1 കൊരിന്ത്യഗാറാര് 4:12 - സാമി സേദി

¹² എമ്മ് ബേ്റ്‌വായിക്ക് ബേ്ണ്ടി എമ്മ അവനവാന് കയില് താനെ പാഡ്‌പഡ്‌ന്റേമ്. എമാന സാപ്പ ഇക്ക്‌ഗാട്ടിമ് അവാര്‌ക്ക് നല്ലാദ് ബര്യ ബേ്ണ്ടി എമ്മ പരേസ്‌ന്റേമ്. എമാന കൊഡിമെപഡ്‌സ്‌ഗാട്ടിമ് എമ്മ അദ്‌ന പൊറിമോഡ താങ്ക്‌ന്റേമ്.

1 കൊരിന്ത്യഗാറാര് 4:12 ပူးပေါင်းရင်းမြစ်များ

മത്തായി 5:11

നിമ്മ എന്ന് സൊല്ലുപഡി നഡാക്കുവാദ്‌നാലെ നിമാന നാണഗെ്ഡ്‌സ്‌ഗാട്ടിമ് കൊഡിമെപഡ്‌സ്‌ഗാട്ടിമ് എല്ലാ ദിന്‌സ് കെ്ട്ട കാര്യഗാള് ഗേന്റവാരെന്റ് നിമാന പറ്റി ഉറുട്ടു സൊല്ലുഗാട്ടിമ് നിമ്മ ബാഗ്യകേ്ട്ടവാര്‌ത്തെ.

മത്തായി 5:44

ആന നാന് നിമാക്ക് സൊല്ലുവാദ് എന്തെന്റ് സൊന്ന, നിമ്മ് പോട്ടിഗാറാര്‌ന സീവാന്‌ബെത്ത് നഡാന്. നിമാന കൊഡിമെപഡ്‌സ്‌ന്റവാര്‌ക്ക് ബേ്ണ്ടി പരേസ്‌ന്.

ലൂക്കോസു 23:34

അദുക്കുള ഏസ്സ്: <<അപ്പാ, ഇവാര് ഗേവാദ് എന്തെന്റ് ഇവാര്‌ക്ക് താനെ തെരിവാദില്ലെ, അദ്‌നാലെ ഇവാര്‌ന പൊറുക്കുഡോമെ>> എന്റ് പരേസ്‌നാന്. അത്തെ അവാര് സീ്ട്ടിക്കി അയാള് ഉഡുപ്പുന പങ്ക്യെ്ഡ്‌ത്താര്.

ലൂക്കോസു 6:28

നിമാന സാപ്പ ഇക്ക്‌ന്റവാര്‌ക്ക് നിമ്മ നലമായിര്‌ന് എന്റ് സൊല്ലുനു. നിമ്മോഡ കെ്ട്ട ദിന്‌സ്‌ല് നഡാന്ത്‌പ്‌ഡിത്ത് ഗേന്റവാര്‌ക്ക് ബേ്ണ്ടി നിമ്മ പരേസ്‌ന്.

ഓഗന്നാന് 15:20

<ഗിലാസഗാറാന് തന്ന് പണ്ണാഡിന ബ്‌ഡ ദൊഡ്ഡവാനല്ല> എന്റ് നിമാക്ക് സൊന്ന നായന നെനേത്ത്‌റ്‌ന്. അവാര് എനാന കൊഡിമെപഡ്‌സ്‌നാര്, അത്ത്യാന നിമാനാമ് കൊഡിമെപഡുസുവാര്, അവാര് എന്ന് സൊല്ലുപഡി നഡാന്തിന്തദാന നിമ്മ് സൊല്ലുപഡിമ് നഡാക്കുവാര്.

അപ്പോസുത്തലാര് 18:3

ഗുഡുസുലു മാഡി ബിക്കുവ ഗിലാസത്തെ അവാര് ഗേന്തിന്താദ്. പവുലോസുമ് അത്തവ ഗിലാസത്തെ ഗേന്തിന്താന്. അദ്‌നാലെ അയാള്‌മ് അവാരോഡ എ്ണേന്ത് അയി ഗിലാസ ഗേന്താന്. അത്തെ അയാള് അയി ഗിലാസ ഗേന്ത് തനാക്ക് പണ സമ്പാരിത്തിന്താന്.

അപ്പോസുത്തലാര് 20:34

എനാക്ക്‌മ് എന്നൊപ്പ ഇര്‌ക്ക്‌ന്റവാര്‌ക്ക്‌മ് ബേ്ഡ്‌മാനാദ്‌ക്കെല്ല എന്ന് ഈ കയില്‌ത്തെ പാഡ്‌പട്ടേനെന്റ് നിമാക്ക് താനെ തെരിമല്ല.

അപ്പോസുത്തലാര് 7:60

അയാള് സന്ത്‌ന ഊന്റികൊണ്ടു ദൊഡ്ഡാദ്‌ക്ക് അഗാറി സൊന്നാന്, <<ആണ്ടവാനെ! അവാര് ഗേന്ത ഈ പാവഗാള്‌ക്ക് അവാര്‌ന നീ ദെ്ണ്ടിക്കാദെ ഇര്‌ക്കുഡോമെ>> എന്റ് സൊന്ന പ്‌റ അയാള് സത്താന്.

റോമഗാറാര് 12:14

നിമാന കൊഡിമെപഡ്‌സ്‌ന്റവാര്‌ക്ക് നല്ലാദ് ബരുഡൊ എന്റ് സൊല്ലുനു, സാപ്പ ഇക്കാദെ അവാര്‌ക്ക് നല്ലാദ് ബരുഡൊ എന്റ് സൊല്ലുനു.

റോമഗാറാര് 12:20

ആന <<നിന്ന് പോട്ടിഗാറാര്‌ക്ക് പജിപ്‌ഡിക്കുവദാന അയാള്‌ക്ക് തിന്ന്യ തീനി കൊഡു, നീരറാക്കെ എ്ഡ്‌ക്കുവദാന കുഡിക്ക്യ നീര് കൊഡു, നീ അത്തെ ഗേന്തദാന അയാള്‌ന നാണഗെ്ഡ്‌സുവായി>> എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്ക്‌ന്റല്ല.

റോമഗാറാര് 8:35

ക്‌റ്‌സ്‌ത്ത് നമ്മോഡ ബെത്ത്‌റ്‌ക്കുവ സീവാന്‌ലിന്ത് ആര്‌ക്ക് നമാന പ്‌റ്‌ക്ക്യ മുഡിമ്? കജട്ടഗാള്‌ക്കൊ, സങ്കഡഗാള്‌ക്കൊ, കൊഡിമെഗാള്‌ക്കൊ, പജിപട്ടിണിക്കൊ, ഉഡുപ്പുസഡ്‌പ്പ് ഇല്ലാത്ത ഗെദിഗാള്‌ക്കൊ, ആവാത്ത്‌ഗാള്‌ക്കൊ, ബാള്‌ക്കൊ നമാന പ്‌റ്‌ക്ക്യ മുഡിമ? മുഡ്യാഗേ മാട്ട.

1 കൊരിന്ത്യഗാറാര് 9:6

അല്ല, ഗിലാസ ഗേഗാദിര്‌ക്ക്യ എനാക്ക്‌മ് ബറ്‌ണവാസ്‌ക്ക്‌മ് താനെത്ത അദിഗര ഇല്ലെന്റ്‌റ്‌ക്ക്‌ന്റ?

2 കൊരിന്ത്യഗാറാര് 11:8

നാന് നിമ്മ് പട്ട്‌ല് നല്ല സേദിന സൊല്ലുഗാട്ടി ബേ്റെ ഏസ്സ്‌ഗാറാര് കൂട്ടഗാള്‌ത്തെ എന്ന് സിലാവുക്കു തന്താദ്. ഒന്റു കണാക്ക്‌ല് സൊല്ല്യ പോന നിമാന കയിതാങ്ക്യ ബേ്ണ്ടി നാന് അവാര്‌ന ബുദ്ദിമുട്ടുസുനെ.

എപസോസുഗാറാര് 4:28

നീ ത്‌റ്‌ട്ടാനായിന്തദാന ത്‌റ്‌ഡുവാദ്‌ന തെ്റിന്ത് തള്ളുഡൊ. അത്തെ ത്‌റ്‌ഡുവാദ്‌ന തെ്റിന്ത് ഏ്ളെമോളേക്ക് ഗുഡി ദാന ഗേയ കെ്ഡേക്കുവാദ്‌ക്കഞ്ച്‌ക്ക്‌മ് നീ നിന്ന് കയില് താനെ പാഡ്‌പട്ട് ഉണ്ടാക്കുഡൊ.

1 തെസെലോനിക്ക്യഗാറാര് 2:9

ഏസ്സ്‌ഗാറാരെ, എമ്മ പട്ട പാഡ്‌നാമ്, എമ്മ പട്ട ബുദ്ദിമുട്ടുനാമ് നിമ്മ നെനേക്ക്‌ന്റ്‌റല്ല. നിമാക്ക് ആര്‌ക്ക്‌മ് ബുദ്ദിമുട്ടു മാഡാദിര്‌ക്ക്യ ബേ്ണ്ടി ഇ്റ്‌ട്ട്‌പഗാല് ഗിലാസ ഗേന്ത്‌കൊണ്ടുത്തെ സാമിന പറ്റി സൊല്ലുവ നല്ല സേദിന എമ്മ നിമാക്ക് സൊന്നാദ്.

2 തെസെലോനിക്ക്യഗാറാര് 3:8

എമ്മ ബെ്റ്‌ദെ ഇന്ത് തീനി തിന്നാലെ. അദ്‌ക്ക് ബദ്‌ല നിമാക്ക് ആര്‌ക്ക്‌മ് എമ്മ ബാര ആഗാദിര്‌ക്ക്യ ബേ്ണ്ടി ഇ്റ്‌ട്ട്‌പഗാല് എമ്മ പാഡ്‌മ് പട്ടേമ്, കജട്ടാമ് പട്ടേമ്.

1 തിമിത്തോസു 4:10

ഇദ്‌ക്ക് ബേ്ണ്ടിത്തെ എമ്മ ഉജുരുള്ള സാമ്യോഡ നെഞ്ചഡെബെത്ത് ബുദ്ദിമുട്ടി ഗിലാസ ഗേവാദ്. അയി സാമി എല്ലാ ആള്‌ഗാള്‌ന കാപാറ്റ്‌ന്റവാന്‌മ് മുക്ക്യമായി തനാന നമ്പ്‌ന്റവാര്‌ന കാപാറ്റ്‌ന്റവാന്‌മ്‌ത്തെ.

1 പത്ത്‌റോസു 2:23

ജനഗാള് തനാന നാണഗെ്ഡ്‌സ്‌ഗാട്ടി താന് ആര്‌നാമ് നാണഗെ്ഡ്‌സാലെ, തനാന കജട്ട പഡ്‌സ്‌ഗാട്ടി താന് ആര്‌നാമ് മെ്റ്‌ട്ടാലെ. അദ്‌ക്ക് ബദ്‌ല നേര്‌മോഡ ബിദിക്കുവ സാമി കയിക്ക് തനാന ഒപ്പുസുനാന്.

1 പത്ത്‌റോസു 3:14

ആന നേര്‌മുള്ള കാര്യ ഗേന്ത് ഗുഡി കജട്ട ബന്തദാന നിമ്മ ബാഗ്യകേ്ട്ടവാര്‌ത്തെ. <<അവാര് നിമാന അഞ്ച്‌സുവാദ്‌ന കണ്ട് നിമ്മ അഞ്ചാമ് ബേ്ഡ, അദ്‌റാമ് ബേ്ഡ.>>

1 പത്ത്‌റോസു 3:9

നിമാക്ക് കെ്ട്ടാദ് ഗേന്റവാര്‌ക്ക് കെ്ട്ടാദ് ഗേഗാദേന്. നിമാന നൊഡിന്റവാര്‌ന നിമ്മ നൊഡ്യാദേന്. അദ്‌ക്ക് ബദ്‌ല അവാര്‌ക്ക് നല്ലാദ് ബരുഡൊ എന്റ് സൊല്ലുനു. എന്ത്‌ക്കെന്റ് സൊന്ന സാമി തരുവ ബാക്ക്‌വരഗാള്‌ക്ക് പങ്ക്‌ഗാറാര് ആയ ബേ്ണ്ടിത്തെ നിമാന ബ്‌ളിത്ത്‌റ്‌ക്കുവാദ്.

1 പത്ത്‌റോസു 4:19

അദ്‌നാലെ സാമി പിര്യാക്ക് കജട്ട പഡുവാദ്‌ന താങ്ക്‌ന്റവാര് നല്ലാദ് ഗേന്ത് കൊണ്ടു സൊന്ന പാസെ ഗേന്റവാനായി ദ്‌ട്ട്‌സ്‌നവാന് കയിക്ക് തമ്മ് നിഗാല് കുട്ടിന ഒപ്പുസുഡൊ.

ജൂദാന് 1:9

ആന ദൂദാര്‌ഗാള്‌ല് മുമ്പാനായിര്‌ക്കുവ മിഗായേല് മോസെ സാവുന പറ്റി സെയിത്താനോഡ തറ്‌ക്കുവ ഗളിഗേല് അയി സെയിത്താന് ഗേവ കുറ്റന കണ്ട് താന് അയാള്‌ന നൊഡിവാദ് സെര്യല്ല എന്റ് നെനേത്ത് ആണ്ടവാന് നിനാന ദെ്ണ്ടിക്കുഡൊ എന്റ്‌ത്തെ സൊന്നാന്.