1 തെസെലോനിക്ക്യഗാറാര് 4:11 - സാമി സേദി

¹¹ എമ്മ നിമാക്ക് സൊല്ലി തന്ത പാസെ അഡ്‌ത്തവാര്‌ക്ക് നിമ്മ തൊന്തറെ മാഡാദേമ്, അഡ്‌ത്തവാര് കാര്യാക്ക് തലെ ഇക്കാദേമ് ഇര്‌ക്കുഡൊ. അദ്‌താനേമല്ല, നിമ്മ തിന്നുവ തീനിക്ക് ബേ്ണ്ടി നിമ്മ താനെ പാഡ്‌പഡുവാദ്‌മ് ആയിര്‌ക്കുഡൊ നിമ്മ് മ്‌ഗ്‌ന്ത ആസെ.

1 തെസെലോനിക്ക്യഗാറാര് 4:11 ပူးပေါင်းရင်းမြစ်များ

മര്‌ക്കോസു 13:34

ഇദ്‌ന നാന് നിമാക്ക് ഒന്റു കദേക്ക് എ്ണേത്ത് സൊല്ലി തന്റെ. ഒന്റൊരുത്താന് തന്ന് ബീ്ഡ്‌ന നോഡിര്‌ക്ക്യ ഗിലാസഗാറാര്‌ക്ക് സൊല്ലി തള്ളി ഒന്റു ബട്ടെ പോനാന്. അയാള് ഗിലാസഗാറാര്‌ക്ക് ആള്‌ക്കൊന്റൊന്റു ഗിലാസ ഗേയ സൊല്ലി ബാസ കാവഗാറാന്‌ന സൊക്കാന നോഡിര്‌ക്ക്യാമ് സൊന്നാന്.

അപ്പോസുത്തലാര് 18:3

ഗുഡുസുലു മാഡി ബിക്കുവ ഗിലാസത്തെ അവാര് ഗേന്തിന്താദ്. പവുലോസുമ് അത്തവ ഗിലാസത്തെ ഗേന്തിന്താന്. അദ്‌നാലെ അയാള്‌മ് അവാരോഡ എ്ണേന്ത് അയി ഗിലാസ ഗേന്താന്. അത്തെ അയാള് അയി ഗിലാസ ഗേന്ത് തനാക്ക് പണ സമ്പാരിത്തിന്താന്.

അപ്പോസുത്തലാര് 20:35

ഇത്തെ നാന് നിമാക്ക് ഗേന്ത് കാട്ടി തന്ത്‌റ്‌ക്കുവാദ്‌നാലെ നിമ്മ എല്ലാ കാര്യാത്ത്‌ല്‌മ് മ്‌ഗ്‌ന്ത പാഡ്‌പട്ട് നോയിഗാറാര്‌ന കയിതാങ്കുഡൊ. <ബാങ്കുവാദ്‌ന ബ്‌ഡ കൊഡുക്കുവാദ്‌ല്‌ത്തെ പിര്യപഡുഡൊ> എന്റ് ആണ്ടവാന് ഏസ്സ് സൊന്നാദ്‌ന മറാക്കദേന്.>>

റോമഗാറാര് 12:11

നിമ്മ കള്ള ബീ്ഗാദെ സുറുസുറുപ്പോഡ ഇന്ത് ആണ്ടവാന് സൊല്ലുവ കാര്യഗാള്‌ന ബക്‌ത്യോഡാമ് മനേസ്സാറാമ് ഗേന്.

റോമഗാറാര് 15:20

ആരാറ്റ ക്‌റ്‌സ്‌ത്ത്‌ന പറ്റി സൊന്ന പട്ട്‌ക്ക് പോയി ക്‌റ്‌സ്‌ത്ത്‌ന പറ്റി സൊല്ല്യ എനാക്ക് പിര്യ ഇല്ലെ. ക്‌റ്‌സ്‌ത്ത്‌ന പറ്റി കേ്ള്‌ക്കാദിര്‌ക്കുവ പട്ട്‌ക്ക് പോയി സൊല്ല്യത്തെ എന്നാസെ.

1 കൊരിന്ത്യഗാറാര് 4:12

എമ്മ് ബേ്റ്‌വായിക്ക് ബേ്ണ്ടി എമ്മ അവനവാന് കയില് താനെ പാഡ്‌പഡ്‌ന്റേമ്. എമാന സാപ്പ ഇക്ക്‌ഗാട്ടിമ് അവാര്‌ക്ക് നല്ലാദ് ബര്യ ബേ്ണ്ടി എമ്മ പരേസ്‌ന്റേമ്. എമാന കൊഡിമെപഡ്‌സ്‌ഗാട്ടിമ് എമ്മ അദ്‌ന പൊറിമോഡ താങ്ക്‌ന്റേമ്.

2 കൊരിന്ത്യഗാറാര് 5:9

അദ്‌നാലെ എമ്മ ഈ സരിഗലാത്ത്‌ല് ഇന്താല്‌മ് സെരി ആണ്ടവാനോഡ ഇന്താല്‌മ് സെരി എമ്മ ഗേവ എല്ലാ കാര്യാത്ത്‌ല്‌മ് ആണ്ടവാന്‌ന പര്യപഡുസുവാദ്‌ത്തെ എമ്മ് മുക്ക്യമാന കാര്യ.

എപസോസുഗാറാര് 4:28

നീ ത്‌റ്‌ട്ടാനായിന്തദാന ത്‌റ്‌ഡുവാദ്‌ന തെ്റിന്ത് തള്ളുഡൊ. അത്തെ ത്‌റ്‌ഡുവാദ്‌ന തെ്റിന്ത് ഏ്ളെമോളേക്ക് ഗുഡി ദാന ഗേയ കെ്ഡേക്കുവാദ്‌ക്കഞ്ച്‌ക്ക്‌മ് നീ നിന്ന് കയില് താനെ പാഡ്‌പട്ട് ഉണ്ടാക്കുഡൊ.

1 തിമിത്തോസു 2:2

മുക്ക്യമായി രാജാവുഗാള്‌ക്ക്‌മ്, എല്ലാ അദിഗാരിഗാള്‌ക്ക്‌മ് ബേ്ണ്ടി പരേസുഡൊ. അത്തെ പരേസ്‌നദാന നമാക്ക് നിമ്മ്‌ദ്യോഡാമ് അര്‌ക്കില്ലാദേമ് പെ്ളേക്ക്യ മുഡിമ്. അത്തെ നമാക്ക് സാമിക്ക് ബേ്ണ്ടി നലമായി പെ്ളേക്ക്യാമ് അഡ്‌ത്തവാരോഡ നല്ല ദിന്‌സ്‌ല് നഡാന്ത്‌പ്‌ഡിത്ത് ഗേയാമ് മുഡിമ്.

1 തിമിത്തോസു 5:13

അവാര്‌ന ഈ കൂട്ടാക്ക് സേത്ത്‌നദാന അവാര് കള്ള ബ്‌ന്ത് നേര മാഡി നഡാക്കുവാര്. അദ് താനേമല്ല ബീ്ഡ് ബീ്ഡ പോയി ബേ്റെ ആള്‌ഗാള് കാര്യാക്ക് തലെ ഇക്കി നൊണ്ടു സൊല്ലിമ് നഡാക്കുവാര്.

തീത്തോസു 3:14

നമ്മ് ആള്‌ഗാള് ഉവഗരില്ലത്തവാരാഗാദെ അഡ്‌ത്തവാര്‌ക്ക് ബേ്ഡ്‌മാന കാര്യഗാള്‌ന കാണ്‌ഗാട്ടി അദ് ഗേന്ത് കൊഡുത്തു നല്ല കാര്യഗാള് ഗേയ പഡിക്കുഡൊ.

1 പത്ത്‌റോസു 3:4

അദ്‌ക്ക് ബദ്‌ല ഈ അളാഗ് നിമ്മ് നെഞ്ച്‌കുളാക്കിന്ത് ബരുഡൊ. അദ് എന്നാല്‌ക്ക്‌മ് മങ്കാത്ത മര്യാദിമ് തണിമേമ് ഇര്‌ക്കുവ മനേസ്സ്‌ത്തെ. അദ്‌ത്തെ സാമി കണ്ണ്‌ക്ക് ദൊഡ്ഡ കാര്യ.

1 പത്ത്‌റോസു 4:15

നിമ്മ കൊലെഗാറാനായൊ, ത്‌റ്‌ട്ടാനായൊ, കെ്ട്ട കാര്യ ഗേന്റവാനായൊ, മല്ലുണ്ടാക്ക്‌ന്റവാനായൊ കജട്ട പഡുവ ഗെദി നിമാക്ക് ബര്യ പാങ്കില്ലെ.