2 കൊരിന്ത്യഗാറാര് 3:18 - സാമി സേദി

¹⁸ ഇത്തെ നമാന മറേത്ത്‌റ്‌ക്കുവ മറെന ആണ്ടവാന് ജറേത്ത് തള്ള്‌ന്റാന്. അത്തെ നമ്മ അയാള്‌ന സൊക്കാന നെപ്പ്‌കെ്ഡേസി കൊണ്ടു മദ്‌പ്പ്‌ക്ക് മേല് മദ്‌പ്പുള്ളവാരായി അയാള് ഉരുവാന പാസെ ആയി കൊണ്ടു ഇര്‌ക്ക്‌ന്റാമ്. ഇത്തെ നമാന മാഡുവാദ് ആണ്ടവാന് നിഗാല്‌ത്തെ.

2 കൊരിന്ത്യഗാറാര് 3:18 ပူးပေါင်းရင်းမြစ်များ

ഓഗന്നാന് 1:14

സാമി സൊല്ലുസുലാക്ക മന്‌സാന് പ്‌റാവി എ്ഡ്‌ത്ത്‌ദ്. അയാള് ഗവാമ് സത്ത്യാമ് തുമ്പുനവാനായി നമ്മ് പട്ട്‌ല് പെ്ളേത്തിന്താന്. അപ്പാന് സാമിത്ത് ഒന്റേ ഒന്റു മഗാന് മദ്‌പ്പ്‌ന സാമി സൊല്ലുസുലാക്ക ആനവാന്‌ല് എമ്മ കണ്ടേമ്.

ഓഗന്നാന് 12:41

ഏസ്സയ്യാവു ഏസ്സ്‌ക്ക് ഇര്‌ക്കുവ മദ്‌പ്പ്‌ന കണ്ട് അയാള്‌ന പറ്റി നായ നൊഡിന്താദ്‌നാലെത്തെ ഇത്തെ സൊന്നാദ്.

ഓഗന്നാന് 17:22

നീമ് നാന്‌മ് ഒന്റായിര്‌ക്കുവ പാസെ അവാര്‌മ് ഒന്റായി ഇര്‌ക്ക്യ ബേ്ണ്ടി നീ എനാക്ക് തന്ത്‌റ്‌ക്കുവ അദേ മദ്‌പ്പ്‌ന നാന് അവാര്‌ക്ക് കൊഡുത്ത്‌റ്‌ക്ക്‌ന്റെ.

ഓഗന്നാന് 17:24

അപ്പാ, നീ എനാക്ക് തന്ത്‌റ്‌ക്ക്‌ന്റവാര് നാന് ഇര്‌ക്കുവ പട്ട്‌ല് എന്നോഡ ഇര്‌ക്ക്യ ബേ്ണ്ടി നാന് ആസെപഡ്‌ന്റെ. നീ ഉലഗാന ഉണ്ടാക്കാത്ത മുദാല് താനെ എനാന സീവാന് പട്ടാദ്‌നാലെ നീ എനാക്ക് തന്ത്‌റ്‌ക്കുവ മദ്‌പ്പ്‌ന അത്തെ അവാര്‌ക്ക് കാണ്യ മുഡിമ്.

റോമഗാറാര് 12:2

ബേ്റെ ആള്‌ഗാള്‌ന പാസെ നിമ്മ പെ്ളേക്കാദെ സാമി കണ്ണ്‌ക്ക് നല്ലാദ്‌മ് മെച്ച്‌പ്‌ഡിത്താദ്‌മ് നേര്‌മെ ഉള്ളാദ്‌മാന കാര്യഗാള് എന്തെന്റ് നെപ്പ്‌കെ്ഡേസ്യ ബേ്ണ്ടി നിമ്മ് മനേസ്സ്‌ന മാറ്റ്യ നിമാന സാമി കയിക്ക് ഒപ്പിസി കൊഡുനു.

റോമഗാറാര് 13:14

ആണ്ടവാന് ഏസ്സ് ക്‌റ്‌സ്‌ത്ത്‌ക്ക് ഇര്‌ക്കുവ ഗുണഗാള് താനെ ഉള്ളവാരായി നഡാന്. സരിഗല ആസെപഡുവ കെ്ട്ട ആസെഗാള്‌ന ഗേയ ബേ്ണ്ടി അദ്‌ക്കായി നെനേക്കാദേന്.

റോമഗാറാര് 8:29

എന്ത്‌ക്കെന്റ് സൊന്ന, സാമി താന് മുന്നുക്കെ തെരിന്തിന്തവാര്‌ന തന്ന് മഗാന്‌ക്ക് ഇര്‌ക്കുവ ഉരുവാന പാസെ ആയ ബേ്ണ്ടി സാമി അവാര്‌ന അലാക്ക പ്‌റ്‌ത്ത് ബെത്ത് അവാര്‌ക്ക് തന്ന് മഗാന്‌ന തലെകോഡി അണ്ണാന് മാഡ്‌നാന്.

റോമഗാറാര് 8:4

അത്തെ നമ്മോഡിര്‌ക്കുവ പാവ പളാക്കാക്ക് കെ്ട്ട്‌പട്ട് നഡാക്കാദെ സാമിനിഗാല്‌ക്ക് കെ്ട്ട്‌പട്ട് നഡാക്കുവ നമാക്ക് സാമി സട്ടാത്ത്‌ല് സൊല്ലിര്‌ക്കുവ നേര്‌മെ ഉള്ള കാര്യഗാള്‌ന ഗേയ മുഡിമ്.

റോമഗാറാര് 8:7

മന്‌സാന്‌ക്ക് ഇര്‌ക്കുവ പാവ പളാക്ക സാമിക്ക് പോട്ടി നില്ല്ന്റ്. അദ് സാമി സട്ടാക്ക് കെ്ട്ട്‌പഡുവാദില്ലെ. സാമി സട്ടാക്ക് കെ്ട്ട്‌പഡ്യ മുഡ്യാമ്‌മാട്ട.

1 കൊരിന്ത്യഗാറാര് 13:12

ഇന്നാല് നമ്മ കന്നാഡില് കാണുവ പാസെ മാഗെമാഗ്യ കാണ്‌ന്റാമ്, അയി നാള്‌ക്ക് നേരെ നേരെ കാണ്യാമ്. എനാക്ക് ഇന്നാല് ലേസ അളാവുലുത്തെ തെരിന്റ്, ആന തെഗേന്ത അളാവുലു സാമിക്ക് എനാന തെരിവ പാസെ അയി നാള്‌ല് എനാക്ക്‌മ് എല്ലാമ് സൊക്കാന തെരിമ്.

1 കൊരിന്ത്യഗാറാര് 15:49

നമ്മ മണ്ണ്‌ല് ഉണ്ടാനവാന് ഉരുവ എ്ഡ്‌ത്ത പാസെ മേലോഗത്ത്‌ലിന്ത് ബന്തവാന് ഉരുവാമ് എ്ഡ്‌ക്ക്‌ല.

2 കൊരിന്ത്യഗാറാര് 3:17

ആണ്ടവാന് നിഗാല്‌ത്തെ, ആണ്ടവാന് നിഗാല് ഇര്‌ക്കുവ പട്ട്‌ല് ആണ്ടവാന് ആസെപഡി നഡാക്ക്യ തഡേസ ഒന്റുമില്ലെ.

2 കൊരിന്ത്യഗാറാര് 4:4

ഏസ്സ്‌ന നമ്പാത്തവാര് മനേസ്സ്‌ന ഈ ഉലഗാത്ത്‌ല സാമ്യാന സെയിത്താന് കുറുഡു മാഡിര്‌ന്റാന്. അദ്‌നാലെ സാമി ഉരുവ ആയിര്‌ക്കുവ ക്‌റ്‌സ്‌ത്ത്‌ന പറ്റി സൊല്ലുവ നല്ല സേദിത്ത് മദ്‌പ്പ്‌ന അവാര്‌ക്ക് കാണ്യ മുഡിവാദില്ലെ.

2 കൊരിന്ത്യഗാറാര് 4:6

<<ഇ്റ്‌ട്ട്‌ലിന്ത് ബെ്ള്‌സ ബരുഡൊ>> എന്റ് സൊന്ന സാമി താനെത്തെ ഈ ബെ്ള്‌സാന എമ്മ് മനേസ്സ്‌ക്ക് തന്താദ്. അദ്‌നാലെത്തെ ഏസ്സ് ക്‌റ്‌സ്‌ത്ത് മൂഞ്ചിലിര്‌ക്കുവ സാമി മദ്‌പ്പ്‌ത്ത് അറുവു എമാക്ക് കെ്ഡേത്താദ്.

2 കൊരിന്ത്യഗാറാര് 5:17

ഒരുത്താന് ക്‌റ്‌സ്‌ത്തോഡ ഒന്റായി എ്ണേന്ത അയാള് പുദ്യാദായി ദ്‌ട്ട്‌സ്‌നവാന് ആയിര്‌ക്ക്‌ന്റാന്. പള്യാദെല്ല ഒയിന്ത് പോയി പുദ്യ പെ്ളേപ്പ് തുഡാങ്കിര്‌ക്ക്‌ന്റ്.

ഗലാത്ത്യഗാറാര് 6:15

ഒരുത്താന് പരിസേദനെ സാത്ത്‌റ ഗേവാദൊ ഗേഗാദിര്‌ക്കുവാദൊ അല്ല ദൊഡ്ഡ കാര്യ. അദ്‌ക്ക് ബദ്‌ല സാമി പുദ്യ പെ്ളേപ്പ്‌ന അവാന്‌ക്ക് കൊഡുത്താദ്‌ത്തെ ദൊഡ്ഡ കാര്യ.

കൊലേസ്യഗാറാര് 3:10

ഏസ്സ്‌ന ഉജുര്‌ളാക്ക്‌ഗാട്ടി തന്ന് നാഡ്‌ല് പെ്ളേക്കുവാദ്‌ക്ക് തഗ്‌ന്ത ഉരുവാത്ത്‌ല് നിമാനാമ് ഉജുര്‌ളാക്ക്‌നാന്. അദ്‌നാലെ അദ്‌ക്ക് തഗ്‌ന്ത ഗുണാത്ത്‌ല് നിമ്മ പെ്ളേന്.

1 തിമിത്തോസു 1:11

ആള്‌ഗാള്‌ന പഡിസ്യ ബേ്ണ്ടി സാമി എനാക്ക് ഒപ്പിസി തന്ത്‌റ്‌ക്കുവ നല്ല സേദില് ഈ ബുദ്ദിനായഗാള് ഒട്ടുക്കു ഇര്‌ക്ക്‌ന്റ്. ഈ നല്ല സേദിന ബാഗ്യകേ്ട്ടവാന്‌മ് അമ്‌സത്തോഡ ഇര്‌ക്ക്‌ന്റവാന്‌മ് ആയിര്‌ക്കുവ സാമിത്തെ എനാക്ക് സൊല്ലി തന്താദ്.

തീത്തോസു 3:5

നമാന കാപാറ്റ്‌നാന്. നമ്മ ഗേന്ത നല്ല കാര്യഗാള്‌നാലെ അല്ല, സാമിക്ക് ബേ്റ്‌വെന്താദ്‌നാലെത്തെ നമാന കാപാറ്റ്‌നാദ്. സാമി തന്ന് നിഗാല്‌ന ബെത്ത് നമാന പുദ്യ മന്‌സാന്‌മ് മാഡ്‌നാന്, നമ്മ് പാവാന തീത്ത് ബെ്ഡിപ്പ് മാഡി നമാക്ക് മറ്‌പ്‌റാപ്പ്‌മ് തന്താന്.

ആക്കോവു 1:23

എന്ത്‌ക്കെന്റ് സൊന്ന സാമി സൊല്ലുസുലാക്കാന കേ്ട്ടിന്ത്‌മ് അദ്‌ല് സൊല്ലിര്‌ക്കുവ കാര്യഗാള്‌നെല്ല ഗേഗാത്തവാന് കന്നാഡില് തന്ന് മൂഞ്ചി നോഡുന്റവാന്‌ന പാസെത്തെ.

1 ഓഗന്നാന് 3:2

എനാക്ക് മെച്ച്‌പ്‌ഡിത്തവാരെ, നമ്മ ഇന്നാല് സാമി പ്‌ള്ളെഗാള്‌ത്തെ. നമ്മ എത്തെ ആവാമെന്റ് ഇന്നിമ് പുരുപ്പില്ലെ. അയാള് എല്ലാര് കണ്ണ്‌ക്ക് എദ്‌ക്ക കാട്ട്‌ഗാട്ടി നമ്മ അയാള് തനി ഉരുവാന കാണുവാദ്‌നാലെ നമ്മ അയാള്‌ന പാസെ ആവാമെന്റ് നമാക്ക് തെരിമ്.