കൊലേസ്യഗാറാര് 3:10 - സാമി സേദി

¹⁰ ഏസ്സ്‌ന ഉജുര്‌ളാക്ക്‌ഗാട്ടി തന്ന് നാഡ്‌ല് പെ്ളേക്കുവാദ്‌ക്ക് തഗ്‌ന്ത ഉരുവാത്ത്‌ല് നിമാനാമ് ഉജുര്‌ളാക്ക്‌നാന്. അദ്‌നാലെ അദ്‌ക്ക് തഗ്‌ന്ത ഗുണാത്ത്‌ല് നിമ്മ പെ്ളേന്.

കൊലേസ്യഗാറാര് 3:10 ပူးပေါင်းရင်းမြစ်များ

ഓഗന്നാന് 17:3

സത്ത്യമാന ഒന്റേ ഒന്റു സാമ്യായിര്‌ക്കുവ നിനാനാമ്, നീ സൊല്ലി ബ്‌ട്ട്‌റ്‌ക്കുവ ഏസ്സ് ക്‌റ്‌സ്‌ത്ത്‌നാമ് തെരിവാദ്‌ത്തെ എന്നാല്‌ക്ക്‌മ് ഇര്‌ക്കുവ പെ്ളേപ്പ്.

റോമഗാറാര് 12:2

ബേ്റെ ആള്‌ഗാള്‌ന പാസെ നിമ്മ പെ്ളേക്കാദെ സാമി കണ്ണ്‌ക്ക് നല്ലാദ്‌മ് മെച്ച്‌പ്‌ഡിത്താദ്‌മ് നേര്‌മെ ഉള്ളാദ്‌മാന കാര്യഗാള് എന്തെന്റ് നെപ്പ്‌കെ്ഡേസ്യ ബേ്ണ്ടി നിമ്മ് മനേസ്സ്‌ന മാറ്റ്യ നിമാന സാമി കയിക്ക് ഒപ്പിസി കൊഡുനു.

റോമഗാറാര് 13:12

ഇ്റ്‌ട്ട് ബെ്ഡ്യ പക്ക ആയിര്‌ക്ക്‌ന്റ്. അദ്‌നാലെ ഇ്റ്‌ട്ട്‌ക്ക് എ്ണേന്ത കാര്യഗാള് ഗേവാദ്‌ന തള്ളി ബെ്ള്‌സാക്ക് എ്ണേന്ത കാര്യഗാള്‌ന ഗേന്.

റോമഗാറാര് 13:14

ആണ്ടവാന് ഏസ്സ് ക്‌റ്‌സ്‌ത്ത്‌ക്ക് ഇര്‌ക്കുവ ഗുണഗാള് താനെ ഉള്ളവാരായി നഡാന്. സരിഗല ആസെപഡുവ കെ്ട്ട ആസെഗാള്‌ന ഗേയ ബേ്ണ്ടി അദ്‌ക്കായി നെനേക്കാദേന്.

റോമഗാറാര് 6:4

അത്തെ അയാള് സാവുക്കു എ്ണേന്തവാരാന മുളുക്കാത്ത്‌ല് അയാളോഡൊപ്പ താനെ നമാന മഡെ ബെ്ട്ടി പാത്ത്‌നാര്. അത്തെ ക്‌റ്‌സ്‌ത്ത് സത്ത് അപ്പാന് സാമിക്കിര്‌ക്കുവ മ്‌ഗ്‌ന്ത സക്‌തില് ഉജുര്‌ളാഗി അയാള്‌ക്ക് പുദ്യ പെ്ളേപ്പ് കെ്ഡേത്ത പാസെ നമാക്ക്‌മ് പുദ്യ പെ്ളേപ്പ് കെ്ഡേക്ക്യ ബേ്ണ്ടിത്തെ.

റോമഗാറാര് 8:29

എന്ത്‌ക്കെന്റ് സൊന്ന, സാമി താന് മുന്നുക്കെ തെരിന്തിന്തവാര്‌ന തന്ന് മഗാന്‌ക്ക് ഇര്‌ക്കുവ ഉരുവാന പാസെ ആയ ബേ്ണ്ടി സാമി അവാര്‌ന അലാക്ക പ്‌റ്‌ത്ത് ബെത്ത് അവാര്‌ക്ക് തന്ന് മഗാന്‌ന തലെകോഡി അണ്ണാന് മാഡ്‌നാന്.

2 കൊരിന്ത്യഗാറാര് 3:18

ഇത്തെ നമാന മറേത്ത്‌റ്‌ക്കുവ മറെന ആണ്ടവാന് ജറേത്ത് തള്ള്‌ന്റാന്. അത്തെ നമ്മ അയാള്‌ന സൊക്കാന നെപ്പ്‌കെ്ഡേസി കൊണ്ടു മദ്‌പ്പ്‌ക്ക് മേല് മദ്‌പ്പുള്ളവാരായി അയാള് ഉരുവാന പാസെ ആയി കൊണ്ടു ഇര്‌ക്ക്‌ന്റാമ്. ഇത്തെ നമാന മാഡുവാദ് ആണ്ടവാന് നിഗാല്‌ത്തെ.

2 കൊരിന്ത്യഗാറാര് 4:16

അദ്‌നാലെ എമ്മ ദയിര ഉള്ളവാര്‌ത്തെ. ഈ ഉലഗാത്ത്‌ല എമ്മ് സരിഗല നരാഗി പോനാല്‌മ് എമ്മ് നിഗാല് കുട്ടി നാള്‌ക്ക്‌മ് ബിലപട്ട്‌കൊണ്ടു ഇര്‌ക്ക്‌ന്റ്.

2 കൊരിന്ത്യഗാറാര് 4:6

<<ഇ്റ്‌ട്ട്‌ലിന്ത് ബെ്ള്‌സ ബരുഡൊ>> എന്റ് സൊന്ന സാമി താനെത്തെ ഈ ബെ്ള്‌സാന എമ്മ് മനേസ്സ്‌ക്ക് തന്താദ്. അദ്‌നാലെത്തെ ഏസ്സ് ക്‌റ്‌സ്‌ത്ത് മൂഞ്ചിലിര്‌ക്കുവ സാമി മദ്‌പ്പ്‌ത്ത് അറുവു എമാക്ക് കെ്ഡേത്താദ്.

2 കൊരിന്ത്യഗാറാര് 5:17

ഒരുത്താന് ക്‌റ്‌സ്‌ത്തോഡ ഒന്റായി എ്ണേന്ത അയാള് പുദ്യാദായി ദ്‌ട്ട്‌സ്‌നവാന് ആയിര്‌ക്ക്‌ന്റാന്. പള്യാദെല്ല ഒയിന്ത് പോയി പുദ്യ പെ്ളേപ്പ് തുഡാങ്കിര്‌ക്ക്‌ന്റ്.

ഗലാത്ത്യഗാറാര് 3:27

ക്‌റ്‌സ്‌ത്ത് ഏസ്സോഡ ഒന്റായി എ്ണേയ നിമ്മ നീര്‌ക്ക് മുളിഗി ഇ്ളാഗ്‌ഗാട്ടി നിമ്മ ക്‌റ്‌സ്‌ത്ത്‌ന പാസെ ആയിര്‌ക്ക്‌ന്റ്‌റ്.

ഗലാത്ത്യഗാറാര് 6:15

ഒരുത്താന് പരിസേദനെ സാത്ത്‌റ ഗേവാദൊ ഗേഗാദിര്‌ക്കുവാദൊ അല്ല ദൊഡ്ഡ കാര്യ. അദ്‌ക്ക് ബദ്‌ല സാമി പുദ്യ പെ്ളേപ്പ്‌ന അവാന്‌ക്ക് കൊഡുത്താദ്‌ത്തെ ദൊഡ്ഡ കാര്യ.

എപസോസുഗാറാര് 2:10

ആന ക്‌റ്‌സ്‌ത്ത് ഏസ്സ് നല്ല കാര്യഗാള് ഗേന്ത പാസെ നമ്മാമ് നല്ല കാര്യഗാള് ഗേയ ബേ്ണ്ടിത്തെ ക്‌റ്‌സ്‌ത്ത് ഏസ്സോഡൊപ്പ സാമി നമാനാമ് പുദ്യ മന്‌സാര് മാഡ്‌നാദ്. ഇത്തെ നമ്മ നല്ല കാര്യഗാള് ഗേന്ത് പെ്ളേക്കുഡൊ എന്റ് സാമി മുദാല് താനെ നെനേത്തിന്താന്.

കൊലേസ്യഗാറാര് 3:12

അദ്‌നാലെ സാമി നിമ്മോഡ സീവാന്‌ബെത്ത് നിമാന സാമി തനാക്ക് മെച്ച്‌പ്‌ഡിത്തവാര്‌മ്, സാമിക്ക് പട്ടവാര്‌മ്, ആയി തെരിന്തെ്ഡ്‌ത്താദ്‌നാലെ ക്‌റ്‌സ്‌ത്ത്‌ക്ക് ഇര്‌ക്കുവ ഗുണ ഉള്ളവാരായി നിമ്മ ബേ്റ്‌വേന്റവാര്‌മ്, ഗവപഡ്‌ന്റവാര്‌മ്, തണിമോഡിര്‌ന്റവാര്‌മ്, മര്യാദോഡ നഡാക്ക്‌ന്റവാര്‌മ്, പൊറിമുള്ളവാര്‌മ് ആയിര്‌ക്കുഡൊ.

കൊലേസ്യഗാറാര് 3:14

ഈ കാര്യഗാളെല്ല ഗേന്ത് നഡാക്കുവാദല്ലാദെ താനെ നിമ്മ സീവാന്‌ബെത്ത് നഡാക്ക്‌ന്റവാര് ആയിര്‌ന്. എന്ത്‌ക്കെന്റ് സൊന്ന സീവാന്‌ത്തെ എല്ലാ കാര്യഗാള്‌നാമ് നലമായി ഒന്റുക്കു സേത്തുവാദ്.

പിലെമോനു 1:6

ഏസ്സ്‌ന നമ്പുവാദ്‌നാലെ നമാക്ക് ബേ്റെ ഏസ്സ്‌ഗാറാരോഡിര്‌ക്കുവ ഒത്തിമെന നമ്മ ഗേവ കാര്യഗാള്‌ല് ഗേന്ത് കാട്ടുഡൊ എന്റ് നാന് പരേസ്‌ന്റെ. അത്തെ ഗേന്ത് കാട്ട്‌ഗാട്ടി ക്‌റ്‌സ്‌ത്തോഡ ഒന്റായി പെ്ളേക്കുവാദ്‌നാലെ കെ്ഡേക്കുവ എല്ലാ നല്ല കാര്യഗാള്‌ന പറ്റി നമാക്ക് നല്ല അറുവു കെ്ഡേക്ക്‌മ്.

1 ഓഗന്നാന് 2:3

നമ്മ അയാള് സട്ടാക്ക് കെ്ട്ട്‌പട്ട് നഡാക്ക്‌ന്റവാര് ആയിന്തദാന നമ്മ അയാളോഡ എ്ണേവു ബെത്ത്‌റ്‌ക്ക്‌ന്റാമ് എന്റ് നമാക്ക് തെരിമ്.

1 ഓഗന്നാന് 2:5

ആന ആരാറ്റ സാമി സൊല്ലുപഡി നഡാക്ക്‌ന്റവാന് ആയിന്തദാന നേര്‌മായിമ് അയാള് സാമ്യോഡ ഉജുരുക്കുജുര സീവാന്‌ബെത്ത്‌റ്‌ന്റാന്. അയാള് സാമ്യോഡ എ്ണേവു ബെത്ത്‌റ്‌ന്റാന് എന്റ് ഇദ്‌ന നോഡുന തെരിമ്.

ബെ്ളിപട്ട കാര്യ 21:5

കുറിഞ്ചില് കുക്കാന്ത്‌റ്‌ന്റവാന്, <<ഇദാ, നാന് എല്ലാദ്‌നാമ് പുദ്യാദ് മാഡ്‌ന്റെ>> എന്റ് സൊന്നാന്. പിന്നേമ് അയാള്, <<ഇദ്‌ന എ്ള്‌ദ്, എന്ത്‌ക്കെന്റ് സൊന്ന ഈ നായഗാള് സത്ത്യാമ് നമ്പ്യ മുഡിവാദ്‌മ്‌ത്തെ>> എന്റ് സൊന്നാന്.