1 തിമിത്തോസു 5:14 - സാമി സേദി

¹⁴ അദ്‌നാലെ ബയിസ്സാഗാത്ത മ്‌ണ്ടേസ്യാര്‌ഗാള് മറിസി ആളാന് സേന്ത് മക്കാള്‌മറി പ്‌റാത്തി ബീ്ഡ്‌കാര്യഗാള് നോഡി നഡാത്തുഡൊ എന്റ് നാന് ആസെപഡ്‌ന്റെ. അത്തെ ഗേന്തദാന പോട്ടിഗാറാര്‌ക്ക് നമാന പറ്റി കുറ്റ സൊല്ല്യ എ്ഡെ കെ്ഡേക്കാദാമ്.

1 തിമിത്തോസു 5:14 ပူးပေါင်းရင်းမြစ်များ

റോമഗാറാര് 14:13

അദ്‌നാലെ നമ്മ ഇന്നി ആങ്കീങ്ക് നമ്മ് കൂട്ടാത്ത്‌ലവാര്‌ന കുറ്റ ബിദിക്കാദേന്. ആന അവാര്‌ക്ക് ഇര്‌ക്കുവ നമ്പിക്കേന ഇല്ലാദെ മാഡുവാദൊ ഇല്ലെ കൊറേവു മാഡുവാദൊ ആന കാര്യഗാള് ഒന്റുമു ഗേഗമാട്ടേമ് എന്റ് നമ്മ മുഡിവാക്കുഡൊ.

2 കൊരിന്ത്യഗാറാര് 11:12

എമ്മ ഗേവ നല്ല സേദി ഗിലാസാന പാസെത്തെ തമ്മാമ് ഗേവാദ് എന്റ് പെരിമെപട്ട് നഡാക്കുവ ബേ്റെ ആള്‌ഗാള് ഇര്‌ക്ക്‌ന്റാരല്ല. അവാര് അത്തെ സൊല്ലാദിര്‌ക്ക്യ ബേ്ണ്ടി നാന് ഇന്നാല് ഗേവാദ്‌ന ഇന്നിമ് ഗേന്ത്‌കൊണ്ടേ ഇര്‌ക്കുവേന്.

1 തിമിത്തോസു 2:8

അദ്‌നാലെ സാമിന കുമ്മുഡുവ പട്ട്‌ലെല്ല സാമിക്ക് ബേ്ണ്ടി പെ്ളേക്കുവ ഗണ്ടാള്‌ഗാള് മൊനേക്ക് തെ്ട്ടാദേമ് തറ്‌ക്കിപ്‌ഡിത്ത് ഗേഗാദേമ് കയിന ഉജാത്തി പരേസുഡൊ.

1 തിമിത്തോസു 4:3

അവാര് ആള്‌ഗാള് പെ്ണ്ണെ്ഡ്‌ക്കുവാദ് ആഗ എന്റ്‌മ് തിന്നുവ ജാദിഗാള്‌ല് ലേസ ജാദിഗാള്‌ന തിന്ന ബേ്ഡ എന്റ്‌മ് പഡ്‌സ്‌ന്റാര്. ആന സത്ത്യാന തെരിന്ത്‌റ്‌ക്കുവ ഏസ്സ്‌ഗാറാര്‌ക്ക് നണ്ണി സൊല്ലി തിന്ന്യ സാമി തിന്നുവ ജാദിഗാള്‌ന ദ്‌ട്ടിസി ബെത്ത്‌റ്‌ന്റാന്.

1 തിമിത്തോസു 5:11

ആന ബയിസ്സാഗാത്ത മ്‌ണ്ടേസ്യാര്‌ന അയി കൂട്ടാക്ക് സേത്ത ബേ്ഡ. എന്ത്‌ക്കെന്റ് സൊന്ന ക്‌റ്‌സ്‌ത്ത് ഏസ്സ്‌ന നമ്പി നഡാക്ക്യ എ്ഡ്‌ത്ത മുഡിവുന ബ്‌ഡ ആസെപാഡ്‌ക്ക് ആളായി അവാര് ആളാന് സേന്ത് പെ്ളേക്ക്യ ആസെപഡുവാര്.

1 തിമിത്തോസു 6:1

സാമി പേര്‌ക്ക്‌മ് നമ്മ പഡിസി കൊഡുക്കുവ കാര്യഗാള്‌ക്ക്‌മ് മാനകേ്ഡ് ബരാദിര്‌ക്ക്യ ബേ്ണ്ടി പണ്ണ്യഗിലാസ ഗേവ ഏസ്സ്‌ഗാറാര് തമ്മ് പണ്ണാഡിഗാള്‌ന എല്ലാ കാര്യാത്ത്‌ല്‌മ് മദ്‌സുഡൊ.

തീത്തോസു 2:5

അദ്‌താനെ അല്ല, നല്ല ബുദ്ദ്യോഡ പെ്ളേക്കുഡൊ എന്റ്‌മ്, ആളാന് നമ്പ്യ മുഡ്യാത്തളാവുക്കു കണ്ടപഡിക്ക് നഡാക്കാദിര്‌ക്കുഡൊ എന്റ്‌മ്, ബീ്ഡ്‌ല കാര്യഗാള്‌ന നോഡുഡൊ എന്റ്‌മ്, അഡ്‌ത്തവാര്‌ന ഗവ പഡുഡൊ എന്റ്‌മ്, ആളാന് സൊല്ലുപഡിക്ക് നഡാക്കുഡൊ എന്റ്‌മ് ഈ പെ്ണ്ണ്‌മക്കാള്‌ന പഡിസ്യ അവാര്‌ക്ക് മുഡിമ്. അത്തെ ഗേന്തദാന സാമി സൊല്ലുസുലാക്കന ആര്‌ക്ക്‌മ് കുറ്റ സൊല്ല്യ മുഡ്യാമാട്ട.

തീത്തോസു 2:8

നീ പഡുസുവ കാര്യഗാള് നേര്‌മാനാദ്‌മ് ആര്‌ക്ക്‌മ് കുറ്റ സൊല്ല്യ മുഡ്യാത്താദ്‌മ് ആയിര്‌ക്കുഡൊ. അന്നാപ്പ് നിന്ന് പോട്ടിഗാറാര് നമാന പറ്റി കുറ്റ സൊല്ല്യ മുഡ്യാദെ നാണഗെ്ഡുവാര്.

എവുറായാര് 13:4

കല്യണ മുഡിക്കുവാദ്‌ന എല്ലാര്‌മ് മദ്‌സ്‌ന്. ആളാന്‌പെ്ണ്ട് ആങ്കീങ്ക് ബേ്റെ പോഗാദെ നമ്പ്യ മുഡിന്റവാര് ആയിര്‌ക്കുഡൊ. കണ്ടപഡിക്ക് നഡാക്ക്‌ന്റവാര്‌നാമ് ബേസ്യാഡ്‌ന്റവാര്‌നാമ് സാമി ദെ്ണ്ടിക്കുവാന്.