Ibiraaniya 5:9 - Wori Haaggane Yeesso Kiriisto Miinsan Ayyinti Husube Waakh Enenyet Igooche

⁹ Inkoo tuum lakayeele ka, eti jirtuu tuumman ꞌdooꞌdi usú raaho ribo yitah.

Ibiraaniya 5:9 ပူးပေါင်းရင်းမြစ်များ

Mattaayo 17:5

Yeyyeedaayi, mirisoo dakhane torrogoot icho ankube, hooyoo la miris goyaka sooyeede, “Waha a Weeleeyki an weyti ꞌdoono, an weyti kahamaado. Usu nabah isuda!” yidah.

Luuka 13:32

Yeesso wihi us ilaabe, “Nyaama ꞌdowwohotaas wihi atin itadeehiin, ‘Ani maalinka ichoow saahta ba ꞌdooꞌd ginnayyo kabahcha, ꞌdooꞌd samaacha, ibeenki seyyahnaatteet ka la hili goorat an iimiy massicha.’

Yoohana 19:30

Chirri us farsota surrukhe ka Yeesso wihi us yidah, “Walah tuumman a massateen.” Wahaas ka matah soolugꞌde, rubey gooche.

Hilassi Ergaano 3:15

Atin ki jiro kasoouummanto a tigaaseene, iꞌdaasenyi Waakh omoot a kasookahche. Nah la gartaas a laabna.

Hilassi Ergaano 4:12

Ribnaanki enenyet et addane lakaꞌhelo mele. A mehe magahoo addane Waakh harra tuumman ka inno karibo ma jiro.”

Hilassi Ergaano 5:32

Nah ichoow Rubeyti Munyeenye Waakh eti yeediis raaho tuumman siicho a garti waha tuumman.”

Rooma 1:5

Kiriisto ka ichoow iroonoti magahiis u, haaggi Waakhe buure ichoow hila khummane ergaano layahe a ꞌhelle. ꞌDee ꞌdooꞌdoo yaafohi Yaꞌhuud ieheynan tuumman kakhuufnaanki icho Waakh kakhuufaane yeediis raahaan iwahna.

Rooma 10:16

Iꞌdaasenyi ꞌdooꞌd tuumman mee Wori Haaggan raahe. Iꞌdi Isaaya rubeytiis chiiruu, “Kamur, ayyo woreenyo rummeeste?”

Rooma 15:18

Wihi Kiriisto ikahaagsate on menye, walah addane an kaayyeedo mele. Iꞌda ka yeedeey ichoow jiroteey ka ꞌdooꞌdi yaafohi Yaꞌhuud ieheynan a woya ayti Waakh raahaan.

Rooma 2:8

Iꞌdaasenyi eti tuummane wihi awtiis kalday on yowti, toro la wihi rummaat ꞌdiiꞌdo, khollookh on raaho, Waakh a kabolkha, hol tusta.

Rooma 6:17

Waakh weyti kalaꞌd ilaabno giꞌde! Chirri atin goorat bowꞌdayyohi uskeel eheneet laka, toolla uurassiin ka runti Waakhe dahantiin lasoogesse tuum a raahteen.

2 Koriinto 10:5

Wihi inno jejjebinno a iriirti yeedi beenaat liiriiro ichoow rannyaatti noole abanti Waakh laabti jeyisso. Nah toro mal tuummane khabanna ꞌdee iholinna Kiriisto raahaan.

Fiiliffi 2:12

Aalasseeyki an weyti ꞌdoono, atin waansiheey kol tuumman a raahteen. Geeddi an atin leejire kalday on menye, toolla an atin ileejirin weyti raahtaan. Maantaka, hamar ichoow roorroti atin Waakh karoortaan ka, orey isohda ribnaanki Waakh atin ribo jirotiin goyaka hol kadowa.

2 'Dessaloonika 1:8

Ulla eti tuummane Waakh igaranne toro la Wori Haaggane Yeessohi Kamureene miinsan daagin ꞌdiiꞌde, sirbi gessa.

2 'Dessaloonika 2:16

Yeesso Kiriistohi Kamureene rubeytiis ichoow Waakkhi Aabbaheenenye inno ꞌdoone, haaggiiski buurenye inno imunneynan ka armaanjireen tuumman uur inno miigooche toro la khajjeeli haaggan inno siiche ba,

2 Timooti 2:10

Maantaka jeenteti ꞌdooꞌdi Waakh soobahsatuu an walah tuumman a igarrahsada, ꞌdee icho laka ribnaan ichoow weynaanti jirtuu imassanne Yeesso Kiriisto lakaꞌhelo ꞌhelaan.

Ibiraaniya 1:14

Herti Waakh a meheey? Icho a rubeyohi Waakh ergati, ꞌdooꞌdi ribnaanki Waakh muꞌdan ihilo menya?

Ibiraaniya 11:40

Iꞌdi tahe Waakh mali inno iroone gooche. Iꞌdaas ka la laanteen Waakh ortiis ka ꞌdooꞌdi el laa ma yateehiin.

Ibiraaniya 11:8

Aburaaham la kakhuufnaanki us Waakh kakhuufe on ka, iche maanti Waakh iloo berri alaal ka siicho irte. Ulla chirri us ili us isohti igaran laka, ayti Waakh a raahe iliis kaguure.

Ibiraaniya 12:2

Taba, kol tuumman Yeesso a kamalanni giꞌde. Usú orey inno woye, Waakh kakhuufne, toro uliba laka inno woya, Waakh tuum kakhuufna. Ulla jeenteti hamaadi sugo u, lakhaanyoti eti massalaaba lakakaaho taham a igarrahsate. Ulla toolla goobi Waakh ka komborti Waakhe antoot ankicheki miigeete fiddiya.

Ibiraaniya 2:10

Waakhe walah tuumman soouume, toro la jeentetiissa walah tuumman liihaaggiche. Waakh a eysiiche maanti us Yeesso massalaaba ka sinayyohi lakawaariche ka eti tuume kayeele, ꞌdee nyaakhuti ittaawe goobi Waakh keena. A mehe Yeesso enenyet jiti ribnaan lakeelo tusa.

Ibiraaniya 2:3

Saggoh sina ikabahsanneey, chirri inno ribnaanki weyti haaggane Waakh inno ribo aw ikakhabin? Yeessohi Kamure rubeytiissa kolooraat ribnaanka cheeke, ꞌdooꞌdi usu daage la, saggi ribnaankaas rum iyahe inno isoocheeke.

Ibiraaniya 9:12

Yeesso Kiriisto la koloo kalday on Meessi Weyti Lagan ikute. Ulla maanti us meessaas gele, diiggi waharoot ommos diiggi maaroot ma khaatine, Waakh ma ibihin. Iꞌdaasenyi us diiggiissa bahche, jirtuu tuumman inno ribe.

Ibiraaniya 9:15

Jeentetuu Kiriisto ayyinti husube Waakh gooche ka dahgele yitah. Omoottiis ka enenyet uskeeli maanti us ayyinti oraat raahe gele a kasoogate kasoofure. Eti tuummane Waakh wahe, ayyinti armaanjireene usu muꞌdane Waakh igooche ꞌhela.

Ibiraaniya 9:28

Saggaas on u Kiriisto laka koloo on lasoorriyooche, ꞌdee uskeeli ꞌdooꞌdi buure bahcha. Ulla maanti lammaatteete us soonokhti, uskeeli us toro bahcho ma iyamiite, iꞌdaasenyi ꞌdooꞌdi usu weyti sugo iche yamiite, ribnaan ikeena.

1 Beetero 1:22

Toolla runti atin raahtaan ka a isdikhteene ꞌdee ꞌdooꞌdi Kiriisto rummeeste ꞌdooninti rummaat ikhabtaan gone, taba giꞌde uurassiin ka weyti isꞌdoona.

1 Yoohana 5:20

Wihi inno garanni Weeli Waakh a yimiyye, miigti inno wahanyeyyohi Waakh kaabanni inno siiche, ꞌdee saggi Waakh rum iyahe abanna. Toolla la inno ichoow Waakkhi rummaat a wohoo kaldaye, inno ichoow Yeesso Kiriistohi Weeliise laka a wohoo kalday. Us a Waakkhi rummaate, toro a jiroti jirtuu imassan.

Yuuda 1:21

Geeddi atin jiroti jirtuu imassanne Yeesso Kiriistohi Kamureene uurnugleeliis ka atin siicho sugtaan, ꞌdooninti Waakh atin ikhabo kafiddiya.