لواحي ن يوحنا 16:17 - ثريفيث 2020

¹⁷ ثكَّر لْمَلَائِكَا وِيس سبْعَا ثْزدْجع ثِمجْمَارْث نّس ذِي لْهَوَا سْڒِيغ إِ يِجّن ن ثْمِيجَّا زِي ثمْزِيذَا ثَمقّْرَانْت إِي د يكِّيْن زِي لْعَرْش يقَّار س جّْهذ: "صَافِي، يتْوَاكمّڒ!"

لواحي ن يوحنا 16:17 ပူးပေါင်းရင်းမြစ်များ

يوحنا 19:30

وَامِي يقَّاس عِيْسَى اَمَان نِّي، ينَّا: "ئِتْوَاكمّڒ!" ئِسَذَار اَزدْجِيف نّس، ئِسلّم بُوْحْبڒ نّس.

أيث-ؤفسوس 2:2

ذَايْسنْت إِي تُوْغَا تْعِيشم خْمِي ثݣُّوْرم ذݣ وبْرِيذ ن دُّنشْت-أَ ثْذفَّارم اَرَّايس ن ڒحْكَام إِي يدْجَان جَار وجنَّا ذ ثْمُوْرْث يعْنِي شِّيطَان إِي يدْجَان نتَّا ذ اَرُّوْح نِّي إِݣ يخدّْمن ذݣ يِنِّي إِي يعصَّان أَربِّـي.

أيث-ؤفسوس 6:12

لِأَنَّا نشِّين وَار نتْمنْغِي شَا ضد إِ يِوْذَان ن ويْسُوْم ذ يذَامّن. لَّا، نتْمنْغَا ضذ ن ثْزمَّار ن ثَادْجسْت-أَ ثَانِيتَا ن زْمَان-أَ ذ يِنِّي إِݣ يحكّْمن ذ يِنِّي إِݣ يجهْذن ذِي ثَادْجسْت-أَ. نشِّين نتْمنْغَا ضذ ن شَّيَاطِين يعفَّانن إِݣ يدْجَان ذݣ يمُوْشَان ن يجنَّاثن.

لواحي ن يوحنا 11:15

ثكَّر لْمَلَائِكَا وِيس سبْعَا ثْصُوْض ذِي زَّمَّار نّس، أُوْشَا ثِمِيجَّاوِين ذݣ وجنَّا قَّارنْت س جّْهذ: "ئِذْوڒ ڒحْكَام ن دُّنشْت-أَ ذݣ يفَاسّن ن سِيذِي أَربِّـي نّغ ذ لْمَسِيح نّس، اَذ يحْكم إِ ڒبْدَا ن ڒبْدَاث."

لواحي ن يوحنا 11:19

ثْنُوْرْزم ثمْزِيذَا ثَمقّْرَانْت ن أَربِّـي ذݣ وجنَّا، يمظْهَار-د تَابُوْت ن ڒْعَهذ ن أَربِّـي ذِي ثمْزِيذَا نِّي. ئِوْقع وَاسَّام ذ يغُوْيَان ذ وَاجَّاج ذ زِّنْزَال ذ يشَرَّا اَطَّاس.

لواحي ن يوحنا 14:15

ئِكَّر يفّغ-د يجّن ن لْمَلَاك نّغْنِي زي ثمْزِيذَا ثَمقّْرَانْت، ئِقَّار-اَس س جّْهذ إِ ونِّي يقِّيمن خ ؤُسيْنُو: "يْسِي اَمْجَار نّش، مْجَر. أَقَا ثْسَعَّات ن ؤُمْجَار ثُوْوض-د، ثَفدْجَاحْث ن ثْمُوْرْث قَا ثوْجذ."

لواحي ن يوحنا 14:17

ئِكَّر يفّغ-د يجّن ن لْمَلَاك نّغْنِي زِي ثمْزِيذَا ثَمقّْرَانْت يدْجَان ذݣ وجنَّا، ؤُڒَا ذ نتَّا غَارس يجّن ن ؤُمْجَار يقْضع.

لواحي ن يوحنا 16:1

سْڒِيغ إِ يِجّن ن ثْمِيجَّا ثنْدق-د زِي ثمْزِيذَا ثَمقّْرَانْت ثقَّار-اَسنْت إِ سبْعَا نِّي ن لْمَلَائِكَاث س جّْهذ: "رُوْحنْت زدْجْعنْت سبْعَا ن ثْمجْمَارِين ن ؤُغْضَب ن أَربِّـي خ ثْمُوْرْث."

لواحي ن يوحنا 21:6

ينَّا-ٱيِي: "صَافِي، ئِتْوَاكمّڒ. نش ذ لْأَلِف نش ذ لْيَاء. نش كُڒْشِي زَّايِي إِݣ يبْذَا، نش كُڒْشِي زَّايِي إِي غَا يكمّڒ. أَذ ؤُشغ إِ ونِّي يفُوْذن زِي ڒْعُنْصَر ن وَامَان ن ثُوْذَارْث بَاطڒ.