1 പത്ത്‌റോസു 2:21 - സാമി സേദി

²¹ അദ്‌ക്ക് ബേ്ണ്ടിത്തെ സാമി നിമാന ബ്‌ളിത്ത്‌റ്‌ന്റാന്. എന്ത്‌ക്കെന്റ് സൊന്ന ക്‌റ്‌സ്‌ത്ത്‌മ് നിമാക്ക് ബേ്ണ്ടി കജട്ടന താങ്കി നിമ്മ എത്തെ പെ്ളേക്കുഡൊ എന്നുവ ദിന്‌സ്‌ന അയാള് നിമാക്ക് പെ്ളേത്ത് കാട്ടിര്‌ക്ക്‌ന്റാന്.

1 പത്ത്‌റോസു 2:21 ပူးပေါင်းရင်းမြစ်များ

മത്തായി 10:38

എന്ന് പേര്‌ല് എന്ത് കജട്ട ബന്താല്‌മ് അദ്‌ന താങ്കി കൊണ്ടു എന്ന് പിന്ന്‌മേലെ ബര്യ മുഡ്യാത്തവാന്‌ക്ക്‌മ് എന്ന് സൊല്ലുപഡി നഡാക്ക്‌ന്റവാനായ മുഡ്യാമാട്ട.

മത്തായി 11:29

നാന് പൊറിമോഡ ഇര്‌ക്ക്‌ന്റവാന്‌മ് തണിമെഗാറാന്‌മ് ആയിര്‌ക്കുവാദ്‌നാലെ നാന് ഗേയ സൊല്ലുവ കാര്യന ഗേന്ത് കൊണ്ടു എന്നോഡിന്ത് പഡിന്. എന്റദാന നിമ്മ നിമ്മ്‌ദ്യായി ഇര്‌ക്കുവുറു.

മത്തായി 16:24

പ്‌റ ഏസ്സ് തന്ന് സൊല്ലുപഡി നഡാക്ക്‌ന്റവാര്‌ക്ക് ഇത്തെ സൊന്നാന്: <<ആരാറ്റ എന്ന് പിന്ന്‌മേലെ ബര്യ ആസെപട്ടദാന അയാള് തനാക്ക് ഇര്‌ക്കുവാദ്‌നെല്ല ബ്‌ട്ട്‌തള്ളി തനാക്ക് ബരുവ കജട്ടഗാള്‌ന താങ്കി തന്ന് ഉജുരുന ഗുഡി കൊഡുക്ക്യ ഒരിങ്കി കൊണ്ടു എന്ന് പിന്ന്‌മേലെ നഡാക്കുഡൊ.

ലൂക്കോസു 24:26

ക്‌റ്‌സ്‌ത്ത് ഈ കജട്ടഗാള്‌നെല്ല താങ്ക്‌ന പ്‌റ മേലോഗാക്ക് മദ്‌പ്പോഡ പോയി ഇര്‌ക്കുഡൊ>> എന്റ് സൊന്നാന്.

ഓഗന്നാന് 13:15

നാന് നിമാക്ക് ബേ്ണ്ടി ഗേന്ത പാസെ നിമ്മാമ് ഗേയ ബേ്ണ്ടിത്തെ നാന് മുദാല് താനെ നിമാക്ക് ഇത്തെ ഗേന്ത് കാട്ടിര്‌ക്കുവാദ്.

ഓഗന്നാന് 16:33

എന്ന്‌നാലെ നിമ്മ നിമ്മ്‌ദ്യായി ഇര്‌ക്ക്യ ബേ്ണ്ടി ഈ കാര്യഗാള്‌ന നാന് നിമാക്ക് സൊല്ലിര്‌ക്ക്‌ന്റെ. ഉലഗാത്ത്‌ല് നിമാക്ക് കജട്ട ഇര്‌ക്ക്‌ന്റ്, എന്റാല്‌മ് ദയിരപഡ്‌ന്, നാന് ഉലഗാന സോലുസിര്‌ക്ക്‌ന്റെ.>>

അപ്പോസുത്തലാര് 14:22

അവാര് അദ്‌ല് ഏസ്സ് സൊല്ലുപഡി നഡാക്ക്‌ന്റവാര് നമ്പിക്കേന ഒറേപ്പ്‌സ്‌ന പ്‌റ നിമാക്ക് ഇര്‌ക്കുവ നമ്പിക്കേല് നേര്‌മോഡ ഇര്‌ക്കുഡൊ എന്റ് അവാര്‌ന ദയിരപഡ്‌സ്‌നാര്. <<നമ്മ പല ദിന്‌സ് കജട്ടഗാള്‌ന താങ്കിത്തെ സാമി ആളുവ നാഡ്‌ക്ക് പോഡൊ>> എന്റ്‌മ് അവാര്‌ന പഡ്‌സ്‌നാര്.

അപ്പോസുത്തലാര് 17:3

ക്‌റ്‌സ്‌ത്ത് കജട്ട പഡുഡൊ എന്റ്‌മ് സാവുലിന്ത് ഉജുര്‌ളാഗുഡൊ എന്റ്‌മ് അവാര്‌ക്ക് സൊക്കാന സൊല്ലി കൊഡുത്താന്. <<നാന് നിമാക്ക് സൊല്ലുവ ഈ ഏസ്സ്‌ത്തെ ക്‌റ്‌സ്‌ത്ത്>> എന്റ്‌മ് പവുലോസു അവാര്‌ക്ക് കാട്ടി കൊഡുത്താന്.

അപ്പോസുത്തലാര് 9:16

എനാക്ക് ബേ്ണ്ടി എന്തെല്ല കജട്ടഗാള് താങ്കുഡൊ എന്നുവാദ്‌ന നാന് താനെ അയാള്‌ക്ക് കാട്ടി കൊഡുക്കുവേന്>> എന്റ് സൊന്നാന്.

റോമഗാറാര് 8:29

എന്ത്‌ക്കെന്റ് സൊന്ന, സാമി താന് മുന്നുക്കെ തെരിന്തിന്തവാര്‌ന തന്ന് മഗാന്‌ക്ക് ഇര്‌ക്കുവ ഉരുവാന പാസെ ആയ ബേ്ണ്ടി സാമി അവാര്‌ന അലാക്ക പ്‌റ്‌ത്ത് ബെത്ത് അവാര്‌ക്ക് തന്ന് മഗാന്‌ന തലെകോഡി അണ്ണാന് മാഡ്‌നാന്.

1 കൊരിന്ത്യഗാറാര് 11:1

നാന് ക്‌റ്‌സ്‌ത്ത്‌ന നോഡികൊണ്ടു പെ്ളേക്കുവ പാസെ നിമ്മാമ് എനാന നോഡികൊണ്ടു പെ്ളേന്.

എപസോസുഗാറാര് 5:2

എന്ത്‌ക്കെന്റ് സൊന്ന ക്‌റ്‌സ്‌ത്ത് ഏസ്സ് നമ്മോഡ സീവാന്‌ബെത്ത് നമ്മ ഗേന്ത പാവഗാള്‌ക്ക് ബേ്ണ്ടി തന്ന് പെ്ളേപ്പ്‌ന സാമിക്ക് നല്ല ബാഡെ അഡിക്കുവ നേര്‌സെ പലി കൊഡുത്താന്. അത്തെ സാമിക്ക് മെച്ച്‌പ്‌ഡിത്ത ദിന്‌സ്‌ല് ക്‌റ്‌സ്‌ത്ത് പെ്ളേത്ത പാസെ നിമ്മാമ് ആങ്കീങ്ക് സീവാന്‌ബെത്ത് പെ്ളേന്.

പിലിപ്പ്യഗാറാര് 2:5

ക്‌റ്‌സ്‌ത്ത് ഏസ്സ്‌ക്കിര്‌ക്കുവ മനേസ്സ്‌ത്തെ നിമാക്ക്‌മ് ഇര്‌ക്കുഡൊ.

1 തെസെലോനിക്ക്യഗാറാര് 3:3

ആന കൊഡിമെഗാള്‌പഡ്യാത്തെ സാമി നമാന എ്ഡ്‌ത്ത് ബെത്ത്‌റ്‌ക്കുവാദ് എന്റ് നിമാക്ക് താനെ തെരിമല്ല.

1 തെസെലോനിക്ക്യഗാറാര് 4:2

ആണ്ടവാന് ഏസ്സ് അദിഗരാത്ത്‌ല് എമ്മ നിമാക്ക് തന്ത കല്‌പനെഗാള് എന്തെന്റ് നിമാക്ക് തെരിമല്ല.

2 തിമിത്തോസു 3:12

ആന ക്‌റ്‌സ്‌ത്ത് ഏസ്സ്‌ന നമ്പി സാമിക്ക് മെച്ച്‌പ്‌ഡിത്ത ദിന്‌സ്‌ല് പെ്ളേക്ക്യ ആസെപഡ്‌ന്റവാര്‌ക്ക് ഒട്ടുക്കു കൊഡിമെഗാള് ബര്‌മ്.

എവുറായാര് 2:10

എല്ലാദ്‌നാമ് ദ്‌ട്ടിസി പാദ്‌ഗാത്ത് ബെക്ക്‌ന്റവാന്‌ത്തെ സാമി. എഞ്ചോ മഗാനാര് തന്ന് മദ്‌പ്പ്‌ക്ക് പങ്ക്‌ഗാറാര് ആയ ബേ്ണ്ടി അവാര്‌ന കാപാറ്റുവ ഏസ്സ്‌ന എഞ്ചോ കജട്ടഗാള്‌പഡ്യ ബ്‌ട്ട് ഒന്റുക്കുമു കൊറേവില്ലത്തവാന് മാഡുവാദ് അയി സാമിക്ക് നല്ലാദ്‌ത്തെ ആയിന്ത്‌ദ്.

1 പത്ത്‌റോസു 1:20

ഉലഗാന ദ്‌ട്ട്‌സാത്ത മുദാല് താനെ സാമി അയാള്‌ന തെരിന്തെ്ഡ്‌ത്തിന്താന്. ആന ഈ കഡേസി കാലാത്ത്‌ല് അയാള് നിമാക്ക് ബേ്ണ്ടി എദ്‌ക്ക ബന്താന്.

1 പത്ത്‌റോസു 2:24

നമ്മ പാവാക്ക് ബേ്ണ്ടി ഇന്നി പെ്ളേക്കാദെ നേര്‌മേക്ക് ബേ്ണ്ടി പെ്ളേക്ക്യ ക്‌റ്‌സ്‌ത്ത് നമ്മ് പാവാനെല്ല തന്ന് സരിഗലാത്ത്‌ല് ഏറ്റെഡ്‌ത്ത് കൊണ്ടു കുരുസുലു സത്താന്. അയാള് പട്ട ഗായനാലെ നിമാക്ക് സുഗ കെ്ഡേത്ത്‌റ്‌ക്ക്‌ന്റ്.

1 പത്ത്‌റോസു 3:18

എന്ത്‌ക്കെന്റ് സൊന്ന നേര്‌മല്ലത്തവാര് ആയിര്‌ക്കുവ നിമാന സാമി പട്ട്‌ക്ക് എ്ഡ്‌ത്ത് പോയ ബേ്ണ്ടി നേര്‌മെഗാറാനാന ക്‌റ്‌സ്‌ത്ത് നിമ്മ് പാവാക്ക് ബേ്ണ്ടി ഒന്റു ജമ്പ് സത്താന്. അയാള് സരിഗലാത്ത്‌ല് സത്താല്‌മ് നിഗാല്‌നാലെ പെ്ളേക്ക്‌ന്റാന്.

1 പത്ത്‌റോസു 3:9

നിമാക്ക് കെ്ട്ടാദ് ഗേന്റവാര്‌ക്ക് കെ്ട്ടാദ് ഗേഗാദേന്. നിമാന നൊഡിന്റവാര്‌ന നിമ്മ നൊഡ്യാദേന്. അദ്‌ക്ക് ബദ്‌ല അവാര്‌ക്ക് നല്ലാദ് ബരുഡൊ എന്റ് സൊല്ലുനു. എന്ത്‌ക്കെന്റ് സൊന്ന സാമി തരുവ ബാക്ക്‌വരഗാള്‌ക്ക് പങ്ക്‌ഗാറാര് ആയ ബേ്ണ്ടിത്തെ നിമാന ബ്‌ളിത്ത്‌റ്‌ക്കുവാദ്.

1 പത്ത്‌റോസു 4:1

അദ്‌നാലെ ക്‌റ്‌സ്‌ത്ത് സരിഗലാത്ത്‌ല് കജട്ട പട്ടാദ്‌നാലെ നിമ്മാമ് അത്തവ കജട്ടപാഡ്‌ഗാള്‌ന താങ്ക്യ ഒരുക്ക ഉള്ളവാര് ആയിര്‌ക്കുഡൊ. അത്തവ കജട്ടപാഡ്‌ഗാള്‌ന താങ്ക്‌ന്റവാര് പാവാക്ക് സിക്കാദെ പെ്ളേക്കുവാര്.

1 പത്ത്‌റോസു 4:13

ആന ക്‌റ്‌സ്‌ത്ത് പട്ട കൊഡിമെഗാള്‌ക്ക് നിമ്മ പങ്ക്‌ഗാറാര് ആവാദ്‌നാലെ നിമ്മ പിര്യപൊങ്കുന്. അത്തെ നിമ്മ കൊഡിമെ പട്ടദാന ക്‌റ്‌സ്‌ത്ത് തനാക്കിര്‌ക്കുവ മദ്‌പ്പ്‌ല് തിരിഗി ബര്‌ഗാട്ടി നിമാക്ക്‌മ് ദൊഡ്ഡ പിര്യ ബര്‌മ്.

1 ഓഗന്നാന് 2:6

സാമ്യോഡ എ്ണേവ് ബെത്ത്‌റ്‌ന്റാന് എന്റ് സൊല്ലുന്റവാന് ഏസ്സ് ക്‌റ്‌സ്‌ത്ത് എത്തെ തന്നപ്പാന് സാമ്യോഡ എ്ണേവ് ബെത്ത് പെ്ളേത്തിന്താനൊ അദേപാസെ പെ്ളേക്കുഡൊ.

1 ഓഗന്നാന് 3:16

ഏസ്സ് ക്‌റ്‌സ്‌ത്ത് നമാക്ക് ബേ്ണ്ടി തന്ന് ഉജുരുന തന്താദ്‌നാലെ സീവാന് എന്നുവാദ് എന്തെന്റ് നമാക്ക് തെരിന്ത്‌റ്‌ക്ക്‌ന്റ്. അദേപാസെ നമ്മാമ് അഡ്‌ത്തവാര്‌ക്ക് ബേ്ണ്ടി നമ്മ് ഉജുരുന കൊഡുക്കുഡൊ.

ബെ്ളിപട്ട കാര്യ 12:11

കൊറ്യാഡ് കുട്ടി സോരെനാലേമ് തമ്മ സൊന്ന സത്ത്യ സേദിനാലേമ് അവാര് അയി പാമ്പ്‌ന സോലുസുനാര്. തമ്മ് ഉജുരുന ദൊഡ്ഡാദ് എന്റ് നോഡാദെ സായ ഗുഡി അവാര് ഒരിങ്കിന്താര്.