1 കൊരിന്ത്യഗാറാര് 10:11 - സാമി സേദി

¹¹ അവാര് പെ്ളേപ്പ്‌ല് നഡാന്ത ഈ കാര്യഗാള് നമാക്ക് കണ്ട് പഡിക്ക്യ മുഡിമ്. ഉലഗ അളിവ ഈ കഡേസി കാലാത്ത്‌ല് പെ്ളേക്കുവ നമ്മാമ് ബുദ്ദി പഡിക്ക്യാത്തെ ഇദ്‌ന എ്ള്‌ദി ബെത്ത്‌റ്‌ക്കുവാദ്.

1 കൊരിന്ത്യഗാറാര് 10:11 ပူးပေါင်းရင်းမြစ်များ

മത്തായി 13:39

അദ്‌ന ബിത്ത്‌ന പോട്ടിഗാറാന് എന്നുവാദ് സെയിത്താന്, അറെ എന്നുവാദ് ഉലഗ കഡേസി നാള്, അറെഗാറാര് എന്നുവാദ് ദൂദാര്‌ഗാള്.

മത്തായി 13:40

കളേന കൂട്ടി തീക്കിക്കി സുട്ടു തള്ളുവ പാസെ ഉലഗ കഡേസി നാള് നഡാക്ക്‌മ്.

റോമഗാറാര് 13:11

നിമ്മ നല്ല സേദിന നമ്പ്‌ന സമ്യന ബെത്ത് നോഡുന നമ്മ തപ്പിസി കഡാക്കുവ നേര ഇന്നാല് ഒന്റേപെ്ട്ട് അഡ്‌ത്ത്‌റ്‌ക്കുവാദ്‌നാലെ ഇന്നാല് ഇദെല്ല ഗേന്. എന്ത്‌ക്കെന്റ് സൊന്ന നിമാക്ക് ഉറാങ്ക്യളാഗുവ നേര ബന്ത്‌ദ്.

റോമഗാറാര് 13:12

ഇ്റ്‌ട്ട് ബെ്ഡ്യ പക്ക ആയിര്‌ക്ക്‌ന്റ്. അദ്‌നാലെ ഇ്റ്‌ട്ട്‌ക്ക് എ്ണേന്ത കാര്യഗാള് ഗേവാദ്‌ന തള്ളി ബെ്ള്‌സാക്ക് എ്ണേന്ത കാര്യഗാള്‌ന ഗേന്.

റോമഗാറാര് 15:4

മുന്നുക്കു താനെ എ്ള്‌ദിര്‌ക്കുവ സാമി സൊല്ലുസുലാക്കഗാള് ഒട്ടുക്കുമു നമാന ബുദ്ദി പഡിസ്യ ബേ്ണ്ടിത്തെ എ്ള്‌ദി ബെത്ത്‌റ്‌ക്കുവാദ്. അദ്‌ന പഡിക്കാട്ടി നമ്മ എല്ലാദ്‌നാമ് പൊറുക്ക്യ മുഡിന്റവാര്‌മ് ദയിര ഉള്ളവാര്‌മ് ആയി നെഞ്ചഡോഡ നമ്മ കാത്ത്‌റ്‌ക്ക്‌ല.

റോമഗാറാര് 4:23

<<അവുറഗാമ്‌ന അത്തെ കണാക്കാക്ക്‌നാദ്>> അയാള്‌ന നെനേത്ത് താനേമല്ല,

1 കൊരിന്ത്യഗാറാര് 10:6

ഈ കാര്യ നമ്മ കണ്ട് പഡിക്ക്യ ബേ്ണ്ടിത്തെ നഡാന്താദ്. എന്ത്‌ക്കെന്റ് സൊന്ന അവാര് കെ്ട്ട ആസെപഡി നഡാന്ത പാസെ നമ്മാമ് കെ്ട്ട ആസെപഡി നഡാക്കാദെ ഇര്‌ക്ക്യ ബേ്ണ്ടിത്തെ.

1 കൊരിന്ത്യഗാറാര് 7:29

ഏസ്സ്‌ഗാറാരെ, നാന് സൊല്ലി ബരുവ അര്‌ത്ത എന്തെന്റ് സൊന്ന, ഇന്നി അദിഗ നാള് ഇല്ലെ, അദ്‌നാലെ ഇന്നാലിന്ത് പെ്ണ്ടച്ച്യാമ് ഇര്‌ക്ക്‌ന്റവാര് പെ്ണ്ടച്ച്യാമ് ഇല്ലത്തവാര്‌ന പാസെ പെ്ളേക്കുഡൊ.

1 കൊരിന്ത്യഗാറാര് 9:10

സത്ത്യാത്ത്‌ല് നമാന നെനേത്ത്‌ത്തെ ഇത്തെ സൊല്ലിര്‌ക്കുവാദ്. എന്ത്‌ക്കെന്റ് സൊന്ന ഏരോട്ട്‌ന്റവാന്‌മ് അന്നാന അറ്‌ക്ക്‌ന്റവാന്‌മ് തമാക്കുള്ള പങ്ക് കെ്ഡേക്കുമെന്റുള്ള നെഞ്ചഡെബെത്ത് ഗിലാസ ഗേയ ബേ്ണ്ടിത്തെ അത്തെ എ്ള്‌ദിര്‌ക്കുവാദ്.

ഗലാത്ത്യഗാറാര് 4:24

ഈ റാഡ് പെ്ണ്ണ്‌മക്കാള്‌നാമ് റാഡ് മക്കാള്‌ഗാള്‌നാമ് എ്ഡ്‌ത്ത് നോഡുന സാമി ബെത്ത റാഡ് ഒപ്പന്തന കാട്ട്‌ന്റാര്. ഒന്റു സീനായി മലേല് സാമി ബെത്ത സട്ടാത്തെ. അദ് ആഗാറ്‌ന കാട്ട്‌ന്റ്. അയി സട്ട കെ്ഡേത്തവാര് അയി സട്ടാക്ക് അഡിമ്യായിര്‌ക്ക്‌ന്റാര്.

പിലിപ്പ്യഗാറാര് 4:5

ആണ്ടവാന് ബര്യ അഡ്‌ത്ത്‌റ്‌ക്കുവാദ്‌നാലെ നിമ്മ എല്ലാ ആള്‌ഗാളോഡാമ് നിദാനത്തോഡ നഡാന്ത്‌പ്‌ഡിത്ത് ഗേഡൊ.

എവുറായാര് 10:25

ഏസ്സ്‌ഗാറാര് കൂട്ടഗാള്‌ക്ക് ഒന്റായി കൂഡുവാദ്‌ന പഗ്‌ദ്യാള്‌ഗാള് തെ്റിന്ത് തള്ളുവ പാസെ നിമ്മാമ് തള്ളദേന്. അദ്‌ക്ക് ബദ്‌ല് ആണ്ടവാന് ബരുവ നാള് അഡ്‌ത്ത്‌റ്‌ക്കുവാദ്‌നാലെ നിമ്മ ആങ്കീങ്ക് അദിഗ രുജ കൂട്ടി കൊഡുക്കുഡൊ.

എവുറായാര് 10:37

സാമി സൊല്ലുസുലാക്കാത്ത്‌ല് എ്ള്‌ദിര്‌ക്കുവ പാസെ <<ഇന്നി ലേസ നാള് കളിന്ത പ്‌റ ബര്യ ഉള്ളവാന് ബരുവാന്. അയാള് ബര്യ ഗളിഗാഗ മാട്ട.

1 ഓഗന്നാന് 2:18

പ്‌ള്ളെഗാളെ, ഉലഗ അളിവാദ്‌ക്ക് പക്ക ആയിര്‌ക്ക്‌ന്റ്. ക്‌റ്‌സ്‌ത്ത് എന്റ് സൊല്ലി ആള്‌ഗാള്‌ന ഏമാത്ത്‌ന്റവാന് ബരുവാനെന്റ് നിമ്മ കേ്ട്ട്‌റ്‌ക്ക്‌ന്റ്‌റല്ല. ക്‌റ്‌സ്‌ത്ത് എന്റ് സൊല്ലി ഏമാത്ത്‌ന്റവാന്‌ന പാസെ ഇര്‌ക്കുവ എഞ്ചോ ആള്‌ഗാള് ഇര്‌ക്കുവാദ്‌നാലെ ഇദ് കഡേസി കാലത്തെ എന്റ് നമാക്ക് തെരിമ്.