Yoohana 17:3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

³ Enenyet la chuꞌus atihi kaldaye rumanka Waakhe kigarti, toro la Yeesso Kiriistohi at sooergatte garti, wahaas a jiroti jirtuu imassan.

Yoohana 17:3 ပူးပေါင်းရင်းမြစ်များ

Marko 9:37

“Eti tuummane jeenteti us abattiteey iyahuu, nyaakhuta rurrucchul kichekoo martiisti, ani imartiista. Eti ani imartiisti la, ani menye eti isooergate martiista.”

Luuka 9:48

Wihi us icho iyidah, “Eti tuummane jeenteti us abattiteey iyahuu weela rucchul martiisti, ani imartiista. Eti tuummane ani imartiisti la eti isooergate martiista. A mehe eti goytiin ka weyti rucchul usu weyti ween.”

Yoohana 10:36

ki Aabbaheey soobahsate kiis kayeesse harrata isooerge la? A iꞌdoh ꞌdeerka chaꞌan, ‘Ani a Weeli Waakh,’ idah, a gafe ielattaan?

Yoohana 11:42

Saggi at kol dakkhan idaagto a garda, iꞌdaasenyi jeenteti ꞌdooꞌdane waha iadeehe, ꞌdee icho la saggi at ani isooergatte rummeestaan.”

Yoohana 14:26

Iꞌdaasenyi Rubeyti Munyeenye ꞌDooggargaarto layadeehe, Aabbaheey meesseey ka sooergo, walah tuummane atin abissa, toro la wihi tuummane an atin isoocheeke, atin kasooꞌhelissa.

Yoohana 17:18

Saggi goorat at ani ꞌdooꞌdi harrata isooergatte, iche an laka icho ꞌdooꞌdi harrata iergade.

Yoohana 17:21

Aabba, a iweesda, ꞌdee icho tuumman wohoo kalday yateehiin, saggi ati ichoow ani wohoo kalday inahe, toro la ani ichoow ati wohoo kalday inahuu. Aabba, a iweesda ꞌdee icho ichoow inno ba wohoo kalday nateehe ꞌdee ꞌdooꞌdi harrata saggi at ani isooeregte rummeesta.

Yoohana 17:23

Ani ichoow icho ba a wohoo kaldaye, ati ichoow ani ba la a wohoo kalday. Icho ba tuum wohoo kalday yateehiine, ꞌdee ꞌdooꞌdi harrata saggi at ani isooeregte abta, toro la enenyet waha abta, geeddi at iꞌdoonto, geeddaase icho laka ꞌdoonta.

Yoohana 17:25

“Aabbaheeyki fissan, chirri ꞌdooꞌdi harrata kigaran laka, an a kigarda, ꞌdooꞌda la saggi at ani isooeregte a garta.

Yoohana 17:8

Wori at isiisse iche anna icho siiche, icho la rummeesteen. Icho la saggi an rumanka ati ikaaimiy a gartaane, toro saggi at ani isooeregte laka a rummeestaan.

Yoohana 3:17

A mehe Waakh Weeliis weeli enenyete us hukkumo ma isooergin. Iꞌdaasenyi a sooerge, ꞌdee weeliis ka weeli enenyet tuumman uskeeliis kariba.

Yoohana 3:34

A mehe eti Waakh sooerge farniinki Waakhe kaayyeeda. Iꞌdi tahe Waakh etaas Rubeytiisti Munyee iche buuh ka rubeytiis goya gessa.

Yoohana 5:44

Atin goytiinna on ka koolo iskayowattaane, iꞌdaasenyi Waakkhi usu kalday on Waakh yahe, koolo ma kayowattaan. Saggoh ani irummeysattaan?”

Yoohana 6:57

Aabbaheeyki jiro lakeelo ani isooergate jiro a isiiche. Saggaas u la, eti tuummane sarteey yaham ani laka usú jiro a siicha.

Yoohana 7:29

Iꞌdaasenyi an usu a garda, iꞌdi tahe an usu kiimiyye, usu la isooergate.”

Yoohana 8:19

ꞌDeerka wihi icho Yeesso worsateen, “Aabbahaah meeke?” Yeesso wihi us ilaabe, “Atin ani ma igarattaane ommos Aabbaheey laka ma garattaan. Chirri kootte atin ani igarattaan, Aabbaheey laka a garattaan gon.”

1 Koriinto 15:34

Waha mujjum kamalda, uskeeliin la ꞌdiicha. Weyti lakhaanyo menya maanta chirri an saggi gaasiinkoo uliba Waakh ma aban eldi?

1 Koriinto 8:4

Maantaka ayta gololi iyookkoyyohi waakkhakh lakayeessi liisoorriyooche layaham ka, saggi iyookkoyyoha harrata ka Waakh ieheynan a garanna. Saggi Waakkhi rummaate jiro la koo kalday on iyahe a garanna.

2 Koriinto 4:6

Iꞌdi tahe Waakkhi, “Mugꞌdi goyaka banay a soobaheen,” yidah rubeytiissa banayhiis uurasseen goya kiifche, ꞌdee garanti inno ababnaanki Waakh garanni inno siicha. Ababnaankaas fool Kiriisto kasooababa.

Fiiliffi 3:10

Wihi an ꞌdoono kallaayo, a Kiriistohi an abdi, ichoow miigti usu omoot kasookahisse jiroteey miigoosso, toro la sinati usu lakawaariche usu leegismo toro iꞌdiis u amuut.

Fiiliffi 3:8

Wihi wahaas kuto, chaꞌan walah tuumman ichoow indigirti buurenye an Yeesso Kiriistohi Kamureeye an abdi isiyeyo, walah tuumman kola jeente Kiriistuu tuum khasaara iekkaacha. Icho uꞌdu iekkaacha ꞌdee Kiriisto ꞌhela,

1 'Dessaloonika 1:9

Iꞌdi tahe icho rubeycho saggi atin goorat nah imartisatteen ichoow saggi atin iyookkoyyohi beenaate Waakh lakayeessi atin orey wahatteen ikasoonokhatteene, ꞌdee atin Waakkhi jiro toro rummaat ikafassaan a cheekaan.

2 'Dessaloonika 1:8

Ulla eti tuummane Waakh igaranne toro la Wori Haaggane Yeessohi Kamureene miinsan daagin ꞌdiiꞌde, sirbi gessa.

Ibiraaniya 3:1

Maantaka ꞌdooꞌd Kiriistoki munyeenye Waakh goobiis iwahe, Yeessohi kakhuufnaanki inno Waakh kakhuufno inno cheekno ka, Waakh ergaano ichoow kuhaanihi weyti ween kayeele kamalda.

2 Beetero 1:2

Waakh ichoow Yeessohi Kamureene ba garanti atin icho garattaan ka tuum atin imaalaane tuum nebey atin kakaalaan.

2 Beetero 1:3

Miigti Waakh ka wihi tuummane jiro miinsane ꞌdee inno jiroti Waakh kahamaado jirro a inno siiche. Garanti inno Kiriisto garanni ka wahanyeyyohaas a khabna. Toro la weynaantiis ichoow haaggiiski weyti deefo ka a inno wahe.

2 Beetero 1:8

Chirri wahaas tuumman wihiin yahiine toro la kakhaymaan, Yeesso Kiriistohi Kamureenenye atin abattaan ka, ꞌdooꞌdi ollommeenye gurnaan idelin ma tateehiin.

1 Yoohana 1:2

Eta la a nah isoobahe, nah usu a agarre, runti usu miinsane cheekna. Toro la eta jiroti jirtuu imassan khabo, goorat Aabbahiis leejire nah isoobahe iche atin isoocheekna.

1 Yoohana 1:3

Wihi nah agarre toro nah daagne, iche atin isoocheekna, ꞌdee atin ichoow nah ba kulankoo kalday khabna. Toro la Waakkhi Aabbaheene ichoow Yeesso Kiriistohi Weeliise kulankoo kaldaye leekhabna.

1 Yoohana 2:23

Eti tuummane Weeli Waakh ꞌdiiꞌdo, Aabbaheen ma khabo. Eti saggi Yeesso Weeli Waakh iyahe cheeko tuumman la, Aabbaheen laka a khaba.

1 Yoohana 4:6

Inno a ki Waakhe eti tuummane Waákh garti la wihi inno ꞌdooꞌd abinno a raaha. Iꞌdaasenyi eti Waakh ikiimaatan ma inno daago. Saggane eti Rubeyti Waakh khabo ichoow ki rubeyti beenaate Seytaan khabo seley ibihinna.

1 Yoohana 5:20

Wihi inno garanni Weeli Waakh a yimiyye, miigti inno wahanyeyyohi Waakh kaabanni inno siiche, ꞌdee saggi Waakh rum iyahe abanna. Toolla la inno ichoow Waakkhi rummaat a wohoo kaldaye, inno ichoow Yeesso Kiriistohi Weeliise laka a wohoo kalday. Us a Waakkhi rummaate, toro a jiroti jirtuu imassan.