‌റ്‌സ്‌ത്ത്‌ക്ക് ബേ്ണ്ടി കജട്ട താങ്കുവാദ്‌ത്തെ ബെലെപെറ്റാദ് എന്റ് മോസെ നെനേത്താന്. എന്ത്‌ക്കെന്റ് സൊന്ന സാമി അയാള്‌ക്ക് കൊഡുക്കുവെ എന്റ് സൊല്ലിന്ത കൂലിക്ക് ബേ്ണ്ടി മോസെ കാത്തിന്താന്.