2 കൊരിന്ത്യഗാറാര് 1:6 - സാമി സേദി

⁶ എമ്മ കജട്ട പഡ്‌ഗാട്ടി എമാക്ക് നിമാന പിരാക്കി ബെക്ക്യ മുഡിമ്. അത്തെ നിമാക്ക് സാമി ആസെപഡുവ പാസെ പെ്ളേക്ക്‌ന്റവാരായ മുഡിമ്. എമാക്ക് ബന്ത കജട്ടാത്ത്‌ല് എമ്മ പിരാക്കി ബെത്ത്‌റ്‌ന്റവാര് ആനദാന അദേ കജട്ടഗാള് നിമാക്ക് ബര്‌ഗാട്ടി നിമാക്ക്‌മ് അദ്‌നെല്ല പൊറിമോഡ താങ്ക്യ മുഡിമ്.

2 കൊരിന്ത്യഗാറാര് 1:6 ပူးပေါင်းရင်းမြစ်များ

അപ്പോസുത്തലാര് 21:5

അവാരോഡ ഇന്ത് പോവ നേര ബര്‌ഗാട്ടി എമ്മ അവാര് പട്ട്‌ലിന്ത് പോനേമ്. അദുക്കുള അവാര്‌മ് അവാര് പെ്ണ്ടച്ച്യാമ്‌മ് മക്കാള്‌ഗാള്‌മ് ഒന്റായി എമ്മോഡ പട്ടണാക്ക് ബെ്ളിഗെ കഡാലോര മാട്ട്‌ക്ക് ബന്താര്. എമ്മ ഒട്ടുക്കു അദ്‌ല് സന്തൂന്റി നിന്റ് പരേസ്‌നേമ്.

റോമഗാറാര് 8:28

ആന സാമി സീവാന്‌ബെത്ത് താന് നെനേത്ത്‌റ്‌ക്കുവ കാര്യാക്ക് ബേ്ണ്ടി ബ്‌ളിത്ത് ബെത്ത്‌റ്‌ക്കുവ ആള്‌ഗാള്‌ക്ക് ബേ്ണ്ടി എല്ലാ കാര്യഗാള്‌നാമ് സാമി നല്ലാദ്‌ക്ക് ബേ്ണ്ടി ഗേന്റാന് എന്റ് നമാക്ക് തെരിമ്.

2 കൊരിന്ത്യഗാറാര് 1:4

എമാക്ക് ബരുവ എല്ലാ കജട്ടഗാള്‌ല്‌മ് സാമി എമാന പിരാക്കി ബെക്ക്‌ന്റാന്. അത്തെ സാമി എമാന പിരാക്കി ബെക്കുവാദ്‌നാലെ ഒന്റൊന്റാള്‌ഗാള്‌ക്ക്‌മ് ബരുവ ഒന്റൊന്റു കജട്ടഗാള്‌ല്‌മ് എമാക്ക് അവാര്‌ന പിരാക്കി ബെക്ക്യ മുഡിന്റ്.

2 കൊരിന്ത്യഗാറാര് 12:15

നിമാന കയിതാങ്ക്യ ബേ്ണ്ടി നാന് എനാക്ക് ഇര്‌ക്കുവാദ്‌ന ഒട്ടുക്കുമു നാന് പിര്യപിര്യാത്ത് സിലാവു മാഡുവെ. അദ്‌താനേമല്ല നിമാന കയിതാങ്ക്യ ബേ്ണ്ടി നാന് എനാന താനേമ് പിര്യപിര്യാത്ത് ഒപ്പിസി തരുവെ. നാന് നിമാന അദിഗ സീവാന്‌പഡുവാദ്‌നാലെ നിമ്മ സെറ്റെന്റാല് എനാന സീവാന്‌പഡുവുറ?

2 കൊരിന്ത്യഗാറാര് 5:5

സാമിത്തെ ഇദ്‌ക്ക് ബേ്ണ്ടി എമാന ഒരിക്കി എ്ഡ്‌ത്താദ്. സാമി അദ് എമാക്ക് ബേ്ണ്ടി ഗേന്ത് തരുവാന് എന്നുവ ഒറേപ്പ്‌ക്ക് ബേ്ണ്ടി തന്ന് നിഗാല്‌ന എമാക്ക് തന്ത്‌റ്‌ന്റാന്.

എപസോസുഗാറാര് 3:1

പവുലോസു എന്നുവ എനാക്ക് ഇന്നാല് നിമാക്ക് ബേ്ണ്ടി ജെയില്‌ലിര്‌ക്കുവ ബാഗ്യ കെ്ഡേത്ത്‌റ്‌ക്ക്‌ന്റ്. അദ് എന്ത്‌ക്കെന്റ് സൊന്ന എഗുദാരല്ലാത്ത ജാദിഗാളായിന്ത നിമാക്ക് നല്ല സേദിന സൊന്നാദ്‌നാലേമ് നാന് ക്‌റ്‌സ്‌ത്ത് ഏസ്സ് സൊല്ലുപഡി നഡാന്താദ്‌നാലേമ്‌ത്തെ.

എപസോസുഗാറാര് 3:13

അദ്‌നാലെ നാന് നിമാക്ക് സൊല്ലുവാദ് എന്തെന്റ് സൊന്ന, നാന് കജട്ട പഡുവാദ്‌നാലെ നിമാക്ക് ഈ പെരിമെപഡുവ പെ്ളേപ്പ് കെ്ഡേത്ത്‌ദ്. അദ്‌നാലെ നാന് ഇന്നാല് ജെയില്‌ലിന്ത് പഡുവ ഈ കജട്ടഗാള്‌ന നെനേത്ത് നിമ്മ സോറ്റു പോഗാദിര്‌ന്.

പിലിപ്പ്യഗാറാര് 1:19

എന്ത്‌ക്കെന്റ് സൊന്ന നിമ്മ പരേസുവാദ്‌നാലേമ് ഏസ്സ് ക്‌റ്‌സ്‌ത്ത് സൊല്ലി ബ്‌ട്ട സാമിനിഗാല് കയി താങ്കുവാദ്‌നാലേമ് എനാക്ക് ബന്ത ബുദ്ദിമുട്ടുഗാള്‌നൊട്ടുക്കു സാമി എനാന കാപാറ്റുവാദ്‌ക്ക് ബേ്ണ്ടി ഉവഗരപഡുസുവാനെന്റ് എനാക്ക് തെരിമ്.

2 തിമിത്തോസു 2:10

അദ്‌നാലെ സാമി തെരിന്തെ്ഡ്‌ത്ത ആള്‌ഗാള് ക്‌റ്‌സ്‌ത്ത് ഏസ്സ്‌ന നമ്പി തപ്പിസി കഡാക്ക്യാമ് എന്നാല്‌ക്ക്‌മ് മദ്‌പ്പോഡാമ് അമ്‌സത്തോഡാമ് ഇര്‌ക്ക്യ നാന് ഈ കജട്ടഗാളെല്ല താങ്ക്‌ന്റേന്.