അപ്പോസുത്തലാര് 9:22 - സാമി സേദി

²² ആന മുദാലിന്താദ്‌ന ബ്‌ഡ നല്ല സക്‌ത്യോഡ സവുലു ഈ സേദിന സൊന്നാന്. അയാള് ദമാസ്‌കോസുല എഗുദാര്‌ക്ക് ഏസ്സ്‌ത്തെ ക്‌റ്‌സ്‌ത്ത് എന്റ് സൊന്നാന്. അത്തെ സൊല്ലി അയാള് എഗുദാര്‌ ബായിന അഡാക്ക്‌നാന്.

അപ്പോസുത്തലാര് 9:22 ပူးပေါင်းရင်းမြစ်များ

അപ്പോസുത്തലാര് 18:5

സീലാസ്‌മ് തിമിത്തോസുമു മക്കെദോന്യാലിന്ത് ബന്താര്. അദ്‌ക്ക് പ്‌റ പവുലോസു ഏദ്‌ഗളിഗേമ് നല്ല സേദിന സൊല്ല്യ പ്‌ഡിത്താന്. അത്തെ അയാള് ഏസ്സ്‌ത്തെ സെരിക്ക്‌മ് ക്‌റ്‌സ്‌ത്ത് എന്റ് എഗുദാര്‌ക്ക് സൊക്കാന കാട്ടി കൊഡുത്താന്.

ലൂക്കോസു 21:15

എന്ത്‌ക്കെന്റ് സൊന്ന നിമ്മ് പോട്ടിഗാറാര് ആര്‌ക്ക്‌മ് മുട്ട്യാമ് തിരിക്കി സൊല്ല്യാമ് മുഡ്യാത്ത ദിന്‌സ്‌ല് സൊല്ല്യ മുഡിവ നായഗാള്‌മ് ബുദ്ദിമ് നാന് നിമാക്ക് തരുവെ.

1 കൊരിന്ത്യഗാറാര് 1:27

ആന അറിവാളിഗാള് എന്റ് നെനേക്ക്‌ന്റവാര്‌ന നാണഗെ്ഡിസ്യ ബേ്ണ്ടി സാമി മന്‌സാര് കണ്ണ്‌ക്ക് ബുദ്ദിഗെ്ട്ടാദ്‌മ് അറുവുഗെ്ട്ടാദ്‌മ് ആനാദ്‌ന തെരിന്തെ്ഡ്‌ത്താന്. സക്‌തി ഇര്‌ക്ക്‌ന്റവാര് എന്റ് നെനേക്ക്‌ന്റവാര്‌ന നാണഗെ്ഡിസ്യ ബേ്ണ്ടി മന്‌സാര് കണ്ണ്‌ക്ക് സക്‌തി ഇല്ലത്താദ്‌ന സാമി തെരിന്തെ്ഡ്‌ത്താന്.

അപ്പോസുത്തലാര് 28:23

അവാര് പവുലോസോഡ നായനൊഡ്യ ഒന്റു നാള് സൊല്ലി ബെത്താര്. അത്തെ അയി നാള് മൊത്തന എഗുദാര്‌ഗാള് പവുലോസു ഇര്‌ക്കുവ പട്ട്‌ക്ക് ബന്താര്. റാവെതാനിന്ത് സന്ത്യോഡ മാട്ട്‌ക്ക് സാമി ആള്യ പോവ കാലന പറ്റി അവാര്‌ക്ക് സൊക്കാന സൊല്ലി കൊഡുത്താന്. മോസെ സട്ടാത്ത്‌ല്‌മ് സാമിദാസ്‌ഗാള് എ്ള്‌ദി ബെത്ത്‌റ്‌ക്കുവ ബൊക്കുലുമു സൊല്ലിര്‌ക്കുവ കാര്യഗാള്‌ന സൊല്ലി കൊഡുത്തു കൊണ്ടു ഏസ്സ് ആര് എന്റ് അവാര്‌ക്ക് തെ്ള്‌വു മാഡി കൊഡുത്താന്.

പിലിപ്പ്യഗാറാര് 4:13

ക്‌റ്‌സ്‌ത്ത് എനാന ബിലപഡുസുവാദ്‌നാലെ ഇത്തെ ബരുവ ഏദ് കാര്യഗാള്‌ക്ക്‌മ് നല്ല ദിന്‌സ്‌ല് ഒത്തുപട്ട് പോയ എനാക്ക് മുഡിമ്.

അപ്പോസുത്തലാര് 17:3

ക്‌റ്‌സ്‌ത്ത് കജട്ട പഡുഡൊ എന്റ്‌മ് സാവുലിന്ത് ഉജുര്‌ളാഗുഡൊ എന്റ്‌മ് അവാര്‌ക്ക് സൊക്കാന സൊല്ലി കൊഡുത്താന്. <<നാന് നിമാക്ക് സൊല്ലുവ ഈ ഏസ്സ്‌ത്തെ ക്‌റ്‌സ്‌ത്ത്>> എന്റ്‌മ് പവുലോസു അവാര്‌ക്ക് കാട്ടി കൊഡുത്താന്.

അപ്പോസുത്തലാര് 9:20

അദ്‌ക്ക് പ്‌റ അയാള് ഏസ്സ്‌ത്തെ സാമിമഗാന് എന്റ് എഗുദാര് പരേസുവ ബീ്ഡ്‌ക്ക്‌റാഗ പോയി സൊല്ല്യ പ്‌ഡിത്താന്.

അപ്പോസുത്തലാര് 9:21

അയാള് നായന കേ്ട്ടവാര്‌ഗാള് ഒട്ടുക്കു അദിസ്യപട്ട് കൊണ്ടു: <<എര്‌സലേമ്‌ല് ഏസ്സ്‌ന കുമ്മുഡുന്റവാര്‌ന ഒട്ടുക്കു കൊന്റിന്താദ് ഇയാള്‌ത്തേഗൊ? അത്തെ ഇദ്‌ല് ഏസ്സ്‌ന കുമ്മുഡുന്റവാര്‌ന പ്‌ഡിത്ത് കെ്ട്ടി എഗുദാര് പൂസാരിഗാള് തലെവാര് പട്ട്‌ക്ക് എ്ഡ്‌ത്ത് പോയല്ല ഇയാള് ബന്താദ്?>> എന്റ് സൊന്നാര്.

അപ്പോസുത്തലാര് 9:23

എഞ്ചോ നാള് കളിന്ത പ്‌റ എഗുദാര് ഒന്റായി എ്ണേന്ത് സവുലുന കൊല്ല്യ സട്ട കെ്ട്ട്‌നാര്.

അപ്പോസുത്തലാര് 9:27

അദുക്കുള ബറ്‌ണവാസ് എന്നുവ ഒന്റൊരുത്താന് ബന്ത് സവുലുക്കു തൊണെ നിന്റ് അപ്പോസുത്തലാര് പട്ട്‌ക്ക് കൂട്ടി പോനാന്. പ്‌റ സവുലു ആണ്ടവാന്‌ന കണ്ടാദ്‌നാമ്, ആണ്ടവാന് അയാളോഡ നായ നൊഡിന്താദ്‌നാമ്, ദമാസ്‌കോസുലു അയാള് ഏസ്സ്‌ന പറ്റി ദയിരത്തോഡ സൊന്നാദ്‌നാമ് ബറ്‌ണവാസ് അപ്പോസുത്തലാര്‌ക്ക് സൊക്കാന സൊന്നാന്.

ഗലാത്ത്യഗാറാര് 1:18

മൂറു ബര്‌സ്സ കളിന്ത പ്‌റ പത്ത്‌റോസുന പളാക്കപഡ്യ നാന് എര്‌സലേമ് പട്ടണാക്ക് പോനെ. പദിനിഞ്ച്‌നാള് നാന് അയാളോഡ അദ്‌ല് തങ്ക്‌നേന്.

1 തിമിത്തോസു 1:12

തന്ന് ഗിലാസാന നാന് ഗേവേനെന്റ് നമ്പി എനാന തന്ന് ഗിലാസാക്ക് ബേ്ണ്ടി എ്ഡ്‌ത്ത് ബെത്താദ്‌ക്ക് നാന് നമ്മ് ആണ്ടവാന് ക്‌റ്‌സ്‌ത്ത് ഏസ്സ്‌ക്ക് നണ്ണി സൊന്റെ. അയി ഗിലാസ ഗേയ എനാന ബിലപഡ്‌സ്‌നാദ്‌ക്ക്‌മ് നണ്ണി സൊന്റെ.