അപ്പോസുത്തലാര് 28:2 - സാമി സേദി

² അദ്‌ലിന്തവാര്‌ക്ക് എമാന കാണ്‌ഗാട്ടി തീയായി ബേ്റ്‌വെന്ത്‌ദ്. അയി ഗളിഗെ മഗെ കാല ആയിന്താദ്‌നാലെ എമാക്ക് നല്ല സളി പ്‌ഡിത്തിന്ത്‌ദ്. അദ്‌നാലെ അവാര് എമാന ബ്‌ളിത്ത് തീബെ്ണ്ടിക്കി കുക്കാസ്‌നാര്.

അപ്പോസുത്തലാര് 28:2 ပူးပေါင်းရင်းမြစ်များ

മത്തായി 10:42

എന്ന് സൊല്ലുപഡി നഡാക്ക്‌ന്റവാന് എന്റ് സൊല്ലി ഈ ഏ്ളെഗാള്‌ല് ഒരുത്താന്‌ക്ക് ഒന്റു തൊട്ടി ഗെ്ളിമാന് നീര് കൊഡുക്കുന്റവാന്‌ക്ക് അദുക്കുള്ള കൂലി കെ്ഡേക്കാദെ പോഗമാട്ട എന്റ് നാന് സത്ത്യമായി നിമാക്ക് സൊന്റെ.>>

ഓഗന്നാന് 18:18

അയി നാള് സളി പ്‌ഡിത്തിന്താദ്‌നാലെ ഗിലാസഗാറാര്‌മ് സാമിബീ്ഡ് കാവഗാറാര്‌മ് തീക്കി അദ്‌ക്ക് സുറ്റീല് നിന്റ് തീ കായിന്ത് കൊണ്ടു ഇന്താര്. പത്ത്‌റോസുമു അവാരൊപ്പ നിന്റ് തീ കായിന്ത് കൊണ്ടിന്താന്.

അപ്പോസുത്തലാര് 27:3

മറ്‌നാള് എമ്മ സീദോനു പട്ടണാക്ക് എജ്ജ്‌നേമ്. ജൂല്യാസ്‌ക്ക് പവുലോസുന ബേ്റ്‌വെന്താദ്‌നാലെ പവുലോസുക്കു അയാള് എ്ണേവുഗാറാര്‌ന പോയി കാണ്യാമ് അയാള് എജേവുഗാറാര്‌ക്ക് പവുലോസു കാര്യഗാള്‌ന നോഡ്യാമ് ബ്‌ട്ടാന്.

അപ്പോസുത്തലാര് 28:3

പവുലോസു പോയി മൊത്തന സുള്ള പൊറിക്കി ബന്ത് തീക്ക് ഇക്ക്‌നാന്. അദുക്കുള സൂഡു തട്ടി അദ്‌ലിന്ത ബിര്യാന് പാമ്പ് ബെ്ളിഗെ കഡാന്ത് പവുലോസു കയിന കഡിത്തിന്ത്‌ദ്.

അപ്പോസുത്തലാര് 28:4

അയി പാമ്പ് അയാള് കയില് നേന്റ്‌ര്‌ക്കുവാദ്‌ന അയി നാഡ്‌ലവാര് കണ്ടാര്. അദുക്കുള അവാര്: <<ഇയാള് ഒന്റു കൊലെഗാറാന്‌ത്തെ, അദ്‌ക്ക്‌ത്തെ കഡാല്‌ലിന്ത് തപ്പിസി കഡാന്ത് ഗുഡി ആള്‌ഗാള് ഗേവ പാവഗാള്‌ക്ക് ദെ്ണ്ടണെ കൊഡുക്കുവ അമ്മ സാമി ഇയാള്‌ന പെ്ളേക്ക്യ ബ്‌ഡമാട്ടെന്റ്‌ര്‌ന്റ>> എന്റ് തമ്മ തമ്മ സൊന്നാര്.

റോമഗാറാര് 1:14

അറുവിര്‌ക്കുവ എവനഗാറാര്‌ക്ക്‌മ് അറുവില്ലാത്ത ബറ്‌ബറ ജാദിഗാറാര്‌ക്ക്‌മ് പഡിപ്പുള്ളവാര്‌ക്കമ് പഡിപ്പില്ലത്തവാര്‌ക്ക്‌മ് നല്ല സേദിന സൊല്ല്യ നാന് കഡാമെ പട്ടവാന്‌ത്തെ.

റോമഗാറാര് 14:1

നിമ്മ് കൂട്ടാത്ത്‌ല് നമ്പിക്കേല് ഒറേക്കത്തവാന്‌ന തള്ളാദേന്. അയാള്‌ക്ക് സൊല്ല്യ ഇര്‌ക്കുവ നായന പറ്റി നിമ്മ അയാളോഡ തറ്‌ക്കദേന്.

റോമഗാറാര് 14:3

എല്ലാദ്‌നാമ് തിന്റവാന് എല്ലാദ്‌നാമ് തിന്നത്തവാന്‌ന ബെലെ ഇല്ലത്തവനായി കാണദേന്. എല്ലാദ്‌നാമ് തിന്നത്തവാന് എല്ലാദ്‌നാമ് തിന്റവാന്‌ന കുറ്റ ബിദിക്ക ബേ്ഡ. എന്ത്‌ക്കെന്റ് സൊന്ന സാമി അയാള്‌നാമ് തങ്കാരിത്തിര്‌ക്ക്‌ന്റാനല്ല.

റോമഗാറാര് 2:27

പരിസേദനെ സാത്ത്‌റ ഗേഗാത്തവാന് സാമി സട്ടപഡി നഡാക്ക്‌ന്റാന്. ആന സാമിസട്ട പഡി കെ്ഡേസിര്‌ന്റവാന്‌മ് പരിസേദനെ സാത്ത്‌റ ഗേന്തിര്‌ന്റവാന്‌മ് ആന നീ സാമിസട്ട പഡി നഡാക്കുവാദില്ലെ. അത്ത്യാന പരിസേദനെ സാത്ത്‌റ ഗേഗാത്ത എഗുദനല്ലാത്ത അയാള് നിനാന കുറ്റ ബിദിക്കാദെ ഇര്‌ക്കുവാന?

1 കൊരിന്ത്യഗാറാര് 14:11

എനാക്ക് തെര്യാത്ത നായാത്ത്‌ല് ഒരുത്താന് നായനൊഡിവാദ് എനാക്ക് നെപ്പ് കെ്ഡേക്കാദെ പോന അയാള് എനാക്ക് ബെ്ളുജുരുഗാറാന് ആയിര്‌ക്കുവാന്. നാന്‌മ് അയാള്‌ക്ക് ബെ്ളുജുരുഗാറാന് ആയിര്‌ക്കുവേന്.

2 കൊരിന്ത്യഗാറാര് 11:27

നാന് പാഡ്‌മ് പട്ടെ, കജട്ടാമ് പട്ടെ, എഞ്ചോ ജാമാല് ഉറാക്കില്ലദേമ് ഇന്തെ. എ്ഡെക്കെ്ഡേക്ക് തീനില്ലാദെ പജി സത്തെ, കുഡിക്ക്യ നീര് കെ്ഡേക്കാദെ നീരറാക്കേക്ക് പട്ടെ, സളി സത്തെ, എനാക്ക് ബേ്ഡ്‌മാന സീലെസിലാപ്പ്‌മ് ഇല്ലാദെ ഇന്ത്‌ദ്.

കൊലേസ്യഗാറാര് 3:11

അത്തെ അയാള് നാഡ്‌ല് എവന നാഡ്‌ഗാറാനൊ എഗുദാര് നാഡ്‌ഗാറാനൊ എന്നുവ ജാദി വിത്ത്യാസില്ലെ. പരിസേദനെ സാത്ത്‌റ ഗേന്തവാരൊ, പരിസേദനെ ഗേഗാത്തവാരൊ എന്നുവ മദ വിത്ത്യാസില്ലെ. പഡിത്തവാനൊ പഡിക്കത്തവാനൊ എന്നുവ അറുവു വിത്ത്യാസാമ് ഇല്ലെ. അഡിമേഗൊ മുദലാള്യൊ എന്നുവ സൊത്തു വിത്ത്യാസാമ് ഇല്ലെ. അദ്‌ല് എല്ലാര്‌ക്ക്‌മ് എല്ലാദ്‌ക്ക്‌മ് ഉജാന്തവനാന ക്‌റ്‌സ്‌ത്ത് താനെത്തെ ഇര്‌ക്കുവാന്.

എവുറായാര് 13:2

നിമാക്ക് തെര്യാത്തവാര്‌ന ബീസാക്ക് ബീ്ഡ്‌ക്ക് സേത്തി നോഡ്യ മറാക്കദേന്. ലേസ ആള്‌ഗാള് അത്തെ ഗേന്ത് ദൂദനാമ്‌ന തെര്യാദെ താനെ ബീ്ഡ്‌ക്ക് സേത്തി നോഡിര്‌ന്റാര്.