Kolossaay 1:6 - Wori Haaggane Yeesso Kiriisto Miinsan Ayyinti Husube Waakh Enenyet Igooche

⁶ Wora Haaggan a atin iyimiyye, ꞌdooꞌdi ittaawenye harra tuumman laka a kataaꞌha toro gurnaan dela. Waha la a wihi goytiin ka laka yitah, uus maanti kolooraat atin Wora rummaat daagteene, toro haaggi Waakhe buure runtiis tuum abatteen.

Kolossaay 1:6 ပူးပေါင်းရင်းမြစ်များ

Mattaayo 24:14

Wora Haaggane dakhi Waakh miinsan la harra tuumman ka a lacheeka, garti ꞌdooꞌdi harra tuumman yateehe, ꞌdee ꞌdeerka ibeenki yomboot yateeh.

Mattaayo 28:19

Maantaka nyaama ꞌdooꞌdi harra tuumman abattiteey kayeela. Magah Aabba ka ichoow ki Weel ka ichoow ki Rubeyti Munyee ka baattissiya.

Marko 16:15

Wihi us icho iyidah, “Nyaama harra tuumman taba, Wori Haaggan la ꞌdooꞌdi Waakh soouume tuumman icheeka.

Marko 4:8

Gaasoo la inti harrati haaggan khabto kadiheene, mujjum baheene, weynaateene, gurnaan deleen. Gaasoo kol tomon seyyah deleene, gaasoo kol tomon lih deleene, gaasoo laka kol kudoo deleen.”

Yoohana 15:16

Atin ani ma isoobahsan, iꞌdaasenyi ani atin soobahsade, toro hiloo atin korche, ꞌdee gurnaan bihissaan, gurnaanki fiddiyo bihissaan. ꞌDeerka jeenteti atin keey itahiin u, Aabbaheey wihi tuummane atin daahtaan, a atin siicha.

Yoohana 17:19

Jeentetichuu la, an a ismunyaacha, ꞌdee icho laka, rumanka lamunyaacha.

Yoohana 4:23

Ibeen a yamiite toro la kola a yitah. Ibeenki Rubeyti Waakh ꞌdooꞌd woyto, ꞌdee ꞌdooꞌd Waakh saggi rumanka us iyahe iwahti. Aabbaheey la ꞌdooꞌdi usú saggaas iwahti iche yowta.

Hilassi Ergaano 11:18

Chirri icho waha daageen ka wihi Beetero yeele ꞌdiiꞌdin katabeene Waakh saaꞌdeen. Wihi icho yidaaheen, “Kola ꞌdeerka Waakh yaafohi Yaꞌhuud ieheynan laka uskeel a kasoolaabe, ꞌdee jiro ꞌhelaan.”

Hilassi Ergaano 12:24

Iꞌdaasenyi Yeedi Waakh orey on isohte, ꞌdooꞌdi ittaawe la Yeesso rummeeste.

Hilassi Ergaano 16:14

Deyyehoti nah dagansatte goyaka too a makhaabassoo Liidiya layadeehe, ilkerengeetti weene ꞌDiyaaꞌdira katimiyye darfohoo mummuggeyyee ororisso. Iche la Waakhe wahatta, Kamur la uuriche fure, ꞌdee wihi Baawulo essi iyoꞌhatta.

Hilassi Ergaano 26:18

Icho kiergada ꞌdee walah abissa indo furnamaane, mugꞌdi kasoolaabta banayhi Waakh goya keenta, miigti Seytaan kasoolaabta Waakh iurgiyissa. Iꞌda ka uskeelicho a liikakuta, toro icho laka kakhuufnaanki icho ikakhuufaan ka ꞌdooꞌdi Waakh soobahsate goyaka meessi icho muꞌdane ꞌhelaan.’ ”

Rooma 1:13

ꞌDooꞌd Kiriistokaaw, saggi an kolassi ittaawe anihi atin sooꞌdaaro iꞌdoone, iꞌdaasenyi ichoowka uliba wohoo on ijeychaan abda. Anihi goytiin ka hil haaggicho gurnaanki Rubeyti Munyee argo iche ꞌdoona, saggi maanta an ꞌdooꞌdi addane yaafohi Yaꞌhuud ieheynan goyaka hil ihaaggiche ichoowka gurnaan isoobahuu.

Rooma 15:19

Ulla miigti Rubeyti Munyee ka wahanyeyyohi miigti Waakh tuso ichoow wihi weeli enenyet yeelin iubaaꞌdan ba yeele, icho Waakh iwoye. Iꞌdaas ka la ani Wori Haaggane Kiriisto miinsan tuume cheeke. Ilkerengeetti weene Yeerusaleeme kasookhabde ichoowka ili Iliriiko eleeliche.

Rooma 15:28

Chaꞌan ꞌdee hila massiche, saggi chilimmeti ꞌdooꞌd soobaayiche tuumman ꞌdooꞌd liigise arge la, ili Isbaaniya miinsada, ꞌdee maantaas la a atin leeamiit.

Rooma 16:26

Iꞌdaasenyi runta dagsan toolla weyti lasoobabbakkaahiche. Runtaas la Chiirnaanneti Waakhe ꞌdooꞌdi Waákh íyeyyeedo ka a lacheeke. Waha la saggi Waakkhi jirtuu tuumman jiro iꞌdoono inno isoocheeke, iche liiyeele. Amuri us inno ibahche la a mehe ya, nyaama runtaas yaafohi harra tuumman abcha, ꞌdee Kiriisto a kakhuufeene, toro la a raaheen.

2 Koriinto 10:14

Nah geeddi Waakh nah ichiire ꞌdirihiche ma kunno. A mehe nah ꞌdooꞌdi orey Wori Haaggane Kiriisto miinsan atin sooeleeliche eheet.

2 Koriinto 6:1

Nah a ꞌdooꞌdi Waakh hil leehaaggicho gone, a atin hawwaassanne, taba haaggi Waakhe buure wihi ilmarhaatteet iikhaatina.

Efeesso 3:2

Saggi dakhi haaggi Waakhe buurenye atin iroon ani liisiiche a daagteen gon.

Efeesso 4:21

Wihi an tissibo, maanti atin woriis daagteen, wihi atin laabche ichoow yeedi rummaate Yeesso miinsan a israahaan.

Efeesso 4:23

Toro la a atin laabche, rubeyohiin ichoow malassiin husubnaassaan.

Efeesso 5:9

A mehe banayha gurnaanki us delo a haag tuumman ichoow wihi fissan tuumman ichoow wihi rummaat tuumman.

Fiiliffi 1:11

Iꞌda ka Yeesso Kiriisto ka gurnaanki fiffissane jirotiin goya buuhicha. Waha la Waakh weynaan ichoow koolo ikeenaan.

Fiiliffi 4:17

An siinti chilimme mee atin kayowdi, wihi buurenye Waakh berri atin ikakhayo yowda.

Kolossaay 1:10

Waakhe atin iwahna, ꞌdee jiroti Kamur inkaanyitto toro kahamaadisso jirtaan. Iꞌda ka sagag tuumman ka enenyet haag a iyeessaane, abannaanki atin Waakh abattaan la a kakhayma.

Kolossaay 1:23

Iꞌdaasenyi, taba wori rummaat kakhuufa, iꞌdi wihi isesseehin u jurkhicha. Khajjeeli Wori Waakhe Haaggan akaguurina. Wora atin daagteen a ki ꞌdooꞌdi harra tuumman liicheeke. Anna a Baawulo, a falfati Wora Haaggan cheekto.

1 'Dessaloonika 1:5

Iꞌdi tahe maanti nah Wori Haaggan atin icheekne, woraas yeedi afoot kalday menye, miigti Rubeyti Munyee laka us a atin tuse. Wori Haaggane nah atin icheekne tuume rummeysanne. Toro la saggi fiddihi nah goytiin fiddiine iroonotiin ieheneet a garattaan.

1 'Dessaloonika 2:13

Maanti atin Yeedi Waakhe atin nah kadaagteen khaatatteen, atin saggi yeedi weeli enenyet menye, saggi us rumanka Yeedi Waakh iyahe on ikhaatatteen. Yeeda atin rummeysatteen la a atin urgiyicha. Jeentetuu laka kol dakkhan Waakh kalaꞌd a ilaabna.

2 'Dessaloonika 2:13

ꞌDooꞌd Kiriistokaaw, Kamur weyti atin ꞌdoona. Nah jeenteti Waakh orey on atin isoobahsate toro la atin iribuu, Waakkhi nah kalaꞌd ilaabno a imasse. A mehe Waakh hili Rubeyti Munyee munya inno kayeesso ichoow runti Waakhe inno rummeysanni ka a atin riba.

1 Beetero 5:12

Eti ullaka koo Kiriisteenye Silfaano layadeehe, an eti weyti lakakhuufo iekkaacho, iche khadaaba ileegargaare. Wihi an gaabi ka atin ikasoochiire la uure atin miigoocha, toro a saggi wihi khadaaba kachiiran haaggi Waakhe buure rum iyahe. Haagga akanokhanna giꞌde.