أيث-ؤفسوس 1:7 - ثريفيث 2020

⁷ ئِفكّ-اَنغ-د سِيذِي أَربِّـي س لْفِدْيَا نِّي ن مِّيس يعْنِي س يذَامّن نّس بَاش اَذ تْوَاغْفَرنْت ڒْمُعْصِيَاث نّغ عْلَاحْسَاب اَݣْڒَا ن اَرْضَا نّس.

أيث-ؤفسوس 1:7 ပူးပေါင်းရင်းမြစ်များ

أَسڒْمذ ن سِيذِيثْنغ عِيْسَى لْكِتَاب ن مَتَّى 20:28

مِّيس ن بْنَاذم ؤُڒَا ذ نتَّا وَار د يُوْسِي شَا حمَا اَخَاس خذْمن يِوْذَان. لَّا، نتَّا يُوْسَا-د حمَا اَخَاسن يخْذم، أَخَاسن يصدّق ثُوْذَارْث نّس حمَا اَذ يسنْجم اَطَّاس زَّايْسن."

أَسڒْمذ ن سِيذِيثْنغ عِيْسَى لْكِتَاب ن مَتَّى 26:28

ڒْكَاس-أَ ذَايس يذَامّن ن ڒْعَهذ، يعْنِي ذ يذَامّن ينُو إِي غَا يَازّْڒن عْلَاحْسَاب اَطَّاس ن يِوْذَان حمَا اَذَاسن يغْفَر أَربِّـي ڒْمُعْصِيَاث نْسن.

أَسڒْمذ ن سِيذِيثْنغ عِيْسَى لْكِتَاب ن مَتَّى 6:12

غْفَر-اَنغ ڒْمُعْصِيَاث نّغ إِ نشِّين، مَامّش نْسمّح إِ يِنِّي إِي كِذْنغ يخطَّان.

مرقس 14:24

ينَّا-ٱسن: "ڒْكَاس-أَ ذَايس يذَامّن ن ڒْعَهذ، يعْنِي ذ يذَامّن ينُو إِي غَا يَازّْڒن عْلَاحْسَاب اَطَّاس ن يِوْذَان.

لوقا 1:77

عَاوذ اَذ تسْڒمْذذ إِ شَّعْب نّس خ وسنْجم، يعْنِي مَامش إِي غَا تْوَاغْفَرنْت ڒْمُعْصِيَاث نْسن.

لوقا 24:47

أَذ بشَّرن مَارَّا ڒݣْنُوْس حمَا اَذ تُوْبن اَذ تْوَاغْفَرنْت ڒْمُعْصِيَاث نْسن س يِيسم ن لْمَسِيح. أَذ يبْذَا مَانَايَا ذِي لْقُدْس.

يوحنا 20:23

ونِّي ؤُمِي ثْسَمْحم إِ دّْنُوْب نّس، أَذَاس تْوَاسَمْحنْت. ونِّي ؤُمِي وَار ثسْمِيحم شَا، وَار ذَاس تْوَاسْمِيحنْت شَا."

ڒخذايم 10:43

مَارَّا لْأَنْبِيَا شهّْذن خَاس نَّان قَا مَارَّا يِنِّي زَّايس غَا يَامْنن اَذ تْوَاغْفَرنْت ڒْمُعْصِيَاث نْسن س يِيسم نّس."

ڒخذايم 2:38

ينَّا-ٱسن بُطْرُس: "تُوْبث، تْوَاطهَّارث س وَامَان كُڒ يجّن زَّايْوم عْلَاحْسَاب يسم ن عِيْسَى لْمَسِيح حمَا اَذ تْوَاغْفَرنْت ڒْمُعْصِيَاث نْوم، أَتَاف اَذَاوم يمُّوْش أَرُّوْح يقدّْسن ذ لْهَدِيَا.

ڒخذايم 20:28

حْضَاث يخف نْوم. حْضَاث ثْحِيمرْث نْوم، ثنِّي إِي زِي كنِّيو يكلّف أَرُّوْح يقدّْسن. اَروْسث جْمَاعث ن ڒْمُوْمِنِين ن أَربِّـي قَا نتَّا يسغ-يت س يذَامّن نّس.

ڒخذايم 3:19

س مَانَايَا تُوْبث، ذوْڒث غَار أَربِّـي حمَا اَذ تْوَاكّْسنْت ڒْمُعْصِيَاث نْوم. حمَا اَذ د تَاس ثْسَعَّات ن لْفَرَج زِي سِيذِي أَربِّـي، أَذ د يسّكّ لْمَسِيح إِي تُوْغَا ذَاوم يتْوَاخْضَرن زِي قْبڒ يعْنِي عِيْسَى.

أيث-روما 2:4

نِغ ثْسحْقَارذ لْحَنَانَا يمْغَارن ن أَربِّـي ذ صّْبَر نّس ذ ڒْخَاضَر إِي غَارس؟ مَا وَار ثْسِّينذ أَربِّـي س لْحَنَانَا نّس يرزُّو اَش د يسْبيّن اَبْرِيذ بَاش اَذ تُوْبذ؟

أيث-روما 3:24

أَربِّـي، نتَّا يسمْصْڒَاح-يثن اَكِذس س اَرْضَا نّس بَاطڒ س وسنْجم إِي د يُوْسِين س عِيْسَى لْمَسِيح.

أيث-روما 3:25

أَربِّـي يقدّم-يث ذ لْفِدْيَا حمَا اَذ تْوَاغْفَارنْت ڒْمُعْصِيَاث س يذَامّن نّس، يعْنِي إِ يِنِّي يقبّْڒن مَانَاينِّي س لْإِيمَان نْسن. س مَانَاينِّي يسْمظْهَار-د أَربِّـي ڒْحَقّ نّس. نتَّا تُوْغَا يصبَّار، وَار ت يُوْوِي شَا ذِي ڒْمُعْصِيَاث نِّي إِي يعْذُوْن،

أيث-روما 9:23

يݣَّا اَمنِّي لِأَنَّا يخس اَذ يسْمظْهَار لْعَظَمَا نّس يمْغَارن خ يِيْنَا إِݣ يرْحم، يعْنِي يغرَّافن-أَ إِݣ يسوْجذ زِي قْبڒ إِ لْعَظَمَا، يعْنِي ذ نشِّين. ئِڒَاغَا-يَانغ-د إِ نشِّين إِي د يُوْسِين زِي أَيث-إِسْرَائِيل ؤُڒَا ذ يِنِّي وَار يدْجِين شَا زِي أَيث-إِسْرَائِيل.

1 أيث-كورينث 1:30

أُو نتَّا ذ سَّبَاب إِي زِي ثدْجَام كنِّيو ذِي عِيْسَى لْمَسِيح. ئِݣِّي-ث أَربِّـي نتَّا ذ ڒفْهَامث نّغ، يعْنِي نتَّا ذَايس صُّلْح نّغ ذ وصفِّي نّغ ذ وفكِّي نّغ.

22 أيث-كورينث 8:9

أَقَا ثسْنم اَرْضَا ن سِيذِيثْنغ عِيْسَى لْمَسِيح. تُوْغَا نتَّا غَارس كُڒْشِي، وَلَكِن عْلَاحْسَاب نشِّين يسْمح ذِي كُڒْشِي مَانَاينِّي بَاش اَغَارْنغ يِيڒِي كُڒْشِي س مَانَاينِّي إِي ذِي يسْمح.

أيث-ؤفسوس 1:14

أَرُّوْح-أَ نتَّا ذ يجّن ن ڒْعَرْبُوْن يضمّن لْوَارث نّغ اَڒ غَا ث نطّف ثُمَّا أَ نحْمذ أَربِّـي خ لْعَظَمَا نّس.

أيث-ؤفسوس 1:18

أَذَاوم د يُوْش يجّن ن نُّوْر إِ وُوْڒَاون نْوم بَاش اَذ تسّْنم مِين يعْنَا لْأَمَال-أَ إِي زِي ذَاوم د يڒَاغَا، ذ مِين يعْنَا وَاݣْڒَا-يَا ن لْوَارث عَظِيم ن صَّالِحِين،

أيث-ؤفسوس 1:6

أَذ يتْوَابَرَك اَرْضَا نّس يمْغَارن، ئِفَرغ-يث-يذ خَانغ أَربِّـي س مِّيس يعِيزّن.

أيث-ؤفسوس 1:8

أَرْضَا-يَا يفَرغ-اَنغ-ث-يذ سِيذِي أَربِّـي س مَارَّا ڒفْهَامث ذ ثُوْسْنَا نّس.

أيث-ؤفسوس 2:4

وَلَكِن أَربِّـي س ڒمْحِبّث نّس إِي يݣَّا إِ نشِّين ذ اَرَّحْمث نّس ثَمقّْرَانْت اَطَّاس، مِين ذَانغ يݣَّا نتَّا؟

أيث-ؤفسوس 2:7

مَايمِّي؟ حمَا سِيذِي أَربِّـي ذِي زْمَانَاث إِي د غَا يَاسن اَذ د يسْمظْهَار اَݣْڒَا نّس يعْنِي اَرْضَا نّس مشْحَاڒ إِݣ يدْجَا ذ اَمقّْرَان بْڒَا ڒقْيَاس إِي ذَانغ د يسْبيّن ذِي عِيْسَى لْمَسِيح.

أيث-ؤفسوس 3:16

تتَّارغ إِ أَربِّـي زݣ وَاݣْڒَا نّس اَعْظِيم اَكنِّيو يسجْهذ ذِي نّفْس نْوم س وفُوْس ن أَرُّوْح نّس

أيث-ؤفسوس 3:8

لْبَرَكَا-يَا يُوْشَا-ٱيِي-ت أَربِّـي وَاخَّا ذ اَمزْيَان إِي دْجِيغ خ مَارَّا صَّالِحِين بَاش نش اَذ بشَّرغ يِنِّي وَار يدْجِين شَا زِي أَيث-إِسْرَائِيل اَذ سّْنن اَݣْڒَا نِّي ن لْمَسِيح إِي وَار يتْوَاشرِّيحن شَا.

أيث-فيليـپـي 4:19

أَقَا أَربِّـي ينُو اَذَاوم يُوْش قَاع مِين ثحْذَاجم عْلَاحْسَاب اَݣْڒَا نّس لْعَظِيم ذِي عِيْسَى لْمَسِيح.

أيث-كولوس 1:14

زَّايس نتَّا يسنْجم-اَنغ يعْنِي يغْفَر-اَنغ ڒْمُعْصِيَاث نّغ.

أيث-كولوس 1:27

نِثْنِي يخْضَر-يثن أَربِّـي بَاش اَذ خبَّارن إِ يِنِّي وَار يدْجِين شَا زِي أَيث-إِسْرَائِيل اَذَاسن ينِين مشْحَاڒ يمْغَر ڒْخِير-أَ لْعَظِيم ن ڒْمَعْنَا ينُوْفَّرن وَانِيتَا. مِين يعْنَى ڒْمَعْنَا-يَا؟ لْمَسِيح نتَّا يدْجَا ذَايْوم، ذ لْأَمَال ن لْعَظَمَا.

أيث-كولوس 2:13

فَا كنِّيو تُوْغَا ثمُّوْثم س وُوْڒَاون نْوم عْلَاحْسَاب ڒْمُعْصِيَاث ذ طَّبِيعَا نْوم وَار يطهَّارن شَا، وَلَكِن أَربِّـي يسدَّر-د كنِّيو اَك لْمَسِيح وَامِي ذَانغ يغْفَر قَاع ڒْمُعْصِيَاث نّغ.

أيث-كولوس 2:2

رزُّوْغ ؤُڒَاون نْوم اَذ تْوَاشجّْعن خْمِي غَا مُوْنن اَك وَايَاوْيَا س ڒمْحِبّث بَاش اَذ تَاوْضم غَار مَارَّا ڒْخِير نِّي إِݣ يدْجَان ذݣ يِجّن ن ڒفْهَامث ثكْمَاڒ ذ يِجّن ن ثُوْسْنَا خ ڒْمَعْنَا ينُوْفَّرن ن أَربِّـي يدْجَان ذِي لْمَسِيح.

1 تيموتاوس 2:6

نتَّا يصدّق ثُوْذَارْث نّس ذ يجّن ن لْفِدْيَا بَاش اَزَّايس يسنْجم مَارَّا يوْذَان، مَانَايَا اَذ يتْوَاشْهذ ذِي ڒْوقْث نّس.

ثبرات غار تيتوس 2:14

نتَّا يصدّق خَانغ يخف نّس ذ يجّن ن لْفِدْيَا خ مَارَّا شَّرّْ نّغ أُو عَاوذ بَاش اَذ يسِّيصْفَا يجّن ن شَّعْب إِ يِيخف نّس اَتَاف اَذ يڒِين نّس مُجُوْدِين اَذ ݣّن لْحَسَانَاث.

ثبرات غار تيتوس 3:6

أَرُّوْح-أَ يفَرغ-يث-يذ خَانغ أَربِّـي س يِجّن ن ڒْخِير يمْغَر س وفُوْس ن عِيْسَى لْمَسِيح ونِّي إِي ذَانغ يسْنجْمن.

يعيبرانيين 9:22

أُو ذ صَّح عْلَاحْسَاب شَّرِيعَا ن مُوْسَى عْڒَاين مَارَّا ثِمسْڒَايِين اَذ تْوَاسِّيصْفَانْت س يذَامّن. أُو بْڒَا مَا ٱذ اَزّْڒن يذَامّن اَتَاف ڒْمُعْصِيَاث وَار تْوَاغْفِيرنْت شَا.

1 بطرس 2:24

نتَّا س يِيخف نّس ييْسِي ڒْمُعْصِيَاث نّغ ذِي دَّات نّس خ ثحْنَاشْت نِّي حمَا أَ نمّث نشِّين س وُوْڒَاون نّغ إِ ڒْمُعْصِيَاث، أَ ندَّر إِ مِين يدْجَان نِيْشَان. أَقَا س وجَرِّيح نّس إِي زِي ثْݣنْفَام كنِّيو.

1 بطرس 3:18

أَمنِّي إِݣ يݣَّا لْمَسِيح وَامِي يتْوَاعدّب يجّن ن تْوَاڒَا إِ ڒبْدَا عْلَاحْسَاب ڒْمُعْصِيَاث. يعْنِي ونِّي يدْجَان نِيْشَان يتْوَاعدّب ذݣ ومْشَان ن يِنِّي يعصَّان حمَا اَكنِّيو يسِّيوض غَار أَربِّـي. دَّات نّس نْغِين-تث، ئِسدَّر-يت-يد أَرُّوْح يقدّْسن.

1 يوحنا 2:12

آ يحنْجِيرن، نش ؤُرِيغ-اَوم-د ڒَاحقَّاش ڒْمُعْصِيَاث نْوم تْوَاغْفَرنْت-اَوم س يِيْسم نّس.

1 يوحنا 2:2

ذ نتَّا إِݣ يرُوْحن ذ لْفِدْيَا خ ڒْمُعْصِيَاث نّغ أُو مَاشِي غِير خ ڒْمُعْصِيَاث نّغ وَاهَا، حتَّا ؤُڒَا ذ ڒْمُعْصِيَاث ن دُّنشْت-أَ اَمن-ثكْمَاڒ.

1 يوحنا 4:10

س مَانَاينِّي مِينْزِي ذَاس قَّارن ڒمْحِبّث. مَاشِي ذ نشِّين إِي يخْسن أَربِّـي، ذ نتَّا إِي ذَانغ يخْسن وَامِي د يسّكّ مِّيس اَذ يِيڒِي ذ لْفِدْيَا خ ڒْمُعْصِيَاث نّغ.

لواحي ن يوحنا 14:4

يِـيْنَا ذ يِنِّي وَار يࢲْرِين عمَّارْص ثِمْغَارِين قِّيمن ذ يعْزْرِيْين. يِـيْنَا ذ يِنِّي يذفَّارن يزْمَار مَانِي مَا يرُوْح. تْوَاسْنجْمن نِثْنِي زِي ڒْوسْط ن يِوْذَان حمَا اَذ تْوَاقدّْمن ذ يمزْوُوْرَا إِ أَربِّـي ذ يِزْمَار.

لواحي ن يوحنا 5:9

تْغنَّاجن س يِجّن ن يِزْڒْي ذ جْذِيذ قَّارن: "ذ شك إِي يسْذَاهدْجن اَذ تيْسِيذ لْكِتَاب أَذ ترْزْمذ يشمَّاعن نّس، ڒَاحقَّاش تْوَاغَرْصذ، ثسْنجْمذ يوْذَان إِ أَربِّـي س يذَامّن نّش زِي مْكُڒ ڒْقُوْم ذ لُّغَا ذ شَّعْب ذ ڒْݣنْس.