2 കൊരിന്ത്യഗാറാര് 10:4 - സാമി സേദി

⁴ ഈ ഉലഗാത്ത്‌ലവാര് തമ്മ് പോട്ടിഗാറാരോഡ ജുദ്ദ ഗേയ എ്ഡ്‌ക്കുവ ജാദിഗാളല്ല എമ്മ എ്ഡ്‌ക്കുവാദ്. എമാക്ക് ഇര്‌ക്കുവ ജാദിഗാള് മ്‌ഗ്‌ന്ത സാമി സക്‌ത്യുള്ളാദ്‌ത്തെ. പട്ടളഗാറാര് തമ്മ് പോട്ടിഗാറാര് കോട്ടെഗാള്‌ന ഇ്ഡിത്ത് തള്ളുവ പാസെ അദ്‌ന ബെത്ത് എമ്മ പോട്ടിഗാറാര് സക്‌തിന ദൂളു പറാത്ത്‌ന്റേമ്. മന്‌സാന് തപ്പായി ബാദിക്കുവ എല്ലാ കാര്യഗാള്‌നാമ് ഇല്ലാദെ മാഡ്‌ന്റേമ്.

2 കൊരിന്ത്യഗാറാര് 10:4 ပူးပေါင်းရင်းမြစ်များ

അപ്പോസുത്തലാര് 7:22

മിസ്‌റേമ്‌ഗാറാര്‌ക്ക് ഇര്‌ക്കുവ അറുവുന പൂരാമ് മോസെ പഡിത്താന്. നായാത്ത്‌ല്‌മ് ഗിലാസാത്ത്‌ല്‌മ് ദൊഡ്ഡവാന് ആനാന്.

റോമഗാറാര് 13:12

ഇ്റ്‌ട്ട് ബെ്ഡ്യ പക്ക ആയിര്‌ക്ക്‌ന്റ്. അദ്‌നാലെ ഇ്റ്‌ട്ട്‌ക്ക് എ്ണേന്ത കാര്യഗാള് ഗേവാദ്‌ന തള്ളി ബെ്ള്‌സാക്ക് എ്ണേന്ത കാര്യഗാള്‌ന ഗേന്.

റോമഗാറാര് 6:13

നിമ്മ സത്തിന്ത് ഉജുര്‌ളാഗ്‌നവാര് ആനാദ്‌നാലെ നിമ്മ് സരിഗലന സാമി ആസെപഡുവ കാര്യഗാള് ഗേയ ബേ്ണ്ടി സാമിക്ക് അഡിമെ മാഡി ബെയിന്. നിമ്മ് സരിഗല ആസെപഡുവ കെ്ട്ട കാര്യഗാള് ഗേന്ത് കൊണ്ടു നിമ്മ് സരിഗലന പാവാക്ക് അഡിമെ മാഡി ബെക്കാദേന്.

1 കൊരിന്ത്യഗാറാര് 2:5

അത്തെ സാമി സക്‌തിന തെരിന്ത്‌ത്തെ നിമ്മ നമ്പ്‌ന്റവാര് ആഡൊ, അല്ലാദെ മന്‌സാര് ബുദ്ദിനാമ് അറുവുനാമ് ബെത്തല്ല നമ്പുവാദ്.

1 കൊരിന്ത്യഗാറാര് 9:7

സൊന്ത സിലാവുലു ജുദ്ദ ഗേയ നില്ലുവ പട്ടളഗാറാന് ഇര്‌ക്ക്‌ന്റാന? മുന്തിരി ദോട്ട ഗേന്ത് അയി ബെ്ള്ളാമെന തിന്നത്തവാന് ഇര്‌ക്ക്‌ന്റാന? ആഡ് കൂട്ടന മേസി അയി ആഡ്‌ഗാള്‌ന ബെത്ത് പെ്ളേക്കാത്ത മാട്ട്യാന് ഇര്‌ക്ക്‌ന്റാന?

2 കൊരിന്ത്യഗാറാര് 10:8

ആണ്ടവാന് എമാക്ക് അദിഗര തന്ത്‌റ്‌ക്കുവാദ് നിമ്മ് നമ്പിക്കേന കെ്ഡിസ്യല്ല, അദ്‌ന ഒറേപ്പ് മാഡ്യത്തെ. ഈ അദിഗരാത്ത്‌ല് നാന് സെറ്റെ പെരിമെപട്ടാല്‌മ് നാണഗെ്ഡമാട്ടെ.

2 കൊരിന്ത്യഗാറാര് 13:10

ആണ്ടവാന് എനാക്ക് തന്ത അദിഗര നിമ്മ് നമ്പിക്കേന കെ്ഡിസ്യല്ല, നിമ്മ് നമ്പിക്കേന ഒറേപ്പ് മാഡ്യത്തെ. നാന് ബര്‌ഗാട്ടി അയി അദിഗരാന ബെത്ത് കഡ്‌പ്പത്തോഡ നിമാന നഡാത്ത്യ ബെക്കാദേന്. അദ്‌നാലെത്തെ ദൂര ഇന്ത്‌കൊണ്ടു നാന് ഈ കാര്യഗാള്‌ന എ്ള്‌ദുവാദ്.

2 കൊരിന്ത്യഗാറാര് 3:5

എന്ത്‌ക്കെന്റ് സൊന്ന എമാക്ക് ഇര്‌ക്കുവ തിരമെനാലെ എമ്മ താനെത്തെ ഈ കാര്യഗാള് ഗേന്റേമ് എന്റല്ല എമ്മ സൊല്ലുവാദ്. സാമിത്തെ ഈ കാര്യഗാള്‌ന ഗേയ എമാന തിരമെസാലിഗാള് മാഡ്‌നാദ്.

2 കൊരിന്ത്യഗാറാര് 4:7

എന്റാല്‌മ് ഈ ദൊഡ്ഡ സക്‌തി എമ്മ് സൊന്തല്ല, സാമിത്ത്‌ത്തെ എന്റ് കാട്ടി കൊഡുക്ക്യ ബേ്ണ്ടി ഈ സൊത്തു ബില ഇല്ലാത്ത മണ്ണ് സട്ടിന പാസെ ഇര്‌ക്കുവ എമ്മ് നെഞ്ച് കുള്ളുക്കുത്തെ തന്ത്‌റ്‌ക്കുവാദ്.

2 കൊരിന്ത്യഗാറാര് 6:7

എമ്മ സത്ത്യനത്തെ പഡ്‌സ്‌ന്റേമ്, സാമി സക്‌തില്‌ത്തെ എമ്മ എല്ലാ കാര്യഗാള്‌മ് ഗേന്റേമ്. പട്ടളഗാറാര്‌ക്ക് ഒന്റു കയില് ബാള്‌മ് ഒന്റു കയില് തഡ്‌ക്കുവ ജാദിമ് ഇര്‌ക്കുവ പാസെ എമ്മ് ഇ്ഡ കയില്‌മ് ബല കയില്‌മ് നേര്‌മെ എന്നുവ ബാള്‌മ് തഡ്‌ക്കുവ ജാദിമ് പ്‌ഡിത്ത്‌കൊണ്ടു പെ്ളേക്ക്‌ന്റേമ്.

1 തെസെലോനിക്ക്യഗാറാര് 5:8

ആന നമ്മ പഗാല്‌ക്കുള്ളവാര് ആനാദ്‌നാലെ ബോദ ഉള്ളവാരായി ഇര്‌ക്കുഡൊ. ഒന്റു പട്ടളഗാറാന് തന്ന് മാര്‌ന പാദ്‌ഗാക്ക്യ മാര്‌കച്ചെ കെ്ട്ടുവ പാസെ നിമ്മ സീവാനുള്ളവാരായിമ് നമ്പിക്കുള്ളവാരായിമ് ഇര്‌ക്കുഡൊ. അദ്‌താനേമല്ല, അയാള് തലേക്ക് പട്ടള തൊപ്പിന ഇക്കുവ പാസെ ഏസ്സ് നമാന ഒറേപ്പായിമ് കാപാറ്റ്യ ബന്റാന് എന്റ് നിമ്മ നെഞ്ചഡെ ബെത്ത്‌റ്‌ക്കുഡൊ.

1 തിമിത്തോസു 1:18

എന്ന് മഗാന് തിമിത്തോസെ, സാമി ആള്‌ഗാള്‌ന ബെത്ത് നിനാന പറ്റി മുന്നുക്കു സൊന്ന കാര്യഗാള്‌ക്ക് ഒത്തു ബരുവ പാസെ താനെ നാന്‌മ് നിനാക്ക് ഈ കാര്യന സൊന്റെ. ഈ നല്ല സേദിക്ക് ബേ്ണ്ടി ഒന്റു പട്ടളഗാറാന്‌ന പാസെ ജുദ്ദ ഗേയ ഈ നായഗാള് നിനാക്ക് കയി താങ്കായിര്‌ക്കുഡൊ.

2 തിമിത്തോസു 2:3

ഒന്റു പട്ടളഗാറാന് കജട്ടഗാള്‌ന താങ്കുവ പാസെ നീയിമ് ക്‌റ്‌സ്‌ത്ത് ഏസ്സ്‌ത്ത് നല്ല ഗിലാസഗാറാനായി എമ്മോഡൊപ്പ കജട്ടഗാള്‌ന താങ്കുഡൊ.

എവുറായാര് 11:30

നമ്പിക്കെ ഇന്താദ്‌നാലെ ഇസ്‌റവേല്‌ഗാറാര് എരിഗോവു പട്ടണന ഏ്ള് നാള് സുറ്റി നഡാക്കാട്ടി അയി പട്ടണ സിവാര് ഇ്ഡിന്ത് ബ്‌ന്ത്‌ദ്.