Zekariya 9:16 - Bibliya Yera 1951 1967 (Burundi)

¹⁶ Maz’ uwo musi Uhoraho Imana yabo azobakiza nk’umukuku, ni wo bantu biwe; kuko bazoba nk’utubuyenge two ku gitsibo, dukayanganira hejuru y’igihugu ciwe.

Zekariya 9:16 ပူးပေါင်းရင်းမြစ်များ

Zaburi 100:3

Mumenye yuk’ Uhoraho ari we Mana: Ni we yaturemye, natwe tur’ abiwe, Tur’ abantu biwe, tur’ intama zo mu canya ciwe.

Kuvayo 28:21

Utwo tubuyenge tunganye igitigiri n’amazina y’ abana ba Isirayeli: tube icumi na tubiri nk’ukw amazina yabo ar’ icumi n’abiri: tumere nk’utubuyenge two kudoma ibimenyetso, tugende twandikwakw izina mu buryo bgo guca amagarwe, tube utw’ iyo miryango ukw ar’ icumi n’ibiri.

Kuvayo 28:9

Kand’ uze wābīre utubuyenge tubiri twitwa shohamu, utwandikekw amazina y’abana ba Isirayeli mu buryo bgo guca amagarwe.

Yesaya 40:10

Eh’ Uhoraho Imana azoza afise ubushobozi, kand’ ukuboko kwiwe kuzomutwarira: rāba, azoza azanye impēra, kand’ inyishu yiwe ir’ imbere yiwe.

Yesaya 54:12

Iminara yawe nzoyubakisha amabuye atukura, n’ ibirimba vyawe nzovyubakisha amabuye akayangana, kand’ uruzitiro rwawe rwose nzorwubakisha ay’ igiciro.

Yesaya 60:14

abahungu b’abāguhahaza bazoza bakubite inkoro hasi imbere yawe, n’abāgukēngēra bīkubite imbere y’ibirenge vyawe, bakwite Umurwa w’Uhoraho, Siyoni h’Uwera w’Abisirayeli.

Yesaya 60:3

Amahanga azoza ku muco wawe, n’abami bazoza ku gukayangana kwawe.

Yesaya 62:3

Kand’ uzoba igitsibo c’ubgiza mu kuboko kw’Uhoraho, n’umugāra w’ ubgami mu kuboko kw’Imana yawe.

Yeremiya 23:3

Kandi nzokoraniriza hamwe amasigarira y’ umukuku wanje, ndazikūre mu bihugu vyose aho nazirukaniye, ndazigarukane ukundi gusha mu mpongore zazo; zizorondoka zigwire.

Yeremiya 31:10

Ni mwumve ijambo ry’Uhoraho, mwa mahanga, muvyamamaze mu bizinga vya kure mu kiyaga: muvuge, mut’ Uwashwiragije Abisirayeli ni we azobatororokanya, abazigame, nk’uk’ umwungere agirira umukuku wiwe.

Yeremiya 31:11

Kuk’ Uhoraho yagobotoye aba Yakobo, yabacunguye abakūra mu kuboko kw’uwabarusha inkomezi.

EZEKIYELI 34:11

Kuk’ ukw ari k’Umwami Uhoraho agize, ati Rāba jewe, jewe ubganje, ndīgīriye kurondera intama zanje, ndazibariritse.

EZEKIYELI 34:12

Nk’ uk’ umwungere abariritsa umukuku wiwe mu gihe ari mu ntama ziwe zāsābagiriye kure, ni ko nanje nzobariritsa intama zanje; nzozikiza ndazikūre ahantu hose zāsābagiriye ku musi wo gufurangana w’ubgirakabiri.

EZEKIYELI 34:31

Kandi namwe ntama zanje, mwa ntama z’icibare canje, mur’ abantu, nanje nd’ Imana yanyu, ni k’ Umwami Uhoraho agize.

Mika 5:4

Azohagarara, aragire umukuku wiwe mu nkomezi z’Uhoraho, no mu cubahiro c’ izina ry’Uhoraho Imana yiwe: kandi bazokwībērah’ umugaramango; kukw ico gihe ubukuru bgiwe buzoshika ku mpera z’isi.

Mika 7:14

Ragiza abantu bawe inyobozo yawe, ari bo mukuku wawe wīzīziye, bībēra ukwabo mu kibira co hagati kuri Karumeli: barishe i Bashani n’i Gileyadi, nko mu gihe ca kera.

Zefaniya 3:20

Ico gihe nzobacūra i muhira, mber’ ico gihe nzobakoraniriza hamwe: kuko nzobahindura ishimwe n’izina rya rurangiranwa mu moko yose yo kw isi, igihe nzogarukana abanyu bajanywe ar’ inyagano muvyibonera, ni k’Uhoraho agize.

Hagayi 2:23

Kur’ uwo musi, ni k’Uhoraho Nyen’ ingabo agize, nzogusobanura, ewe Zerubabeli musavyi wanje, mwene Sheyalitiyeli, ni k’Uhoraho agize, nguhindure impeta nzohora ndomesha ikimenyetso: kuko nagutoranije, ni k’Uhoraho Nyen’ ingabo agize.

Zekariya 10:6

Kandi nzokomeza inzu ya Yuda, nkize n’inzu ya Yosefu; nzobagarukana, kuko mbagiriye ikigongwe; bazomera nk’aho ntigeze kubaca, kuko jewe nd’Uhoraho Imana yabo, kandi nzobumva.

Zekariya 8:23

Uku ni k’Uhoraho Nyen’ ingabo agize, ati Mur’ iyo misi abantu cumi bazova mu mahanga y’indimi zidahwanye, bafate umutwe w’impuzu y’Umuyuda, bamubgire, bati Turajana, kuko twumvise yukw Imana iri kumwe namwe.

Luka 12:32

Yemwe mwa busho buto, ntimutinye: kuko So bimuhimbara kubaha ubgami.

Yohana 10:27

Abābaye intama zanje bumva ijwi ryanje, nanje ndabazi, na bo barankurikira,