1 തിമിത്തോസു 1:11 - സാമി സേദി

¹¹ ആള്‌ഗാള്‌ന പഡിസ്യ ബേ്ണ്ടി സാമി എനാക്ക് ഒപ്പിസി തന്ത്‌റ്‌ക്കുവ നല്ല സേദില് ഈ ബുദ്ദിനായഗാള് ഒട്ടുക്കു ഇര്‌ക്ക്‌ന്റ്. ഈ നല്ല സേദിന ബാഗ്യകേ്ട്ടവാന്‌മ് അമ്‌സത്തോഡ ഇര്‌ക്ക്‌ന്റവാന്‌മ് ആയിര്‌ക്കുവ സാമിത്തെ എനാക്ക് സൊല്ലി തന്താദ്.

1 തിമിത്തോസു 1:11 ပူးပေါင်းရင်းမြစ်များ

ലൂക്കോസു 2:14

<<മേലോഗാത്ത്‌ലിര്‌ക്കുവ സാമിന മദ്‌സ്‌ന്റേമ്. സാമിക്ക് മെച്ച്‌പ്‌ഡിത്തവാര് ബൂമില് നിമ്മ്‌ദ്യോഡ ഇര്‌ക്കുവാര്.>>

റോമഗാറാര് 2:16

ക്‌റ്‌സ്‌ത്ത് ഏസ്സ്‌ന ബെത്ത് സാമി മന്‌സാര്‌ഗാള്‌ന ബിദിക്കുവ നാള്‌ക്ക് മന്‌സാന് തന്ന് മനേസ്സ്‌കുള്ളുക്കു ബെത്ത്‌റ്‌ക്കുവ എല്ലാ നെനേവുഗാള്‌നാമ് ബെ്ളിഗെ എ്ഡ്‌ത്ത് കാട്ടി അവാര്‌ന ബിദിക്കുവാന്. ഈ കാര്യ നാന് സൊല്ലുവ നല്ല സേദിക്ക് തഗ്‌ന്ത പഡി ഉള്ളാദ്‌ത്തെ.

1 കൊരിന്ത്യഗാറാര് 9:17

നാന് എന്ന് മനേസ്സാറ ഈ ഗിലാസ ഗേവദാന എനാക്ക് കൂലി കെ്ഡേക്കുവാദ്‌ക്കുള്ള തഗ്‌ദി ഇര്‌ക്ക്‌ന്റ്. ഇദ് നാന് എന്ന് പിര്യാക്ക് തെരിന്തെ്ഡ്‌ത്താദല്ല. ആന സാമി ഈ കാര്യ ഗേയ തന്താദ്‌നാലെ നാന് അദ്‌ന ഗേയ കഡാമെ പട്ടവാന്‌ത്തെ.

2 കൊരിന്ത്യഗാറാര് 4:4

ഏസ്സ്‌ന നമ്പാത്തവാര് മനേസ്സ്‌ന ഈ ഉലഗാത്ത്‌ല സാമ്യാന സെയിത്താന് കുറുഡു മാഡിര്‌ന്റാന്. അദ്‌നാലെ സാമി ഉരുവ ആയിര്‌ക്കുവ ക്‌റ്‌സ്‌ത്ത്‌ന പറ്റി സൊല്ലുവ നല്ല സേദിത്ത് മദ്‌പ്പ്‌ന അവാര്‌ക്ക് കാണ്യ മുഡിവാദില്ലെ.

2 കൊരിന്ത്യഗാറാര് 4:6

<<ഇ്റ്‌ട്ട്‌ലിന്ത് ബെ്ള്‌സ ബരുഡൊ>> എന്റ് സൊന്ന സാമി താനെത്തെ ഈ ബെ്ള്‌സാന എമ്മ് മനേസ്സ്‌ക്ക് തന്താദ്. അദ്‌നാലെത്തെ ഏസ്സ് ക്‌റ്‌സ്‌ത്ത് മൂഞ്ചിലിര്‌ക്കുവ സാമി മദ്‌പ്പ്‌ത്ത് അറുവു എമാക്ക് കെ്ഡേത്താദ്.

ഗലാത്ത്യഗാറാര് 2:7

ആന എഗുദാര്‌ക്ക് നല്ല സേദിന സൊല്ല്യ സാമി പത്ത്‌റോസുന എ്ഡ്‌ത്ത് ബെത്ത്‌റ്‌ക്കുവ പാസെ എഗുദാരല്ലാത്ത ജാദിഗാള്‌ക്ക് നല്ല സേദിന സൊല്ല്യ സാമി എനാന എ്ഡ്‌ത്ത് ബെത്ത്‌റ്‌ന്റാന് എന്റ് ഈ തലെവാര്‌ഗാള്‌ക്ക് തെരിന്ത്‌ദ്.

എപസോസുഗാറാര് 1:12

അദേപാസെ എല്ലാവാര്‌ക്ക് ബ്‌ഡ മുദാല് ക്‌റ്‌സ്‌ത്ത്‌ന നമ്പിര്‌ക്കുവ ഇസ്‌റവേല്‌ഗാറാര് ആയിര്‌ക്കുവ നമ്മ സാമിന പാഡി പെരിമെപഡുസുഡൊ എന്നുവാദ്‌നാമ് സാമി മുദാല് താനെ നെനേത്ത് ബെത്തിന്താന്.

എപസോസുഗാറാര് 1:6

ഇത്തെ സാമിക്ക് മെച്ച്‌പ്‌ഡിത്ത ഏസ്സ് ക്‌റ്‌സ്‌ത്ത്‌ന ബെത്ത് നമാന തന്ന് മക്കാളായി എ്ഡ്‌ക്ക്യ ബേ്ണ്ടി സാമി നമാക്ക് പ്‌ണ്ണ്യ ഗേന്ത്‌റ്‌ന്റാന്. അദ്‌നാലെ അയി സാമി ഗേന്ത പ്‌ണ്ണ്യന നെനേത്ത് നമ്മ നണ്ണ്യുള്ളവാര് ആയിര്‌ക്ക്‌ല.

എപസോസുഗാറാര് 2:7

ഏസ്സ് ക്‌റ്‌സ്‌ത്ത് പേര്‌ല് സാമി നമാന പട്ട ഗവ എത്ത്‌റ ദൊഡ്ഡാദെന്റ് ഇന്നി ബരുവ കാലാത്ത്‌ല ആള്‌ഗാള് കാണ്യ ബേ്ണ്ടിത്തെ സാമി ഇത്തെ ഗവ പട്ടാദ്.

എപസോസുഗാറാര് 3:10

ഏസ്സ്‌ഗാറാര് കൂട്ടായി പെ്ളേക്കുവ നമാന ബെത്ത് ഇന്നമാട്ട് സൊല്ലാദെ ബെത്തിന്ത സാമിക്കിര്‌ക്കുവ ഈ അറുവു എത്ത്‌റ ദൊഡ്ഡാദെന്റ് മാഗെലോഗന ആളുവ കെ്ട്ട നിഗാല്‌ഗാള്‌ക്ക് സാമി കാട്ടി കൊഡുത്താന്.

കൊലേസ്യഗാറാര് 1:25

എന്ത്‌ക്കെന്റ് സൊന്ന മുന്തെ കാലാത്ത്‌ല് സാമിന പറ്റി തെര്യാദിന്ത കാര്യഗാള്‌ന ഒട്ടുക്കു ഇന്നാല് ഏസ്സ്‌ഗാറാര് കൂട്ടാക്ക് സൊല്ലി കൊഡുക്കുവ ഗിലാസാന ഗേയ സാമി എനാന തെരിന്തെ്ഡ്‌ത്ത്‌റ്‌ന്റാന്.

1 തെസെലോനിക്ക്യഗാറാര് 2:4

എന്ത്‌ക്കെന്റ് സൊന്ന, എമാന നല്ല സേദി സൊല്ലുന്റവാര് മാഡ്യ ബേ്ണ്ടി സാമി എമാന നോഡി നമ്പി എ്ഡ്‌ത്ത് ബെത്താന്. അദ്‌നാലെ എമ്മ മന്‌സാര്‌ഗാള്‌ന പിര്യപഡിസ്യല്ല, എമ്മ് മനേസ്സ്‌ന സോദണെ ഗേവ സാമിന പിര്യപഡിസ്യത്തെ എമ്മ നല്ല സേദിന സൊല്ലുവാദ്.

1 തിമിത്തോസു 2:7

അദ്‌നാലെത്തെ നമ്പിക്കേന പറ്റി സൊല്ലുവ ഈ സത്ത്യ സേദിന എഗുദരല്ലാത്ത ജാദിഗാള്‌ക്ക് പഡിസ്യ അപ്പോസുത്തലാനായിമ് ബാത്ത്യാനായിമ് സാമി എനാന സൊല്ലി ബ്‌ട്ട്‌റ്‌ക്കുവാദ്. നാന് സൊല്ലുവാദ് പൊയ്യല്ല നേര്‌ത്തെ.

1 തിമിത്തോസു 6:15

സാമി മുഡിവു മാഡിര്‌ക്കുവ അദേ നേരാക്ക് താനെ അയാള് മറിസി ബരുവാന്. അയി സാമി ബാഗ്യകേ്ട്ടവാന്‌മ് ഒന്റേ ഒരുത്താനിന്ത് ആള്‌ന്റവാന്‌മ് എല്ലാ രാജാവുഗാള്‌ക്ക് രാജാവുമു ആണ്ട്‌റ്‌ന്റവാര്‌ഗാള്‌ക്ക് ആണ്ടവാന്‌മ്‌ത്തെ.

1 തിമിത്തോസു 6:20

തിമിത്തോസെ, നീ ഗേയ ബേ്ണ്ടി സാമി നിന്ന് കയിക്ക് ഒപ്പിസി തന്ത്‌റ്‌ക്കുവ കാര്യഗാള്‌ന നീ സൂസാരിത്ത് ഗേഡൊ. സാമിന മദിസ്യ ഉവഗരപഡാത്ത ബുദ്ദില്ലാത്ത നായഗാള്‌ന ഇദ്‌ത്തെ അറുവു എന്റ് ഉറുട്ടുസൊല്ലികൊണ്ടു സില ആള്‌ഗാള് പഡ്‌സ്‌ന്റാര്. ഈ നായഗാള്‌ന നീ കേ്ള്‌ക്കാദെ.

2 തിമിത്തോസു 1:11

അയി നല്ല സേദിന പറ്റി സൊല്ലി കൊഡുക്ക്യ ബേ്ണ്ടിത്തെ സാമി എനാന അപ്പോസുത്തലാന്‌മ് ബാത്ത്യാന്‌മ് ആയി എ്ഡ്‌ത്ത് ബെത്ത്‌റ്‌ക്കുവാദ്.

2 തിമിത്തോസു 1:14

സാമി നിനാക്ക് ഒപ്പിസി തന്ത്‌റ്‌ക്കുവ ഈ നേരാന കാര്യഗാള്‌ന നമ്മോഡിര്‌ക്കുവ സാമിനിഗാല് പാദ്‌ഗാപ്പ്‌ല് നീ സൂസാരിത്ത് ബെക്കുഡൊ.

2 തിമിത്തോസു 2:2

എഞ്ചോ ആള്‌ഗാള്‌ക്ക് മുന്നുക്കു നാന് സൊന്ന കാര്യഗാള്‌ന നീ കേ്ട്ട്‌റ്‌ന്റായി. അദ്‌നൊട്ടുക്കു അഡ്‌ത്തവാര്‌ക്ക് സൊല്ലി കൊഡു. അവാര് നിനാക്ക് നമ്പ്യ മുഡിവ ആള്‌ഗാള്‌മ് ആള്‌ഗാള്‌ന പഡിസ്യ മുഡിവ ആള്‌ഗാള്‌മ് ആയിര്‌ക്കുഡൊ.