2 KORINTUS 11:3 - JANJAI BLAU Lem Bahaso Jang Bebilai

³ Tapi uku saben, amen pekeran udi sensat kunei kesetiaan udi de sejati ngen Kristus, serai awei Hawa tergoda ngen kelicikan dung.

2 KORINTUS 11:3 ပူးပေါင်းရင်းမြစ်များ

MATIUS 24:24

Sebab bakea timboa tun-tun de senlamat de palsu ngen nebai-nebai palsu. Tobo'o bakea made plep-plep de luea biaso ngen mujizat-mujizat utuk mike amen mukin umat Allah kulo.

YOHANES 8:44

Udi berasal kunei baknu, adeba Iblis, ngen udi lok menea kenlok baknu. Si adeba tukang munuak manusio kunei ke'an yo ngen coa idup lem de kebenea, kerno neak lemne coa ade kebenea. Amen si miling coa benea, si miling kunei diraine suang. Sebab si adeba tukang ngike ngen bak tukang ngike.

ROMA 12:8

Amen karunio utuk melei nasehat, baikba ite melei nasehat. Api de magiak sesuaktau, lokba si meneane ngen atei ikhlas. Api de melei pipinan, lokba si meneane ngen rajin. Api de melei ngen baik atei, lokba si meneane ngen atei riang.

2 KORINTUS 1:12

Keme bangga, sebab atei nurani keme melei saksai ngen keme bahwo idup keme neak dunio yo, khususne lem hubungan keme ngen udi, kenuaso ketulusan ngen kemurnian kunei Allah iso kunei dunio, tapi ngen kekuatan anugerah Allah.

2 KORINTUS 11:20

kerno udi sabar, amen tun mbudok udi, amen tun meras udi, amen tun kemuaso udi, amen tun ombong te'adep udi, amen tun tempok udi.

2 KORINTUS 11:29

Amen ade de lemah uku kulo meding lemah. Amen ade de us moi lem duso, ateiku milau duko.

2 KORINTUS 2:17

Keme coa awei dau tun de mesoa utung kunei bito Allah awei barang dagangan bae. Tujuan-tujuan keme adeba benea, sebab keme nelei tugas ngen Allah. Ngen Allah suang kemliak bahwo keme semapei bito o sebagai hamba-hamba Kristus.

2 KORINTUS 4:2

Keme coa makei ca'o-ca'o de menea selek. Keme coa lok kerjo ngen ca'o licik atau menea coa benea kecek Allah. Keme melayan Allah ngen atei baik temurut kelok-Ne. Sebab o, keme minoi kute tun kemliak keme ngen baik neak lem ateine.

GALATIA 1:6

Uku sele tetang Saudaro-saudaro! Udi nok Allah kerno rahmat Kristus, ngen temotoa Bito Baik de luyen,

GALATIA 2:4

Memang ade tun-tun de makso hal o. Tobo'o adeba tun-tun de makso masuk moi lem golongan ite ngen nyamar sebagoi pasuak. Tobo'o masuk seca'o dediem utuk semlidik kebebasan de ade ngen ite kerno ite jijai do ngen Kristus Yesus, supayo ngen ca'o o tobo'o dapet menea ite jijai hambane.

GALATIA 3:1

Saudaro-saudaro tun-tun Galatia! Udi kebiak bodong! Api de sudo menghasut udi? Iso Yesus Kristus de senalib o bi uku jemlas ngen sejelas-jelasne ngen udi?

GALATIA 4:11

Uku khawatir, jibeak sapei jerih payeakku utuk udi sio-sio bae.

EFESUS 4:14

Mako ite coa jijai anok-anok de terombang-ambing ngen coa tau arahne ngen memecem ajaran kunei tun-tun licik. Tobo'o menea tun seset ngen tipu muslihat tobo'o.

EFESUS 4:22

Sebab o tenanggeaba manusio an ngen pola idup an de gidong nusak ngen kelok-kelokne de seset.

EFESUS 6:24

Angerah Allah semerto kute tun, de mengasihi Tuhante Yesus Kristus ngen kasih de coa benaso. Hormat keme, Paulus

KOLOSE 2:18

Jibeakba udi munyau dirainu rugai ngen tun de aweine merendeak dirai ngen sembeak malaikat-malaikat. Tun o ombong ngen pekeran-pekeranne de duniawi ngen mengagung-agungkan pengeliak-pengeliakne de khusus,

KOLOSE 2:4

Uku melei namen dio supayo udi jibeak keno pike ngen api bae kulo de ketenne baik ngen ko.

KOLOSE 2:8

Lokba udi teatei, jibeak sapei ade de mbujuk udi ngen falsafah-falsafah manusio de coa beguno, cuma menea udi jijai sesat. Falsafah-falsafah o iso kunei Kristus, tapi kunei pendapet manusio bae ngen kunei roh-roh penguaso dunio.

1 TESALONIKA 3:5

Do'oba sebabne uku mutus Timotius, kerno uku lok nien namen awei ipe imennu lem hal pecayo ngen Kristus. Uku khawatir Iblis berasea menggoda udi sehinggo kute jerih payeak keme coa sio-sio.

1 TIMOTIUS 1:3

Uku lok supayo ko tep tinggea neak Efesus awei de sudo uku demsok ko pado waktau ko lalau moi Makedonia. Sebab, neak Efesus ade kekedau tun de sembea ajaran de coa benea, ko harus mdan tobo'o.

1 TIMOTIUS 2:14

Isone Adam de tergoda, tapi Hawaba de tergoda ngen jijai beduso.

2 TIMOTIUS 3:13

dong tun jahat ngen tukang mike bakea tambeak jahat. Tobo'o mike tun luyen padahal tobo'o suang kulo keno pike.

TITUS 1:10

Sebab dau tun de galok berutak, terutamo tun-tun de nanone agamo Yahudi; tobo'o mike tun luyen.

IBRANI 13:9

Jibeakba munyau kute mecem ajaran de seseleh semset udi. Atei ite harus kenuet ngen kebaikan atei Allah, do'oba de baik; jibeak ngen peraturan-peraturan tetang kembuk. Tun-tun de bel'o taat ngen peraturan-peraturan o coa dapet utungne.

2 PETRUS 3:17

Tapi udi, saudaro-saudaro de tecito, bi namen tetang hal o. Sebab o, teateiba, jibeak sapei udi tekembin moi lem kesesatan tun-tun jahat sehinggo udi us kunei penan pelatnu de kuet.

2 PETRUS 3:3

Pertamo-tamo, udi harus namen bahwo pado bilai-bilai terakhir, bakea timboa tun-tun de idupne kenuaso hawo nafsu tobo'o su'ang. Tobo'o bakea mino udi

1 YOHANES 2:18

Anok-anokku, kiamat bi pa'ok! Sudo nelei namen ngen udi ayokne bahwo musuak Kristus bakea teko; ngen uyo bi teko dau tun de musuak ngen Kristus. Do'o tandone bahwo kiamat bi pa'ok.

1 YOHANES 4:1

Saudaro-saudaro de tecito! Jibeakba pecayo ngen kute tun de makau temuan Roh Allah, tapi ntesba kileak tobo'o utuk namen jano roh de ade ngen tobo'o asalne kunei Allah atau iso. Sebab dau nebai palsu bi teko moi kute dunio.

YUDAS 1:4

Sebab seca'o coa sadar ade tun-tun de seca'o de diem bi masuk moi tengeak-tengeak ite. Tobo'o tun-tun bejat de semaleak bito tetang rahmat Allah ite, utuk dapet kesepatan utuk melampiaskan hawa nafsu tobo'o. Ngen tobo'o coa lok temimo Yesus Kristus, do-done Penguaso ngen Tuhan ite. Sejak bel'o ukuman utuk tobo'o sudo tentau lem Kiteb Sucai

WAHYU 12:15

Mako nagai o kemluea kunei bibiane dau nien bioa moi selawei o, kunyau si monot.

WAHYU 12:9

Nagai lai o nuang moi luea! Siba dung tuai o de genne Iblis atau Roh Kidek, de mike kute dunio. Si nuang moi bumai ngen kute malaikatne.

WAHYU 20:2

Lajau si temakep nagai o, dung tuai o, – adeba Iblis atau roh kidek o, – ngen si meketne utuk seribau taun anne.