1 പത്ത്‌റോസു 2:19 - സാമി സേദി

¹⁹ എന്ത്‌ക്കെന്റ് സൊന്ന സാമിന നെനേത്ത് നിമ്മ കുറ്റ ഗേഗാദെ കൊഡിമെപഡുവദാന സാമി നിമാന നെനേത്ത് പിര്യപഡുവാന്.

1 പത്ത്‌റോസു 2:19 ပူးပေါင်းရင်းမြစ်များ

ലൂക്കോസു 6:32

നിമാന സീവാന്‌ബെത്ത് നഡാക്ക്‌ന്റവാരോഡ താനെ നിമ്മ സീവാന്‌ബെത്ത് നഡാന്തദാന നിമാക്ക് എന്ത് ഉവഗര? പാവ ഗേന്റവാര്‌മ് തമാന സീവാന്‌പഡ്‌ന്റവാര്‌ന സീവാന്‌പഡ്‌ന്റാരല്ല.

ഓഗന്നാന് 15:21

എന്റാല്‌മ് എനാന സൊല്ലി ബ്‌ട്ടവാന്‌ന അവാര്‌ക്ക് തെര്യാത്താദ്‌നാലേമ് നിമ്മ എന്ന് ആള്‌ഗാള് ആനാദ്‌നാലേമ് ഇദൊട്ടുക്കു നിമാക്ക്‌മ് അവാര് ഗേവാര്.

അപ്പോസുത്തലാര് 11:23

അയാള് ആങ്ക് എജ്ജി സാമി അവാര്‌ക്ക് കൊഡുത്ത്‌റ്‌ക്കുവ ബരഗാള്‌ന കണ്ട് പിര്യപട്ടാന്. നിമാക്ക് ഏസ്സോഡ ഇര്‌ക്കുവ നമ്പിക്കെ എന്നാല്‌ക്ക്‌മ് കമ്മി ആഗാദെ ഇര്‌ക്കുഡൊ എന്റ്‌മ്, മനേസ്സാറ ആണ്ടവാന്‌ക്ക് ബേ്ണ്ടി പെ്ളേക്കുഡൊ എന്റ്‌മ് അയാള് അവാര്‌ക്ക് സൊന്നാന്.

റോമഗാറാര് 13:5

അദ്‌നാലെ കെ്ഡേക്കുവ ദെ്ണ്ടണെന നെനേത്ത് താനേമല്ല, അത്തെ ഗേഡൊ എന്റ് മനേസ്സ് സൊല്ലുവാദ്‌നാലേമ് ആള്‌ന്റവാര്‌ക്ക് കെ്ട്ട്‌പട്ട് നഡാക്കുഡൊ എന്നുവാദ് ബേ്ഡ്‌മാന കാര്യത്തെ.

1 കൊരിന്ത്യഗാറാര് 15:10

ആന സാമി പ്‌ണ്ണ്യാത്ത്‌ല്‌ത്തെ നാന് അപ്പോസുത്തലാന് ആനാദ്. സാമി എനാക്ക് ഗേന്ത പ്‌ണ്ണ്യ ഉവഗര ഇല്ലത്താദ് ആഗാലെ. ബേ്റെ അപ്പോസുത്തലാര്‌ന ബ്‌ഡ നാന് മ്‌ഗ്‌ന്ത പാഡ്‌പട്ട്‌റ്‌ന്റെ. നാന് ഒരുത്താന് താനെ എന്തൊന്റു ഗേന്തേന് എന്റല്ല, സാമി പ്‌ണ്ണ്യാത്ത്‌ല്‌ത്തെ നാന് ഇദെല്ല ഗേന്താദ്.

2 കൊരിന്ത്യഗാറാര് 1:12

ഈ ഉലഗാത്ത്‌ല ആള്‌ഗാള് പട്ട്‌ല്, മുക്ക്യമായിമ് നിമ്മ് പട്ട്‌ല് പെ്ളേക്കാട്ടി സാമി എമാക്ക് തന്ത സുത്താപ്പുള്ള മനേസ്സോഡാമ് കവാഡില്ലാത്ത മനേസ്സോഡാമ്‌ത്തെ പെ്ളേത്തേമ്. ഈ ഉലഗാത്ത്‌ലിന്ത് കെ്ഡേത്ത അറുവുനാലെ അല്ല സാമി ഗേന്ത പ്‌ണ്ണ്യാത്ത്‌ല്‌ത്തെ എമാക്ക് അത്തെ പെ്ളേക്ക്യ മുഡിന്താദ്. ഇദ് നേര്‌ത്തെ എന്റ് എമ്മ് മനേസ്സ് ഒറേപ്പായിമ് സൊന്റു. ഇദ്‌നത്തെ എമ്മ പെരിമെപഡ്‌ന്റേമ്.

2 കൊരിന്ത്യഗാറാര് 8:1

ഏസ്സ്‌ഗാറാരെ, മക്കെദോന്യാല് ഇര്‌ക്കുവ ഏസ്സ്‌ഗാറാര് കൂട്ടഗാള്‌ക്ക് സാമി ഗേന്ത പ്‌ണ്ണ്യന പറ്റി നിമാക്ക് സൊല്ല്യ നാന് ഇന്നാല് ആസെപഡ്‌ന്റെ.

2 തിമിത്തോസു 1:12

അദ്‌നാലെത്തെ നാന് ഇന്നാലീ കജട്ട പഡുവാദ്. എന്റാല്‌മ് അത്തെ കജട്ട പഡുവാദ്‌ല് നാന് നാണപഡുവാദില്ലെ. എന്ത്‌ക്കെന്റ് സൊന്ന നാന് ആര്‌ന നമ്പിര്‌ന്റേന് എന്റ് എനാക്ക് തെരിമ്. ആണ്ടവാന് തിരിഗി ബരമാട്ട്‌ക്ക്, എനാക്ക് ഒപ്പിസി തന്ത്‌റ്‌ക്കുവ ഈ കാര്യന പാദ്‌ഗാത്ത് ബെക്ക്യ അയാള്‌ക്ക് മുഡിമെന്റ് എനാക്ക് ഒറേപ്പിര്‌ക്ക്‌ന്റ്.

എവുറായാര് 10:2

അത്തെ മാഡ്യ മുഡിന്തിന്തദാന പലി കൊഡുക്കുവാദ് താനെ നിന്റ് പോയിര്‌ക്ക്‌മല്ല? കുമ്മുഡ്യ ബന്റവാര് ഒന്റേ ജമ്പ് താനെ സുത്താപ്പുള്ളവാര് ആയിന്തദാന തമ്മ പാവ ഗേന്തവാര് എന്നുവ നെനേവു പിന്നെ അവാര്‌ക്ക് ഇന്ത്‌റ്‌ക്കമാട്ട.

1 പത്ത്‌റോസു 2:20

നിമ്മ കുറ്റ ഗേന്ത് കെ്ഡേസ്‌ന അഡിന താങ്കുവാദ്‌നാലെ നിമാക്ക് എന്ത് പെരിമെ ഇര്‌ക്ക്‌ന്റ്? ആന നല്ലാദ് ഗേന്ത പേര്‌ല് കജട്ട പഡുവാദ്‌ന താങ്കുവദാന സാമി നിമാന പിര്യപഡുവാന്.

1 പത്ത്‌റോസു 4:15

നിമ്മ കൊലെഗാറാനായൊ, ത്‌റ്‌ട്ടാനായൊ, കെ്ട്ട കാര്യ ഗേന്റവാനായൊ, മല്ലുണ്ടാക്ക്‌ന്റവാനായൊ കജട്ട പഡുവ ഗെദി നിമാക്ക് ബര്യ പാങ്കില്ലെ.