2 കൊരിന്ത്യഗാറാര് 8:2 - സാമി സേദി

² മ്‌ഗ്‌ന്ത കൊഡിമെഗാള് ബന്ത് സോദണെ പട്ട ഈ ഏസ്സ്‌ഗാറാര് കൂട്ട ഏ്ളെഗാള് ആയിന്താര്. എന്റിന്ത് ഗുഡി അവാര് മനേസ്സാറ എഞ്ച്‌ക്കൊ ദറ്‌മ്മ കൊഡുക്ക്യ എത്ത്‌റാഗോ പിര്യ ഉള്ളവാര് ആയിന്താര്.

2 കൊരിന്ത്യഗാറാര് 8:2 ပူးပေါင်းရင်းမြစ်များ

മത്തായി 20:15

എനാക്കിര്‌ക്കുവാദ്‌ന എന്ന് മനേസ്സ്‌ക്ക് പ്‌ഡിത്ത പാസെ ഗേയ എനാക്ക് ഉരിമെ ഇല്ലേഗ? നാന് നല്ലവാന് ആനാദ്‌നാലെ നിനാക്ക് കണ്ണ്‌കഡ്യ?> എന്റ് സൊന്നാന്.

റോമഗാറാര് 12:8

ബുദ്ദിനായ സൊല്ലി കൊഡുക്കുവ ബര കെ്ഡേത്തവാന് ബുദ്ദിനായ സൊല്ലി കൊഡുക്കുഡൊ. ദാന ഗേവാദ്‌ക്കുള്ള ബര കെ്ഡേത്തവാന് മനേസ്സാറ ദാന ഗേഡൊ, തലെവാന് ആയിര്‌ക്ക്യ ബര കെ്ഡേത്തവാന് സുറുസുറുപ്പോഡ അയി കാര്യഗാള് ഗേഡൊ. ഗവ പഡുവ ബര കെ്ഡേത്തവാന് അഡ്‌ത്തവാര്‌ക്ക് ഗേവ കാര്യഗാള്‌ന പിര്യപിര്യാത്തോഡ ഗേഡൊ.

റോമഗാറാര് 2:4

ഇല്ലെ, സാമി പഡുവ ഗവ നിനാന പാവ ഗേവാദ്‌ന തള്ളി സാമിസാരി തിരിഗ്യ ബെക്ക്‌ന്റ് എന്റ് തെര്യാദെ സാമി നിമാന പഡുവ ഗവനാമ്, സാമി നിമാന പൊറുക്കുവാദ്‌നാമ്, നിമ്മ സാമിസാരി തിരിഗ്യ ബേ്ണ്ടി സാമി പൊറിമോഡ കാത്ത്‌റ്‌ക്കുവാദ്‌നാമ് ബെലെലില്ലാത്ത കാര്യ എന്റ് നെനേക്ക്‌ന്റായ?

2 കൊരിന്ത്യഗാറാര് 1:12

ഈ ഉലഗാത്ത്‌ല ആള്‌ഗാള് പട്ട്‌ല്, മുക്ക്യമായിമ് നിമ്മ് പട്ട്‌ല് പെ്ളേക്കാട്ടി സാമി എമാക്ക് തന്ത സുത്താപ്പുള്ള മനേസ്സോഡാമ് കവാഡില്ലാത്ത മനേസ്സോഡാമ്‌ത്തെ പെ്ളേത്തേമ്. ഈ ഉലഗാത്ത്‌ലിന്ത് കെ്ഡേത്ത അറുവുനാലെ അല്ല സാമി ഗേന്ത പ്‌ണ്ണ്യാത്ത്‌ല്‌ത്തെ എമാക്ക് അത്തെ പെ്ളേക്ക്യ മുഡിന്താദ്. ഇദ് നേര്‌ത്തെ എന്റ് എമ്മ് മനേസ്സ് ഒറേപ്പായിമ് സൊന്റു. ഇദ്‌നത്തെ എമ്മ പെരിമെപഡ്‌ന്റേമ്.

2 കൊരിന്ത്യഗാറാര് 2:9

നാന് സൊല്ലുവ നായഗാള്‌ക്ക് നിമ്മ കെ്ട്ട്‌പട്ട് നഡാക്ക്‌ന്റ്‌റ എന്റ് സോദണെ ഗേന്ത് കണ്ട്‌പ്‌ഡിക്ക്യ ബേ്ണ്ടിത്തെ നാന് അത്തെ എ്ള്‌ദ്‌നാദ്.

2 കൊരിന്ത്യഗാറാര് 6:10

എമ്മ ദുക്കപഡ്‌ന്റവാര് ആയിന്താല്‌മ് ഒപ്പ പിര്യപിര്യാത്ത് ഇര്‌ക്ക്‌ന്റേമ്. എമ്മ ഏ്ളെഗാള് ആയിന്താല്‌മ് എഞ്ചോ ആള്‌ഗാള്‌ന സാമ്യോഡ ഇര്‌ക്കുവ ഉറാവുല് മ്‌ഗ്‌ന്തവാര് മാഡ്‌ന്റേമ്. എമ്മ ഒന്റുമു ഇല്ലത്തവാര് ആയിന്താല്‌മ് എമാക്ക് എല്ലാദ്‌മ് ഇര്‌ക്ക്‌ന്റ്.

2 കൊരിന്ത്യഗാറാര് 9:11

ഒപ്പ ദറ്‌മ്മ ഗേവ പളാക്ക ഉള്ളവാര് ആയിര്‌ക്ക്യ സാമി നിമാക്ക് ബേ്ഡ്‌മാനദെല്ല തരുവാന്. എമ്മ നിമ്മോഡിന്ത് സേത്തുവ ഈ ദറ്‌മ്മ കെ്ഡേക്ക്‌ന്റവാര് നിമ്മ ഗേവ ദറ്‌മ്മാക്ക് ബേ്ണ്ടി സാമിക്ക് നണ്ണി സൊല്ലുവാര്.

2 കൊരിന്ത്യഗാറാര് 9:13

നിമ്മ ഏസ്സ് ക്‌റ്‌സ്‌ത്ത്‌ന നമ്പുവാദ് താനേമല്ല, നിമാക്ക് ഇര്‌ക്കുവാദ്‌ന സാമിക്ക് പട്ടവാര്‌ക്ക് ദറ്‌മ്മ ഗേന്ത് ക്‌റ്‌സ്‌ത്ത്‌ത്ത് നല്ല സേദ്യോഡ നിമാക്ക് ഇര്‌ക്കുവ പൊറുപ്പുന നിമ്മ കാട്ടുവാദ്‌നാലെ എഞ്ചോ ആള്‌ഗാള് സാമിന പെരിമെപഡ്‌ന്റാര്.

1 തെസെലോനിക്ക്യഗാറാര് 1:6

മ്‌ഗ്‌ന്ത കജട്ടഗാള്‌ന നിമാക്ക് താങ്കുവാദ്‌ക്കായി ബന്ത് ഗുഡി സാമിനിഗാല് പിര്യപഡുസുവ പിര്യാത്ത്‌ല് നിമ്മ എമ്മ സൊന്ന സേദിന തങ്കാരിത്ത്‌റ്. അത്തെ ആണ്ടവാന് ഏസ്സ് പെ്ളേത്ത പാസേമ് എമ്മ പെ്ളേത്ത പാസേമ് നിമ്മ പെ്ളേത്ത് കാട്ട്‌ന്റ്റ്.

1 തെസെലോനിക്ക്യഗാറാര് 2:14

ഏസ്സ്‌ഗാറാരെ, നിമ്മാമ് എഗുദ നാഡ്‌ല് ക്‌റ്‌സ്‌ത്ത് ഏസ്സ്‌ന നമ്പിര്‌ക്കുവ ഏസ്സ്‌ഗാറാര് കൂട്ടന പാസെത്തെ. അവാര് ഏസ്സ്‌ന നമ്പാത്ത എഗുദാരായിര്‌ക്കുവ തമ്മ് ജനഗാള് കയില് കൊഡിമെപട്ടാര്. അദേപാസെത്തെ നിമ്മാമ് നിമ്മ് ജാദിഗാള് കയിലിന്ത് കൊഡിമെ പട്ട്‌റല്ല.

ആക്കോവു 2:5

എനാക്ക് മെച്ച്‌പ്‌ഡിത്ത ഏസ്സ്‌ഗാറാരെ, നാന് സൊല്ലുവാദ്‌ന സൊക്കാന കേ്ള്‌ന്. ഈ ലോഗാത്ത്‌ല് ഏസ്സ്‌ന നമ്പി പെ്ളേക്കുവ ഏ്ളെഗാള്‌ന സാമി ദൊഡ്ഡവാരായി കണാക്ക് മാഡ്‌ന്റാന്. അത്തവാള്‌ഗാള് സാമ്യോഡ സീവാന്‌ബെത്ത് പെ്ളേക്കുവാദ്‌നാലെ സാമി അവാര്‌ന തന്ന് സൊന്ത മക്കാളായി എ്ഡ്‌ത്ത് ബെക്ക്‌ന്റാന്.

ബെ്ളിപട്ട കാര്യ 2:9

നീ കജട്ട പട്ടാദ് എനാക്ക് തെരിമ്. നീ ഏ്ളെ എന്റ്‌മ് എനാക്ക് തെരിമ്. ആന സെരിക്ക്‌മ് നീ പണഗാറാന്‌ത്തെ. എഗുദാര് അല്ലാദിന്ത് ഗുഡി തമ്മ എഗുദാര് എന്റ് സൊല്ലുവ സെയിത്താന്‌ന പരേസുവ ബീ്ഡ്‌ഗാറാരായി ഇര്‌ക്ക്‌ന്റവാര് നിനാന പറ്റി കെ്ട്ട കാര്യ സൊല്ലുവാദ്‌മ് എനാക്ക് തെരിമ്.