1 കൊരിന്ത്യഗാറാര് 12:11 - സാമി സേദി

¹¹ ആന ഈ ബരഗാളെല്ല കൊഡുക്കുവാദ് ഒന്റേ സാമിനിഗാല്‌ത്തെ. അയാള് തനാക്ക് പ്‌ഡിത്ത പാസെ ഒന്റൊന്റാള്‌ക്ക്‌മ് അദാദ് ബരാന പങ്കി കൊഡുക്കുന്റാന്.

1 കൊരിന്ത്യഗാറാര് 12:11 ပူးပေါင်းရင်းမြစ်များ

മത്തായി 11:26

നേര്‌ത്തപ്പ, അത്തെ ഗേയാത്തെ നിനാക്ക് ആസെ ഇന്താദ്.

മത്തായി 20:15

എനാക്കിര്‌ക്കുവാദ്‌ന എന്ന് മനേസ്സ്‌ക്ക് പ്‌ഡിത്ത പാസെ ഗേയ എനാക്ക് ഉരിമെ ഇല്ലേഗ? നാന് നല്ലവാന് ആനാദ്‌നാലെ നിനാക്ക് കണ്ണ്‌കഡ്യ?> എന്റ് സൊന്നാന്.

ഓഗന്നാന് 3:27

അദുക്കുള ഓഗന്നാന് ഇത്തെ ബദ്‌ല് സൊന്നാന്: <<മേലോഗാത്ത്‌ല സാമി കൊഡുക്കാദെ കണ്ട് ആര്‌ക്ക്‌മ് ഒന്റുമു കെ്ഡേയ.

ഓഗന്നാന് 3:8

കാറ്റ് തനാക്ക് പ്‌ഡിത്ത സാരി അഡിക്ക്‌ന്റ്. അയി ജദ്ദന താനെത്തെ നീ കേ്ള്‌ക്ക്‌ന്റായി. ആന കാറ്റ് ഏദ്‌ലിന്ത് ബന്റ് എന്റ്‌മ് ഏങ്ക് പോന്റു എന്റ്‌മ് നിനാക്ക് തെരിവാദില്ലെ. അദേപാസെത്തെ സാമിനിഗാല്‌ല് പ്‌റാന്ത ഒന്റൊന്റു ആള്‌ഗാള്>> എന്റ് സൊന്നാന്.

ഓഗന്നാന് 5:21

അപ്പാന് സാമി സത്തവാര്‌ന ഉജുര്‌ളാക്കി അവാര്‌ക്ക് ഉജുരു കൊഡുത്ത പാസെ മഗാന്‌മ് തനാക്ക് പ്‌ഡിത്തവാര്‌ക്ക് ഉജുരു കൊഡുക്കുവാന്.

റോമഗാറാര് 12:6

അദ്‌നാലെ സാമി നമാക്ക് ഗേന്ത പ്‌ണ്ണ്യാക്ക് തഗ്‌ന്ത പാസെ പല ദിന്‌സ് ബരഗാള് നമാക്ക് കെ്ഡേത്ത്‌റ്ക്ക്ന്റ്. അദ്‌നാലെ സാമിക്ക് മന്‌സാരോഡ സൊല്ല്യ ഇര്‌ക്കുവ കാര്യഗാള്‌ന സൊല്ലുവ ബര കെ്ഡേത്തവാന് അയാള്‌ക്ക് ഇര്‌ക്കുവ നമ്പിക്കേക്ക് തഗ്‌ന്ത പാസെ അയാള് അയി കാര്യ ഗേഡൊ.

റോമഗാറാര് 9:18

അദ്‌നാലെ താന് തെരിന്തെ്ഡ്‌ക്കുവ ആള്‌ഗാള്‌ന സാമിക്ക് ഗവപ്‌ഡിക്ക്‌ന്റ്, താന് തെരിന്തെ്ഡ്‌ക്കുവ ആള്‌ഗാള്‌ന മരനെഞ്ച്‌ഗാറാര് മാഡ്‌ന്റാന്.

1 കൊരിന്ത്യഗാറാര് 12:18

സാമി തന്ന് ആസെപഡി മൂട്ടുമുറിഗാള്‌ന സരിഗലാത്ത്‌ല് അദാദ് പട്ട്‌ക്ക് ബെത്ത് മൂട്ടിര്‌ന്റാന്.

1 കൊരിന്ത്യഗാറാര് 12:4

സാമിനിഗാല് തരുവ ബാക്ക്‌വരഗാള് പല ദിന്‌സ്‌ല് ഇര്‌ക്ക്‌ന്റ്. ആന അദ്‌ന നമാക്ക് തരുവ സാമിനിഗാല് ഒന്റുത്തെ.

1 കൊരിന്ത്യഗാറാര് 12:6

പല ദിന്‌സ്‌ക്ക് പട്ട അദിസ്യാന കാര്യഗാള് ഗേവാദ്‌ക്കുള്ള തിരമെ നമാക്ക് ഇര്‌ക്ക്‌ന്റ്, എന്റാല്‌മ് എല്ലാവാര്‌ല്‌മ് എല്ലാദ്‌നാമ് ഗേയ തിരമെ കൊഡുക്കുവ സാമി ഒരുത്താന്‌ത്തെ.

1 കൊരിന്ത്യഗാറാര് 7:17

ആന ആണ്ടവാന് നിമ്മ് പെ്ളേപ്പ്‌ല് നിമാക്ക് തന്തിന്ത കഡാമെഗാള്‌നാമ് താനെ ഗേന്ത് കൊണ്ടുമു സാമി നിമാന ബ്‌ളിത്ത ഗളിഗേല് നിമ്മ ആര് ആയിന്ത്‌റൊ അദേ ആള് ആയി താനെത്തെ ഇര്‌ക്കുഡൊ. ഈ സട്ടനാത്തെ നാന് എല്ലാ ഏസ്സ്‌ഗാറാര് കൂട്ടാത്ത്‌ല്‌മ് പഡുസുവാദ്.

1 കൊരിന്ത്യഗാറാര് 7:7

എല്ലാ മന്‌സാര്‌ഗാള്‌മ് എനാന പാസെ ഒണ്ടി മന്‌സാനായി പെ്ളേക്കുഡൊ എന്റ്‌ത്തെ നാന് ആസെപഡുവാദ്. ആനാല്‌മ് ഒന്റൊന്റാള്‌മ് എത്തെ പെ്ളേക്കുഡൊ എന്റ് സാമി ബര കൊഡുത്ത്‌റ്ക്ക്‌ന്റാന്. ഒന്റാള്‌ക്ക് ഒന്റു ബര, ബേ്റൊന്റാള്‌ക്ക് ബേ്റൊന്റു ബര.

2 കൊരിന്ത്യഗാറാര് 10:13

എമ്മ അളാവുക്കു മീ്റി പെരിമെപഡ്‌ന്റവാരല്ല. ആന സാമി എമാക്ക് ഗേയ തന്ത്‌റ്‌ക്കുവ എല്ലെ കുള്ളുക്കു ഇന്ത് കൊണ്ടുത്തെ എമ്മ ഗിലാസ ഗേന്റേമ്. അയി എല്ലെ കുള്ളുക്കു നിമ്മാമ് പഡുവുറു.

എപസോസുഗാറാര് 1:11

അയി ക്‌റ്‌സ്‌ത്ത്‌ന ബെത്ത്‌ത്തെ തന്ന് പ്‌ള്ളെഗാള് എന്നുവ ഉരിമെന സാമി നമാക്ക് തന്ത്‌റ്‌ക്കുവാദ്. ഇത്തെ ഗേയ തനാക്കിര്‌ക്കുവ അളാവുക്കു മീ്റ്‌ന ബുദ്ദില് സാമി മുദാല് താനെ നെനേത്ത് ബെത്തിന്താന്. അയി സാമി താന് നെനേത്ത് ബെത്ത്‌റ്‌ക്കുവ പാസെത്തെ ഈ എല്ലാ കാര്യഗാള്‌നാമ് നഡാത്തി ബരുവാദ്.

എപസോസുഗാറാര് 4:7

ആന ക്‌റ്‌സ്‌ത്ത് നമാക്ക് പ്‌ണ്ണ്യ ഗേന്ത് നമ്മ ഒന്റൊന്റാള്‌ക്ക്‌മ് ഒന്റൊന്റു ഗിലാസഗാള് ഗേവാദ്‌ക്ക് തഗ്‌ന്ത ബരഗാള് തന്ത്‌റ്‌ന്റാന്.

എവുറായാര് 2:4

ഇദല്ലാദെ താനെ അഡ്യാളഗാള് കാട്ടി കൊണ്ടുമു അദിസ്യഗാള് ഗേന്ത് കൊണ്ടുമു അദിസ്യപഡുവ ദൊഡ്ഡുദൊഡ്ഡ കാര്യഗാള് ഗേന്ത് കൊണ്ടുമു ഇദ് സത്ത്യ എന്റ് ആണ്ടവാന് കാട്ടി തന്ത്‌റ്‌ന്റാന്. സാമിനിഗാല് തരുവ ബരഗാള്‌ന തന്ന് ആസെപഡി കൊഡുത്തു കൊണ്ടുമു ഇദ് സത്ത്യ എന്റ് ആണ്ടവാന് കാട്ടി തന്ത്‌റ്‌ന്റാന്.

ആക്കോവു 1:18

താന് ദ്‌ട്ടിസിര്‌ക്കുവ എല്ലാദ്‌ന ബ്‌ഡ നമ്മ ഉജാന്തവാരായി ഇര്‌ക്ക്യ ബേ്ണ്ടി സാമി ആസെപഡ്‌ന്റാന്. അദ്‌നാലെ സാമി തന്ന് സത്ത്യമാന സൊല്ലുസുലാക്കാന നമാക്ക് സൊല്ലി തന്ത് നമാന പുദ്യ മന്‌സാന് മാഡിര്‌ക്ക്‌ന്റാന്.