YAKOBUS 4:11 - JANJAI BLAU Lem Bahaso Jang Bebilai

¹¹ Saudaro-saudaro jibeakba saling mino atau saling semaleak. Tun de mino atau semaleak saudarone de samo-samo Kristen, si mino ngen semaleak hukum Allah. Ngen amen udi semaleak hukum Allah, do'o taine udi coa temotoa hukum-hukum o, meluyen jijai hakimne.

YAKOBUS 4:11 ပူးပေါင်းရင်းမြစ်များ

LUKAS 6:37

“Jibeakba makim tun luyen, supayo udi suang kulo jibeak Allah makim. Jibeakba mukum tun luyen, supayo udi suang kulo jibeak Allah mukum. Napunba tun luyen, supayo Allah kulo mapun udi.

ROMA 2:1

Kerno o, Saudaro-saudaro, api bae udi, de mukum tun luyen, ko suang coa bebas kunei saleak. Sebab, lem mukum tun luyen, ko mukum dirainu suang, kerno ko de mukum tun luyen, menea hal-hal de serai.

ROMA 2:13

Kerno iso tun de temi'uk hukum agamo Yahudi de benea neak adep Allah, tapi tun de kemerjo hukum agamo Yahudiba de bakea benea.

ROMA 7:7

Amen awei o, jano de lok ite nadeak? Jano hukum agamo Yahudi o duso? Paset bae coa! Sebelekne, justru kerno hukum agamo Yahudi uku bi kemnal duso. Kerno uku kulo coa namen jano do'o kelok, amen hukum agamo Yahudi coa madeak, “Jibeak lok!”

1 KORINTUS 4:5

Kerno o, jibeakba mukum ayok waktaune, mbotba sapei Tuhan teko be. Allahba de bakea mukok kute resio-resio de coa keten lem kegelapan. Allahba de bakea mukok kute niat de tependam lem atei manusio. Pado waktau o baruba tiep tun temimo kunei Allah de patas tenimone.

2 KORINTUS 12:20

Uku khawatir bahwo pado waktau uku mulau udi be, uku kemliak udi coa awei jano de uku lok, ngen udi kulo bakea kemliak uku coa awei de udi lok. Jibeak sapei be ade de tekea, iri atei, panes atei, mementingkan dirai suang, fitneak, majung, ombong ngen kemacau.

EFESUS 4:31

Nuangba kute perasaan gis atei, garang mengiak, gu'ok ngen fitneak, awei o kulo kute kejahatan.

1 TIMOTIUS 3:11

Ngenyan-ngenyan tobo'o lokba tun terhormat, harusba kulo tun baik, iso tun de galok fitneak. Tobo'o harus temaen dirai ngen jujur lem kute hal.

2 TIMOTIUS 3:3

Tobo'o coa mengasihi sesamo, coa galok melei apun, tobo'o galok kemidek gen tun luyen, galok makei kekerasan, tobo'o kejam, coa as ngen de baik.

TITUS 2:3

Awei o kulo lokba ko nasehat selawei-selawei de tu'ai supayo plep tobo'o sesuoi ngen jano de patut bagiak tun de idup kusus bagiak Allah. Tobo'o coa buliak fitneak tun luyen, coa buliak bogoa mabuk. Tobo'o harus majea hal-hal de baik,

YAKOBUS 1:16

Jibeakba udi keno pike, Saudaro-saudaroku de tecito!

YAKOBUS 1:19

Kemliakba dio bebaik, Saudaro-saudaro de tecito! Tiep tun harus gacang utuk temi'uk, tapi cendok utuk miling ngen mengiak.

YAKOBUS 1:25

Hukum Allah sempurno ngen temuan kekuataan utuk mbebas manusio. Tun de semlidik ngen kemliak bebaik serto kemerjo hukum-hukum o, iso temi'uk bae lajau coa mingetne, tun o bakea diberkati Allah lem kute hal de neane.

YAKOBUS 2:8

Udi menea de benea, amen udi kemerjo hukum Kerajaan de ade neak lem ayat Kiteb Sucai yo, “Citoba sesamonu awei ko cito dirainu su'ang.”

YAKOBUS 5:10

Saudaro-saudaro, ingetba paro nebai de miling das gen Tuhan. Tobo'o sabar madep saro. Jijai, mokba tobo'o sebagai contoh.

YAKOBUS 5:7

Kerno'o, sabarba Saudaro-saudaroku, sapei Tuhan teko. Kemliakba awei ipe sabarne suang petani mbot taneakne melei asea de bego. Ngen sabar si mbot ujen musim gugua ngen ujen musim bungai.

YAKOBUS 5:9

Jibeakba gerunyam ngen saling nyaleak, supayo udi coa hukum Allah. Inget! Hakim bi pa'ok, siap utuk teko.

1 PETRUS 2:1

Kerno o, nuangba kunei dirainu kute de jahat; jibeak igai mike, jibeak pura-pura. Jibeak iri atei, jibeak mino tun luyen.