2 തിമിത്തോസു 2:18 - സാമി സേദി

¹⁸ അവാര് നേരാന കാര്യഗാള്‌ന പഡുസുവാദ്‌ന തെ്റിന്ത് തള്ളി നഡാക്ക്‌ന്റാര്. സാമി സത്തവാര്‌ന മുദാല് താനെ ഉജുര്‌ളാക്ക്‌നാനെന്റ് അവാര് പഡിസികൊണ്ടു ലേസ ആള്‌ഗാള് നമ്പിക്കേന ഇല്ലാദെ മാഡ്‌ന്റാര്.

2 തിമിത്തോസു 2:18 ပူးပေါင်းရင်းမြစ်များ

മത്തായി 15:13

അദുക്കുള ഏസ്സ്: <<മേലോഗാത്ത്‌ല എന്ന് അപ്പാന് സാമി നാട്ടാത്ത സെ്ഡി ഒട്ടുക്കു ബേരോഡ പ്‌ഡാങ്കി തള്ള്‌മ്.

മത്തായി 22:29

അദുക്കുള ഏസ്സ്: <<സാമി ബൊക്കുലു എ്ള്‌ദിര്‌ക്കുവാദ്‌നാമ് സാമിക്ക് എല്ലാമ് ഗേയ മുഡിമ് എന്റ്‌മ് നിമാക്ക് തെര്യാത്താദ്‌നാലെത്തെ നിമാക്ക് തപ്പ് ബന്ത്‌റ്‌ക്കുവാദ്.

ലൂക്കോസു 8:13

അഡി അറെര്‌ക്കുവ പട്ട്‌ക്ക് ബ്‌ന്ത ബെദെ എന്നുവാദ് സാമി സൊല്ലുസുലാക്കാന കേ്ട്ട് പിര്യപിര്യാത്ത് തങ്കാരിക്ക്‌ന്റവാര്‌ത്തെ. ആന അഡി ബേര് ഇ്റാഗ്യ മണ്ണില്ലാദിന്ത്‌ദ്. അദ്‌നാലെ പാദി നാള് അവാര്‌ക്ക് നമ്പിക്കെ ഇന്ത്‌ദ്. ആന സോദണെ ബര്‌ഗാട്ടി അവാര്‌ക്ക് നമ്പിക്കില്ലാദാന്റ്.

അപ്പോസുത്തലാര് 5:39

ആന ഇവാര്‌ത്ത് നെനേവുമു ഗേവ ഗിലാസാമ് സാമിത്ത് ആയിന്തദാന നിമാക്ക് ഇവാര്‌ന കൊല്ല്യ മുഡ്യാമാട്ട. നിമ്മ സാമ്യോഡ ജൂദുപ്‌ഡിത്ത് മല്ല്‌പ്‌ഡിക്ക്‌ന്റവാര് ആഗ ബേ്ഡ.>> ഗമേലിയേല് സൊന്നാദ്‌ന എഗുദ കോഡിദിഗാറാര് സെരി എന്റാര്.

1 കൊരിന്ത്യഗാറാര് 11:19

നിമ്മ് കൂട്ടാത്ത്‌ല് തഗ്‌ദ്യാന ആള്‌ഗാള് ആരെന്റ് തെര്യ കച്ചി പ്‌ഡിക്കുവാദ് ബേ്ഡ്‌മാന കാര്യത്തെ.

1 കൊരിന്ത്യഗാറാര് 15:12

ക്‌റ്‌സ്‌ത്ത് സത്തവാര് പട്ട്‌ലിന്ത് ഉജുര്‌ളാഗ്‌നാന് എന്റ് എമ്മ സൊല്ലി നഡാക്ക്‌ന്റേമ്, ആന സത്തവാര് ഉജുര്‌ളാഗുവാദില്ലെ എന്റ് നിമ്മ് കൂട്ടാത്ത്‌ല് ലേസ ആള്‌ഗാള് സൊല്ലുവാദ് എത്തെ?

കൊലേസ്യഗാറാര് 3:1

അദ്‌നാലെ ഏസ്സ് ക്‌റ്‌സ്‌ത്ത് ഉജുര്‌ളാഗാട്ടി നിമ്മാമ് അയാളോഡൊപ്പ ഉജുര്‌ളാഗ്‌ന്റ്‌റ് എന്നുവാദ്‌ന നമ്പ്‌നദാന ഉജുര്‌ളാഗ്‌ന ഏസ്സ് സാമി തനാക്ക് കൊഡുത്ത പദാവിപട്ടാത്ത്‌ലിന്ത് ആളുവാദ്‌നാലെ അയാള് നാഡ്‌ല് നിമാക്ക് ബെത്ത്‌റ്‌ക്കുവ സൊത്തുക്കു ബേ്ണ്ടി ആസെപട്ട് കൊണ്ടു പെ്ളേന്.

1 തിമിത്തോസു 1:19

അദ്‌താനെ അല്ല, ഏസ്സ് ക്‌റ്‌സ്‌ത്തോഡ ഇര്‌ക്കുവ നമ്പിക്കേല് നീ ഒറേപ്പുള്ളവാനായിര്‌ക്ക്യാമ്, മനേസ്സ് നേരെന്റ് സൊല്ലുവ കാര്യഗാള്‌ന ഗേയാമ് ഇദ് നിനാക്ക് ഉവഗര പഡുഡൊ. മനേസ്സ് നേരെന്റ് സൊല്ലുവ കാര്യഗാള്‌ന ബെലേക്കെ്ഡ്‌ക്കാത്ത ലേസ ആള്‌ഗാള് സാമ്യോഡിര്‌ക്കുവ നമ്പിക്കേന ബ്‌ട്ട് തള്ള്‌നാര്.

1 തിമിത്തോസു 6:10

പണാക്ക് ബേ്ണ്ടി ആസെപഡുവാദ്‌ത്തെ എല്ലാ ദിന്‌സ് കെ്ട്ടാദ് ബര്യ ബെക്കുവ ഒന്റേ ഒന്റു ബട്ടെ. ലേസ ആള്‌ഗാള് മൊത്തന പണാക്ക് ആസെപട്ട് സാമ്യോഡിര്‌ക്കുവ നമ്പിക്കേന ബ്‌ട്ട്‌തള്ളി തമാക്ക് താനെ പല ദിന്‌സ്‌ല കജട്ടഗാള്‌ന ബരിസ്സി ബെക്ക്‌ന്റാര്.

1 തിമിത്തോസു 6:21

സില ആള്‌ഗാള് ഇത്തവ നായഗാള്‌ന കേ്ട്ട് അദേപാസെ ഗേന്ത് നഡാന്ത് തമാക്ക് സാമ്യോഡിര്‌ക്കുവ നമ്പിക്കേന ബ്‌ട്ട് തള്ള്‌നാര്. സാമി നിമാക്ക് നല്ലാദ് ഗേഡൊ.

2 തിമിത്തോസു 2:14

നീ ഈ കാര്യഗാള്‌നെല്ല ഏസ്സ്‌ഗാറാര്‌ക്ക് സൊല്ലി കൊഡുത്തു കൊണ്ടേ ഇര്‌ക്കുഡൊ. ഒന്റൊന്റു നായഗാള്‌ന സൊല്ലി തറ്‌ക്കദേന് എന്റ് സാമി കേ്ട്ട്‌കൊണ്ട്‌റ്‌ക്കാട്ടി താനെ നീ അവാര്‌ക്ക് സൊല്ലുഡൊ. ഇത്തവ തറ്‌ക്കഗാള് ഒന്റുക്കുമു ഉവഗര ഇല്ലത്താദ്‌മ് കേ്ള്‌ക്ക്‌ന്റവാര് നമ്പിക്കേന കെ്ഡ്‌സുവാദ്‌മ്‌ത്തെ.

തീത്തോസു 1:11

അവാര്‌ന നീ മ്‌ണ്ട്യ ബ്‌ഡാദെ. എന്ത്‌ക്കെന്റ് സൊന്ന അവാര് ആള്‌ഗാള്‌ന ഏമാത്തി പണ സമ്പാരിക്ക്യ ബേ്ണ്ടി അവാര് പഡുസുവാദ്‌ക്കല്ലാത്ത കാര്യഗാള്‌ന ആള്‌ഗാള്‌ക്ക് പഡിസി എഞ്ചോ ബീ്ഡ്‌ലവാര്‌നൊട്ടുക്കു നേര്‌മാന ബുദ്ദിനായന നമ്പാത്തവാര് മാഡ്‌ന്റാര്.

എവുറായാര് 3:10

അദ്‌നാലെ എനാക്ക് അയി തലെകെ്ട്ട്‌ഗാളോഡ മൊനെ ബന്ത് <അവാര് എന്നാല്‌ക്ക്‌മ് എനാന ബ്‌ട്ട് ദൂര പോന്റവാര്‌മ് എന്ന് കല്‌പനെ പഡി നഡാക്കുവാദ്‌ന തള്ള്‌ന്റവാര്‌മ്> എന്റ് നാന് സൊന്നെ.

ആക്കോവു 5:19

ഏസ്സ്‌ഗാറാരെ, നിമ്മ് കൂട്ടാത്ത്‌ല് ഒന്റൊരുത്താന് കുറ്റ ഗേന്ത് സാമിന ബ്‌ട്ട് പ്‌റ്‌ന്ത് പോന അയാള് തിരിഗി സാമിസാരി ബര്യ നിമ്മ കയിതാങ്കുഡൊ.

1 ഓഗന്നാന് 2:19

അവാര് നമ്മ് കൂട്ടാത്ത്‌ലിന്ത് പോനവാര്‌ത്തെ. എന്ത്‌ക്കെന്റ് സൊന്ന അവാര് ഏസ്സ് ബെത്ത സട്ടപഡി നമ്മോഡ ആങ്കീങ്ക് സീവാന്‌ബെത്ത് നഡാക്കാലെ. അത്തെ സീവാന്‌ബെത്ത് നഡാന്തിന്തദാന അവാര് നമ്മൊപ്പ ഇന്ത്‌റ്‌ക്കുവാര്. അത്തെ അവാര് നമാന ബ്‌ട്ട് പ്‌റ്‌ന്ത് പോനാദ്‌നാലെ അവാര് സാമിപ്‌ള്ളെഗാള് അല്ല എന്റ് നമാക്ക് തെരിന്റ്.