2 Buṭrus 2:14 - Ṯarifiṯ 2020

¹⁴ Ṯiṭṭawin nsen ɣir xezzarent ḏi zzna, war tjiwinent ca s ȓmuƹṣiyaṯ. Niṯni tḥeǧaqen-d yinni war itejhiḏen ca ḏi lʼiman, uȓawen nsen trinaren ḏi ṭṭmaƹ. Niṯni ḏ ṯarwa n nnaƹȓeṯ.

2 Buṭrus 2:14 ပူးပေါင်းရင်းမြစ်များ

Matta 12:34

A ṯarwa ifiɣeran, mammec ɣa ṯeggem aḏ tinim awaȓ aṣebḥan u kenniw ḏ iƹeffanen? Ȓaḥeqqac aqemmum n bnaḏem issawaȓ min iǧan ḏeg wuȓ nnes.

Matta 23:14

{Ya ȓefḍiḥeṯ nwem ay imseȓmaḏen n ccariƹa ḏ ȓḥizeb n ifarrisiyen, a lmunafiqin! Tettem i ṯajjaȓin marra min ɣarsent. Tesmeḍharem-d ixef nwem tẓaǧam aṭṭas ḥima aḏ tbeyynem i yiwḏan belli ṯṣebḥem aṭṭas zaƹma. X manayenni aḏ twaƹaqbem ktar.}

Matta 25:41

Ȓexddenni yinni iǧan x uẓeȓmaḍ aḏasen yini uzeǧiḏ: A yinni inƹeȓ Arebbi beƹƹḏem xafi! Ruḥem ɣar ṯmessi iy war ixessin ƹemmarṣ isewjḏen i Cciṭan ḏ ccayaṭin nnes!

Matta 5:28

Walakin nec qqareɣ-awem: Marra wenni ixezzaren ɣar can ṯemɣarṯ s wuȓ nnes, ataf itwaḥsab izna.

Marqus 13:22

Aqa aṭṭas iy d ɣa imeḍharen s ixarriqen aḏ inin aqa nec ḏ Lmasiḥ niɣ nec zi lʼanbiya. Aḏ ggen lmuƹjizaṯ ḏ ṯimeqqranin ḏ ȓaƹjayeb zaƹma ḥima aḏ xeḏƹen iwḏan. Maƹlik zemmaren iȓi xeḏƹen uȓa ḏ yinni ixḍar Arebbi.

Yuḥanna 5:44

Mammec ɣa ṯeggem aḏ tamnem? Iwa kenniw texsem lƹaḍama n wayawya, war ṯrezzum ca x lƹaḍama n Arebbi aweḥḏani.

Ayṯ-Ruma 16:18

Liʼanna yina war xeddmen ca i Siḏiṯneɣ Ƹisa Lmasiḥ, xeddmen ɣir i uƹeddis nsen waha. S wawaȓ yiziḍen ḏ lmuhawaḍa izewwqen xeddƹen uȓawen n yinni iy ḏi ṯeǧa nniyyeṯ.

1 Ayṯ-Kurinṯ 11:19

Ȓaḥeqqac wa labud aḏ iȓin lxilafaṯ jarawem bac aḏ d banen yinni iǧan nican jarawem.

Ayṯ-Ufasus 2:3

Neccin marra tuɣa netƹic am niṯni ḏeg yijjen n ȓweqṯ wami tuɣa netseƹƹaf ccehawaṯ n array aƹeffan n nnefs nneɣ nḏeffar min irezzu ḏ min itfekkar. Tuɣaneɣ am marra iwḏan iƹni neccin zeg yinni iy ɣa iƹaqeb Siḏi Arebbi.

Ayṯ-Ufasus 4:14

Amenni war netɣimi ca ḏ iḥenjiren tawint-aneɣ ȓemwaj tarrant-aneɣ. Niɣ ḏ arriḥ itṣuḍ xaneɣ ikessi-yaneɣ ssa ḏ ssa s kuȓ arriḥ zaƹma n useȓmeḏ u s ṯeḥraymiṯ ḏ ixarwiḍen n iryazen ḏ min tciṭṭinen.

Ayṯ-Kulus 2:18

War tejjam uȓa ḏ ijjen n bnaḏem akenniw isbeṭṭeȓ x ljaʼiza. Netta bnaḏem nni ḏ wenni ig isemɣaren min iqesḥen ḏi ddin, isemɣar ƹaweḏ lƹibada nni iy zi ƹebbḏen lmalaʼikaṯ. Issawaȓ aṭṭas ṯa s ṯa x min iẓra zaƹma ḏi ca n lwaḥi nnes. Ȓƹaqeȓ nnes yuff imɣar s ttakebbur. War ḏinni bu Arruḥ iqeddsen, ḏinni lʼafkar nnes ixwan waha.

Yaƹqub 1:8

Itcekka, kuȓ ȓaƹqeȓ nnes min ḏas iqqar menbaƹd itḏewwax ḏeg ibriḏen nnes marra.

2 Buṭrus 2:18

Semɣaren ixef nsen s wawaȓen ixwan. S ȓeqbaḥeṯ nni n ccehweṯ n bnaḏem tḥeǧaqen-d yinni yallah ƹaḏ yarewwȓen zeg yiwḏan iy tƹicen ḏi lɣalaṭ.

2 Buṭrus 2:3

Ƹlaḥsab aƹeddis nsen aḏawem ccen ȓmux s wawaȓen iy tsayasen waha. Mecḥaȓ zeg wami lƹiqab nsen ƹaḏ itrajan-ṯen war iteṭṭeṣ ca.

2 Buṭrus 3:16

Itari manaya ḏi marra ṯibraṯin nnes issawaȓ x ṯmesȓayin-a. Ḏi ṯebraṯin nnes ḏinni ca n ṯmesȓayin qesḥent aṯent ṯfehmem. Ṯimesȓayin nni sƹewwajen-ṯent can yiwḏan iqefȓen war tejhiḏen ca ḏi lʼiman nsen, wa amenni ƹaweḏ iy teggen i Lkutub nneɣni. Sxeddamen manaya i ȓefna nsen.

1 Yuḥanna 2:16

Minzi marra min iǧan ḏi ddunect-a iƹni min ṯrezzu ṭṭabiƹa ṯaƹeffant n bnaḏem ḏ min rezzunt ṯiṭṭawin ḏ ttakebbur iy zi teftaxaren yiwḏan qa manaya war d yusi ca zi Arebbi, yusa-d zi ddunect-a.

Yahuḏa 1:11

Ya ȓefḍiḥeṯ nsen! Tebƹen abriḏ nni n Qabil. Semḥen ḏeg yixef nsen ḍemƹen ḏi tmenyaṯ gguren ḏi lɣaleṭ n Balƹam. Fnan ḏi lḥirak nni n Quraḥ wami iƹarreḍ i Musa.

Lwaḥi 12:9

Imenḍar-d zeg ujenna bu-sebƹa-ya izeǧifen ameqqran, iƹni fiɣer nni ḏi zman wenni umi qqaren Ibȓis niɣ ḏ Cciṭan iƹni wenni ixeddƹen marra ddunect. Imenḍar-d ɣar ṯmurṯ, menḍaren-d akiḏes ccayaṭin nnes.