2 തിമിത്തോസു 2:24 - സാമി സേദി24 ആണ്ടവാന്‌ക്ക് ബേ്ണ്ടി ഗിലാസ ഗേന്റവാന് മല്ല് കെ്ട്ട്യ പാങ്കില്ലെ. അദ്‌ക്ക് ബദ്‌ല അയാള് എല്ലാ ആള്‌ഗാള്‌ന ഗവപട്ട് നഡാക്ക്‌ന്റവാന്‌മ്, പഡിസ്യ മുഡിന്റവാന്‌മ്, പൊറിമോഡ ഇര്‌ക്ക്‌ന്റവാന്‌മ് ആയിര്‌ക്കുഡൊ. အခန်းကိုကြည့်ပါ။ |
2 തിമിത്തോസു 2:24
31 ပူးပေါင်းရင်းမြစ်များ
പവുലോസുമു, ബറ്‌ണവാസ്‌മ് ബണങ്കാദെ അവാരോഡ സെരിക്ക്‌മ് തറ്‌ക്ക്‌നാര്. അദ്‌നാലെ ഈ തറ്‌ക്ക്‌ന കാര്യന പറ്റി എര്‌സലേമ്‌ല അപ്പോസുത്തലാരോഡാമ് മൂപ്പനാമോഡാമ് കേ്ള്‌ക്കുഡൊ എന്റ് അവാര് നെനേത്താര്. അദ്‌ക്ക് ബേ്ണ്ടി പവുലോസുനാമ്, ബറ്‌ണവാസ്‌നാമ്, അന്തോക്ക്യാല് ഇര്‌ക്കുവ ലേസ ആള്‌ഗാള്‌നാമ് എര്‌സലേമ്‌ക്ക് ബ്‌ഡ്യ മുഡിവെ്ഡ്‌ത്താര്.
ഈ ഉലഗാത്ത്‌ലവാര് തമ്മ് പോട്ടിഗാറാരോഡ ജുദ്ദ ഗേയ എ്ഡ്‌ക്കുവ ജാദിഗാളല്ല എമ്മ എ്ഡ്‌ക്കുവാദ്. എമാക്ക് ഇര്‌ക്കുവ ജാദിഗാള് മ്‌ഗ്‌ന്ത സാമി സക്‌ത്യുള്ളാദ്‌ത്തെ. പട്ടളഗാറാര് തമ്മ് പോട്ടിഗാറാര് കോട്ടെഗാള്‌ന ഇ്ഡിത്ത് തള്ളുവ പാസെ അദ്‌ന ബെത്ത് എമ്മ പോട്ടിഗാറാര് സക്‌തിന ദൂളു പറാത്ത്‌ന്റേമ്. മന്‌സാന് തപ്പായി ബാദിക്കുവ എല്ലാ കാര്യഗാള്‌നാമ് ഇല്ലാദെ മാഡ്‌ന്റേമ്.
ആന നീ സാമിക്ക് പട്ടവാന് ആയിര്‌ക്കുവാദ്‌നാലെ ഈ കാര്യഗാളെല്ല ഒന്റുമു ഗേഗാദിര്‌ക്കുഡൊ. അദ്‌ക്ക് ബദ്‌ല സാമി ഗേയ സൊന്ന പാസെ കാര്യഗാള് ഗേഡൊ, സാമിക്ക് മെച്ച്‌പ്‌ഡിത്ത ദിന്‌സ്‌ല് പെ്ളേക്കുഡൊ, സാമിന മലെന പാസെ നമ്പി നഡാക്കുഡൊ, അഡ്‌ത്തവാരോഡ സീവാന്‌ബെത്ത് നഡാക്കുഡൊ, എല്ലാ കജട്ടഗാള്‌നാമ് പൊറിമോഡ താങ്കുഡൊ, അഡ്‌ത്തവാരോഡ നിദാനത്തോഡ നഡാന്ത്‌പ്‌ഡിത്ത് ഗേഡൊ. ഇദെല്ല നീ മ്‌ഗ്‌ന്ത സുറുസറുപ്പോഡ ഗേഡൊ.
എനാന പാസെ ഏസ്സ്‌ന നമ്പ്‌ന്റവാന്‌മ് എനാക്ക് നേര്‌മായി മഗാന്‌മ് ആയിര്‌ക്കുവ തീത്തോസെ, സാമി ഗിലാസഗാറാന്‌മ് ഏസ്സ് ക്‌റ്‌സ്‌ത്ത് അപ്പോസുത്തലാന്‌മ് ആയിര്‌ക്കുവ പവുലോസു എന്നുവ നാന് നിനാക്ക് എ്ള്‌ദുവാദ്. സാമി തെരിന്തെ്ഡ്‌ത്ത ആള്‌ഗാള് ഏസ്സ്‌ന ഒറേപ്പായി നമ്പ്യാമ് സാമി പിര്യാക്ക് പെ്ളേക്ക്യ ബേ്ണ്ടി ക്‌റ്‌സ്‌ത്ത്‌ന പറ്റി പഡുസുവ സത്ത്യമാന കാര്യഗാള്‌ന അവാര്‌ക്ക് സൊക്കാന സൊല്ലി കൊഡുക്ക്യാമ് സാമി എനാന അപ്പോസുത്തലാനായി സൊല്ലി ബ്‌ട്ട്‌റ്‌ന്റാന്. എല്ലാദ്‌നാമ് ദ്‌ട്ട്‌സുവാദ്‌ക്ക് മുദാല് സാമി തന്റെ എന്റ് ബാക്ക് തന്ത്‌റ്‌ക്കുവ എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ന കെ്ഡേക്ക്‌മ് എന്നുവ ഒറേപ്പ് ഈ സത്ത്യമാന കാര്യഗാള്‌ലിന്ത് കെ്ഡേക്ക്‌ന്റ്. അദ് തന്റെന്റ് സൊന്ന സാമി താന് സൊന്ന ബാക്ക്‌ന തവാറ്‌സമാട്ടാന്. സാമി മുഡിവു മാഡിന്ത അദേ ഗളിഗേക്ക് താനെ ഈ സത്ത്യമാന കാര്യഗാള്‌ന സൊല്ലി തന്ത് എദ്‌ക്ക മാഡ്‌നാന്. ഈ സത്ത്യമാന കാര്യഗാള്‌ന സൊല്ലി കൊഡുക്ക്യ നമാന കാപാറ്റുവ സാമി എനാക്ക് സൊല്ലിര്‌ക്ക്‌ന്റാന്. നമ്മ് അപ്പാന് സാമിമ് നമാന കാപാറ്റുവ ക്‌റ്‌സ്‌ത്ത് ഏസ്സ്‌മ് നിനാക്ക് പ്‌ണ്ണ്യാമ് ഗേഡൊ, നിനാന നിമ്മ്‌ദ്യായിമ് ബെക്കുഡൊ.
ഏസ്സ്‌ഗാറാര് കൂട്ടാത്ത്‌ല മൂപ്പനാമ്‌ഗാള്‌ന കയിതാങ്ക്‌ന്റവാന് സാമി കൊഡുത്ത്‌റ്‌ക്കുവ ഗിലാസാന നോഡിനഡാത്ത്‌ന്റവാന് ആയിര്‌ക്കുവാദ്‌നാലെ കുറ്റകൊറേവു ഇല്ലത്തവാന് ആയിര്‌ക്കുഡൊ. അയാള് താന്‌ത്തെ ദൊഡ്ഡവാനെന്റ് നെനേക്ക്‌ന്റവാന്‌മ് മുട്ടു മൊനെഗാറാന്‌മ് ആയിര്‌ക്ക്യ പാങ്കില്ലെ. അയാള് കുഡിഗാറാന്‌മ് ഒപ്പ മല്ല്‌ക്ക് പോന്റവാന്‌മ് അദിഗ പണ സമ്പാരിക്ക്യ ഏമാത്ത്‌ന്റവാന്‌മ് ആയിര്‌ക്ക്യ പാങ്കില്ലെ.
അയാള് ഏസ്സ്‌ന പറ്റി പഡിത്ത്‌റ്‌ക്കുവ ബുദ്ദിനായന താന് പഡിത്ത്‌റ്‌ക്കുവ പാസെ താനെ ഒറേപ്പായി നമ്പി നഡാക്കുഡൊ. അയി ബുദ്ദിനായഗാള് നമ്പ്യ മുഡിവ ബുദ്ദിനായത്തെ. അത്തെ ആള്‌ഗാള്‌ക്ക് നേര് എന്തെന്റ് പഡിസി കൊഡുക്ക്യാമ് അവാര്‌ന ദയിരപഡിസ്യാമ് അയാള്‌ക്ക് മുഡിമ്. അദോഡൊപ്പ ഈ നായാക്ക് മുട്ടി നോഡ്യ ബന്റവാര്‌ക്ക് ബന്ത്‌റ്‌ക്കുവ തപ്പ് എന്തെന്റ് സൊല്ലി കൊഡുക്ക്യാമ് മുഡിമ്.
ആന സാമിലിന്ത് കെ്ഡേക്കുവ അറുവു കവാഡില്ലാത്താദ്‌ത്തെ. അയി അറുവിര്‌ക്ക്‌ന്റവാര് അഡ്‌ത്തവാരോഡ സീവാന്‌ബെത്ത് നിമ്മ്‌ദ്യോഡ ഇര്‌ക്കുവാര്, അഡ്‌ത്തവാന് മനേസ്സ്‌ലിര്‌ക്കുവാദ്‌ന തെരിന്ത് തണിന്ത് കൊഡുത്തു പെ്ളേക്കുവാര്, അവാര് മനേസ്സാറ ഗവപട്ട് അഡ്‌ത്തവാര്‌ക്ക് നല്ലാദ് ഗേവാര്, അവാര് ദൊഡ്ഡവാര് സ്‌ന്നവാര് എന്റ് പ്‌റ്‌ത്ത് നോഡമാട്ടാര്. അവാര് ബക്‌തിഗാറാരെന്റ് നഡിക്കമാട്ടാര്.
എനാക്ക് മെച്ച്‌പ്‌ഡിത്തവാരെ, ഏസ്സ് ക്‌റ്‌സ്‌ത്ത്‌ന ബെത്ത് സാമി നമ്മ് പെ്ളേപ്പ്‌ന എത്തെ കാപാറ്റ്‌ന്റാന് എന്നുവ കാര്യന പറ്റി നിമാക്ക് എ്ള്‌ദ്യ ബേ്ണ്ടി നാന് മുദാല് ആസെപട്ടിന്തെ. അത്തെ നാന് ആസെപട്ട്‌റ്‌ക്കാട്ടി ഏസ്സ്‌ന നമ്പി സാമിക്ക് പട്ടവാര് ആനവാര് ഏസ്സ് സൊന്ന നായഗാള്‌ന ഉറുദ്ദ്യായി നമ്പി പെ്ളേക്കുഡൊ എന്നുവ കാര്യന പറ്റി എ്ള്‌ദുവാദ്‌ത്തെ ദൊഡ്ഡ കാര്യ എന്റ് നാന് നെനേത്തെ. അദ്‌നാലെ അദ്‌ന പറ്റി എ്ള്‌ദ്യ നാന് ആസെപട്ടെ.
ကြော်ငြာတွေ