Homanos 8:19 - Rikbaktsa

¹⁹ Tsizubarẽna Deus nizukni ana hi aparakbaha taperyky. Deus hi: — O asaktsa kahyrytsa. Asahi katse babata watsa — my. Ana harere hi tapery.

Homanos 8:19 ပူးပေါင်းရင်းမြစ်များ

Mateus 5:9

— O sakurẽtsa asaktsa kytsa naharape harereziuzonaha iwaze siharereziuwy moziknaha. Deus ispe: “kahyrytsa isopyk. Kawatsa maha” — my.

Suão 1:12

Wastuhu ihumo sispirikporẽtsa. Iwatahi ispe niy: — O ikiahatsa Deus tuktsa tsimoziknaha. Kahumo tsimyspirikponahaze Deus tyryktsa tsimoziknaha. Deus hyrytsa tsimoziknaha — niy.

Atos 3:21

Bykyze Deus Sesus myzipehazo. Deus ziwatawyta ahapehatsa mozik. Aba bijoikpe eze tu mynapykyryk niy. Bykyze Deus Sesus mybarawy bo myzipehazo. Niytahi Deus nanabyi humo piharabokzo. Iwaze Deus harere sohokotsitsa botu nikaranaha — niy.

Homanos 8:14

Asaktsa Deus hyrikoso mysipehaka iharere bo zuba hyỹ mynakaranaha asahi Deus hyrytsa babatsa maha.

Homanos 8:16

Ihyrytsa babatsa tsimoziknahaze Deus pe: — Myzo — tsimaha. Ihyrikoso atsatu mynakara. Atahi mype: — Ikiahatsa Deus hyrytsa babatsa — mynakara.

Homanos 8:18

Katsaktsa mybarawy eze tu sinini tsimykaranaha. Aiba zuba mysapyrẽtsa tsimoziknaha hỹ. Batu amy tohi anawata hawa sinini tsiknakaranaha mopykbaik. Amy ty imysapynikia ty tsizubarẽna ezytyk mozik. Iwatsahi batu paikpa mytsaty tsimahaktsa!

Homanos 8:23

Katsa niwatihi tsipiperykynaha. Deus myzo abaka katsa batu mymypykyhy, myraparẽtsa, myrapukrẽtsa imysapybara mytu mynapykyryk. Iwatsahi batu myku. Aiba zuba mykurẽtsa tsimoziknaha botu Deus mymysapywyky abaka Deus hyrikoso mytuk mynapykyryk atahi mymyhyrinymyryky. Atahi: — Aiba zuba Sesus Kiristu wata tsimoziknaha. Deus ahasoho “asaktsa kahyrytsa babatsa” my. Ahanury ty ezytyk ty ahabo nyny my — Deus hyrikoso my. Mekywatu tsimoziknaha. Iwa mymyhyrinymyryky ana hi taperyky.

Homanos 9:26

Haneze Deus tihi: — Ikiahatsa katyrytsabyitsa tsimaha. Kyze anaeze ispe sopyk: “kahyrytsa tsimaha” my. Deus koikny baktatu asahi kahyrytsa tsimoziknaha — niy. Iwa botu Hosea ziwatahaka. Sudeutsabyitsa soho, hawa asa kino niwatihi Deus hyrytsa moziknaha.

1 Korĩtios 1:7

Iwatsahi amy humo ahaku byri zeka ahabo nyny my. Ihumo ahaspirikporẽtsa. Ihyrikoso ty ahabo nyny my. Sesus Kiristu mybo myziksizo. Deus tatse mybarawy bo myzipehazo, ana hi taperyky. Tsipiperykynahaze amy humo ahaku byri zeka Deus hyrikoso ahabo nyny my.

1 Korĩtios 1:8

Deus pahapunihikwyky iwatsahi ihumo ahaspirikporẽtsa tsimoziknaha. Iwaze hi Sesus Kiristu myziksizoze ahakubyrisorokrẽtsa hỹ. Iwatsahi Deus harere humo batu ahaspiriktsokdahu, iharere bo yhỹ tsimykaranaha.

2 Korĩtios 6:18

Utahi ahazo mozik. Ikiahatsa kahyrytsa tsimoziknaha. Kahyrytsa kahyryza ahape my — niy. Iwa Deus nikara atahi izikwyrẽnikita my ba hawa tohi zikzukninaha.

Karatas 3:26

Ikiahatsa Kiristu Sesus harere bo zuba hyỹ tsimykaranaha iwatsahi ihumo ahaspirikporẽtsa iwatsahi Deus hyrytsa tsimoziknaha.

Piripẽses 1:20

Kiristu tuk zuba mynakara ana hi mozihikik. Kamysapyrẽta mynakara Kiristu kabo iktsa my zeka batu kasikpyby. Abaka Kiristu soho motsasokoze batu kapyby. Kapunihikrẽta tu Deus wasaniha motsasoko. Iwaze kytsa hi: — O Sesus Kiristu imysapyrẽnikita hỹ — maha. Utakta kaspitu mopykyryk zeka yhỹ my. Kytsa pikbezenaha zeka niwatihi yhỹ my. Kiristu ihyrinymyryta babata harere mozihikik.

Korosẽses 3:4

Ikiahatsa hi ahamysapyrẽtsa tsimoziknaha. Kiristu humo mekywa tu tsimoziknaha. Iharere bo zuba ma tynakaranaha. Iwatahi ata kino mybarawy bo myziksizoze ikiahatsa ituk tsimyzahakahazonaha. Kiristu humo ahamysapyrẽtsa tsimoziknaha. Atahi isopykziuhanikita my.

Ebereus 12:27

Deus hi: — Estuba zuba mybarawy pitydydykyzo — niy. Iwatahi mybarawy nizukni hana bo ja meky watu mozikzo. Mybarawy bijoikpe kino niwatihi izikwy humo ezytyk mozikzo. Itydydykokbara zuba motare.

1 Peduru 1:13

Kyze iwatsahi meky watu tsimoziknahaktsa! Sesus Kiristu myziksizoze Deus tisapyrẽna ty ahabo nyny my ihumo myspihikrẽtsa. Ahanamy bo ka mytsaty mytsaty byitaha. Sesus Kiristu myziksizo naha bo zuba mytsaty tynakaranaha!

1 Peduru 1:7

Ouro wa tsipokzitsarẽna katsaktsa ouro wa. Katsa kino Sesus humo myspirikporẽtsa zeka ihumo mymypokzitsirẽtsa hỹ. Katsaktsa ouro izo bo piakzazanaha wa takpyky amybara tu ja iwaze amy ty ouro baba zuba motare, iwa Deus niwatihi mybo my. Sinini tsimykaranaha zeka Sesus humo myspirikporẽtsa ana humo hi tsihyrinymyrẽta. Sinini tsimykaranaha zeka Deus harere bo yhỹ tsimykaranaha. Myspirikporẽtsa hỹ wasani tsimykaranaha. Ba zikpyk ana humo hi Deus tsihyrinymyrẽta. Ouro izo eze ky waha. Sesus Kiristu myziksizoze Deus ahape: — Kaokzeka ikiahatsa ahamysapyrẽtsa. Ahaharere wasani Sesus watsa ahapunihikrẽtsa tsimoziknaha — my.

1 Suão 3:1

Deus myzo myhumo tsimypokzitsiarẽta. Iwatahi mype my: — Asahi kahyrytsa — my. Katsaktsa Sesus tukytsa tsimaha. Ana humo hi mytsatytahaktsa! Iwaze kytsa Deus humo batu siakparawy katsa Deus hyrytsa ana humo hi batu sihyrinymyry. Sesus Deus tse babata ana humo sihyrinymyrybyitsa iwatsahi katsa Deus hyrytsa niwatihi batu sihyrinymyry.

1 Suão 3:2

O katukytsa katsaktsa botu Deus hyrytsa tsimaha. Aibani Deus tuk mywahi tsimynapykyryknaha. Iwaze hawa tsimaha. Batu mynyhy. Kiristu myziksizoze katsaktsa ihyritywa tsimoziknaha ana humo hi myhyrinymyrẽtsa. Hawa Kiristu mykara myhyrinymyrẽtsa ibo tsimykozonahaze myhyrinymyrẽtsa babatsa.

Apokaripisi 21:7

Aty kaharere bo hyỹ mynakara zeka isapyha ty ibo nyny my. Utakta sihumo Deus babata, asaktsa kahyrytsa moziknaha hỹ.