2 Ayṯ-Kurinṯ 4:2 - Ṯarifiṯ 2020

² Neccin netbeƹƹaḏ x ṯmesȓayin n ȓefḍiḥeṯ ig itwaxeddmen s ṯnufra. War nesxeddim ca ṯaḥraymiṯ, war netḥerrif ca awaȓ n Arebbi. Neccin zzaṯ i Arebbi nseȓmaḏ lḥaqiqa bȓa ma at nesnuffar. Ammu ɣarsen marra iwḏan ḏi ḍḍamir nsen belli ḏayneɣ ttiqeṯ.

2 Ayṯ-Kurinṯ 4:2 ပူးပေါင်းရင်းမြစ်များ

Ayṯ-Ruma 1:16

Aqa nec war tseḏḥiɣ ca zi Lʼinjil liʼanna Lʼinjil ḏ jjheḏ nni ig isxeddam Arebbi bac aḏ isenjem marra wi ɣa yamnen: Ayṯ-Israʼil ḏ imezwura ṯumma yinni war iǧin ca zi Ayṯ-Israʼil.

Ayṯ-Ruma 6:21

Ḏi ȓweqṯ nni, ṯimesȓayin nni ma ḏaysent can nnfaƹ minzi ȓexxu tseḏḥam? Walu, liʼanna ṯimesȓayin nni tawint ɣar ȓmewṯ.

1 Ayṯ-Kurinṯ 4:5

X manaya war qqarem walu x ȓḥukem qbeȓ ȓweqṯ, iƹni qbeȓ iy d ɣa yas Siḏiṯneɣ. Ḏ netta iy ɣa isbeyynen ṯimesȓayin nni ɣar nnur ȓexxu nuffarent ḏi ṯaǧest, aḏ d ismeḍhar kuȓ lɣaraḍ n yiwḏan iy ɣarsen ḏeg wuȓawen nsen. Ȓexddenni kuȓ ijjen aɣares yiȓi usemɣar nnes zi Arebbi.

2 Ayṯ-Kurinṯ 1:12

Aqa neccin nteftaxar zi ḍḍamir nneɣ iƹni icehheḏ belli nuyur mliḥ ḏi ddunect-a xaṣṣatan akiḏwem s yijjen n nniyyeṯ ḏ wuȓ iṣfan zi Arebbi. War iǧi bu s yijjen n ȓefhameṯ n ddunect-a; Lla, s yijjen n arḍa n Arebbi.

2 Ayṯ-Kurinṯ 11:3

Walakin nec ggwḏeɣ mammec ḏas iwqeƹ i Ḥawwa icmeṯ-it ufiɣar s ṯeḥraymiṯ nnes uȓa ḏ kenniw ȓaƹquȓaṯ nwem aḏ ffɣen abriḏ, war ḏas tṭiƹim ca i Lmasiḥ s wuȓawen nwem bȓa nnifaq u bȓa ȓƹib.

2 Ayṯ-Kurinṯ 11:6

U nec waxxa war ssineɣ ca lxuṭba inu mliḥ, war ḏayi ṯenqiṣ ca ṯusna. Neccin ṯusna-ya nesbeyyen-awem-t-id nican s marra ṯimesȓayin.

2 Ayṯ-Kurinṯ 2:17

Aqa neccin maci am xarebbi n yiwḏan iteggen ttijara ḏeg wawaȓ n Arebbi, neccin ḏi Lmasiḥ nessawaȓ s wuȓ iṣfa zi Arebbi u zzaṯ i Arebbi.

2 Ayṯ-Kurinṯ 5:11

Falihaḏa wami nessen a neggweḏ zi Siḏiṯneɣ, nrezzu iwḏan aḏ qtanƹen. Y min neƹna neccin issen-iṯ Arebbi mliḥ, u tmenniɣ ƹaweḏ ḍḍamir nwem aḏ issen manayenni.

2 Ayṯ-Kurinṯ 6:8

Netqeddam-awem ixef nneɣ liʼanna iwḏan tweqqaren-aneɣ sbehdaȓen-aneɣ; qqaren ḏayneɣ ȓbaṭeȓ semɣaren-aneɣ; tarran-aneɣ ḏ iɣeccacen walakin neccin war ḏayneɣ bu ixarriqen;

2 Ayṯ-Kurinṯ 7:14

Wami zzaywem ftaxareɣ ɣar Titus war iǧi mayemmi ɣa seḏḥiɣ ȓexxu. Ȓaḥeqqac mammec nessiweȓ akiḏwem nican ḏi marra, uȓa ḏ lʼiftixar nneɣ xawem ɣar Titus qa iffeɣ-d nican.

Ayṯ-Ufasus 4:14

Amenni war netɣimi ca ḏ iḥenjiren tawint-aneɣ ȓemwaj tarrant-aneɣ. Niɣ ḏ arriḥ itṣuḍ xaneɣ ikessi-yaneɣ ssa ḏ ssa s kuȓ arriḥ zaƹma n useȓmeḏ u s ṯeḥraymiṯ ḏ ixarwiḍen n iryazen ḏ min tciṭṭinen.

Ayṯ-Ufasus 5:12

Yinni war itṭiƹin ca. Meȓa nessiweȓ xasen ijjen n wawaȓ waha x min teggen s ṯnufra ataf a nseḏḥa.