1 തെസെലോനിക്ക്യഗാറാര് 3:1 - സാമി സേദി

^1-2 അദ്‌നാലെ ഇന്നിമ് നിമാന കാണാദെ പ്‌റ്‌ന്ത്‌റ്‌ക്ക്യ എമാക്ക് മുഡ്യാത്താദ്‌നാലെ എമ്മ തനിഗെ ആദാന്‌സ്‌ല് ഇന്താല്‌മ് പരാവില്ലെന്റ് നെനേത്ത് തിമിത്തോസുന നിമ്മ് പട്ട്‌ക്ക് സൊല്ലി ബ്‌ട്ടേമ്. സാമിന നമ്പി പെ്ളേക്കുവ നിമ്മ് പെ്ളേപ്പ്‌ല് ഇര്‌ക്കുവ നിമ്മ് കജട്ടഗാള്‌ല് നിമ്മ സോറ്റു പോഗാദെ നിമാന ഒറേപ്പുള്ളവാര് മാഡ്യ ബേ്ണ്ടിമ് നിമാന ദയിരപഡിസ്യ ബേ്ണ്ടിമ്‌ത്തെ എമ്മ അയാള്‌ന നിമ്മ് പട്ട്‌ക്ക് സൊല്ലി ബ്‌ട്ടാദ്. അയാള് ഏസ്സ്‌ഗാറാന്‌മ് ക്‌റ്‌സ്‌ത്ത്‌ന പറ്റി സൊല്ലുവ നല്ല സേദിന ആള്‌ഗാള്‌ക്ക് സൊല്ല്യ സാമിക്ക് ബേ്ണ്ടി എമ്മോഡ എ്ണേന്ത് ഗിലാസ ഗേന്റാവാന്‌മ്‌ത്തെ.

1 തെസെലോനിക്ക്യഗാറാര് 3:1 ပူးပေါင်းရင်းမြစ်များ

അപ്പോസുത്തലാര് 17:15

പവുലോസുന കൂട്ടി പോനവാര് ആദാന്‌സ് പട്ടണ എന്നുവ എ്ഡെ മാട്ട്‌ക്ക് അയാളോഡ പോനാര്. പ്‌റസാരി അവാര് ബെ്റോവ പട്ടണാക്ക് തിരിഗി ബന്താര്. സീലാസ്‌മ് തിമിത്തോസുമു സട്ടന തന്ന് പട്ട്‌ക്ക് എജ്ജുഡൊ എന്റ് പവുലോസു അവാര് കയിക്ക് സൊല്ലി ബ്‌ട്ടാന്.

അപ്പോസുത്തലാര് 17:16

സീലാസ്‌മ് തിമിത്തോസുമു ബര്യ ബേ്ണ്ടി പവുലോസു ആദാന്‌സ് പട്ടണാത്ത്‌ല് താനെ കാത്തിന്താന്. അയി പട്ടണാത്ത്‌ല് സെലെഗാള് തുമ്പിന്ത്‌ദ്. അദ്‌ന കണ്ട് അയാള് മനേസ്സ് അത്തേഗേ ബെന്ത്ഡിന്ത്‌ദ്.

2 കൊരിന്ത്യഗാറാര് 2:13

ആന ഏസ്സ്‌ഗാറാന് ആയിര്‌ക്കുവ എന്ന് തീത്തോസുന അദ്‌ല് കാണ്യ മുഡ്യാദാഗാട്ടി എനാക്ക് അറപറാപാറ്റ്. അദ്‌നാലെ അദ്‌ലവാര്‌ന ബിനാത്തി തള്ളി നാന് മക്കെദോന്യാക്ക് പോനെ.

1 തെസെലോനിക്ക്യഗാറാര് 2:17

ഏസ്സ്‌ഗാറാരെ, എമ്മ സെറ്റെ ഗളിഗേത്തെ നിമ്മ് പട്ട്‌ലിന്ത് പ്‌റ്‌ന്തിന്തേമ്, എന്റാല്‌മ് എമ്മ് നെനേവൊട്ടുക്കു നിമ്മോഡത്തെ ഇന്ത്‌ദ്. അദ്‌നാലെ നിമാന ബന്ത് നോഡ്യ എമാക്ക് എത്ത്‌റാഗോ അറാക്കെ എ്ഡ്‌ത്താദ്‌നാലെ അദ്‌ക്ക് ബേ്ണ്ടി എഞ്ചോ ജമ്പ് ഓരാഡ്‌നേമ്.

1 തെസെലോനിക്ക്യഗാറാര് 3:5

അദ്‌നാലെ നിമാന പറ്റ്യുള്ള സേദി തെര്യാദെ എനാക്ക് മുട്ടുമുട്ടാഗാട്ടി സാമിന നമ്പി പെ്ളേക്കുവ നിമ്മ് പെ്ളേപ്പ്‌ന പറ്റി തെര്യ ബേ്ണ്ടി നാന് ആള് ബ്‌ട്ടെ. എന്ത്‌ക്കെന്റ് സൊന്ന, സോദണെ ഗേന്റവാന് ഈ കൊഡിമേന ബെത്ത് നിമാന സോദണെ ഗേന്താനൊ, ഇല്ലെ എമ്മ പട്ടപാഡ് ബെ്റ്‌ദാറ്റൊ എന്റ് നാന് അഞ്ചിക്കെപട്ടെ.